1-2. Kay ano nga ginsiring ni Jesus an mga pulong nga mababasa ha Juan 4:35, 36?

HI Jesus nagbibinaktas hadto ha kaumhan, posible ha mga sebada nga nagtitikang pa la pagtubo. (Juan 4:3-6) An sebada naabot hin upat ka bulan antes anihon. Hi Jesus may ginsiring nga sigurado nga nakakapahiusa gud: “Itan-aw an iyo mga mata ngan kitaa an kaumhan, busag na ito ngan andam na ha pangani.” (Basaha an Juan 4:35, 36.) Ano an iya karuyag sidngon?

² Posible gud nga an iginpapasabot ni Jesus amo an simboliko nga pag-ani hin mga tawo. Hunahunaa an nahitabo pa la. Bisan kon an mga Judio kasagaran na nga nalikay ha mga taga-Samaria, nagsangyaw hi Jesus ha usa nga Samaritana, ngan namati an Samaritana! Ngani, han nag-iistorya hi Jesus mahitungod han kaumhan nga “busag na . . . ngan andam na ha pangani,” usa nga grupo han mga Samaritano an tipakadto kan Jesus basi mahibaro hin dugang pa; ini hira nakabati mahitungod kan Jesus tikang ha babaye. (Juan 4:9, 39-42) Usa nga komentaryo ha Biblia an nagsiring mahitungod hini nga istorya: “An pagin eksayted han mga tawo nga kumadto ngan mamati kan Jesus . . . nagpapakita nga sugad hira hin mga lugas nga aranihon na.”

3. Kon ginkikita mo an mga tawo pariho han pagkita ni Jesus, paonan-o ito makakabulig nga magin mas maopay ka nga parasangyaw?

³ Kumusta man an mga tawo nga ginsasangyawan mo han maopay nga sumat? Ginhuhunahuna mo ba nga sugad hira hin lugas nga hinog na ngan angay na anihon? Kon oo, may tulo nga butang nga mahitatabo. Siyahan, magsasangyaw ka nga may pagkaapurado. Limitado la an panahon han pangani; diri angay magkarag hin panahon. Ikaduha, malilipay ka samtang nakikita mo nga an mga tawo namamati han maopay nga sumat. An Biblia nasiring: “An mga tawo nagrarayhak ha panahon han pangani.” (Isa. 9:3) Ngan ikatulo, kikitaon mo an tagsa nga tawo sugad nga potensyal nga  magin disipulo, salit ipapahiuyon mo an imo presentasyon ha kon ano an nakakapainteres ha iya.

4. Ano an aton mahibabaroan kan apostol Pablo hini nga artikulo?

⁴ Waray hunahunaa ni Jesus nga an mga Samaritano diri magigin mga disipulo niya, pariho han bangin ginhunahuna han iya mga sumurunod. Lugod, ginhunahuna niya hira sugad nga potensyal nga mga disipulo. Kita liwat, kinahanglan hunahunaon naton an mga tawo ha aton teritoryo sugad nga potensyal nga mga disipulo han Kristo. Hi apostol Pablo nagpakita hin maopay gud nga ehemplo nga angay naton sundon. Ano an aton mahibabaroan ha iya? Hini nga artikulo, hihisgotan naton kon paonan-o niya (1) nahibaroan an mga gintotoohan han iya mga ginsasangyawan, (2) nahibaroan an nakakapainteres ha ira, ngan (3) ginhunahuna hira sugad nga potensyal nga mga disipulo ni Jesus.

5. Kay ano nga pamilyar gud hi Pablo ha iya mga mamarati ha sinagoga?

⁵ Pirme nagsasangyaw hi Pablo ha mga sinagoga han mga Judio. Pananglitan ha sinagoga ha Tesalonica, “ha tulo nga sabbath nangatadongan hiya ha [mga Judio] tikang ha Kasuratan.” (Buh. 17:1, 2) Posible nga komportable hi Pablo ha sinagoga. Nagdaku hiya nga Judio. (Buh. 26:4, 5) Pamilyar gud hi Pablo ha mga Judio, salit nakakasangyaw hiya ha ira nga may kompyansa.​—Fil. 3:4, 5.

6. Kay ano nga an mga tawo ha merkado ha Atenas iba ha mga tawo nga ginsangyawan ni Pablo ha sinagoga?

⁶ Katapos pwersahon hi Pablo han mga nagtitimaraot ha iya nga bumaya ha Tesalonica ngan katapos, ha Berea, inabot hiya ha Atenas. Makausa pa, “nagtikang hiya mangatadongan didto ha sinagoga ha mga Judio ngan ha iba nga mga tawo nga nagsisingba ha Dios.” (Buh. 17:17) Pero han nagsasangyaw hi Pablo ha merkado, iba na an iya mga mamarati. Kaupod hito an mga pilosopo ngan iba nga mga Hentil nga naghuhunahuna nga an mensahe ni Pablo “bag-o nga katutdoan.” Hira nagsiring: “Nagyiyinakan ka hin mga butang nga bag-o ha amon pamati.”​—Buh. 17:18-20.

7. Sumala ha Buhat 17:22, 23, paonan-o iginpahiuyon ni Pablo an iya presentasyon?

⁷ Basaha an Buhat 17:22, 23. An paagi han pagpresenta ni Pablo han iya mensahe ha mga Hentil ha Atenas diri pariho han iya pagpresenta hito ha mga Judio ha sinagoga. Posible nga ginhunahuna ni Pablo kon ano an gintotoohan han mga tawo ha Atenas. Gin-obserbaran niya hin maopay an iya palibot ngan gintigamnan an relihiyoso nga mga kustomre han mga tawo. Katapos, gintikangan ni Pablo an iya pakiistorya ha mga tawo mahitungod han kamatuoran ha Kasuratan pinaagi han mga topiko nga ira  ginkakauyonan. “Sugad nga Judio nga Kristiano, nasabtan niya nga an pagano nga mga Griego diri nagsisingba ha ‘tinuod’ nga Dios han mga Judio ngan mga Kristiano,” siring han usa nga komentarista ha Biblia, “pero nangalimbasog hiya nga ipakita nga an Dios nga iya iginpapakilala ha pagkamatuod diri bag-o ha mga taga-Atenas.” Salit andam hi Pablo nga ipahiuyon an iya presentasyon. Ginsidngan niya an mga taga-Atenas nga an iya mensahe nagtikang ha “Diri Kilala nga Dios,” nga ira ginpapangalimbasogan nga singbahon. Bisan kon an mga Hentil diri pamilyar ha Kasuratan, waray maghunahuna hi Pablo nga diri gud hira magigin mga Kristiano. Lugod, ginhunahuna niya hira sugad nga lugas nga hinog na ngan aranihon na, ngan iginpahiuyon niya an iya presentasyon han maopay nga sumat.

8. (a) Paonan-o mo mahibabaroan an relihiyoso nga gintotoohan han mga tawo ha iyo teritoryo? (b) Kon may magsiring nga may kalugaringon na hiya nga relihiyon, ano an mahimo mo ibaton?

⁸ Pariho kan Pablo, magin maobserbaron. Pangita hin mga tigaman nga nagpapakita kon ano an mga gintotoohan han mga tawo ha iyo teritoryo. Ano an dekorasyon han balay o sarakyan han tagbalay? An iya ba ngaran, bado, pag-ayos, o bisan an iya bokabularyo nagpapakita kon ano an iya relihiyon? Bangin nagsiring hiya mismo ha imo nga may relihiyon na hiya. Kon may nasiring hito ha espesyal payunir nga hi Flutura, nabaton hiya, “Kinanhi ako, diri basi ipirit ha imo an akon mga gintotoohan, kondi basi makiistorya ha imo mahitungod hini nga topiko . . . ”

9. Ano nga mga topiko an mahimo pagkauyonan niyo han usa nga relihiyoso nga tawo?

⁹ Ano nga mga topiko an mahimo mo ipakiistorya ha usa nga relihiyoso nga tawo? Pamiling hin mga topiko nga iyo pagkakauyonan. Bangin nagsisingba hiya ha usa la nga Dios, bangin ginkikilala niya hi Jesus sugad nga an Paratalwas han katawohan, o bangin natoo hiya nga nagkikinabuhi na kita ha panahon nga hirani na tapuson an karaotan. Gamita an mga topiko nga iyo ginkakauyonan basi isumat ha iya an mensahe han Biblia ha paagi nga makakapainteres ha iya.

10. Ano an angay naton pangalimbasogan nga buhaton, ngan kay ano?

¹⁰ Hinumdumi nga may mga tawo nga bangin diri natoo ha tanan nga igintututdo han ira relihiyon. Salit bisan kon nahibaroan mo na an relihiyon han usa, paningkamuti nga mahibaroan an iya personal nga gintotoohan. “Ginsasalaktan han damu yana an ira relihiyoso nga gintotoohan hin pilosopiya,” siring ni David nga espesyal payunir ha Australia. Hi Donalta nga taga-Albania nagsiring, “An pipira nga amon nakakaistorya nasiring nga may relihiyon hira, pero ha urhi gin-aamin nira nga diri gud hira natoo ha Dios.” Ngan napansin han usa nga misyonero nga brother ha Argentina nga an iba nga mga tawo nasiring  nga natoo hira ha Trinidad, pero bangin diri gud hira natoo nga an Amay, an Anak, ngan an baraan nga espiritu uusa nga Dios. “An paghibaro hito nabulig nga magin mas masayon an pamiling hin topiko nga pagkakauyonan niyo,” siring niya. Salit pangalimbasugi nga hibaroan kon ano gud an gintotoohan han mga tawo. Tapos, pariho kan Pablo, mahimo ka ‘makiangay ha ngatanan nga klase hin tawo.’​—1 Cor. 9:19-23.

11. Sugad la han nakarekord ha Buhat 14:14-17, paonan-o iginpresenta ni Pablo an iya mensahe ha mga tawo ha Listra ha makapainteres nga paagi?

¹¹ Basaha an Buhat 14:14-17. Nakita ni Pablo kon ano an nakakapainteres han iya mamarati, ngan katapos iya iginpahiuyon an iya presentasyon. Pananglitan, an damu nga tawo nga nakaistorya niya ha Listra may gutiay la o waray gud hinbabaroan ha Kasuratan. Salit nakiistorya hi Pablo ha paagi nga maiintindihan nira. Nakiistorya hiya mahitungod ha produktibo nga pangani ngan abilidad nga maglipay ha kinabuhi. Gumamit hiya hin mga pulong ngan ehemplo nga masayon masabtan han iya mamarati.

12. Paonan-o mo mahibabaroan kon ano an nakakapainteres ha usa ngan maipapahiuyon an imo presentasyon?

¹² Gamit hin pagsabot basi mahibaroan kon ano an nakakapainteres ha mga tawo ha iyo teritoryo ngan ipahiuyon an imo presentasyon. Paonan-o mo mahibabaroan kon ano an nakakapainteres ha usa nga tawo samtang nadaop ka ha iya o ha iya balay? Makausa pa, magin maobserbaron. Bangin nagtatanom hiya, nagbabasa hin libro, nag-aayad hin awto, o may ginhihimo nga iba nga buruhaton. Kon angayan, kay ano nga diri gamiton an iya ginbubuhat basi makagtikang hin pakiistorya ha iya? (Juan 4:7) Bisan an pamado han usa bangin may iginsusumat mahitungod ha iya​—bangin iginpapakita hito kon ano an iya nasyonalidad, trabaho, o paborito nga team ha isport. “Nakiistorya ako ha usa nga 19 anyos nga lalaki nga an T-shirt may piktyur hin sikat nga singer,” siring ni Gustavo. “Ginpakianhan ko hiya parte hito, ngan ginsumatan ako han lalaki kon kay ano nga karuyag niya ito nga singer. Ito nga pakiistorya nagresulta ha pag-aram ha Biblia, ngan yana usa na hiya han aton kabugtoan.”

13. Paonan-o ka makakatanyag hin pag-aram ha Biblia ha makapainteres nga paagi?

 ¹³ Kon nagtatanyag ka hin pag-aram ha Biblia ha usa, himoa ito ha makapainteres nga paagi; ipakita kon paonan-o makakabulig ha iya an pag-aram. (Juan 4:13-15) Pananglitan, an sister nga hi Poppy ginpasulod ha balay han usa nga babaye nga nagpakita hin interes. Han may nakita hi Poppy nga sertipiko ha bungbong nga nagpapakita nga an babaye usa nga propesor nga nag-aram hin education, ginpabug-atan niya nga kita liwat nag-iedukar ha mga tawo pinaagi han aton programa ha pag-aram ha Biblia ngan mga katirok. An babaye nagpa-Bible study, tinambong ha katirok kinabuwasan, ngan waray pag-iha, tinambong ha sirkito nga asembleya. Paglabay hin usa ka tuig, nabawtismohan hiya. Pakianhi an imo kalugaringon: ‘Ano an nakakapainteres ha akon mga ginbabalik-bisita? Maisasaysay ko ba an aton programa ha pag-aram ha Biblia ha paagi nga makakapainteres ha ira?’

14. Paonan-o mo maipapahiuyon ha tagsa nga estudyante an pag-aram ha Biblia?

¹⁴ Kon natikangan mo na an usa nga pag-aram ha Biblia, pag-andam para ha tagsa niyo nga pag-aram, nga ginhuhunahuna an pamilya, edukasyon, eksperyensya, ngan nakakapainteres ha imo estudyante. Samtang nag-aandam ka, pagpili hin mga teksto nga imo babasahon, video nga imo ipapakita, ngan ilustrasyon nga imo gagamiton basi isaysay an mga kamatuoran ha Biblia. Pakianhi an imo kalugaringon, ‘Ano an labi nga makakabantad han kasingkasing hini nga estudyante?’ (Prob. 16:23) Ha Albania, usa nga babaye nga gindudumarahan hin pag-aram han payunir nga hi Flora an marig-on nga nagsiring, “Diri ko maaakseptar an katutdoan nga pagkabanhaw.” Waray pirita ni Flora an babaye nga karawaton ito. Hiya nagsiring, “Nahunahuna ko nga antes hiya tumoo ha pagkabanhaw kinahanglan anay niya makilala an Dios nga nagsasaad hito.” Tikang hito, ha kada nira pag-aaram, ginpapabug-atan ni Flora an gugma, kinaadman, ngan gahum ni Jehova. Ha urhi, tinoo an iya estudyante ha pagkabanhaw. Yana, madasigon na hiya nga Saksi ni Jehova.

15. Sumala ha Buhat 17:16-18, ano nga panggawi han mga taga-Atenas an nakapabaraka kan Pablo, pero kay ano nga padayon hiya nga nagsangyaw ha ira?

¹⁵ Basaha an Buhat 17:16-18. Hi Pablo padayon nga nagsangyaw ha mga taga-Atenas, bisan kon an ira syudad puno hin idolatriya, seksuwal nga imoralidad, ngan pagano nga pilosopiya; waray liwat niya tuguti an ira mga pan-insulto nga magpahunong ha iya ha pagsangyaw. Hi Pablo mismo nagin Kristiano, bisan kon nagin ‘parapasipara hiya ngan paratimaraot ngan arogante nga tawo.’ (1 Tim. 1:13) Sugad la nga ginkita ni Jesus an potensyal ni Pablo nga magin disipulo, ginkita liwat ni Pablo an potensyal han mga taga-Atenas nga magin mga disipulo. Ngan waray hiya magsayop hito nga iya pagsarig.​—Buh. 9:13-15; 17:34.

16-17. Ano an nagpapakita nga an ngatanan nga klase hin tawo mahimo magin mga disipulo han Kristo? Paghatag hin ehemplo.

¹⁶ Han siyahan nga siglo, nagin mga disipulo ni Jesus an ngatanan nga klase hin tawo. Han nagsurat hi Pablo ha mga Kristiano ha Corinto nga usa nga syudad han Gresya, nagsiring hiya nga an iba nga membro hito nga kongregasyon mga kriminal hadto o sobra kaimoral an pagkinabuhi. Katapos nagsiring pa hiya: “Sugad hito an iba ha iyo hadto. Pero ginlimpyohan na kamo.” (1 Cor. 6:9-11) Kon ikaw, huhunahunaon mo daw la nga may potensyal hira nga magbag-o ngan magin mga disipulo?

¹⁷ Yana, damu an andam maghimo han ginkikinahanglan nga mga pagbag-o basi magin mga disipulo ni Jesus. Pananglitan ha Australia, nahibaroan han espesyal payunir nga hi Yukina nga mahimo kumarawat han mensahe han Biblia an ngatanan nga klase hin tawo. Usa ka adlaw, ha usa nga opisina han real estate, napansin niya an  tatoon nga batan-on nga babaye nga sobra kahaluag an bado. Hi Yukina nagsiring: “Nag-alang ako kadali, pero nakiistorya ako ha iya. Nahibaroan ko nga interesado gud hiya ha Biblia kay an iba han iya mga tato mga bersikulo tikang ha Salmo!” Nag-aram ha Biblia an batan-on nga babaye ngan tinambong ha mga katirok. *

18. Kay ano nga diri kita angay maghukom ha mga tawo?

¹⁸ Ginhunahuna ba ni Jesus nga an kaumhan andam na ha pangani kay naglalaom hiya nga an kadam-an nga tawo masunod ha iya? Waray gud. Nagtagna an Kasuratan nga pipira la an matoo ha iya. (Juan 12:37, 38) Ngan hi Jesus may milagroso nga abilidad nga makabasa han kasingkasing. (Mat. 9:4) Pero, nagpokus la gihapon hiya ha pipira nga magpapakita hin pagtoo ngan madasigon nga nagsangyaw ha ngatanan. Diri kita nakakabasa han kasingkasing, salit labi nga kinahanglan naton atohan an tendensya nga maghukom ha usa nga teritoryo o indibiduwal! Lugod, kitaa an potensyal han mga tawo. Hi Marc nga misyonero ha Burkina Faso nagsiring: “An mga tawo nga ginhuhunahuna ko nga mag-uuswag kaurogan na nga amo an nahunong ha pag-aram. Pero an mga tawo nga ginhuhunahuna ko nga diri magpapadayon amo lugod an nag-uuswag. Salit nahibaroan ko nga mas maopay nga magpagiya kita ha espiritu ni Jehova.”

19. Ano an angay naton magin panhunahuna ha mga tawo ha aton teritoryo?

¹⁹ Ha siyahan nga pagkita, sugad hin diri damu ha aton teritoryo an pariho hin lugas nga hinog na ngan angay na anihon. Pero hinumdumi an ginsiring ni Jesus ha iya mga disipulo. An kaumhan busag na, karuyag sidngon, andam na ito ha pag-ani. Mahimo magbag-o an mga tawo ngan magin disipulo han Kristo. Para kan Jehova, ini nga potensyal nga mga disipulo “presyoso nga mga butang.” (Hag. 2:7) Kon kikitaon naton an mga tawo pariho han pagkita ni Jehova ngan ni Jesus, mahibabaroan naton an mga impormasyon mahitungod ha ira ngan an nakakapainteres ha ira. Huhunahunaon naton hira, diri sugad nga mga estranghero, kondi sugad nga potensyal nga kabugtoan.