1. Sugad han iginsasaysay ha Efeso 6:10-13, ano an usa han pinakamaopay nga paagi nga iginpapakita ni Jehova an iya gugma ha aton? Isaysay.

USA han pinakamaopay nga paagi nga iginpapakita ni Jehova an iya gugma ha iya mga surugoon amo an pagbulig ha aton nga maatohan an aton mga kaaway. An aton nangunguna nga kaaway amo hi Satanas ngan an mga demonyo. Ginpapahamangnoan kita ni Jehova mahitungod hini nga mga kaaway, ngan iginhahatag niya an aton ginkikinahanglan basi maatohan hira. (Basaha an Efeso 6:10-13.) Kon kakarawaton naton an bulig ni Jehova ngan bug-os nga masarig ha iya, magdadaog kita kontra ha Yawa. Magkakaada kita pagsarig nga pariho han kan apostol Pablo. Hiya nagsurat: “Kon an Dios dapig ha aton, hin-o an makontra ha aton?”​—Roma 8:31.

2. Ano an aton hihisgotan hini nga artikulo?

² Sugad nga tinuod nga mga Kristiano, diri kita duro nga nagpupokus kan Satanas ngan ha mga demonyo. Mas nagpupokus kita ha paghibaro mahitungod kan Jehova ngan ha pag-alagad ha iya. (Sal. 25:5) Kondi, kinahanglan naton hibaroan an nangunguna nga mga paagi nga ginagamit ni Satanas. Kay ano? Basi diri kita niya malimbongan. (2 Cor. 2:11) Hini nga artikulo, hihisgotan naton an usa han nangunguna nga paagi nga ginagamit ni Satanas ngan han mga demonyo ha paglimbong ha mga tawo. Hihisgotan liwat naton kon paonan-o kita magdadaog kontra ha ira.

3-4. (a) Ano an espiritismo? (b) Mationan-o kakalyap an katutdoan mahitungod ha espiritismo?

³ An usa han nangunguna nga paagi nga ginagamit ni Satanas ngan han mga demonyo ha paglimbong ha mga tawo amo an espiritismo.  An mga nagbubuhat hito nag-aangkon nga may nahibabaroan o may nakukontrol hira nga mga butang nga kasagaran nga diri nahibabaroan o nakukontrol han mga tawo. Pananglitan, may nag-aangkon nga kaya nira hibaroan an tidaraon pinaagi ha panigo o astrolohiya. Iginpapakita han iba nga baga hin nakakaistorya nira an mga patay. May pipira nga nagbubuhat hin pamarang o hin madyik, ngan mahimo hira manlumay ha iba. *

⁴ Mationan-o kakalyap an katutdoan mahitungod han gahum han espiritismo? Ha usa nga surbey nga ginhimo ha 18 nga nasud ha Latin Amerika ngan ha Caribbean, nahibaroan nga ha kada tulo nga ginpapakianhan mga usa hito an natoo ha madyik o pamarang, ngan haros pariho liwat hito an kadamu hadton natoo nga puydi makigkomunikar ha mga espiritu. Usa pa nga surbey an ginhimo ha 18 nga nasud ha Aprika. Ha aberids, sobra katunga han nakigbahin ha surbey an natoo ha barang. Syempre, diin man kita naukoy, kinahanglan magbantay kita kontra ha espiritismo. Kay ha pagkamatuod, nangangalimbasog hi Satanas nga limbongan an “bug-os nga inuukyan nga tuna.”​—Pah. 12:9.

5. Ano an inaabat ni Jehova mahitungod ha espiritismo?

⁵ Hi Jehova an “Dios han kamatuuran.” (Sal. 31:5) Ano an iya inaabat mahitungod ha espiritismo? Nangangalas gud hiya hito! Hi Jehova nagsiring ha mga Israelita: “Waray hiagian dida ha imo, in bisan hin-o nga maghihimo han iya anak nga lalaki o anak niya nga babaye ha pagagi ha kalayo, in usa nga nagamit hin panag-an, in usa nga manirigo pinaagi hin mga barita, o parapanganito, o parapanhimalad. O lumayan, o tamyawan, o mahiko, o namamakiana han mga minatay. Kay bisan hin-o nga magbuhat hini nga mga butang magmamangil-ad kan Jehova.” (Deut. 18:10-12) An mga Kristiano diri na sakop han Balaud nga iginhatag ni Jehova ha mga Israelita. Pero maaram kita nga waray magbag-o an iya inaabat mahitungod ha espiritismo.​—Mal. 3:6.

6. (a) Paonan-o ginagamit ni Satanas an espiritismo basi dauton an mga tawo? (b) Sumala ha Eklesiastes 9:5, ano an kamatuoran mahitungod ha kahimtang han patay?

⁶ Ginpapahamangnoan kita ni Jehova kontra ha espiritismo kay maaram hiya nga ginagamit ito ni Satanas basi dauton an mga tawo. Ginagamit ni Satanas an espiritismo basi maghimo hin kabuwaan​—upod na an buwa nga an patay nabubuhi ha iba nga dapit. (Basaha an Eklesiastes 9:5.) Ginagamit liwat ni Satanas an espiritismo basi padayon nga mahadlok an mga tawo ngan igpahirayo hira kan Jehova. Tumong niya nga an mga tawo nga nagbubuhat hin espiritismo sumarig ha magraot nga espiritu imbes kan Jehova.

7. Ano an iginsusumat ha aton ni Jehova?

⁷ Sugad han gin-unabi na, ginsusumatan kita ni Jehova han kinahanglan naton hibaroan basi diri kita malimbongan ni Satanas ngan han mga demonyo. Tagda an pipira nga butang nga mahimo naton buhaton basi maatohan hi Satanas ngan an mga demonyo.

8. (a) Ano an nangunguna nga paagi ha pag-ato ha magraot nga espiritu? (b) Paonan-o iginbubuhayhag han Salmos 146:4 an buwa ni Satanas mahitungod ha patay?

⁸ Basaha an Pulong han Dios ngan pamalandonga ito. Ini an nangunguna nga paagi basi maisalikway naton an kabuwaan nga iginpapasarang han magraot nga espiritu. An Pulong han Dios pariho hin matarom nga espada nga  nakakag-utod han kabuwaan ni Satanas. (Efe. 6:17) Pananglitan, iginbubuhayhag han Pulong han Dios an kabuwaan nga nakakaistorya han patay an mga buhi. (Basaha an Salmos 146:4.) Nagpapahinumdom liwat ito ha aton nga hi Jehova la an masasarigan nga makakagsumat han mahitatabo ha tidaraon. (Isa. 45:21; 46:10) Kon babasahon naton an Pulong han Dios ngan papamalandungon ito adlaw-adlaw, magigin andam kita nga isalikway ngan kangalasan an kabuwaan han magraot nga espiritu nga karuyag nira nga toohan naton.

9. Ano nga klase han espiritismo an aton ginlilikyan?

⁹ Ayaw pagbuhat hin bisan ano nga konektado ha espiritismo. Sugad nga tinuod nga mga Kristiano, diri gud kita nagbubuhat hin bisan ano nga klase han espiritismo. Pananglitan, diri kita nakadto ha mga espiritista o nakikigkomunikar ha patay ha bisan ano nga paagi. Sugad han ginhisgotan ha nahiuna nga artikulo, diri kita nakikigbahin ha mga kustomre ha lubong nga basado ha katutdoan nga an patay padayon nga nabubuhi ha iba nga dapit. Diri liwat kita nakonsulta ha astrolohiya o ha parapanigo basi hibaroan an mahitungod ha tidaraon. (Isa. 8:19) Maaram kita nga ito ngatanan peligroso gud ngan mahimo pa ngani magin hinungdan nga magkaada kita direkta nga komunikasyon kan Satanas ngan ha mga demonyo.

10-11. (a) Ano an ginbuhat han pipira ha siyahan nga siglo han nahibaro hira han kamatuoran? (b) Sumala ha 1 Corinto 10:21, kay ano nga sadang naton subaron an ehemplo han siyahan-siglo nga mga Kristiano, ngan paonan-o naton ito bubuhaton?

¹⁰ Wad-a an bisan ano nga butang nga may kalabotan ha espiritismo. Ha siyahan nga siglo, an pipira han mga taga-Efeso nagbubuhat hin espiritismo. Han nahibaro hira han kamatuoran, naghimo dayon hira hin daku nga pagbag-o. “Gindara han damu nga nagbubuhat hin madyik an ira mga libro ngan ginsunog ito ha atubangan han ngatanan.” (Buh. 19:19) Determinado gud hira nga atohan an magraot nga espiritu. Daku an kantidad han ira mga libro mahitungod ha madyik. Pero imbes nga ipanhatag ito o ibaligya, ira  ito ginpansunog. Mas importante ha ira an pagpalipay kan Jehova kay ha daku nga kwarta nga ira makukuha hito nga mga libro.

¹¹ Paonan-o naton masusubad an ehemplo han siyahan-siglo nga mga Kristiano? Maaramon kon wawad-on naton an bisan ano nga butang nga konektado ha espiritismo nga bangin may-ada kita. Nag-uupod ini han anting-anting, panpaswerte, o iba pa nga butang nga iginsusul-ot o gintatag-iya han mga tawo basi panalipdan an ira kalugaringon tikang ha magraot nga espiritu.​—Basaha an 1 Corinto 10:21.

12. May kalabotan ha aton kaliawan, ano an sadang naton ipakiana ha aton kalugaringon?

¹² Usisaha hin maopay an imo kaliawan. Pakianhi an imo kalugaringon: ‘Nagbabasa ba ako hin libro, magasin, o artikulo ha Internet mahitungod ha espiritismo? Kumusta man an musika nga akon ginpapamatian, an mga pelikula ngan mga salida ha TV nga akon ginkikita, o an mga video game nga akon gin-uuyag? May-ada ba ako kaliawan nga nag-uupod hin espiritismo? May-ada ba ito mga bampira, zombie, o ingkanto? Iginpapakita ba hito nga an madyik, panlumay, o pagpahinabo hin sumpa kaliawan la nga diri nakakadaot?’ Syempre, diri ngatanan nga kaliawan nga may kalabotan ha mga susmatanon o mga fairy tale konektado ha espiritismo. Kon gin-uusisa mo an imo kaliawan, magin determinado ha pagpili hadton mabulig ha imo nga magpahirayo ha bisan ano nga butang nga ginkakangalasan ni Jehova. Karuyag naton buhaton an ngatanan basi “magkaada [kita] pirme limpyo nga konsensya” ha atubangan han aton Dios.​—Buh. 24:16. *

13. Ano an diri naton sadang buhaton?

¹³ Ayaw pag-inistorya hin may kalabotan ha mga demonyo. Hini nga bahin, karuyag naton  subaron an ehemplo ni Jesus. (1 Ped. 2:21) Antes hi Jesus kumanhi ha tuna, nagkinabuhi hiya ha langit, ngan damu an iya nahibaroan mahitungod kan Satanas ngan ha mga demonyo. Pero waray hiya mag-istorya mahitungod han mga ginbuhat hini nga magraot nga espiritu. Karuyag ni Jesus nga magin saksi ni Jehova, diri ni Satanas. Masusubad naton hi Jesus kon diri kita magpapasarang hin mga istorya mahitungod ha mga demonyo. Lugod, iginpapakita naton pinaagi ha mga pulong nga an aton “kasingkasing nagaawas hin maopay nga butang,” nga amo an kamatuoran.​—Sal. 45:1.

14-15. (a) Kay ano nga diri kita sadang mahadlok ha magraot nga espiritu? (b) Ano an ebidensya nga ginpapanalipdan ni Jehova an iya katawohan yana?

¹⁴ Ayaw kahadlok ha magraot nga espiritu. Hinin diri perpekto nga kalibotan, mahimo may mahitabo ha aton nga maraot. An aksidente, sakit, o kamatayon pa ngani bangin tigda nga umabot ha aton. Pero diri kita sadang maghunahuna nga ginpahinabo ito han magraot nga espiritu. An Biblia nasiring nga an panahon ngan diri ginlalaoman nga mga hitabo mahimo umabot ha bisan hin-o. (Ekles. 9:11) May kalabotan ha mga demonyo, iginpapakita ni Jehova nga mas gamhanan hiya kay ha ira. Pananglitan, waray tuguti han Dios nga patayon ni Satanas hi Job. (Job 2:6) Ha panahon ni Moises, iginpakita ni Jehova nga mas gamhanan hiya kay ha madyikero nga mga saserdote han Ehipto. (Eks. 8:18; 9:11) Pinaagi han gahum nga iginhatag ni Jehova, iginpakita han ginhimaya nga hi Jesus nga mas gamhanan hiya kan Satanas ngan ha mga demonyo han iya hira iginlabog tikang ha langit nganhi ha tuna. Diri na maiha, ilalabog hira ha kahiladman, ngan diri na hira makakapandaot ha bisan hin-o.​—Pah. 12:9; 20:2, 3.

¹⁵ Damu an aton ebidensya nga ginpapanalipdan ni Jehova an iya katawohan yana. Hunahunaa ini: Iginsasangyaw ngan igintututdo naton an kamatuoran ha ngatanan nga bahin han tuna. (Mat. 28:19, 20) Tungod hito, naibubuhayhag naton an magraot nga buhat han Yawa. Sigurado nga kon kaya paundangon ni Satanas an aton buruhaton, ginhimo na unta niya ito. Salit diri kita sadang mahadlok ha magraot nga espiritu. Maaram kita nga “an mga mata ni Jehova nadalagan ngadto nganhi sahid an bug-os nga kalibutan, ha pagpakita ha iya ngahaw nga makusug ha ngaran nira kan kanay kasingkasing hingpit tipakadto ha iya.” (2 Kron. 16:9) Kon matinumanon kita kan  Jehova, an mga demonyo diri makakagpahinabo ha aton hin nagpapadayon nga kadaot.

16-17. Paghatag hin ehemplo nga nagpapakita nga kinahanglan an kaisog basi maatohan an magraot nga espiritu.

¹⁶ Kinahanglan an kaisog ha pag-ato ha magraot nga espiritu, labi na kon ginkukontra kita han aton kasangkayan o mga kapamilya nga may maopay nga intensyon. Pero ginbibendisyonan ni Jehova adton nagpapakita hin kaisog. Tagda an ehemplo han sister nga hi Erica nga taga-Ghana. Hi Erica 21 anyos han nag-aram hiya han Biblia. Tungod kay an iya tatay usa nga espiritista nga padi, ginlalaoman nga makikigbahin hiya ha usa nga espiritistiko nga kustomre nga nag-uupod ha pagkaon han iginhalad nga karne para ha mga dios han iya tatay. Han nagdumiri hi Erica, gintagad ito han iya pamilya sugad nga pag-insulto ha mga dios. Natoo an iya pamilya nga sisirotan hira han mga dios hin sakit ha mental ngan pisikal.

¹⁷ Ginpirit hi Erica han iya pamilya nga makigbahin ha kustomre, pero waray hiya magpadara bisan kon maaram hiya nga papalayason hiya. May pipira nga Saksi nga nagpaukoy ha iya. Hito nga paagi, ginbendisyonan hiya ni Jehova hin bag-o nga pamilya​—mga igkasi-tumuroo nga nagin sugad hin iya kabugtoan ha unod. (Mar. 10:29, 30) Bisan kon iginsalikway hi Erica han iya mga kapamilya ngan ginsunog pa ngani an iya mga gamit, nagpabilin hiya nga maunungon kan Jehova, nagpabawtismo, ngan yana regular payunir na. Diri hiya nahahadlok ha mga demonyo. Ngan may kalabotan ha iya pamilya, hi Erica nagsiring nga “kada adlaw ako nag-aampo nga maeksperyensyahan unta han akon pamilya an bendisyon ha pagkilala kan Jehova ngan pagkaada kagawasan tungod han pag-alagad ha mahigugmaon nga Dios.”

18. Ano nga mga bendisyon an aton makakarawat tungod ha pagsarig kan Jehova?

¹⁸ Diri ngatanan ha aton makakaeksperyensya han sugad nga pagsari ha aton pagtoo. Kondi, kinahanglan atohan naton ngatanan an magraot nga espiritu ngan sumarig kan Jehova. Kon bubuhaton naton ito, makakarawat naton an damu nga bendisyon ngan diri kita malilimbongan han kabuwaan ni Satanas. Diri liwat mapapaundang an aton pag-alagad tungod ha kahadlok ha mga demonyo. Labaw ha ngatanan, mapaparig-on naton an aton duok nga relasyon kan Jehova. An disipulo nga hi Santiago nagsurat: “Magpasakop kamo ha Dios; pero atohi an Yawa, ngan mabaya hiya ha iyo. Magin duok kamo ha Dios, ngan magigin duok hiya ha iyo.”​—San. 4:7, 8.