1. Ano nga paghukom an hirani na mahitabo?

 NAGKIKINABUHI kita ha panahon nga may daku nga mga pagbag-o nga mahitatabo! Diri na maiha, huhukman ni Jesus an tagsa nga tawo. Iginhulagway ni Jesus an mahitatabo antes hiya maghukom. Gintagan niya an iya mga disipulo hin matagnaon nga “tigaman” han iya diri nakikita nga presensya ngan “han ikatarapos han sistema han mga butang.” (Mat. 24:3) Ini nga tagna nakarekord ha Mateo kapitulo 24 ngan 25 ngan ha Marcos kapitulo 13 ngan Lucas kapitulo 21.

2. Ano an aton hihisgotan hini nga artikulo, ngan kay ano nga mabulig ini ha aton?

² Nagtagana hi Jesus hin mapulsanon nga mga pahamangno pinaagi han tulo nga parabola. Ini nga mga parabola mahitungod ha mga karnero ngan ha mga kanding, ha maaramon ngan ha diri maaramon nga mga birhen, ngan ha mga talanton. An tagsa nga parabola mabulig ha aton nga masabtan kon kay ano nga an panggawi han usa nga tawo makakaapekto ha kon paonan-o hiya huhukman. Samtang aton ginrirepaso ini nga mga parabola, hibaroan ta an mga leksyon ngan kon paonan-o naton ito maiaaplikar. An siyahan nga parabola nga aton hihisgotan amo an mahitungod ha mga karnero ngan ha mga kanding.

AN MGA KARNERO NGAN AN MGA KANDING

3. San-o huhukman ni Jesus an mga tawo?

³ Ha parabola mahitungod ha mga karnero ngan ha mga kanding, iginhulagway ni Jesus an paghukom ha mga tawo nga may oportunidad nga mamati han maopay nga sumat ngan sumuporta ha iya dinihogan nga kabugtoan. (Mat. 25:​31-46) Ha “daku nga kasakitan,” maghuhukom hiya kon hin-o an mga karnero o mga kanding antes gud la magtikang an Armagedon. (Mat. 24:21) Sugad la nga iginlalain han paraataman an mga karnero tikang ha mga kanding, ilalain ni Jesus adton maunungon nga  nasuporta ha iya dinihogan nga mga sumurunod tikang ha diri nasuporta.

4. Sumala ha Isaias 11:​3, 4, kay ano nga makakasiguro kita nga huhukman ni Jesus an mga tawo hin patas? (Kitaa liwat an piktyur.)

⁴ Iginpapakita ha tagna han Biblia nga sugad nga pinili nga Hukom ni Jehova, magigin matadong hi Jesus ha iya paghukom. (Basaha an Isaias 11:​3, 4.) Gin-oobserbaran niya an panggawi, disposisyon, ngan panyakan han katawohan—upod na kon paonan-o nira gintatratar an iya dinihogan nga kabugtoan. (Mat. 12:​36, 37; 25:40) Mahibabaro hi Jesus kon hin-o an sinuporta ha iya dinihogan nga kabugtoan ngan ha ira buruhaton. a An usa han pinakaimportante nga mga paagi nga mahihimo han usa nga sugad-karnero amo an pagsuporta ha kabugtoan han Kristo pinaagi ha pagbulig ha ira ha pagsangyaw nga buruhaton. Adton nasuporta huhukman sugad nga “magtadong” ngan magkakaada paglaom nga “kinabuhi nga waray kataposan” ha tuna. (Mat. 25:46; Pah. 7:​16, 17) Makaruruyag gud ito nga balos para hadton magtitipig han ira integridad! Pinaagi ha pagpabilin nga matinumanon ha panahon han daku nga kasakitan ngan ha masunod pa, gintitipigan nira an ira mga ngaran “ha libro han kinabuhi.”​—Pah. 20:15.

5. Ano an leksyon han parabola mahitungod ha mga karnero ngan ha mga kanding, ngan hin-o an dapat magin interesado hito?

⁵ Pamatud-i nga matinumanon ka ngan maunungon. An parabola ni Jesus mahitungod ha mga karnero ngan ha mga kanding siyahan nga naaplikar hadton may tunan-on nga paglaom. Iginpapakita nira an ira pagtoo diri la pinaagi ha pagsuporta ha kabugtoan han Kristo ha pagsangyaw nga buruhaton kondi pinaagi liwat ha maunungon nga pagsunod han pagpanguna han gutiay nga grupo nga dinihogan nga kabugtoan nga ginpili ni Jesus. (Mat. 24:45) Pero adton may langitnon nga paglaom kinahanglan liwat mamati han nagpapahamangno nga mensahe han parabola. Kay ano? Kay ginkikita ni Jesus an ira panggawi, disposisyon, ngan panyakan. Kinahanglan liwat nira pamatud-an nga matinumanon hira. Ngani, nag-unabi hi Jesus hin duha pa nga parabola nga may espisipiko nga mga pahamangno para ha mga dinihogan. Mababasa liwat naton ini nga mga parabola ha Mateo kapitulo 25. Sunod, hisgotan naton an parabola mahitungod ha maaramon ngan ha diri maaramon nga mga birhen.

AN MAARAMON NGAN AN DIRI MAARAMON NGA MGA BIRHEN

6. Paonan-o ginpamatud-an han lima han mga birhen nga maaramon hira? (Mateo 25:​6-10)

⁶ Ha parabola mahitungod ha mga birhen, nag-unabi hi Jesus hin napulo nga birhen nga ginawas basi tapoon an karaslon nga lalaki. (Mat. 25:​1-4) Ginlalaoman nira ngatanan nga uupdan nira an karaslon nga lalaki ha iya panagtawo ha kasal. Iginhulagway ni Jesus an lima ha ira sugad nga “maaramon” ngan an lima pa sugad nga “diri maaramon.” An maaramon nga mga birhen andam ngan alerto. Andam hira maghulat ha karaslon nga lalaki tubtob nga kinahanglan bisan kon gab-i na gud hiya umabot. Salit nagdara hira hin mga lampara basi may panlawag hira ha kasisidman. Nagdara pa ngani hira hin reserba nga lana engkaso maatrasado an karaslon nga lalaki. Salit andam hira nga tipigan nga naglalaga an ira mga lampara. (Basaha an Mateo 25:​6-10.) Han inabot an karaslon nga lalaki, an maaramon nga mga birhen sinulod kaupod niya ngadto ha panagtawo ha kasal. Ha pariho nga paagi, an dinihogan nga mga Kristiano nga napamatud-an nga andam pinaagi ha pagpabilin nga alerto ngan matinumanon tubtob ha pag-abot han Kristo huhukman nga angayan  nga umupod ha karaslon nga lalaki, hi Jesus, ha iya Ginhadian ha langit. b (Pah. 7:​1-3) Kumusta naman an lima nga diri maaramon nga birhen?

7. Ano an nahitabo ha lima nga diri maaramon nga birhen, ngan kay ano?

⁷ Diri pariho ha maaramon nga mga birhen, an lima nga diri maaramon diri andam han inabot an karaslon nga lalaki. An ira mga lampara hirani na maparong, ngan waray hira magdara hin reserba nga lana. Han nahibaroan nira nga hirani na umabot an karaslon nga lalaki, kinahanglan pa hira pumalit hin lana. Waray pa hira makabalik han inabot an karaslon nga lalaki. Hito nga takna, “an mga birhen nga andam sinulod kaupod niya ngadto ha panagtawo ha kasal, ngan ginsadhan an purtahan.” (Mat. 25:10) Ha urhi, han an diri maaramon nga mga birhen binalik ngan karuyag sumulod, ginsidngan hira han karaslon nga lalaki: “Diri ako nakilala ha iyo.” (Mat. 25:​11, 12) Ito nga mga birhen diri andam nga maghulat ha karaslon nga lalaki tubtob nga kinahanglan. Ano an leksyon hito para ha mga dinihogan?

8-9. Ano nga leksyon an mahibabaroan han mga dinihogan ha parabola mahitungod ha mga birhen? (Kitaa liwat an piktyur.)

⁸ Pamatud-i nga andam ka ngan alerto. Hi Jesus diri nagtatagna nga magkakaada duha nga klase han mga dinihogan—an usa nga andam ha paghulat tubtob ha kataposan hini nga sistema han mga butang ngan an usa nga diri andam. Lugod, iginsasaysay niya kon ano an mahitatabo ha mga dinihogan kon diri hira andam nga magpailob nga matinumanon tubtob ha kataposan. Kon diri hira andam, diri nira makakarawat an ira balos. (Juan 14:​3, 4) Seryoso gud ito! Ha langit man o ha tuna an aton paglaom, kita ngatanan dapat mamati gud ha pahamangno ha parabola mahitungod ha mga birhen. An kada tagsa ha aton dapat padayon nga magin mabinantayon, ngan andam ha pagpailob tubtob ha kataposan.​—Mat. 24:13.

⁹ Katapos unabihon an parabola mahitungod ha mga birhen basi pabug-atan nga kinahanglan magin andam ngan alerto, gin-unabi ni Jesus  an parabola mahitungod ha mga talanton. Ginpapabug-atan hito nga parabola nga kinahanglan magin maduruto.

AN MGA TALANTON

10. Paonan-o ginpamatud-an han duha nga uripon nga matinumanon hira? (Mateo 25:​19-23)

¹⁰ Ha parabola mahitungod ha mga talanton nag-unabi hi Jesus hin duha nga uripon nga matinumanon ha ira agaron ngan usa nga diri matinumanon. (Mat. 25:​14-18) Ginpamatud-an han duha nga uripon nga matinumanon hira pinaagi ha pagin maduruto nga patuboon an kwarta han ira agaron. Antes magbiyahe ha iba nga nasud, gintaporan niya hira hin mga talanton—kwarta nga daku an kantidad. Maduruto an duha nga matinumanon nga uripon ngan gin-gamit nira hin maaramon an kwarta. Ano an resulta? Han binalik an ira agaron, tinubo hin duha ka pilo an kwarta nga iginhatag ha ira. Ginkumendasyonan hira han agaron—‘nalipay hira upod han ira agaron.’ (Basaha an Mateo 25:​19-23.) Pero kumusta man an ikatulo nga uripon? Ano an iya ginhimo ha kwarta nga iginhatag ha iya han iya agaron?

11. Ano an nahitabo ha “hubya” nga uripon, ngan kay ano?

¹¹ An ikatulo nga uripon nakakarawat hin usa nga talanton pero “hubya” hiya. Naglaom an iya agaron nga gagamiton niya hin maaramon an talanton. Lugod, iginlubong niya ito ha tuna. Han binalik an agaron, iginbalik la ha iya han uripon an usa nga talanton. Diri maopay an disposisyon hito nga uripon. Imbes nga mangaro hin pasaylo nga waray niya mapatubo an kwarta han agaron, diri tama nga gintawag han uripon nga ‘istrikto nga tawo’ an agaron. Waray makarawat hini nga uripon an pag-uyon han iya agaron. Labot pa hito, ginkuha ha iya an talanton ngan ginpaiwas hiya ha balay han agaron.​—Mat. 25:​24, 26-30.

12. Hin-o an ginrirepresentaran yana han duha nga matinumanon nga uripon?

¹² An duha nga matinumanon nga uripon nagrirepresentar ha matinumanon nga dinihogan nga mga Kristiano. Gin-iimbitar hira han Agaron, hi Jesus, nga ‘malipay upod han ira agaron.’ Makakarawat nira an balos ha ira ha langit, an siyahan nga pagkabanhaw. (Mat. 25:​21, 23; Pah. 20:5b) Ha luyo nga bahin, an maraot  nga ehemplo han hubya nga uripon naghahatag hin pahamangno ha mga dinihogan. Paonan-o?

13-14. Ano nga leksyon an mahibabaroan han mga dinihogan ha parabola mahitungod ha mga talanton? (Kitaa liwat an piktyur.)

¹³ Pamatud-i nga maduruto ka. Ha parabola mahitungod ha mga talanton, sugad man ha parabola mahitungod ha mga birhen, hi Jesus diri nagtatagna nga an mga dinihogan magigin hubya. Lugod, iginsasaysay niya kon ano an mahitatabo kon mawara nira an ira kadasig. Diri hira ‘tatawagon ngan pipilion,’ ngan diri hira papasudlon ha Ginhadian ha langit.​—2 Ped. 1:10.

¹⁴ Nagin klaro pinaagi han mga parabola ni Jesus mahitungod ha mga birhen ngan ha mga talanton nga an ngatanan nga dinihogan nga Kristiano dapat magin andam ngan alerto sugad man magin maduruto. Pero may ginyakan pa ba hi Jesus nga nagpapahamangno ha mga dinihogan? Oo, may-ada! An mga pulong ni Jesus nga mababasa ha Mateo 24:​40, 41 konektado liwat ha ultimo nga paghukom ha mga dinihogan.

HIN-O AN “KUKUHAON”?

15-16. Paonan-o ginpapabug-atan han Mateo 24:​40, 41 nga kinahanglan magin mabinantayon an mga dinihogan?

¹⁵ Antes unabihon an tulo nga parabola, iginhulagway ni Jesus an ultimo nga paghukom ha mga dinihogan nga magpapakita kon hin-o an inuyonan. Nag-istorya hiya mahitungod ha duha nga lalaki nga nagtatrabaho ha uma ngan ha duha nga babaye nga naggigiling ha de-mano nga gilingan. Ha tagsa nga kahimtang, ito nga duha baga hin pariho an ginbubuhat, pero nagsiring hi Jesus nga an usa “kukuhaon ngan an usa babayaan.” (Basaha an Mateo 24:​40, 41.) Katapos, gin-aghat niya an iya mga sumurunod: “Salit padayon nga magbantay, kay diri kamo maaram kon ano nga adlaw maabot an iyo Ginoo.” (Mat. 24:42) May ginyakan hi Jesus nga puropariho katapos unabihon an parabola mahitungod ha mga birhen. (Mat. 25:13) Konektado ba ini nga iya mga ginsiring? Posible. An totoo la ngan matinumanon nga dinihogan an “kukuhaon,” ngan an kakarawaton ni Jesus ha Ginhadian ha langit.​—Juan 14:3.

¹⁶ Pamatud-i nga mabinantayon ka. An bisan hin-o nga mga dinihogan nga diri nagpapabilin nga alerto ha espirituwal diri titirukon kaupod han “mga pinili.” (Mat. 24:31) Ngan an ngatanan nga may paglaom nga mabuhi ha waray kataposan ha tuna, dapat liwat magpabilin nga mabinantayon ngan matinumanon.

17. Kay ano nga diri dapat kita mabaraka kon may ginpipili hi Jehova nga magigin mga dinihogan ha aton panahon?

¹⁷ Nakilala naton hin maopay hi Jehova, salit nasarig kita nga tama an bisan ano nga iya ginhihimo. Diri kita nababaraka kon nagpipili hi Jehova basi dihogan an pipira nga matinumanon ha aton panahon. c Aton hinumdoman an ginsiring ni Jesus ha iya ilustrasyon mahitungod ha mga trabahador nga inabot ha urubasan ha ika-11 ka oras. (Mat. 20:​1-16) Adton gin-imbitar nga magtrabaho ha urubasan ha kulop kinarawat hin suhol pariho hadton nagtrabaho hin mas temprano. Sugad man, bisan san-o pilion an mga dinihogan, makakarawat nira an balos ha ira ha langit kon magpabilin hira nga matinumanon.

PAMATI HA MGA PAHAMANGNO

18-19. Ano nga mga leksyon ngan mga pahamangno an aton ginhisgotan?

¹⁸ Ano an aton ginhisgotan? Para hadton may paglaom nga mabuhi hin waray kataposan ha tuna, ginpapabug-atan han parabola mahitungod ha mga karnero ngan ha mga kanding nga kinahanglan magpabilin nga matinumanon ngan maunungon kan Jehova—yana ngan ha  panahon han tiarabot nga daku nga kasakitan. Hito nga tiarabot nga panahon, huhukman ni Jesus an mga matinumanon nga angay kumarawat hin “kinabuhi nga waray kataposan.”​—Mat. 25:46.

¹⁹ Ginrepaso liwat naton an duha nga parabola nga naghahatag hin mga pahamangno ha mga dinihogan. Ha parabola ni Jesus mahitungod ha maaramon ngan ha diri maaramon nga mga birhen, lima ha ira an napamatud-an nga maaramon. Andam ngan alerto hira ha paghulat ha karaslon nga lalaki tubtob nga kinahanglan. Pero an diri maaramon nga mga birhen, diri andam. Salit waray hira pasudla han karaslon nga lalaki ha iya panagtawo ha kasal. Dapat liwat kita magin andam ha paghulat anoman ito kaiha tubtob nga tapuson na ni Jesus ini nga sistema han mga butang. Ha parabola liwat ni Jesus mahitungod ha mga talanton ginhisgotan naton an duha nga matinumanon nga uripon nga maduruto. Nagin maduruto hira para ha ira agaron ngan nakarawat nira an iya pag-uyon. Pero iginsalikway an hubya nga uripon. Ano an leksyon? Dapat kita magpabilin nga busy ha pag-alagad kan Jehova tubtob ha kataposan. Ngan ha ultimo, ginhisgotan naton kon paonan-o an mga dinihogan dapat magpabilin nga mabinantayon basi ‘kuhaon’ hira ni Jesus ngadto ha langit sugad nga balos ha ira. Eksayted gud ito nga mga dinihogan nga ‘tirukon’ hira ni Jesus ngadto ha langit. Katapos han girra han Armagedon, hira an magigin maarasawa ni Jesus ha kasal han Kordero.​—2 Tes. 2:1; Pah. 19:9.

20. Ano an bubuhaton ni Jehova hadton namamati ha iya mga pahamangno?

²⁰ Bisan kon an paghukom madagmit nga nagtitikahirani, waray kita rason nga mahadlok. Kon magpabilin kita nga matinumanon, an aton mahigugmaon nga langitnon nga Amay maghahatag ha aton hin “diri ordinaryo nga gahum” basi kita “maglampos . . . ha pagtindog ha atubangan han Anak han tawo.” (2 Cor. 4:7; Luc. 21:36) Ha langit man o ha tuna an aton paglaom, mapapalipay naton an aton Amay kon mamamati kita ha mga pahamangno nga makikita ha mga parabola ni Jesus. Pinaagi han diri matupngan nga pagkabuotan ni Jehova an aton mga ngaran makikita nga “nakasurat ha libro” han kinabuhi.​—Dan. 12:1; Pah. 3:5.