1-2. (a) Ano an sitwasyon ha Judea han hi apostol Pablo nagsurat ha mga Hebreo? (b) Kay ano nga napapanahon gud ini nga giniyahan nga surat?

 AN Hebreo nga mga Kristiano nga naukoy ha Jerusalem ngan Judea nakaeksperyensya hin damu nga kakurian mga tuig katapos mamatay hi Jesus. Waray pag-iha katapos maporma an Kristiano nga kongregasyon, inatubang ito hin duro nga pagtimaraot. (Buh. 8:1) Ngan paglabay hin mga 20 ka tuig, an mga sumurunod han Kristo inatubang hin grabe nga kakurian ha ekonomiya, posible nga tungod han gutom nga nahitabo na hito nga lugar. (Buh. 11:​27-30) Pero han mga 61 C.E., an mga Kristiano may-ada temporaryo nga kamurayawan kon ikompara ha tiarabot. Hito nga panahon, nakakarawat hira hin giniyahan nga surat tikang kan apostol Pablo—usa nga surat nga napapanahon gud.

² Napapanahon an surat para ha mga Hebreo kay an kamurayawan nga naieksperyensyahan han mga Kristiano temporaryo la. Hi Pablo naghatag hin praktikal nga sagdon nga mabulig hito nga mga Kristiano basi mailob an kasakitan nga hirani na nira atubangon. An kabungkagan han Judio nga sistema han mga butang nga igintagna ni Jesus nagtitikahirani na. (Luc. 21:20) Syempre, hi Pablo o an mga Kristiano ha Judea diri maaram kon san-o gud mahitatabo an kabungkagan. Bisan pa hito, puydi gamiton hito nga mga Kristiano an nabibilin nga panahon basi iandam an ira kalugaringon pinaagi ha pagparig-on han mga kalidad sugad han pagtoo ngan pagpailob.​—Heb. 10:25; 12:​1, 2.

3. Kay ano nga dapat magin interesado an mga Kristiano yana ha surat para ha mga Hebreo?

³ Maatubang kita hin kasakitan nga mas makuri gud kay han naeksperyensyahan han Hebreo nga mga Kristiano. (Mat. 24:21; Pah. 16:​14, 16) Salit hisgotan naton an pipira nga praktikal nga  sagdon nga iginhatag ni Jehova hito nga mga Kristiano nga puydi liwat kita magpahimulos.

“MAG-USWAG HA PAGKAHAMTONG”

4. Ano nga mga problema an gin-atubang han Judio nga mga Kristiano? (Kitaa liwat an piktyur.)

⁴ An Judio nga nagin mga Kristiano inatubang hin daku nga problema. May panahon, an mga Judio nagin pinili nga katawohan ni Jehova. An Jerusalem an sentro han pagmando han Ginhadian han Dios dinhi ha tuna, ngan an templo didto amo an sentro han putli nga pagsingba. An ngatanan nga matinumanon nga Judio nagsunod han Mosaiko nga Balaud sugad han igintutdo han ira mga lider han relihiyon. Ito nga mga katutdoan nakaimpluwensya ha ira kon ano an ira kakaunon, ha ira panhunahuna ha pagturi, ngan bisan ha ira pagtratar ha mga Hentil. Pero katapos mamatay hi Jesus, waray na karawata ni Jehova an mga iginhahalad ha templo. Tungod hito, nakurian an Judio nga mga Kristiano nga nahiara ha pagsunod ha Balaud. (Heb. 10:​1, 4, 10) Bisan an hamtong nga mga Kristiano, sugad kan apostol Pedro, nakurian ha pagpahiuyon ha pipira hini nga mga pagbag-o. (Buh. 10:​9-14; Gal. 2:​11-14) Tungod han ira bag-o nga gintotoohan, ito nga mga Kristiano gintimaraot han mga Judio nga lider han relihiyon.

5. Ha ano kinahanglan magin mabinantayon an mga Kristiano?

⁵ An Hebreo nga mga Kristiano ginkontra han duha nga grupo. Pananglitan, may Judio nga mga lider han relihiyon an nagtratar ha ira sugad nga mga apostata. Dugang pa, an pipira nga nag-aangkon nga mga Kristiano nagpipirit nga padayon nga sundon han mga sumurunod han Kristo an pipira nga surundon han Mosaiko nga Balaud, posible basi malikyan an pagtimaraot. (Gal. 6:12) Ano an mabulig ha matinumanon nga mga Kristiano nga magpabilin ha kamatuoran?

6. Ano an igindasig ni Pablo nga buhaton han iya mga igkasi-tumuroo? (Hebreo 5:14–6:1)

⁶ Ha surat ni Pablo para ha mga Hebreo, gin-aghat niya an iya mga igkasi-tumuroo nga usisahon hin mas maopay an Pulong han Dios. (Basaha an Hebreo 5:14–6:1.) Gamit an Hebreo  nga Kasuratan, iginsaysay ni Pablo ha iya kabugtoan kon kay ano nga labaw an paagi han pagsingba han Kristiano kay ha Judaismo. a Maaram hi Pablo nga an dugang nga kahibaro ngan an mas hilarom nga pagsabot ha kamatuoran mabulig hito nga mga Kristiano nga makilala ngan isalikway an buwa nga mga pangatadongan basi diri hira maisimang.

7. Ano nga mga problema an aton gin-aatubang yana?

⁷ Pariho ha Hebreo nga mga Kristiano, naatubang kita hin mga tawo nga nagpapasarang hin impormasyon ngan mga pangatadongan nga nakontra ha matadong nga mga suruklan ni Jehova. Agsob nga gin-aatake kita han mga parakontra kay nasunod kita ha mga suruklan han moralidad nga iginbasar ha Biblia, nga nasiring hira nga mga brutal kita ngan panatiko. An mga panhunahuna ngan opinyon han kalibotan mas hirayo na gud ha perpekto nga panhunahuna han Dios mahitungod hini. (Prob. 17:15) Salit kinahanglan naton parig-unon an aton abilidad ha pagkilala ngan pagsalikway ha mga ideya nga ginagamit han mga parakontra basi paluyahon kita o isimang pa ngani.​—Heb. 13:9.

8. Ano an makakabulig ha aton nga magin hamtong ha espirituwal?

⁸ Ginsidngan ni Pablo an mga Hebreo nga padayon nga mag-uswag sugad nga Kristiano ngan ito liwat an dapat naton buhaton. Nagpapasabot ito ha pagkuha hin hilarom nga kahibaro han kamatuoran ngan pagpahiuyon ha paagi han panhunahuna ni Jehova. Ini nga proseso nagpapadayon bisan katapos han dedikasyon ngan bawtismo. Anoman kita kaiha na ha kamatuoran, kita ngatanan kinahanglan regular nga magbasa ngan mag-aram ha Pulong han Dios. (Sal. 1:2) An maopay nga rutina ha personal nga pag-aram mabulig ha aton nga maparig-on an usa nga kalidad nga ginpabug-atan ni Pablo ha iya surat para ha mga Hebreo: pagtoo.​—Heb. 11:​1, 6.

‘MAGKAADA PAGTOO PARA MATIPIGAN AN ATON KINABUHI’

9. Kay ano nga importante an marig-on nga pagtoo para ha Hebreo nga mga Kristiano?

⁹ An Hebreo nga mga Kristiano magkikinahanglan hin marig-on nga pagtoo basi makatalwas ha tiarabot nga kasakitan ha Judea. (Heb. 10:​37-39) Ginpahamangnoan ni Jesus an iya mga sumurunod nga kon makita nira an Jerusalem nga ginpalibotan na han nagkakampo nga mga kasundalohan, kinahanglan nira pumalagiw ha kabukiran. An iya sagdon aplikado ha ngatanan nga Kristiano, naukoy man hira hito nga syudad o ha gawas hito nga syudad. (Luc. 21:​20-24) Hadto kon gintatarhog an mga tawo han nasulong nga mga kasundalohan kasagaran na nga napakadto hira ha pinader nga syudad sugad han Jerusalem basi maproteksyonan. An pagpalagiw ngadto ha kabukiran baga hin diri maopay nga ideya ngan nagkikinahanglan hin daku nga pagtoo.

10. An marig-on nga pagtoo mag-aaghat ha mga Kristiano nga buhaton an ano? (Hebreo 13:17)

¹⁰ An Hebreo nga mga Kristiano kinahanglan liwat tumapod hadton mga ginagamit ni Jesus ha paggiya ha kongregasyon. An mga nangunguna, posible naghatag hin espisipiko nga mga instruksyon basi buligan an ngatanan ha kongregasyon nga sundon an giya ni Jesus ha tama nga panahon ngan ha organisado nga paagi. (Basaha an Hebreo 13:17.) An Hebreo nga pulong nga gin-gamit ha Hebreo 13:17 para ha “magin masinugtanon” nangangahulogan nga an usa nakombinse nga sumunod kay natapod hiya hito nga tawo nga naghahatag hin giya. Labaw pa hito an iginpapasabot kay ha basta la pagsunod ha iya tungod kay awtorisado hiya  ha paghatag hin giya. Salit kinahanglan parig-unon han Hebreo nga mga Kristiano an ira pagtapod ha mga nangunguna antes umabot an kasakitan. Kon ha murayaw nga panahon an mga Kristiano masinugtanon ha mga instruksyon han mga nangunguna, magigin mas masayon para ha ira nga buhaton ito ha makuri nga mga panahon.

11. Kay ano nga importante gud yana nga an mga Kristiano magkaada marig-on nga pagtoo?

¹¹ Yana, kinahanglan naton hin pagtoo pariho ha Hebreo nga mga Kristiano nga nakakarawat han surat ni Pablo. Nabubuhi kita ha panahon diin an kadam-an nga tawo nagsasalikway ngan nagtatamay pa ngani han pahamangno han Biblia mahitungod han kataposan hini nga sistema han mga butang. (2 Ped. 3:​3, 4) Dugang pa, bisan kon an Biblia nagsusumat hin damu nga detalye mahitungod ha mahitatabo ha daku nga kasakitan, damu pa nga butang an diri kita maaram. Dapat kita magkaada pagtoo nga an kataposan hini nga sistema maabot ha tama nga panahon ngan kombinsido kita nga aatamanon kita ni Jehova hito nga panahon.​—Hab. 2:3.

12. Ano an mabulig ha aton basi makatalwas ha daku nga kasakitan?

¹² Dapat liwat parig-unon naton an aton pagtoo nga ginagamit ni Jehova yana “an matinumanon ngan maaramon nga uripon” ha paggiya ha aton. (Mat. 24:45) Kon magtikang na an daku nga kasakitan, posible kita makakarawat hin espisipiko nga mga instruksyon nga nagtatalwas hin kinabuhi, sugad han posible nga nakarawat han Hebreo nga mga Kristiano han inabot an mga Romano. Yana na an panahon nga parig-unon naton an aton pagtapod ngan pagsarig ha direksyon nga aton nakakarawat tikang ha mga nangunguna ha organisasyon ni Jehova. Kon diri kita natapod o nasugot ha ira paggiya yana, magigin makuri ha aton an pagsunod ha instruksyon nga makakarawat naton ha daku nga kasakitan.

13. Kay ano nga importante an sagdon nga mababasa ha Hebreo 13:5?

¹³ Samtang ginhuhulat han Hebreo nga mga Kristiano an sinyales ha pagpalagiw, kinahanglan liwat nira tipigan nga simple an ira kinabuhi, nga naglilikay ha “paghigugma ha kwarta.” (Basaha an Hebreo 13:5.) An iba ha ira nag-agi han mga panahon han kagutom ngan kapobrehan. (Heb. 10:​32-34) Bisan kon andam hira hadto ha pag-antos han kakurian tungod han maopay nga sumat, an iba bangin naghunahuna nga an bahandi usa nga proteksyon para ha ira. Pero an kwarta diri makakaprotektar ha ira ha pag-abot han kabungkagan. (San. 5:3) Ngani, an bisan hin-o nga nahigugma ha materyal nga mga butang posible gud nga nakurian ha pagpalagiw, nga bayaan an ira mga urukyan ngan mga panag-iya.

14. Paonan-o an marig-on nga pagtoo nakakaapekto ha aton mga desisyon yana mahitungod ha materyal nga mga butang?

¹⁴ Kon marig-on an aton pagtoo nga hirani na bungkagon ni Jehova ini nga maraot nga kalibotan, maaaghat kita nga isalikway an materyalismo. Ha panahon han daku nga kasakitan, an mga tawo ‘maglalabog han ira silber ha mga kalye’ kay mahuhunahuna nira nga an “ira silber ngan an ira bulawan diri makakatalwas ha ira ha adlaw han kapungot ni Jehova.” (Ezek. 7:19) Imbes nga magpokus kita ha pagpinaniguro ha pagtirok hin damu nga kwarta dapat kita maghimo hin mga desisyon nga mabulig ha aton nga magkinabuhi hin simple pero balanse. Nag-uupod ito han pag-ato ha presyur han diri ginkikinahanglan nga pangutang o mabug-atan tungod ha pag-ataman ha damu nga materyal. Dapat liwat kita maghirot nga diri magin duro kaimportante ha aton an aton mga panag-iya. (Mat. 6:​19, 24) An aton pagtoo posible liwat matestingan pinaagi han materyal nga mga  butang ngan iba pa nga butang samtang ginhuhulat naton an kataposan hini nga sistema.

“KINAHANGLAN NIYO AN PAGPAILOB”

15. Kay ano nga an Hebreo nga mga Kristiano nagkikinahanglan gud hin pagpailob?

¹⁵ An Hebreo nga mga Kristiano kinahanglan magpailob ha ira pag-alagad kan Jehova kay nagtitikaraot an kahimtang ha Judea. (Heb. 10:36) Bisan kon an iba nga Hebreo nga mga Kristiano inatubang hin duro nga pagtimaraot, damu an nagin mga Kristiano ha panahon nga medyo murayaw. Salit hi Pablo nagpahinumdom ha ira nga magin andam ha mas makuri nga pagtimaraot, ngan magin matinumanon tubtob ha kamatayon, pariho kan Jesus. (Heb. 12:4) Pero tungod ha pagtikadamu han mga Kristiano, an Judio nga mga parakontra mas nasina ngan nagin bayolente. Mga tuig antes hito, usa nga bayolente nga grupo an umatake kan Pablo han nagsasangyaw hiya ha Jerusalem. Sobra 40 nga Judio an “nanumpa nga maghihikaraot hira kon kumaon hira o uminom nga diri pa nira napapatay hi Pablo.” (Buh. 22:22; 23:​12-14) Bisan kon may mga nasisina ha ira ngan nagtitimaraot, an mga Kristiano kinahanglan padayon nga magkatirok para ha pagsingba, magsangyaw han maopay nga sumat, ngan padayon nga parig-unon an ira pagtoo.

16. Paonan-o makakabulig ha aton an surat para ha mga Hebreo nga magkaada kita tama nga panhunahuna mahitungod ha pagtimaraot? (Hebreo 12:7)

¹⁶ Ano an mabulig ha Hebreo nga mga Kristiano nga mailob nira an pagkontra? Maaram hi Pablo nga kinahanglan nira an tama nga panhunahuna han ira mga kakurian. Ginsaysay niya nga posible nga tugotan han Dios nga matestingan an pagtoo han mga Kristiano sugad nga bahin han pag-train ha ira. (Basaha an Hebreo 12:7.) An sugad nga training makakabulig ha usa nga makultibar ngan mapauswag an importante nga mga kalidad han Kristiano. Pinaagi ha pagpokus ha mag-opay nga resulta han mga kakurian, magigin mas masayon para ha Hebreo nga mga Kristiano nga magin mapailubon.​—Heb. 12:11.

17. Ano an nahibaroan ni Pablo mahitungod ha pag-ilob ha pagtimaraot?

 ¹⁷ Gin-aghat ni Pablo an Hebreo nga mga Kristiano nga magin mas determinado nga ilubon an mga kakurian. Usa hiya nga makakahatag hin maopay nga sagdon mahitungod han pag-ilob ha pagtimaraot. Sugad nga paratimaraot hadto ha mga Kristiano, maaram hiya kon ano karaot hira gintratar. Maaram liwat hiya kon paonan-o maiilob an pagtimaraot. Ngani, naeksperyensyahan niya an iba-iba nga klase han pagkontra han nagin Kristiano hiya. (2 Cor. 11:​23-25) Salit hi Pablo makakagyakan nga may kombiksyon kon ano an ginkikinahanglan basi makailob. Ginpahinumdoman niya ito nga mga Kristiano nga kon nag-iilob hin mga problema kinahanglan diri hira sumarig ha ira kalugaringon kondi kan Jehova. Ito an nakahatag kan Pablo hin kaisog salit nakasiring hiya: “Hi Jehova an akon parabulig; diri ako mahahadlok.”​—Heb. 13:6.

18. Kay ano nga an paghibaro han tiarabot nakakabulig ha aton nga mailob an pagtimaraot?

¹⁸ An iba han aton kabugtoan nagpapailob yana mismo han pagtimaraot. Mahimo kita magin maunungon ha pagsuporta ha ira pinaagi han aton mga pag-ampo ngan usahay ha praktikal nga mga paagi. (Heb. 10:33) Pero an Biblia klaro nga nasiring, “pagtitimarauton liwat an ngatanan nga naghihingyap magkinabuhi nga may debosyon ha Dios sugad nga mga disipulo ni Kristo Jesus.” (2 Tim. 3:12) Salit kita ngatanan kinahanglan mag-andam han mahitatabo. Padayon kita nga sumarig hin bug-os kan Jehova, nga natapod nga bubuligan kita niya nga makailob ha bisan ano nga kakurian nga bangin naton atubangon. Maabot an panahon, tatagan niya hin kapahuwayan an ngatanan nga iya matinumanon nga magsiringba.​—2 Tes. 1:​7, 8.

19. Ano an puydi naton buhaton basi magin andam ha daku nga kasakitan? (Kitaa liwat an piktyur.)

¹⁹ Sigurado nga an surat ni Pablo ha mga Hebreo nakabulig ha mga Kristiano ha siyahan nga siglo nga magin andam ha kasakitan nga ira aatubangon. Gin-aghat ni Pablo an iya kabugtoan nga magkaada mas hilarom nga kahibaro ngan pagsabot ha Kasuratan. An pagbuhat hito mabulig ha ira nga makilala ngan isalikway an mga katutdoan nga magpapaluya han ira pagtoo. Gindasig niya hira nga parig-unon an ira pagtoo basi magin madagmit hira ha pagsunod ha giya ni Jesus ngan hadton nangunguna ha kongregasyon. Ngan ginbuligan niya an mga Kristiano nga magin mapailubon pinaagi ha pagkaada tama nga panhunahuna han mga kakurian ngan hunahunaon ito nga mga kakurian sugad nga oportunidad nga ma-train han ira mahigugmaon nga Amay. Hinaot iaplikar liwat naton ini nga giniyahan nga sagdon. Tungod hito makakapailob kita nga matinumanon tubtob ha kataposan.​—Heb. 3:14.