NAGHIHINGYAP ka ba hin usa nga toka ha kongregasyon nga diri mo pa nakakab-ot? Bangin usa ito nga responsabilidad nga igintoka ha iba. O bangin usa ito nga toka, o pribilehiyo, nga imo napahimulosan hadto. Pero tungod ha edad, maluya nga kahimsog, makuri nga panginabuhi, o responsabilidad ha pamilya, nalilimitahan na yana an imo nahihimo. O bangin kinahanglan mo bumaya ha imo maiha na nga toka tungod han mga pagbag-o ha organisasyon. Anoman an hinungdan, bangin inaabat mo nga diri mo na nahihimo an ngatanan nga karuyag mo buhaton ha pag-alagad ha Dios. Salit, normal la nga usahay bangin umabat ka nga napakyas ka. Bisan pa hito, paonan-o mo madadaog an negatibo nga mga pagbati sugad han panluya, kasina, o pagdumot? Paonan-o ka makakapabilin nga malipayon?

May mahibabaroan kita nga leksyon kon paonan-o magpapabilin nga malipayon pinaagi ha paghisgot han susbaranan ni Juan Bawtista. Hi Juan may-ada makalilipay nga mga pribilehiyo, pero posible nga diri hiya maaram kon ano an mahitatabo ha iya pag-alagad kan Jehova. Bangin waray gud niya mahunahuna nga mas hilawig nga panahon an iya kapriso kay ha iya pagministeryo. Bisan pa hito, nagpabilin hi Juan nga malipayon, ngan gintipigan niya ito nga disposisyon ha iya bug-os nga kinabuhi. Ano an nakabulig ha iya? Ngan paonan-o naton matitipigan an aton kalipay bisan kon nakakaeksperyensya kita hin kapakyasan?

Han katsaringsing han 29 C.E., gintikangan ni Juan an iya toka, nga amo an pag-andam han katawohan ha pag-abot han Mesias. Nagsiring hiya: “Pagbasol kamo, kay an Ginhadian han langit hirani na.” (Mat. 3:2; Luc. 1:12-17) Damu an kumarawat hito. Ngani, damu nga tawo nga tikang ha higrayo nga lugar an kinadto ha iya basi mamati han iya mensahe, ngan damu an nagbasol ngan nagpabawtismo. Maisugon nga ginpahamangnoan liwat ni Juan an nagpapakamatadong nga mga lider han relihiyon mahitungod han paghukom nga naghuhulat ha ira kon diri hira magbag-o. (Mat. 3:5-12) Ginbuhat ni Juan an pinakaimportante nga bahin han iya ministeryo han ginbawtismohan niya hi Jesus han katrakdag han 29 C.E. Tikang hito nga panahon, gin-giyahan ni Juan an mga tawo nga sumunod kan Jesus, an iginsaad nga Mesias.​—Juan 1:32-37.

May kalabotan ha naiiba nga papel ni Juan, hi Jesus nagsiring: “Ha ngatanan nga igin-anak han  kababayin-an, waray bisan hin-o nga inabot nga mas labaw kan Juan Bawtista.” (Mat. 11:11) Sigurado nga nalipay gud hi Juan ha mga bendisyon nga iya nakarawat. Pariho kan Juan, damu liwat yana an nakakakarawat hin damu nga bendisyon. Tagda an bugto nga hi Terry. Hiya ngan an iya asawa nga hi Sandra, sobra 50 ka tuig na ha bug-os-panahon nga pag-alagad. Hi Terry nagsiring: “Damu nga pribilehiyo an akon nakarawat. Nagin payunir ako, Bethelite, espesyal payunir, paramangno han sirkito, paramangno han distrito, ngan yana espesyal payunir na liwat.” Makalilipay gud an pakakarawat hin teokratiko nga mga pribilehiyo, pero sugad han aton mahibabaroan ha ehemplo ni Juan, an pagpabilin nga malipayon nagkikinahanglan hin paningkamot kon nagbabag-o an aton kahimtang.

Nagpabilin hi Juan Bawtista nga malipayon kay gintipigan niya an iya pagin maapresyaron ha iya mga pribilehiyo. Pananglitan, katapos han bawtismo ni Jesus, nagtikaguti an mga disipulo ni Juan ngan nagtikadamu an kan Jesus. Tungod kay nabaraka an mga disipulo ni Juan, ginsidngan nira hiya: “Kitaa, nanbabawtismo hiya, ngan an ngatanan napakadto ha iya.” (Juan 3:26) Binaton hi Juan: “An tag-iya han karaslon nga babaye amo an karaslon nga lalaki. Pero an sangkay han karaslon nga lalaki, ha pagtindog niya ngan pakabati ha iya, nalilipay gud tungod han tingog han karaslon nga lalaki. Salit bug-os na an akon kalipay.” (Juan 3:29) Waray makigkompetensya hi Juan kan Jesus, waray man liwat niya hunahunaa nga waray bili an iya toka tungod kay mas importante an papel ni Jesus. Lugod, nagpabilin hi Juan nga malipayon kay ginpapabilhan niya an iya toka sugad nga “sangkay han karaslon nga lalaki.”

An disposisyon ni Juan nakabulig ha iya nga magpabilin nga kontento bisan kon diri masayon an iya toka. Pananglitan, hi Juan usa nga Nazareo tikang ha katawo, salit diri hiya puydi uminom hin bino. (Luc. 1:15) Ha pag-unabi han simple nga pagkinabuhi ni Juan, hi Jesus nagsiring: “Hi Juan kinanhi, diri hiya nakaon o nainom.” Ha luyo nga bahin, hi Jesus ngan an iya mga disipulo waray sugad nga mga restriksyon ngan nagkaada mas normal nga pagkinabuhi. (Mat. 11:18, 19) Labot pa, bisan kon hi Juan waray maghimo hin mga milagro, maaram hiya nga an mga disipulo ni Jesus, upod na an pipira nga disipulo hadto ni Juan, gintagan hin gahum ha paghimo hin milagro. (Mat. 10:1; Juan 10:41) Imbes nga tugotan ito nga mga butang nga makagwara han iya pokus, nagpabilin hi Juan nga madasigon ha toka nga iginhatag ha iya ni Jehova.

Kon papabilhan liwat naton an aton toka yana ha pag-alagad kan Jehova, matitipigan naton an aton kalipay. Hi Terry nga gin-unabi kanina nagsiring: “Nagpokus ako ha tagsa nga toka nga iginhatag ha akon.” Ha paghinumdom han iya bug-os-panahon nga pag-alagad, hiya nagsiring, “Waray gud ako ginbabasolan lugod makalilipay la nga mga hinumdoman.”

Mapapahilarom naton an aton kalipay ha pag-alagad ha Dios pinaagi ha pagpamalandong ha kon ano an naghahatag han tinuod nga bili han bisan ano nga teokratiko nga toka, o responsabilidad​—an pribilehiyo nga magin “igkasi-magburuhat han Dios.” (1 Cor. 3:9) Sugad la nga natitipigan an kainggat han usa nga birilhon nga panurundon kon pirme ito gintatrapohan, an pirme pagpamalandong ha daku nga dungog nga magin alagad han Dios mabulig nga diri mawara an aton kalipay tungod han sayop nga panhunahuna. Malilikyan naton nga ikompara an aton nahihimo ha mga nahihimo han iba. Diri naton huhunahunaon nga mas gutiay an bili han aton pribilehiyo kay ha pribilehiyo han iba.​—Gal. 6:4.

Posible nga maaram hi Juan nga may tubtoban an iya ministeryo, pero bangin waray niya mahunahuna nga matatapos dayon ito. (Juan 3:30) Han 30 C.E., mga unom ka bulan katapos bawtismohan hi Jesus, iginpapriso hi Juan ni Hadi Herodes. Bisan pa hito, padayon nga ginbuhat ni Juan an iya mahihimo ha pagtutdo ha iba. (Mar. 6:17-20) Ano daw la an nakabulig ha iya nga matipigan an iya kalipay bisan pa hini nga mga pagbag-o? Nagpabilin hiya nga nakapokus ha espirituwal nga mga butang.

Samtang priso hi Juan, nakakarawat hiya hin mga sumat mahitungod ha nag-uuswag nga ministeryo ni Jesus. (Mat. 11:2; Luc. 7:18) Kombinsido hi Juan nga hi Jesus an Mesias pero bangin naghunahuna hiya kon paonan-o tutumanon ni Jesus an ngatanan nga ginsisiring han Kasuratan mahitungod ha bubuhaton  han Mesias. Tungod kay magigin hadi an Mesias, posible ba nga magtikang dayon an pagmando ni Jesus? Magriresulta ba ito ha pagpagawas kan Juan ha prisohan? Tungod kay karuyag gud ni Juan nga mas masabtan pa an papel ni Jesus, ginsugo niya an duha niya nga disipulo basi magpakiana kan Jesus: “Ikaw ba an Usa nga Maabot, o may iba pa kami nga pamumulaton?” (Luc. 7:19) Pagbalik hini nga mga disipulo, sigurado nga namati gud hin maopay hi Juan samtang ira iginsusumat nga milagroso nga nanambal hi Jesus, ngan ginsugo hira nga sumatan hi Juan: “An mga buta nakakakita na yana, an mga piay nakakalakat na, an mga may liprosi nagin limpyo na, an mga bungol nakakabati na, an mga patay nagkabubuhi, ngan an mga pobre ginsusumatan han maopay nga sumat.”​—Luc. 7:20-22.

Sigurado nga naparig-on gud hi Juan han ira sumat. Ginpamatud-an hito nga gintutuman ni Jesus an mga tagna mahitungod han Mesias. Bisan kon an pag-abot ni Jesus diri magriresulta ha pagpagawas kan Juan ha prisohan, maaram hi Juan nga waray makarag an iya pag-alagad. Bisan pa han iya kahimtang, may hinungdan hiya nga malipay.

Pariho kan Juan, kon magpupokus kita ha espirituwal nga mga butang, makakapailob kita nga malipayon ngan may pagpasensya. (Col. 1:9-11) Mahihimo naton ini pinaagi ha pagbasa han Biblia ngan pagpamalandong hito, ngan magpapahinumdom ito ha aton nga an aton pag-alagad ha Dios diri gud karag. (1 Cor. 15:58) Hi Sandra nagsiring: “An pagbasa hin usa ka kapitulo ha Biblia kada adlaw nakabulig ha akon nga magin mas duok kan Jehova. Nabulig ito ha akon nga magpokus ha iya imbes nga ha akon.” Mahimo liwat kita magpokus ha mga report han mga buruhaton han Ginhadian, nga mabulig ha aton nga diri paghinunahunaon an aton kalugaringon nga kahimtang kondi ha kon ano an mga nahihimo ni Jehova. Hi Sandra nagsiring: “An binulan nga mga programa ha JW Broadcasting^® nabulig ha amon nga magin mas duok ha organisasyon ngan magpabilin nga malipayon ha amon toka.”

Gintuman ni Juan Bawtista an iya madaliay nga ministeryo nga may “espiritu ngan gahum nga pariho han kan Elias,” ngan pariho kan Elias, “usa [hiya] nga tawo nga may mga pagbati nga pariho han aton.” (Luc. 1:17; San. 5:17) Kon susubaron naton an iya ehemplo ha pagin maapresyaron ngan pagpokus ha espirituwal, makakapabilin liwat kita nga malipayon ha aton pag-alagad, anoman an mahitabo.