1-2. Kay ano nga nabaraka gud hi Jesus?

HA ULTIMO nga adlaw ni Jesus sugad nga tawo, nababaraka gud hiya. Diri mag-iiha, mag-aantos hiya hin brutal nga kamatayon ha kamot han magraot nga tawo. Pero nababaraka hi Jesus diri la tungod kay hirani na hiya mamatay. Hinigugma gud ni Jesus an iya Amay ngan karuyag niya nga lipayon hiya. Maaram hi Jesus nga kon magpabilin hiya nga matinumanon ha tiarabot nga makuri nga pagsari, makakabulig hiya ha pagbindikar han ngaran ni Jehova. Hinigugma liwat ni Jesus an mga tawo, ngan maaram hiya nga an aton paglaom nga kinabuhi nga waray kataposan nakadepende ha iya pagpabilin nga matinumanon tubtob ha kamatayon.

² Bisan kon istres gud hi Jesus, may-ada hiya kamurayawan. “Igbibilin ko ha iyo an kamurayawan nga iginhatag ko ha iyo,” siring niya ha iya mga apostol. (Juan 14:27) May-ada hiya han “kamurayawan han Dios,” an pagin kalmado ngan pagin murayaw tungod han pagkaada maopay nga relasyon kan Jehova. Ito nga kamurayawan nagpakalma han hunahuna ngan kasingkasing ni Jesus.​—Fil. 4:6, 7.

3. Ano an aton uusisahon hini nga artikulo?

³ Waray bisan usa ha aton an makakaeksperyensya han gin-agian ngan gin-abat ni Jesus, pero ngatanan nga iya sumurunod maatubang hin mga pagsari. (Mat. 16:24, 25; Juan 15:20) Ngan pariho kan Jesus, usahay maabat kita hin duro nga kabaraka. Paonan-o naton malilikyan nga diri kita madaog han kabaraka ngan mawara an aton kamurayawan ha hunahuna? Aton usisahon an tulo nga butang nga ginbuhat ni Jesus durante han iya ministeryo dinhi ha tuna ngan kitaon naton kon paonan-o naton hiya masusubad kon naatubang kita hin mga pagsari.

4. Samtang ginhuhunahuna an 1 Tesalonica 5:17, paghatag hin mga ehemplo nga nagpapakita nga agsob mag-ampo hi Jesus durante han ultimo nga adlaw han iya kinabuhi ha tuna.

⁴ Basaha an 1 Tesalonica 5:17. Hi Jesus agsob mag-ampo ha ultimo nga adlaw han iya kinabuhi dinhi ha tuna. Han gintikangan niya an pagsaurog para ha paghinumdom han iya kamatayon, nag-ampo hiya para ha tinapay ngan ha bino. (1 Cor. 11:23-25) Antes bumaya ha lugar diin ira ginsaurog an Paskua, nag-ampo hiya upod han mga disipulo. (Juan 17:1-26) Han inabot hiya ngan an iya mga disipulo ha Bukid han mga Olibo hito nga gab-i, pauroutro hiya nga nag-ampo. (Mat. 26:36-39, 42, 44) Ngan an ultimo nga mga pulong nga ginyakan ni Jesus antes hiya mamatay usa nga pag-ampo. (Luc. 23:46) Durante hiton ultimo nga adlaw han iya kinabuhi, igin-ampo ni Jesus kan Jehova an ngatanan nga nahitabo ha iya.

5. Kay ano nga nawad-an hin kaisog an mga apostol?

⁵ Usa nga rason kon kay ano nga nakailob hi Jesus ha mga pagsari amo an iya pagsarig ha iya Amay pinaagi ha pag-ampo. Ha luyo nga bahin, an mga apostol waray magpadayon ha pag-ampo hito nga gab-i. Salit han nakaeksperyensya hira hin pagsari, nawad-an hira hin kaisog. (Mat. 26:40, 41, 43, 45, 56) Kon naatubang kita hin mga pagsari, makakapabilin la kita nga matinumanon kon susundon naton an ehemplo ni Jesus ngan ‘padayon nga mag-aampo.’ Ano an mahimo naton ig-ampo?

6. Paonan-o an pagtoo mabulig ha aton nga matipigan an kamurayawan?

⁶ Mahimo kita mag-ampo kan Jehova nga ‘tagan kita hin dugang nga pagtoo.’ (Luc. 17:5; Juan 14:1) Kinahanglan naton hin pagtoo tungod kay sasarihan ni Satanas an ngatanan nga nasunod kan Jesus. (Luc. 22:31) Paonan-o an pagtoo mabulig ha aton nga matipigan an kamurayawan  kon naatubang kita hin sunod-sunod nga problema? Kon ginbuhat na naton an ngatanan nga aton mahihimo basi malamposan an usa nga pagsari, an pagtoo magpapagios ha aton nga isarig kan Jehova an aton kahimtang. Tungod kay nasarig kita nga mas maopay an mahihimo niya kay ha aton, may-ada kita kamurayawan ha hunahuna ngan kasingkasing.​—1 Ped. 5:6, 7.

7. Ano an imo nahibaroan ha ginsiring ni Robert?

⁷ An pag-ampo nabulig ha aton nga matipigan an aton kamurayawan ha hunahuna anoman nga pagsari an aton atubangon. Tagda an ehemplo ni Robert nga matinumanon nga tigurang nga sobra 80 anyos na yana. Hiya nagsiring: “An sagdon ha Filipos 4:6, 7 nakabulig ha akon nga malamposan an damu nga pagsari. Nagkaproblema ako ha pinansyal. Ngan temporaryo nga nawara an akon pribilehiyo sugad nga tigurang.” Ano an nakabulig kan Robert nga matipigan an kamurayawan ha hunahuna? “Nag-aampo dayon ako kon naabat ako hin kabaraka,” siring niya. “Inaabat ko nga kon mas agsob ngan mas sinsero ako nga nag-aampo, mas nagigin murayaw ako.”

8. Sumala ha Juan 8:29, ano an usa pa nga rason nga hi Jesus may kamurayawan ha hunahuna?

⁸ Basaha an Juan 8:29. Bisan han gintitimaraot hi Jesus, may kamurayawan hiya ha hunahuna kay maaram hiya nga napapalipay niya an iya Amay. Nagpabilin hiya nga masinugtanon ha panahon nga makuri ha iya an pagbuhat hito. Hinigugma niya an iya Amay ngan pinakaimportante ha iya an pag-alagad kan Jehova. Antes hiya kumanhi ha tuna, eksperto hiya nga magburuhat han Dios. (Prob. 8:30) Ngan han nakanhi hiya ha tuna, madasigon nga igintutdo niya ha iba an mahitungod han iya Amay. (Mat. 6:9; Juan 5:17) Ito  nga buruhaton naghatag kan Jesus hin daku nga kalipay.​—Juan 4:34-36.

9. Paonan-o an pagin sagipo ha pagsangyaw nabulig ha aton nga matipigan an kamurayawan ha hunahuna?

⁹ Masusubad naton hi Jesus pinaagi ha pagsugot kan Jehova ngan pagkaada ‘pirme damu nga ginbubuhat ha buruhaton han Ginoo.’ (1 Cor. 15:58) Kon “sagipo gud” kita ha pagsangyaw, nagkakaada kita mas positibo nga disposisyon mahitungod han aton mga problema. (Buh. 18:5) Pananglitan, an aton mga nasasangyawan agsob nga mas daku an problema kay ha aton. Pero, kon nahibabaro hira paghigugma kan Jehova ngan pag-aplikar han iya sagdon, nagigin mas maopay ngan malipayon an ira kinabuhi. Ha kada panahon nga nakikita naton ito, nagigin mas kombinsido kita nga mamangnoan kita ni Jehova. Ngan nabulig ini ha aton nga matipigan an aton kamurayawan ha hunahuna. Ito mismo an naeksperyensyahan han usa nga sister nga maiha na nga nag-aantos hin depresyon ngan pag-abat hin kawaray-pulos. Hiya nagsiring: “Kon sagipo ako ha ministeryo, mas nakukontrol ko an akon emosyon ngan nagigin mas malipayon. Siguro tungod ito kay kon aadto ako ha ministeryo, inaabat ko nga duok gud ako kan Jehova.”

10. Ano an imo nahibaroan ha ginsiring ni Brenda?

¹⁰ Tagda liwat an ehemplo han sister nga hi Brenda. Hiya ngan an iya anak nga babaye may sakit nga multiple sclerosis. Hi Brenda naka-wheelchair na la ngan maluya. Kon maopay an iya inaabat, naupod hiya ha pagbalay-balay, pero kasagaran na nga nagsasangyaw hiya pinaagi hin surat. Nagsiring hiya: “Han nakarawat ko na ha akon hunahuna ngan kasingkasing nga diri ako matatambal hini nga sistema, nakagpokus na ako ha akon ministeryo. Ngani, kon nagsasangyaw ako, diri ko na nahuhunahuna an akon mga kabaraka. Lugod, nabulig ito ha akon nga magpokus ha pagbulig ha akon mga nasasangyawan ha teritoryo han amon kongregasyon. Ngan pirme ito nagpapahinumdom han akon paglaom ha tidaraon.”

11-13. (a) Paonan-o ginpamatud-an han mga apostol ngan han iba pa nga tinuod hira nga sangkay ni Jesus? (b) Ano an epekto kan Jesus han iya mga sangkay?

¹¹ Ha bug-os nga pagministeryo ni Jesus, ginpamatud-an han matinumanon nga mga apostol nga tinuod hira nga sangkay ni Jesus. Hira an klase hin mga sangkay nga ginhuhulagway hini nga puplunganon: “Mayada sangkay nga surosuuk pa kay hin bugto.” (Prob. 18:24) Ginpabilhan ni Jesus an sugad nga mga sangkay. Durante han iya ministeryo, an iya kabugtoan ha unod waray tumoo ha iya. (Juan 7:3-5) Makausa, ginhunahuna pa ngani han iya mga paryente nga lurong hiya. (Mar. 3:21) Ha kabaliktaran, hi Jesus nakagsiring ha matinumanon nga mga apostol han gab-i antes hiya mamatay: “Kamo an nagpabilin nga kaupod ko ha akon mga kasakitan.”​—Luc. 22:28.

¹² Usahay napapasubo hi Jesus han iya mga apostol, pero diri hiya nagpupokus ha ira mga sayop, lugod ha ira pagtoo ha iya. (Mat. 26:40; Mar. 10:13, 14; Juan 6:66-69) Han kaupod ni Jesus inin maunungon nga kalalakin-an han gab-i antes hiya patayon, ginsidngan niya hira: “Gintatawag ko kamo nga kasangkayan, kay an ngatanan nga hinbatian ko ha akon Amay iginpapahibaro ko ha iyo.” (Juan 15:15) Sigurado nga an mga sangkay ni Jesus nakadasig gud ha iya. An ira naibulig ha pagministeryo ni Jesus naghatag gud ha iya hin daku nga kalipay.—Luc. 10:17, 21.

¹³ Labot la han iya mga apostol, hi Jesus may iba pa nga mga sangkay, kalalakin-an ngan kababayin-an, nga binulig ha iya ha pagsangyaw ngan ha iba pa nga praktikal nga paagi. May pipira nga nag-imbitar ha iya ngadto ha ira balay basi didto hiya kumaon. (Luc. 10:38-42; Juan 12:1, 2) An iba inupod ha iya ha pagbiyahe ngan iginpagamit ha iya an ira mga panag-iya. (Luc. 8:3) Hi Jesus may mag-opay nga sangkay tungod kay maopay hiya nga sangkay. Nagbuhat hiya hin mag-opay  nga butang para ha ira ngan nagin makatadunganon hiya ha iya mga ginlalaoman ha ira. Bisan kon perpekto hi Jesus, gin-apresyar niya an bulig han iya diri perpekto nga mga sangkay. Ngan sigurado nga nakabulig hira nga matipigan an iya kamurayawan ha hunahuna.

14-15. Paonan-o kita magkakaada mag-opay nga sangkay, ngan paonan-o hira makakabulig ha aton?

¹⁴ An mag-opay nga sangkay mabulig ha aton nga magpabilin nga maunungon kan Jehova. Ngan an pinakamaopay nga paagi basi magkaada mag-opay nga sangkay amo an pagin maopay nga sangkay. (Mat. 7:12) Pananglitan, gin-aaghat kita han Biblia nga maggahin hin panahon ngan kusog ha pagbulig ha iba, labi na hadton “nanginginahanglan.” (Efe 4:28) May nahuhunahuna ka ba nga kakongregasyon nga mahimo mo buligan? Puydi ka ba mamalit para ha usa nga magwarali nga may sakit o lagas na? Mahimo ka ba maghatag hin pagkaon ha pamilya nga nagkukuri ha pinansyal? Kon maaram ka gumamit han jw.org^® nga website ngan JW Library^® nga app, puydi mo ba buligan an iba nga imo kakongregasyon basi makita an mga bahandi nga aada hito? Kon sagipo kita ha pagbulig ha iba, posible gud nga magin mas malipayon kita.​—Buh. 20:35.

¹⁵ An aton mga sangkay mabulig ha aton kon umatubang kita hin mga pagsari; mabulig ini ha aton nga matipigan an kamurayawan ha hunahuna. Pariho kan Elihu nga namati samtang igin-iistorya ni Job an mga pagsari nga iya gin-aatubang, an aton mga sangkay nabulig ha aton pinaagi ha mapailubon nga pagpamati samtang aton iginsusumat an aton mga problema. (Job 32:4) Diri naton sadang laoman nga an aton mga sangkay an magdidesisyon para ha aton, pero maaramon kita kon mamamati kita han ira sagdon nga iginbasar ha Biblia. (Prob. 15:22) Ngan  sugad la nga mapainubsanon nga ginkarawat ni Hadi David an bulig han iya mga sangkay, mapainubsanon nga karawaton liwat naton an bulig han aton mga sangkay kon nanginginahanglan kita. (2 Sam. 17:27-29) Oo, an mag-opay nga sangkay regalo tikang kan Jehova.​—San. 1:17.

16. Sumala ha Filipos 4:6, 7, ano la an paagi nga magkakaada kita kamurayawan? Isaysay.

¹⁶ Basaha an Filipos 4:6, 7. Kay ano nga nagsiring hi Jehova nga makakarawat naton an kamurayawan nga iya iginhahatag “pinaagi kan Kristo Jesus”? Tungod kay magkakaada la kita nagpapadayon nga kamurayawan ha hunahuna ngan kasingkasing kon nasasabtan naton ngan natoo kita ha papel ni Jesus ha katuyoan han Dios. Pananglitan, pinaagi han halad-lukat ni Jesus, an ngatanan naton nga sala mahimo mapasaylo. (1 Juan 2:12) Nakakaliaw gud ito ha aton! Sugad nga Hadi han Ginhadian han Dios, wawad-on ni Jesus an ngatanan naton nga pag-antos nga ginpapahinabo ni Satanas ngan han iya sistema. (Isa. 65:17; 1 Juan 3:8; Pah. 21:3, 4) Makalilipay gud ito nga paglaom! Ngan bisan kon gintagan kita ni Jesus hin makuri nga toka, kaupod naton hiya, ngan ginbubuligan kita niya durante han kataposan nga mga adlaw hini nga sistema. (Mat. 28:19, 20) Naghahatag gud ito ha aton hin dugang nga kaisog! An pagliaw, paglaom, ngan kaisog importante gud nga mga butang nga kinahanglan naton basi magkaada kita kamurayawan ha hunahuna.

17. (a) Paonan-o matitipigan han usa nga Kristiano an kamurayawan ha hunahuna? (b) Sugad han iginsaad han Juan 16:33, ano an kaya naton buhaton?

¹⁷ Kon sugad, paonan-o mo matitipigan an kamurayawan ha hunahuna kon naatubang ka hin magkuri nga pagsari? Mahihimo mo ito pinaagi ha pagsubad han mga ginbuhat ni Jesus. Siyahan, pag-ampo ngan padayon ito nga buhata. Ikaduha, sugta hi Jehova ngan madasigon nga magsangyaw bisan kon makuri an pagbuhat hito. Ngan ikatulo, pangaro hin bulig ha imo kasangkayan kon naatubang hin mga pagsari. Kon bubuhaton mo ini, an kamurayawan han Dios magbabantay han imo hunahuna ngan kasingkasing. Ngan pariho kan Jesus, madadaog mo an bisan ano nga pagsari.​—Basaha an Juan 16:33.