1. Ano an karuyag buhaton han ngatanan nga surugoon han Dios, ngan kay ano? (Kitaa an retrato ha kobre.)

GINSUGO ni Jesu-Kristo an iya mga sumurunod nga ‘kumadto ha mga tawo han ngatanan nga nasud ngan tutdoan hira basi magin iya mga disipulo.’ (Mat. 28:19) Karuyag han ngatanan nga matinumanon nga surugoon han Dios nga mahibaroan kon paonan-o nira ‘bug-os nga matutuman’ ini nga ministeryo nga iginsugo ha ira. (2 Tim. 4:5) Kay ngani, mas importante ini, mas mapulsanon, ngan mas apurado kay ha bisan ano nga buruhaton. Pero, mahimo magin makuri an paggahin hin daku nga panahon ha ministeryo sugad han karuyag naton buhaton.

2. Ano nga mga problema an aton gin-aatubang samtang gintutuman naton an aton ministeryo?

² May iba pa nga importante nga buruhaton nga nagkikinahanglan han aton panahon ngan kusog. Bangin kinahanglan naton magtrabaho hin damu ka oras kada adlaw basi magkaada kita han aton mga panginahanglan ngan han aton pamilya. Bangin nakukurian kita tungod han aton responsabilidad ha pamilya, o tungod han sakit, depresyon, o mga problema han pagtikalagas. Paonan-o naton bug-os nga matutuman an aton ministeryo samtang gin-aatubang naton ini nga mga problema?

3. Ano an iginpapakita han ginsiring ni Jesus ha Mateo 13:23?

³ Kon nalilimitahan an aton panahon ha pag-alagad kan Jehova tungod han aton kahimtang, diri kita sadang manluya. Maaram hi Jesus nga kita ngatanan diri makakapamunga hin parapriho nga kadamu han bunga han Ginhadian. (Basaha an Mateo 13:23.) Ginpapabilhan gud ni Jehova an ngatanan naton nga ginbubuhat ha pag-alagad ha iya basta ginbubuhat naton an aton gimaopayi. (Heb. 6:10-12) Ha luyo nga bahin, bangin abaton naton nga igintutugot han aton kahimtang nga makabuhat hin dugang pa.  Hini nga artikulo, uusisahon naton kon paonan-o naton uunahon ha aton kinabuhi an ministeryo, titipigan nga simple an aton kinabuhi, ngan papauswagon an aton abilidad ha pagsangyaw ngan pagtutdo. Pero, hisgotan anay naton kon ano an iginpapasabot han bug-os nga pagtuman han aton ministeryo.

4. Ano an iginpapasabot han bug-os nga pagtuman han aton ministeryo?

⁴ Basi bug-os nga matuman an aton ministeryo, kinahanglan makigbahin kita ha pagsangyaw ngan pagtutdo nga buruhaton tubtob ha aton mahihimo. Pero diri la panahon an nahiuupod hito. An aton motibo importante kan Jehova. Tungod kay hinigugma naton hi Jehova ngan an aton igkasi-tawo, bug-os-kalag nga gintutuman naton an aton Kristiano nga ministeryo. * (Mar. 12:30, 31; Col. 3:23) An bug-os-kalag nga pag-alagad ha Dios nagpapasabot hin paghatag han aton kalugaringon, nga ginagamit an aton kusog ha bug-os naton nga mahihimo ha pag-alagad ha iya. Kon gin-aapresyar naton an pribilehiyo nga pagsangyaw, mangangalimbasog kita nga isangyaw an maopay nga sumat ha damu nga tawo tubtob ha aton mahihimo.

5-6. Iilustrar kon paonan-o an ministeryo mahimo iprayoridad han usa nga limitado an panahon.

⁵ Hunahunaa an usa nga batan-on nga hilig gud an pagginitara. Kon nakakahigayon hiya, nalilipay hiya paggitara. Inabot an panahon, nakatrabaho hiya ha restawran sugad nga gitarista ha kada kataposan han semana. Pero, diri nakakatapar an iya kità ha iya mga kagarastohan. Salit nagtrabaho hiya sugad nga cashier ha usa nga groseri ha Lunes tubtob Biernes. Bisan kon mas daku an iya panahon ha groseri, mas karuyag niya an pagin gitarista. Karuyag gud niya mapauswag pa an iya abilidad ngan magin bug-os-panahon nga musikero. Bisan kon sagipo, ginsasalingabot niya an iya bakante nga mga panahon basi makaggitara, bisan madaliay la.

⁶ Ha pariho nga paagi, bangin limitado la nga panahon an imo naigagahin para ha pagsangyaw. Pero, karuyag mo gud an pagsangyaw. Nangangalimbasog ka nga mapauswag an imo abilidad nga maabot an kasingkasing han mga tawo pinaagi han maopay nga sumat. Tungod han imo pagin  sagipo, bangin maghunahuna ka kon paonan-o mo hihimoon nga prayoridad an pagsangyaw.

7-8. Paonan-o naton masusubad an disposisyon ni Jesus ha ministeryo?

⁷ Hi Jesus nagpakita hin maopay gud nga susbaranan may kalabotan han iya disposisyon ha ministeryo. An pinakaimportante ha iya kinabuhi amo an pagsumat mahitungod han Ginhadian han Dios. (Juan 4:34, 35) Nagbaktas hiya hin ginatos ka kilometro basi masangyawan an damu nga tawo tubtob nga posible. Ginsalingabot niya an tagsa nga higayon nga makaistorya an mga tawo ha panpubliko nga mga lugar ngan ha ira balay. Ngatanan nga iya ginbubuhat konektado ha ministeryo.

⁸ Masusubad naton an Kristo pinaagi ha pamiling hin higayon nga maisangyaw an maopay nga sumat ha anoman nga panahon ngan ha bisan diin nga posible. Andam kita nga isakripisyo an aton kahimyang basi makasangyaw. (Mar. 6:31-34; 1 Ped. 2:21) An pipira ha kongregasyon nakakag-alagad sugad nga espesyal, regular, o auxiliary payunir. An iba naman nag-aaram hin iba nga linggwahe o nabalhin ha lugar nga may daku nga panginahanglan hin mga magwarali. Pero, kadam-an han nakikigbahin ha pagsangyaw amo an mga magwarali nga diri aada ha bug-os-panahon, kondi nangangalimbasog nga himoon an ira pinakamaopay. Anoman an aton kahimtang, diri naglalaom hi Jehova hin labaw kay han aton maihahatag. Karuyag niya nga kita ngatanan malipay ha aton sagrado nga pag-alagad samtang iginpapasamwak an “mahimayaon nga maopay nga sumat . . . han malipayon nga Dios.”​—1 Tim. 1:11; Deut. 30:11.

9. (a) Paonan-o ginprayoridad ni Pablo an pagsangyaw bisan kon kinahanglan niya magtrabaho hin sekular? (b) Ano an iginpapakita han Buhat 28:16, 30, 31 mahitungod han disposisyon ni Pablo ha iya ministeryo?

⁹ Hi apostol Pablo nagpakita hin maopay nga ehemplo ha pagprayoridad han ministeryo. Han nakadto hiya ha Corinto durante han iya ikaduha nga pagbiyahe sugad nga misyonero, kapos hiya ha pinansyal salit kinahanglan niya magtrabaho sugad nga parahimo hin tolda. Kondi, an panhimo hin tolda diri amo an pinakaimportante kan Pablo. Nagtrabaho hiya para masuportaran an iya ministeryo basi maipasamwak niya hin “waray bayad” an maopay nga sumat ha mga taga-Corinto. (2 Cor. 11:7) Bisan kon kinahanglan ni Pablo magtrabaho hin sekular, padayon niya nga gin-una an ministeryo, ngan nagsangyaw hiya ha kada Sabbath. Han nag-opay-opay na an iya kahimtang, natagan niya hin dugang pa nga atensyon an pagsangyaw. “Nagin sagipo gud hi Pablo ha pagsangyaw han pulong han Dios, ha pagpamatuod ha mga Judio nga hi Jesus amo an Kristo.” (Buh. 18:3-5; 2 Cor. 11:9) Ha urhi, han napriso hi Pablo ha usa nga balay didto ha Roma ha sulod hin duha ka tuig, nagsangyaw hiya ha mga nabisita ha iya ngan naghimo hin mga surat. (Basaha an Buhat 28:16, 30, 31.) Determinado hi Pablo nga diri maulang hin bisan ano an iya ministeryo. Hiya nagsurat: “Tungod kay may-ada kami hini nga sagrado nga buruhaton . . . , diri kami naundang.” (2 Cor. 4:1) Pariho kan Pablo, bisan kon kinahanglan maggahin kita hin panahon ha aton sekular nga trabaho, mahimo la gihapon naton himoon nga pinakaimportante ha aton kinabuhi an buruhaton han Ginhadian.

10-11. Kon nalilimitahan kita tungod han problema ha kahimsog, paonan-o naton bug-os nga matutuman an aton ministeryo?

¹⁰ Kon an aton pagsangyaw ha balay-balay nalilimitahan tungod han pagtikalagas o mga problema ha kahimsog, mahimo kita makigbahin ha iba nga paagi han pagministeryo. An siyahan-siglo nga mga Kristiano nagsangyaw ha mga tawo ha bisan diin nga lugar. Ginsalingabot nira an tagsa nga higayon nga maisumat an kamatuoran​—ha balay-balay, publiko, ngan diri-pormal nga paagi—​ha bisan diin nga may mga tawo. (Buh. 17:17; 20:20) Kon diri kita nailob paglinakat, puydi kita magsangyaw nga nakalingkod la  ha matawo nga mga lugar. O mahimo kita makagsangyaw ha diri-pormal nga paagi, magsangyaw pinaagi ha surat, o pinaagi ha telepono. Damu nga magwarali nga diri na gud kaya magbalay-balay an nalilipay ngan natatagbaw hini nga iba pa nga paagi han pagsangyaw.

¹¹ Bisan pa han imo mga limitasyon ha kahimsog, mahimo mo matuman hin bug-os an imo ministeryo. Tagda utro an ehemplo ni apostol Pablo. Hiya nagsiring: “Ha ngatanan nga butang may kusog ako pinaagi ha iya nga naghahatag ha akon hin gahum.” (Fil. 4:13) Ginkinahanglan ni Pablo ito nga gahum han nagkasakit hiya durante han iya pagmisyonero. Nagsiring hiya ha mga taga-Galacia: “Tungod han akon sakit ha lawas nagkaada ako siyahan nga higayon nga magpahayag han maopay nga sumat ha iyo.” (Gal. 4:13) Sugad man, an imo problema ha kahimsog mahimo maghatag ha imo hin oportunidad nga maisangyaw an maopay nga sumat ha iba, sugad han mga doktor, nars, ngan iba pa nga nabulig ha pag-ataman ha imo. Damu ha ira an aadto ha trabaho kon an mga Saksi nabisita ha ira balay.

12. Ano an karuyag sidngon han pagtipig han imo mata nga “simple”?

¹² Hi Jesus nagsiring: “An lampara han lawas amo an mata. Salit kon an imo mata simple, magigin malamrag an imo bug-os nga lawas.” (Mat. 6:22) Ano an iya karuyag sidngon? Kinahanglan tipigan naton nga simple an aton kinabuhi o magpokus kita ha usa nga tumong, o katuyoan, nga diri gintutugotan nga mawara an aton pokus. Hi Jesus mismo nagpakita hin susbaranan pinaagi ha  pagpokus ha ministeryo, ngan gintutdoan niya an iya mga disipulo nga padayon nga magpokus ha pag-alagad kan Jehova ngan ha Iya Ginhadian. Ginsusubad naton hi Jesus kon ginhihimo naton nga pinakaimportante ha aton kinabuhi an Kristiano nga pagministeryo, nga ‘padayon nga gin-uuna an pagpamiling han Ginhadian ngan han katadongan’ han Dios.​—Mat. 6:33.

13. Ano an makakabulig ha aton nga makapokus ha aton ministeryo?

¹³ Usa nga paagi nga maipapakita naton nga nakapokus kita ha ministeryo amo an pagpasimple han aton kinabuhi basi makagahin kita hin mas daku nga panahon ha pagbulig ha iba nga mahibaro mahitungod kan Jehova ngan higugmaon hiya. * Pananglitan, puydi ba naton ibanan an aton oras ha sekular nga trabaho basi mas daku nga panahon an aton maigahin ha ministeryo durante han semana? Puydi ba naton ibanan an aton mga pagpahalibway nga bangin nakakaubos hin panahon?

14. Ano nga mga pagbag-o an ginhimo han usa nga mag-asawa basi magkaada mas daku nga panahon ha ministeryo?

¹⁴ Ini an ginbuhat han tigurang nga hi Elias ngan han iya asawa. Hi Elias nagsiring: “Waray dayon kami makagpayunir, pero kinahanglan may himoon kami. Salit naghimo kami hin gutiay nga mga pagbag-o basi madugangan an amon panahon ha ministeryo. Pananglitan, nagtipid kami, gin-ibanan an amon mga pagpahalibway nga nakakaubos hin panahon, ngan naghangyo ha amon boss nga bag-uhon an amon eskedyol basi magkaada mas daku nga panahon ha pagsangyaw. Sugad nga resulta, nakakaupod na kami ha pagsangyaw ha gab-i, nagkaada mas damu nga Bible study, ngan nakakaupod na ngani kami ha pagsangyaw ha ordinaryo nga mga adlaw han semana duha ka beses ha usa ka bulan. Makalilipay gud ini!”

15-16. Sumala ha 1 Timoteo 4:13, 15, paonan-o naton padayon nga mapapauswag an aton abilidad ha pagsangyaw? (Kitaa an kahon nga “ Mga Tumong nga Mabulig ha Akon Basi Bug-os nga Matuman an Akon Ministeryo.”)

¹⁵ An usa pa nga paagi basi bug-os nga matuman an aton ministeryo amo an pagpauswag han aton abilidad ha pagsangyaw. May mga trabaho diin an mga empleyado ginkikinahanglan nga padayon nga bansayon basi mapauswag an ira kahibaro ngan abilidad. Pariho liwat hito an mga magsarangyaw han Ginhadian. Kinahanglan padayon kita nga mag-aram kon paonan-o magigin mas epektibo ha ministeryo.​—Prob. 1:5; basaha an 1 Timoteo 4:13, 15.

¹⁶ Pero, paonan-o kita padayon nga mag-uuswag ha aton ministeryo? Pinaagi ha pagpamati hin maopay ha instruksyon nga aton nakakarawat ha sinemana nga Katirok ha Pagkinabuhi Ngan Ministeryo. Hini nga katirok, nakakakarawat kita hin mapulsanon nga pagbansay nga mabulig ha aton basi padayon nga mapauswag an aton abilidad ha ministeryo. Pananglitan, kon an tsirman naghahatag hin sagdon ha estudyante, may makukuha kita nga mga suhestyon nga mabulig ha aton nga mapauswag an aton ministeryo. Puydi naton gamiton ito nga mga suhestyon ha sunod naton nga pagsangyaw. Mahimo kita magpabulig ha aton paramangno han grupo o makigpartner ha iya ha pagsangyaw o ha usa nga eksperyensyado nga magwarali, ha payunir, o ha paramangno han sirkito. Samtang nagigin mas epektibo kita ha paggamit han tagsa nga garamiton ha aton Toolbox ha Pagpanutdo, mas nalilipay kita ha pagsangyaw ngan pagtutdo.

17. Ano an imo maieksperyensyahan kon bug-os nga gintutuman mo an imo ministeryo?

¹⁷ Pribilehiyo gud naton nga gintutugotan kita ni Jehova nga magin iya “igkasi-magburuhat”! (1 Cor. 3:9) Kon ‘ginsisiguro mo an mas importante nga mga butang’ ngan nagpupokus ha Kristiano nga ministeryo, ‘magaalagad [ka] upud an kalipay kan Jehova.’ (Fil. 1:10; Sal. 100:2) Sugad nga usa han mga ministro han Dios, makakasiguro ka nga tatagan ka niya hin kusog nga imo ginkikinahanglan basi matuman an imo ministeryo anoman nga problema o limitasyon an mahimo mo atubangon. (2 Cor. 4:1, 7; 6:4) Gutiay man o daku nga panahon an imo nagagamit ha pagsangyaw tungod han imo kahimtang, “magkakaada [ka] hinungdan nga malipay” kon bug-os-kalag nga gintutuman mo an imo ministeryo. (Gal. 6:4) An imo bug-os nga pagtuman han imo ministeryo nagpapakita nga hinigugma mo hi Jehova ngan an imo igkasi-tawo. “Kon buhaton mo ini, matatalwas ka ngan an mga namamati ha imo.”​—1 Tim. 4:16.