1. Ano an kinahanglan buhaton han mga Kristiano basi matapos nira an rumba para ha kinabuhi?

AN MGA Kristiano api ha rumba para ha kinabuhi. Bisan kon nagtitikang pa la kita pagdalagan o maiha na kita nga api ha rumba, kinahanglan kita padayon nga dumalagan tubtob nga makaabot ha finish line. An sagdon ni apostol Pablo ha mga Kristiano ha Filipos makakaaghat ha aton nga tapuson an rumba. An pipira nga membro hito nga siyahan-siglo nga kongregasyon maiha na nga nag-aalagad kan Jehova han nakarawat nira an surat ni Pablo. Matinumanon na hira nga nag-aalagad, pero ginpahinumdoman hira ni Pablo nga kinahanglan hira padayon nga mapailubon nga dumalagan. Karuyag niya nga padayon nira nga subaron an iya ehemplo ha ‘pangalimbasog nga makab-ot an tumong.’​—Fil. 3:14.

2. Kay ano nga napapanahon an sagdon ni Pablo ha mga taga-Filipos?

² Napapanahon an sagdon ni Pablo ha mga taga-Filipos. Tikang han naestablisar an kongregasyon, gintimaraot na ito. Nagtikang ito han inabot hira Pablo ngan Silas ha Filipos han mga 50 C.E., tungod han pagkarawat nira han imbitasyon han Dios nga ‘kumadto ha Macedonia.’ (Buh. 16:9) Didto nakilala nira hi Lydia nga “nagpipinamati . . . , ngan gin-abrihan ni Jehova hin bug-os an iya kasingkasing” ha pagkarawat han maopay nga sumat. (Buh. 16:14) Waray pag-iha, nabawtismohan hiya ngan an iya panimalay. Pero an Yawa aktibo. Gindanas han kalalakin-an han syudad hira Pablo ngan Silas pakadto ha mga mahistrado sibil ngan buwa nga gin-akusaran nga nagpapahinabo hin samok. Tungod hito, hira Pablo ngan Silas ginkastigo, ginpriso, ngan ha urhi ginpabaya ha syudad. (Buh. 16:16-40) Inundang ba hira? Waray! Ngan ano man an  ginhimo han kabugtoan ha naiestablisar pa la nga kongregasyon? Nagpakita hira hin maopay nga ehemplo kay nagpailob liwat hira. Sigurado nga nadasig gud hira ha susbaranan nga iginpakita nira Pablo ngan Silas.

3. Ano an nasantop ni Pablo, ngan ano nga mga pakiana an aton hihisgotan?

³ Determinado hi Pablo nga diri umundang. (2 Cor. 4:16) Pero maaram hiya nga basi matapos niya an rumba, kinahanglan hiya magpabilin nga nakapokus ha iya tumong. Ano an aton mahibabaroan ha ehemplo ni Pablo? Ano nga moderno nga mga ehemplo han pagtoo an nagpapakita nga kaya naton makapailob? Ngan paonan-o an aton paglaom magpaparig-on han aton determinasyon nga diri umundang?

4. Paonan-o nagpabilin hi Pablo nga okupado bisan pa han iya kahimtang?

⁴ Hunahunaa an kahimtang ni Pablo han nagsurat hiya ha mga taga-Filipos. Priso hiya ha usa nga balay ha Roma. An iya kagawasan ha pagsangyaw limitado gud. Bisan pa hito, okupado hiya pagsangyaw ha mga nabisita ha iya ngan paghimo hin mga surat para ha higrayo nga kongregasyon. Yana liwat, damu nga Kristiano nga aada na la ha balay an nagsasalingabot nga masangyawan an mga nabisita ha ira. Nagpapadara liwat hira hin surat ha mga tawo nga diri nakakaistorya hin personal.

5. Sumala han ginsiring ni Pablo ha Filipos 3:12-14, ano an nakabulig ha iya nga magpabilin nga nakapokus ha iya tumong?

⁵ Waray tuguti ni Pablo nga mawara an iya pokus tungod han iya naglabay nga kalamposan o han iya naglabay nga mga sayop. Ngani nagsiring hiya nga an ‘paglimot han mga butang nga ginbayaan’ importante basi ‘maabot an mga butang ha unhan,’ karuyag sidngon, basi matapos an rumba. (Basaha an Filipos 3:12-14.) Ano an mahimo makawara han pokus ni Pablo? Siyahan, damu an iya nahimo nga kalamposan ha Judaismo. Pero ginhunahuna niya ito sugad nga “basura.” (Fil. 3:3-8) Ikaduha, bisan kon bangin nakukonsensya pa gihapon hiya han gintimaraot niya an mga Kristiano, waray niya ito tuguti nga makapaundang ha iya pag-alagad. Ngan ikatulo, waray hiya maghunahuna nga damu na an iya nahimo para kan Jehova. Mabungahon an ministeryo ni Pablo bisan kon ginpriso hiya, ginkastigo, ginbato, ngan nakaeksperyensya hin kalunod, pati hin kawaray-pagkaon ngan bado. (2 Cor. 11:23-27) Pero bisan pa han mga kalamposan ngan kakurian nga iya gin-agian, maaram hi Pablo nga kinahanglan niya magpadayon. Ito liwat an kinahanglan naton buhaton.

6. Ano an pipira han “mga butang nga ginbayaan” nga bangin kinahanglan naton kalimtan?

⁶ Paonan-o naton masusubad hi Pablo ha ‘paglimot han mga butang nga ginbayaan’? An pipira ha aton bangin kinahanglan atohan an kakonsensya ha naglabay nga mga sala. Kon ito an imo kahimtang, mahimo ka magtikang hin proyekto ha pag-aram nga nakapokus ha halad-lukat han Kristo. Kon pag-aadman, papamalandungon, ngan ig-aampo naton iton makaparig-on nga topiko, bangin makabulig ito nga maibanan an aton diri kinahanglanon nga kakonsensya. Mahimo pa ngani ito magwara han aton kakonsensya ha mga sala nga ginpasaylo na ni Jehova. Tagda an usa pa nga leksyon nga aton mahibabaroan tikang kan Pablo. An pipira bangin ginbayaan an ira trabaho nga daku an kità basi unahon an Ginhadian. Kon ito an aton kahimtang, puydi ba naton kalimtan an mga butang nga ginbayaan pinaagi ha diri na paghingyap han mga oportunidad nga mahimo unta naton makab-ot? (Num. 11:4-6; Ecles. 7:10) “An mga butang nga ginbayaan” mahimo mag-upod han mga kalamposan o kakurian nga aton gin-agian. Syempre, an paghinumdom kon paonan-o kita ginbendisyonan ngan ginsuportaran ni Jehova han naglabay mabulig nga magin duok kita ha aton Amay. Pero diri gud  kita maghunahuna nga igo na an aton mga nabuhat, nga tungod hito maghuhunahuna kita nga tapos na an aton buruhaton.​—1 Cor. 15:58.

7. Sumala ha 1 Corinto 9:24-27, ano an kinahanglan buhaton basi magdaog ha rumba para ha kinabuhi? Iilustrar.

⁷ Nasabtan gud ni Pablo an ginsiring ni Jesus: “Paniguro gud kamo.” (Luc. 13:23, 24) Maaram hi Pablo nga pariho han Kristo, kinahanglan hiya maniguro tubtob ha kataposan. Iginpariho niya an Kristiano nga pagkinabuhi ha usa nga rumba. (Basaha an 1 Corinto 9:24-27.) An usa nga paradalagan ha rumba pirme naghuhunahuna han finish line ngan diri natugot nga mawara an iya pokus. Pananglitan, an mga paradalagan yana ha rumba nga ginhihimo ha syudad bangin umagi ha mga lugar nga may mga negosyo ngan iba pa nga butang nga mahimo magwara han ira pokus. Mahuhunahuna mo ba nga maundang an usa nga paradalagan basi kitaon an mga nakadispley ha tindahan? Diri gud niya ito hihimoon kon karuyag niya magdaog! Ha rumba para ha kinabuhi, kinahanglan liwat naton likyan an mga butang nga mahimo magwara han aton pokus. Kon pirme kita magpupokus ha aton tumong ngan maniniguro gud pariho han ginbuhat ni Pablo, makakarawat naton an premyo!

8. Ano an tulo nga pagsari nga aton hihisgotan?

⁸ Hisgotan naton yana an tulo nga pagsari nga mahimo magpaluya ha aton​—nalalangan nga mga ginpapamulat, nagtitikaluya nga lawas, ngan nagpapadayon nga mga pagsari. Makakabulig ha aton an paghibaro kon paonan-o ini nga mga kahimtang nalamposan han iba.​—Fil. 3:17.

9. Ano an mahimo magin epekto ha aton han nalalangan nga mga ginpapamulat?

⁹ Nalalangan nga mga ginpapamulat. Natural la nga hingyapon naton an mag-opay nga butang nga iginsaad ni Jehova. Ngani, han an propeta ni Jehova nga hi Habakuk nagpahayag nga karuyag na niya nga tapuson ni Jehova an maraot nga kahimtang ha Juda, ginsugo hiya ni Jehova nga ‘padayon ito nga pamulaton.’ (Hab. 2:3) Pero kon baga hin nalalangan an katumanan han aton mga ginpapamulat, mahimo ito magwara han aton kadasig. Posible pa ngani kita manluya. (Prob. 13:12) Ini an nahitabo ha tinikangan han  ika-20 ka siglo. Hito nga panahon, naglalaom an damu nga dinihogan nga makakarawat nira an ira langitnon nga balos ha 1914. Han waray ito mahitabo, ano an ginbuhat han matinumanon nga kabugtoan han nalangan an ira ginpapamulat?

10. Ano an ginbuhat han usa nga mag-asawa han nalangan an ira ginpapamulat?

¹⁰ Tagda an ehemplo han duha nga maunungon nga kabugtoan nga naglampos ha sugad nga pagsari. Hi Bugto Royal Spatz, nabawtismohan han 1908 han 20 anyos hiya. Kombinsido gud hiya nga diri mag-iiha, makakarawat na niya an iya balos. Ngani, han pangangasaw-on na niya hi Pearl han 1911, ginsidngan niya hiya: “Maaram ka na kon ano an mahitatabo ha 1914. Kon mag-aasawa kita, mas maopay kon diri na naton ito pag-inihaon!” Inundang ba inin Kristiano nga mag-asawa ha rumba para ha kinabuhi han waray nira makarawat an ira langitnon nga balos han 1914? Waray, kay an ira gud pokus amo an bug-os nga pagtuman han kaburut-on han Dios, diri an pagkarawat han ira balos. Determinado hira nga mapailubon nga dalaganon an rumba. Ha pagkatinuod, nagpadayon gud nga aktibo ngan matinumanon hira Royal ngan Pearl ha sulod hin mga dekada tubtob nga natapos an ira kinabuhi dinhi ha tuna. Sigurado nga ginhihingyap mo gud nga makita nga ginbibindikar ni Jehova an iya ngaran ngan pagkasoberano ngan gintutuman an iya mga saad. Sarig nga mahitatabo ini ha itinanda nga panahon ni Jehova. Samtang waray pa ito, hinaot padayon kita nga magin sagipo ha pag-alagad ha aton Dios ngan diri naton tugotan an nalalangan nga mga ginpapamulat nga magwara han aton kadasig o magpaluya ha aton.

11-12. Kay ano nga padayon kita nga makakag-alagad bisan kon nagtitikaluya na an aton lawas? Paghatag hin ehemplo.

¹¹ Nagtitikaluya nga lawas. Diri pariho ha literal nga paradalagan, diri kinahanglan nga magin mahimsog an imo lawas basi padayon nga magin marig-on ha espirituwal. Ngani, damu hadton nagtitikaluya an lawas an determinado la gihapon nga mag-uswag ha espirituwal. (2 Cor. 4:16) Pananglitan, han 88 anyos hi Bugto Arthur Secord * nag-aalagad hiya ha Bethel hin 55 ka tuig na, nga hito nga panahon maluya na hiya. Usa nga nars an dinaop ha iya higdaan basi asikasuhon hiya. Kumita ha iya an nars ngan may pagkabuotan nga nagsiring: “Bugto Secord, damu na gud an imo nabuhat ha pag-alagad kan Jehova.” Pero hi Bugto Arthur waray magpokus ha naglabay. Siniplat hiya ha nars, hiniyom, ngan nagsiring: “Oo, tinuod ito. Pero diri an aton mga nahimo an importante. Mas importante an aton mga ginhihimo yana.”

¹² Bangin maiha ka na nga nag-aalagad kan Jehova pero yana, tungod han imo nagtitikaluya nga lawas, diri mo na nahihimo an imo nahihimo hadto. Kon amo, ayaw panluya. Sarig nga  ginpapabilhan ni Jehova an imo matinumanon nga pag-alagad han naglabay. (Heb. 6:10) Ngan tigamni nga an aton bug-os-kalag nga debosyon diri nasusukol ha kadamu han aton ginhihimo ha pag-alagad kan Jehova. Lugod, iginpapakita naton an kahilarom han aton debosyon pinaagi ha pagkaada positibo nga disposisyon ngan ha pagbuhat han ngatanan naton nga mahihimo. (Col. 3:23) Maaram hi Jehova han aton mga limitasyon ngan diri hiya naglalaom hin labaw kay han aton mahihimo.​—Mar. 12:43, 44.

13. Paonan-o an eksperyensya nira Anatoly ngan Lidiya nag-aaghat ha aton nga magpadayon bisan pa han damu nga pagsari?

¹³ Nagpapadayon nga mga pagsari. An pipira han mga surugoon ni Jehova nag-aantos hin mga kakurian ngan pagtimaraot hin maiha nga panahon. Pananglitan, 12 anyos pa la hi Anatoly Melnik * han gindakop, ginpriso, ngan gindistyero an iya tatay ha Siberia, nga sobra 7,000 ka kilometro an kahirayo tikang ha iya pamilya ha Moldova. Paglabay hin usa ka tuig, hi Anatoly, an iya nanay, ngan an iya lolo ngan lola igindistyero liwat ha Siberia. Waray pag-iha, nakatambong hira ha mga katirok ha usa nga baryo, pero kinahanglan nira magbaktas hin 30 ka kilometro ha niebe, nga gin-aantos an duro nga kahagkot. Ha urhi, napriso hi Bugto Melnik hin tulo ka tuig, hirayo ha iya asawa nga hi Lidiya ngan ha ira usa ka tuig nga anak. Bisan pa han kakurian ha sulod hin katuigan, hi Anatoly ngan an iya pamilya nagpadayon nga matinumanon. Yana, ha edad nga 82, nag-aalagad hi Anatoly sugad nga membro han Komite han Sanga ha Central Asia. Pariho kanda Anatoly ngan Lidiya, hinaot buhaton naton an ngatanan nga aton mahihimo ha pag-alagad kan Jehova ngan padayon nga magpailob sugad la han aton ginhimo ha naglabay.​—Gal. 6:9.

14. Ano an nasantop ni Pablo nga kinahanglan niya himoon basi makab-ot an iya tumong?

¹⁴ Kombinsido hi Pablo nga matatapos niya an rumba ngan makakab-ot an iya tumong. Sugad nga dinihogan nga Kristiano, naglalaom hiya nga makakarawat niya an “premyo nga langitnon nga pagtawag han Dios.” Pero basi makab-ot ito, nasantop niya nga kinahanglan padayon hiya nga ‘mangalimbasog.’ (Fil. 3:14) Gumamit hi Pablo hin makapainteres nga ilustrasyon basi buligan an mga taga-Filipos nga pirme magpokus ha ira tumong.

15. Paonan-o gin-gamit ni Pablo an ilustrasyon han pagkatuminungnong ha pagdasig ha mga Kristiano ha Filipos nga padayon nga ‘mangalimbasog’?

¹⁵ Ginpahinumdoman ni Pablo an mga taga-Filipos mahitungod han ira langitnon nga pagkatuminungnong. (Fil. 3:20) Kay ano nga importante  ito nga pagkatuminungnong? Hito nga panahon, an Romano nga pagkatuminungnong damu an kapulsanan. * Kondi, an dinihogan nga mga Kristiano may mas maopay nga pagkatuminungnong, nga mas damu gud an kapulsanan. Gutiay gud la an kapulsanan han Romano nga pagkatuminungnong kon ikompara hito! Tungod hini, gin-aghat ni Pablo an mga taga-Filipos nga “magpadayon . . . sugad nga mga tuminungnong nga takos ha maopay nga sumat mahitungod han Kristo.” (Fil. 1:27, ftn.) An dinihogan nga mga Kristiano yana nagpapakita hin susbaranan pinaagi han ira paningkamot nga makab-ot an tumong nga kinabuhi nga waray kataposan ha langit.

16. Ha langit man o ha tuna an aton paglaom, ano an kinahanglan naton padayon nga buhaton sumala ha Filipos 4:6, 7?

¹⁶ Naglalaom man kita nga mabuhi hin waray kataposan ha langit o ha Paraiso nga tuna, kinahanglan padayon kita nga maningkamot nga makab-ot ito nga tumong. Anoman an aton kahimtang, kinahanglan diri na naton paghinunahunaon an mga butang nga aton na ginbayaan; diri liwat naton tugotan nga may makaulang ha aton pag-alagad. (Fil. 3:16) An katumanan han aton mga ginpapamulat bangin baga hin nalalangan, o bangin nagtitikaluya an aton lawas. Bangin nakakaeksperyensya kita hin kakurian ngan pagtimaraot hin maiha na nga panahon. Anoman an imo kahimtang, “ayaw . . . kabaraka ha bisan ano nga butang.” Lugod, ipahibaro ha Dios an imo mga hangyo ngan pangamuyo, ngan tatagan ka niya hin kamurayawan nga labaw pa han imo nahuhunahuna.​—Basaha an Filipos 4:6, 7.

17. Ano an aton hihisgotan ha sunod nga artikulo?

¹⁷ Pariho hin paradalagan nga naniniguro nga makaabot ha finish line, hinaot magpabilin kita nga nakapokus ha aton tumong nga matapos an rumba para ha kinabuhi. Tubtob nga kaya pa han aton lawas ngan kahimtang, hinaot maniguro ngan magpadayon gud kita ha pagkab-ot han maopay nga mga saad nga matutuman ha tiarabot. Ano an aton bubuhaton basi makapadayon ha husto nga direksyon ngan ha kalaksihon nga kaya la naton? An sunod nga artikulo mabulig ha aton nga magkaada husto nga prayoridad ngan “masiguro . . . an mas importante nga mga butang.”​—Fil. 1:9, 10.