1. Hin-o an binulig ha pag-establisar han kongregasyon ha Filipos?

HAN hira apostol Pablo, Silas, Lucas, ngan Timoteo kinadto ha Filipos nga kolonya han Roma, nakita nira nga damu an interesado ha mensahe han Ginhadian. Inin madasigon nga kabugtoan binulig ha pag-establisar hin kongregasyon, ngan an ngatanan nga disipulo nagtikang magkatirok, posible ha balay han maabiabihon nga tumuroo nga hi Lydia.​—Buh. 16:40.

2. Ano nga pagsari an gin-atubang hito nga kongregasyon?

² Waray pag-iha, inin bag-o la nga kongregasyon inatubang hin pagsari. Ginpagios ni Satanas an mga kaaway han kamatuoran nga nangangalas gud han pagsangyaw hinin maunungon nga mga Kristiano. Hira Pablo ngan Silas gin-aresto, ginkastigo gamit an mga balbag, ngan ginpriso. Han ginpagawas hira ha prisohan, ginbisita nira an bag-o nga mga disipulo ngan gindasig hira. Katapos, hira Pablo, Silas, ngan Timoteo binaya ha syudad pero hi Lucas posible nga nagpabilin didto. Ano an ginbuhat hinin bag-o la nga kongregasyon? Ha bulig han espiritu ni Jehova, an bag-o nga mga tumuroo nagpadayon pag-alagad kan Jehova. (Fil. 2:12) May rason gud hi Pablo nga malipay ha ira!

3. Sumala ha Filipos 1:9-11, ano an igin-ampo ni Pablo?

³ Paglabay hin mga napulo ka tuig, hi Pablo nagsurat ha kongregasyon han Filipos. Samtang ginbabasa mo ito nga surat, makikita mo dayon an gugma ni Pablo ha iya kabugtoan. Nagsurat hiya: “Nahihidlaw ako ha iyo ngatanan kay may-ada ako malumo nga pagpalangga ha iyo sugad han kan Kristo Jesus.” (Fil. 1:8) Siring niya ha iya surat nga igin-aampo niya hira. Naghangyo hiya kan Jehova nga buligan hira nga madugangan an ira gugma, masiguro  an mas importante nga mga butang, magin waray kasaypanan, magin diri hiparakdolan, ngan padayon nga magkaada matadong nga bunga. Yana, magpapahimulos liwat kita hinin kinasingkasing nga mga pulong ni Pablo. Salit basahon naton an surat ni Pablo ha mga taga-Filipos. (Basaha an Filipos 1:9-11.) Katapos, aton ikukonsiderar an mga punto nga iya gin-unabi ngan hihisgotan kon paonan-o naton maiaaplikar ito.

4. (a) Sumala ha 1 Juan 4:9, 10, paonan-o iginpakita ni Jehova an iya gugma ha aton? (b) Mationan-o kadaku nga gugma an kinahanglan naton ipakita ha Dios?

⁴ Iginpakita ni Jehova an iya daku nga gugma ha aton pinaagi ha pagsugoa han iya Anak nganhi ha tuna basi mamatay para ha aton mga sala. (Basaha an 1 Juan 4:9, 10.) An diri makikalugaringon nga gugma han Dios nagpapagios ha aton nga higugmaon hiya. (Roma 5:8) Mationan-o kadaku nga gugma an kinahanglan naton ipakita ha Dios? Ginbaton ni Jesus ito nga pakiana han ginsidngan niya an usa nga Pariseo: “Higugmaa hi Jehova nga imo Dios ha bug-os mo nga kasingkasing ngan ha bug-os mo nga kalag ngan ha bug-os mo nga hunahuna.” (Mat. 22:36, 37) Diri naton karuyag nga diri magin bug-os an aton gugma ha Dios. Lugod, karuyag naton nga magtikahilarom an aton gugma ha iya kada adlaw. Ginsidngan ni Pablo an mga taga-Filipos nga kinahanglan “madugangan pa gud an [ira] gugma.” Ano an mahimo naton buhaton basi mapahilarom an aton gugma ha Dios?

5. Paonan-o naton mapapahilarom an aton gugma?

⁵ Kinahanglan makilala naton an Dios basi higugmaon hiya. An Biblia nasiring: “An bisan hin-o nga diri nahigugma diri nakilala ha Dios, kay an Dios gugma.” (1 Juan 4:8) Iginpakita ni apostol Pablo nga basi maghilarom an aton gugma ha Dios kinahanglan magkaada kita “husto nga kahibaro ngan bug-os nga pagsabot” ha Iya. (Fil. 1:9) Han nagtikang kita mag-aram ha Biblia, nakultibar naton an gugma ha Dios pinaagi han limitado nga kahibaro han iya mag-opay nga kalidad. Samtang nagtitikadamu an aton nahibabaroan mahitungod kan Jehova, nagtitikahilarom an aton gugma ha iya. Tungod hito, gintatagad naton an regular nga pag-aram ngan pagpamalandong ha Pulong han Dios sugad nga usa han pinakaimportante ha aton kinabuhi!​—Fil. 2:16.

6. Sumala ha 1 Juan 4:11, 20, 21, ha ano nga paagi madudugangan naton an aton gugma?

⁶ An daku nga gugma ha aton han Dios magpapagios ha aton nga higugmaon an kabugtoan. (Basaha an 1 Juan 4:11, 20, 21.) Bangin maghunahuna kita nga magigin masayon la an paghigugma ha aton kabugtoan. Tungod ini kay nagsisingba kita kan Jehova ngan naniningkamot ha pagsubad han iya mag-opay nga kalidad. Ginsusubad naton an ehemplo ni Jesus, nga daku gud an gugma salit iginhatag niya an iya kinabuhi para ha aton. Pero bangin may mga panahon nga makuri an pagsugot han sugo nga higugmaon an usa kag usa. Tagda an usa nga nahitabo ha kongregasyon han Filipos.

7. Ano an aton mahibabaroan ha sagdon ni Pablo kanda Euodia ngan Sintike?

⁷ Hira Euodia ngan Sintike madasigon nga kabugtoan nga nag-alagad kaupod ni apostol Pablo. Pero, bangin gintugotan nira an diri pagkasinabtanay nga magwara han ira maopay nga relasyon. Ha surat ni Pablo ha kongregasyon hinin duha nga bugto, espisipiko nga ginngaranan niya hira Euodia ngan Sintike ngan prangka nga ginsagdonan nga “magkaada pariho nga hunahuna.” (Fil. 4:2, 3) Ginhunahuna ni Pablo nga kinahanglan sagdonan niya an bug-os nga kongregasyon: “Padayon nga buhata niyo an ngatanan nga butang nga waray pagngurutob ngan mga argumento.” (Fil. 2:14) Sigurado, an prangka nga sagdon ni Pablo nakabulig diri la hinin duha nga maunungon nga bugto kondi pati ha  bug-os nga kongregasyon nga maparig-on an bugkos han ira gugma ha usa kag usa.

8. Ano an usa nga daku nga ulang ha paghigugma ha aton kabugtoan, ngan paonan-o naton ito malalamposan?

⁸ Pariho kanda Euodia ngan Sintike, bangin may daku nga nakakaulang ha aton nga mapatubo an hilarom nga gugma ha iba​—an tendensya nga magpokus ha kaluyahan. Kita ngatanan nakakasala kada adlaw. Kon padayon kita nga magpupokus ha kaluyahan han iba, an aton gugma ha ira magtutugnaw. Pananglitan, kon nalimot an usa nga bugto ha pagbulig ha aton ha paglimpyo han Kingdom Hall, bangin maaringit kita. Kon pag-inihapon naton an ngatanan nga sayop han aton bugto, magduduro an aton kaaringit ngan an aton gugma ha iya maiibanan. Kon pariho hini an imo sitwasyon, maopay kon papamalandungon naton ini nga kamatuoran: Nakikita ni Jehova an aton kaluyahan pati an kaluyahan han aton bugto. Bisan pa hini nga mga kaluyahan, hinigugma la gihapon niya an aton bugto pati kita. Tungod hini, kinahanglan naton subaron an gugma ni Jehova ngan tipigan an positibo nga panhunahuna ha aton kabugtoan. Kon maniningkamot kita nga higugmaon an kabugtoan, mapaparig-on naton an aton pagkaurosa.​—Fil. 2:1, 2.

9. Ano an nahiuupod ha “mas importante nga mga butang” nga gin-unabi ni Pablo ha iya surat ha mga taga-Filipos?

⁹ Gin-giyahan hi Pablo han baraan nga espiritu nga sagdonan an mga taga-Filipos​—ngan an ngatanan nga Kristiano—​nga ‘siguruhon an mas importante nga mga butang.’ (Fil. 1:10) Inin importante nga mga butang nag-uupod han pagbaraan han ngaran ni Jehova, katumanan han iya mga katuyoan, ngan han kamurayawan ngan pagkaurosa han kongregasyon. (Mat. 6:9, 10; Juan 13:35) Kon gin-uuna naton ha aton kinabuhi inin importante nga mga butang, ginpapamatud-an naton nga hinigugma naton hi Jehova.

10. Ano an kinahanglan naton buhaton basi mawaray kita kasaypanan?

¹⁰ Hi Pablo nagsiring liwat nga kinahanglan ‘mawaray kita kasaypanan.’ Diri ini nagpapasabot nga kinahanglan magin perpekto kita. Diri naton matutupngan an pagin waray kasaypanan ni Jehova nga Dios. Pero magigin waray kasaypanan kita ha pagkita ni Jehova kon bubuhaton naton an aton pinakamaopay ha pagpahilarom han aton gugma ngan pagsiguro ha mas importante nga mga butang. Usa nga paagi nga maipapakita naton an aton gugma amo an pagbuhat han aton bug-os nga mahihimo nga diri makapakdol ha iba.

11. Kay ano nga kinahanglan diri kita makapakdol ha iba?

¹¹ An sagdon nga diri makapakdol ha iba usa gud nga pahamangno. Paonan-o kita mahimo makapakdol? Puydi kita makapakdol pinaagi han aton ginpipili nga kaliawan, bado, o trabaho. An aton ginbubuhat bangin diri man maraot. Pero kon an aton mga ginpipili diri ginkakarawat han konsensya han usa ngan napapakdol hiya hito, seryoso gud ito. Hi Jesus nagsiring nga mas maopay pa nga bitayan an aton liog hin mabug-at nga bato ngan iglabog ha dagat kay ha makapakdol kita ha usa han iya mga karnero!​—Mat. 18:6.

12. Ano an aton mahibabaroan ha ehemplo han mag-asawa nga payunir?

¹² Tagda kon paonan-o igin-aplikar han usa nga mag-asawa nga payunir an pahamangno ni Jesus. Nag-aalagad hira ha kongregasyon nga may bag-o la nga bawtismado nga mag-asawa nga nagdaku ha konserbatibo nga pamilya. Para hinin bag-ohan nga mag-asawa, an mga Kristiano diri puydi magkita hin sine bisan kon an pelikula waray natatalapas nga balaud. Nahipakdol hira han hinbaroan nira nga an mag-asawa nga payunir nagkita hin sine. Tikang hito, waray na  magkita hin sine an mag-asawa nga payunir tubtob han nabansay na han bag-ohan nga mag-asawa an ira konsensya nga magin mas timbang na. (Heb. 5:14) Tungod han pagin diri makikalugaringon han mag-asawa nga payunir, ginpamatud-an nira nga hinigugma nira an bag-o nga kabugtoan diri la ha pulong kondi pati ha buhat.​—Roma 14:19-21; 1 Juan 3:18.

13. Paonan-o naton mahimo maaghat an usa nga makasala?

¹³ Usa pa nga paagi nga mahimo kita makapakdol amo an pag-aghat ha usa nga makasala. Paonan-o ito mahimo mahitabo? Tagda ini nga sitwasyon. Katapos hin maiha nga pagpinaniguro, nalamposan gihap han usa nga estudyante ha Biblia an iya pagin parahubog. Nagdesisyon hiya nga diri na gud hiya mainom hin de-alkohol. Madagmit hiya nga nag-uswag ngan nagpabawtismo. Makausa, gin-imbitar an bag-ohan nga bugto para ha Kristiano nga pagturotarampo ngan gin-aghat hiya nga uminom han bugto nga nangimbitar, nagsiring ito: “Kristiano ka na; may-ada ka na han espiritu ni Jehova. Usa nga bahin han baraan nga espiritu amo an pagpugong ha kalugaringon. Kon magpupugong ka ha imo kalugaringon, makukontrol mo an pag-inom hin de-alkohol.” Makasurubo gud an magigin resulta kon an bag-ohan nga bugto mamamati hiton sayop nga sagdon!

14. Paonan-o an mga katirok nabulig ha aton nga maiaplikar an sagdon ha Filipos 1:10?

¹⁴ An aton mga katirok nabulig ha aton nga maiaplikar ha damu nga paagi an sagdon ha Filipos 1:10. Siyahan, an ginhihisgotan nga hura nga espirituwal nga pagkaon nagpapahinumdom ha aton kon ano an ginhuhunahuna ni  Jehova nga mas importante. Ikaduha, gintututdoan kita kon paonan-o iaaplikar an aton nahibabaroan basi mawaray kita kasaypanan. Ngan ikatulo, gin-aaghat kita ha “pagpakita hin gugma ngan mag-opay nga mga buhat.” (Heb. 10:24, 25) Samtang mas nadadasig kita han kabugtoan, mas naghihilarom an aton gugma ha Dios ngan ha kabugtoan. Kon hinigugma gud naton an Dios ngan an kabugtoan, hihimoon naton an ngatanan nga diri kita makapakdol ha kabugtoan.

15. Ano an iginpapasabot han ‘mapuno han matadong nga bunga’?

¹⁵ Sinsero nga nag-ampo hi Pablo nga an mga taga-Filipos ‘mapuno han matadong nga bunga.’ (Fil. 1:11) Sigurado nga inin “matadong nga bunga” nag-uupod han ira gugma kan Jehova ngan ha iya katawohan. Nahiuupod liwat hito an ira pakiistorya ha iba mahitungod han ira pagtoo kan Jesus ngan han ira makalilipay nga paglaom. An Filipos 2:15 nag-uunabi hin iba pa nga ilustrasyon nga amo an ‘paglamrag sugad nga mga suga ha kalibotan.’ Angayan ini tungod kay gintawag ni Jesus an iya mga disipulo sugad nga “an kalamrag han kalibotan.” (Mat. 5:14-16) Ginsugo liwat niya an iya mga sumurunod nga ‘manhimo hin mga disipulo,’ ngan nagsiring hiya nga magigin “mga saksi [hira] . . . ngadto ha pinakahirayo nga bahin han tuna.” (Mat. 28:18-20; Buh. 1:8) Nagkakaada kita “matadong nga bunga” kon aktibo kita nga nakikigbahin hinin pinakaimportante nga buruhaton.

16. Paonan-o iginpapakita han Filipos 1:12-14 nga mahimo kita maglamrag sugad nga suga bisan pa ha magkuri nga sitwasyon? (Kitaa an retrato ha kobre.)

¹⁶ Anoman an aton sitwasyon, mahimo kita maglamrag sugad nga mga suga. Ha pipira nga kahimtang, adton baga hin ulang ha aton pagpasamwak han maopay nga sumat mahimo makahatag hin oportunidad nga makasangyaw kita. Pananglitan, hi apostol Pablo priso ha usa nga  balay ha Roma han nagsurat hiya ha mga taga-Filipos. Pero an iya mga kadena waray makapugong ha iya pagsangyaw ha mga gwardya ngan ha mga nabisita ha iya. Hi Pablo madasigon nga nagsangyaw ha sugad nga kahimtang, ngan tungod hini, an kabugtoan nagkaada kompyansa ngan kaisog “ha pagyakan han pulong han Dios hin waray kahadlok.”​—Basaha an Filipos 1:12-14; 4:22.

17. Paghatag hin ehemplo han kabugtoan nga nakakasangyaw la gihapon bisan pa ha magkuri nga kahimtang.

¹⁷ Damu han aton kabugtoan an may higayon nga masubad an kaisog ni Pablo. Nag-uukoy hira ha mga nasud diin diri hira nakakasangyaw ha publiko o ha balay-balay, salit namimiling hira hin iba nga paagi nga maisangyaw an maopay nga sumat. (Mat. 10:16-20) Ha usa nga nasud, may paramangno han sirkito nga nagsuhestyon nga kobrehan han tagsa nga magwarali an iya personal nga “teritoryo” nga nag-uupod han mga paryente, amyaw, kaeskwela, katrabaho, ngan kakilala. Ha sulod hin duha ka tuig, nagdamu gud an kongregasyon hito nga sirkito. Bangin diri kita nag-uukoy ha nasud nga igindidiri an pagsangyaw. Kondi, may mahibabaroan kita nga importante nga leksyon ha ehemplo han aton madiskarte nga kabugtoan: Pirme pamiling hin paagi nga bug-os nga makigbahin ha ministeryo, nga nasarig nga tatagan ka ni Jehova hin kusog nga imo ginkikinahanglan basi malamposan an anoman nga ulang.​—Fil. 2:13.

18. Ano an kinahanglan naton magin determinasyon?

¹⁸ Hinin makuri nga panahon, hinaot magin determinado kita nga iaplikar an sagdon ni Pablo ha iya surat ha mga taga-Filipos. Hinaot siguruhon naton an mas importante nga mga butang, mawaray kita kasaypanan, diri kita magin hiparakdolan, ngan magkaada kita matadong nga bunga. Kon bubuhaton naton ini, madudugangan an aton gugma ngan mapapasidunggan an aton mahigugmaon nga Amay, hi Jehova.