1. Ano an aton ginhihingyap para ha aton mga paryente?

“TIKANG han nahibaro ako han kamatuoran, karuyag ko nga an ngatanan ko nga kapamilya makaupod ko ha Paraiso,” siring han sister nga hi Pauline. * “Ginhihingyap ko gud nga makaupod an akon bana nga hi Wayne ngan an amon anak ha pag-alagad kan Jehova.” May mga paryente ka ba nga diri pa nakilala ngan nahigugma kan Jehova? Bangin inaabat mo liwat an inabat ni Pauline para ha iya pamilya.

2. Ano nga mga pakiana an hihisgotan hini nga artikulo?

² Diri naton mapipirit an aton mga paryente nga karawaton an maopay nga sumat, pero maaaghat naton hira nga abrihan an ira hunahuna ngan kasingkasing ha mensahe han Biblia. (2 Tim. 3:14, 15) Kay ano nga kinahanglan naton sangyawan an aton mga paryente? Kay ano nga kinahanglan kita magpakita hin empatiya? Paonan-o naton mabubuligan an aton mga paryente nga higugmaon liwat hi Jehova? Ngan paonan-o makakabulig ha aton an ngatanan naton nga kakongregasyon?

3. Sumala ha 2 Pedro 3:9, kay ano nga kinahanglan naton sangyawan an aton mga paryente?

³ Diri mag-iiha, bubungkagon ni Jehova ini nga sistema. An matatalwas la adton “may husto nga disposisyon basi magkaada kinabuhi nga waray kataposan.” (Buh. 13:48) Naggagahin kita hin daku nga panahon ngan kusog ha pagsangyaw ha mga diri naton kakilala, salit natural la nga karuyag liwat naton nga mag-alagad kan Jehova an aton mga paryente. An aton mahigugmaon nga  Amay, hi Jehova, ‘diri naruruyag nga mabungkag an bisan hin-o, lugod karuyag niya nga magbasol an ngatanan.’​—Basaha an 2 Pedro 3:9.

4. Kon nagsasangyaw ha aton mga paryente, ano an bangin nahihimo naton nga sayop?

⁴ Hinumdoman naton nga may husto ngan sayop nga paagi ha pagsangyaw han mensahe han katalwasan. Bisan kon bangin mataktika kita kon nagsasangyaw ha diri naton kakilala, bangin sobra kita kaprangka kon nagsasangyaw ha aton mga paryente.

5. Ano an angay naton hinumdoman antes magsangyaw ha aton mga paryente?

⁵ Damu ha aton an bangin nagbabasol han siyahan nga naningkamot kita pagsangyaw ha aton mga paryente ngan naghihingyap nga unta ginhimo naton ito ha iba nga paagi. Ginsagdonan ni apostol Pablo an mga Kristiano: “An iyo mga pulong magin makaruruyag pirme, sugad hin tinimplahan hin asin, basi mahibaro kamo kon paonan-o kamo sadang bumaton ha tagsa nga tawo.” (Col. 4:5, 6) Maopay nga hinumdoman ini nga sagdon kon nakikiistorya kita ha aton mga paryente. Kay kon diri, bangin magpahirayo lugod hira imbes nga mamati.

6-7. Paghatag hin ehemplo kon kay ano nga kinahanglan magpakita hin empatiya ha diri Saksi nga padis.

⁶ Pagpakita hin empatiya. Hi Pauline, nga gin-unabi kanina, nagsiring: “Ha tinikangan, karuyag ko nga pirme espirituwal nga mga butang an ig-inistorya ha akon bana. Diri na kami nag-iistorya mahitungod han ordinaryo nga mga butang.” Pero an bana ni Pauline, nga hi Wayne, diri pamilyar ha Biblia ngan diri nakakasabot han igin-iinistorya ni Pauline. Para ha iya, baga hin waray na iba nga ginhihinunahuna hi Pauline kondi an iya relihiyon. Nabaraka hiya nga bangin inapi an iya asawa hin peligroso nga sekta ngan nauwat la.

⁷ Aminado hi Pauline nga daku nga panahon  ha mga gab-i ngan weekend an iya igin-gagahin ha iya Kristiano nga kabugtoan​—ha mga katirok, pagsangyaw, ngan pagturotarampo. “Usahay nauli hi Wayne nga waray tawo ha balay ngan naabat hin kamingaw,” siring ni Pauline. Natural la nga mingawon hi Wayne ha iya asawa ngan anak. Diri niya kilala an mga tawo nga kaupod han iya magnanay, ngan baga hin mas importante na kan Pauline an iya bag-o nga kasangkayan kay ha kan Wayne. Salit, gintarhog ni Wayne hi Pauline nga makikigdiborsyo hiya. Kon ikaw an aada ha kahimtang ni Pauline, ano an imo nahuhunahuna nga paagi basi mas maipakita an empatiya?

8. Sumala ha 1 Pedro 3:1, 2, ano an posible nga may mas daku nga epekto ha aton mga paryente?

⁸ Magpakita hin susbaranan. Kaurogan na nga mas daku an epekto ha aton mga paryente han aton ginbubuhat kay han aton ginyayakan. (Basaha an 1 Pedro 3:1, 2.) Ito an nasantop ni Pauline. “Maaram ako nga hinigugma kami ni Wayne ngan diri gud niya karuyag makigdiborsyo,” siring niya. “Pero tungod han iya tarhog, nasantop ko nga kinahanglan ko na buhaton an mga butang ha paagi ni Jehova. Imbes nga magyinakan, kinahanglan ko magpakita hin susbaranan pinaagi ha akon panggawi.” Waray na pagpinirita ni Pauline hi Wayne nga makiistorya mahitungod ha Biblia, ngan nakiistorya na hiya mahitungod han ordinaryo nga mga butang. Nakita ni Wayne nga mas mamurayawon na an iya asawa ngan an ira anak nagin mas buotan. (Prob. 31:18, 27, 28) Han naobserbaran ni Wayne an maopay nga epekto ha iya pamilya han mensahe han Biblia, gin-abrihan niya an iya hunahuna ngan kasingkasing ha mensahe han Pulong han Dios.​—1 Cor. 7:12-14, 16.

9. Kay ano nga kinahanglan kita magin mapinadayunon?

⁹ Padayon nga maningkamot ha pagbulig ha imo mga paryente. Nagpakita hi Jehova hin susbaranan  ha aton. “Pauroutro” niya nga gintatagan hin higayon an mga tawo nga karawaton an maopay nga sumat ngan magkaada kinabuhi. (Jer. 44:4) Ngan ginsidngan ni apostol Pablo hi Timoteo nga magpadayon ha pagbulig ha iba. Kay ano? Kay ha pagbuhat hini, matatalwas niya an iya kalugaringon ngan an mga namamati ha iya. (1 Tim. 4:16) Hinigugma naton an aton mga paryente, salit karuyag naton nga mahibaroan nira an kamatuoran nga aada ha Biblia. Ha urhi, an mga pulong ngan buhat ni Pauline nagkaada maopay nga epekto ha iya pamilya. Malipayon hiya yana nga nag-aalagad kan Jehova kaupod han iya bana. Payunir hira nga duha, ngan hi Wayne nag-aalagad sugad nga tigurang.

10. Kay ano nga kinahanglan kita magin mapailubon?

¹⁰ Magin mapailubon. Kon nagkikinabuhi na kita uyon ha mga suruklan han Dios, bangin makurian an aton mga paryente nga karawaton nga bag-o na an aton gintotoohan ngan pagkinabuhi. Kaurogan nga an ira siyahan nga naoobserbaran amo an diri na naton pag-api ha ira ha pagselebrar han relihiyoso nga mga piyesta ngan an diri na pakigbahin ha politika. An pipira han aton mga paryente bangin masina ha aton ha tinikangan. (Mat. 10:35, 36) Pero diri kita angay mawad-an hin paglaom ha ira. Kon umundang kita ha pagbulig ha ira nga maintindihan an aton mga gintotoohan, sugad hin ginhuhukman na naton hira nga diri hira angay kumarawat han kinabuhi nga waray kataposan. Waray ihatag ni Jehova ha aton an pagin hukom​—igintoka niya ito kan Jesus. (Juan 5:22) Kon mapailubon kita, ha urhi, bangin mamati ha aton mensahe an aton mga paryente.​—Kitaa an kahon nga “ Gamita an Aton Website ha Pagtutdo.”

11-13. Ano an imo nahibaroan ha paagi han pagtratar ni Alice ha iya mga kag-anak?

¹¹ Magin marig-on pero mataktika. (Prob. 15:2) Tagda an ehemplo ni Alice. Nahibaro hiya mahitungod kan Jehova han hirayo hiya ha iya mga kag-anak, nga aktibo ha politika ngan mga ateyista. Nasantop niya nga kinahanglan niya hira sumatan dayon mahitungod han mag-opay nga butang nga iya nahibabaroan. “Kon lalanganon mo an pagsumat mahitungod han imo bag-o nga gintotoohan ngan ginbubuhat,” siring ni Alice, “mas masusubo an imo pamilya.” Nagpadara hiya hin mga surat ha iya mga kag-anak, diin nag-uunabi hiya hin mga katutdoan ha Biblia mahitungod han mga topiko nga ginhuhunahuna niya nga makakapainteres ha ira, sugad han gugma, ngan iya gin-aaro an ira opinyon may kalabotan hito. (1 Cor. 13:1-13) Ginpasalamatan niya an iya mga kag-anak tungod ha pagpadaku ngan pag-ataman ha iya, ngan nagpadara hiya hin mga regalo. Kon nabisita hiya ha iya mga kag-anak, ginbubuhat niya an iya bug-os nga mahihimo ha pagbulig ha iya nanay ha mga buruhaton ha balay. Ha tinikangan, waray malipay an mga kag-anak ni Alice han ginsumatan niya hira han iya bag-o nga gintotoohan.

¹² Kon nauli hi Alice ha iya mga kag-anak, gintutuman gud niya an iya eskedyol ha pagbasa han Biblia. “Nakabulig ini nga maintindihan ni Nanay nga importante gud ha akon an Biblia,” siring ni Alice. Hito nga panahon, an tatay ni Alice nagdesisyon nga pag-adman an Biblia basi masabtan niya kon kay ano nga nagbag-o an panhunahuna han iya anak, ngan karuyag niya makabiling hin sayop ha Biblia. “Gintagan ko hiya hin Biblia,” siring ni Alice, “ngan ginsuratan ko ito hin personal nga nota para ha iya.” Ano an resulta? Imbes nga makabiling hin sayop, an tatay ni Alice nabantad gud han iya nabasa ha Pulong han Dios.

¹³ Kinahanglan magin marig-on kita pero mataktika, bisan kon kinahanglan umatubang kita hin mga pagsari. (1 Cor. 4:12b) Pananglitan, kinahanglan ilubon ni Alice an pagkontra han iya nanay. “Han nagpabawtismo ako, gintawag ako ni Nanay nga ‘pasaway nga anak.’” Ano an reaksyon ni Alice? “Imbes nga likyan an isyu, matinalahuron nga nagsiring ako nga nagdesisyon na  ako nga magin Saksi ni Jehova ngan diri na ito mababag-o. Ginpasarig ko hi Nanay nga hinigugma ko gud hiya. Nagtangis kami, ngan ginlutoan ko hiya hin marasa nga pagkaon. Tikang hito, nasantop ni Nanay nga nagin mas maopay ako nga tawo tungod han Biblia.”

14. Kay ano nga kinahanglan diri kita magpapresyur nga magkompromiso?

¹⁴ Bangin mag-iha-iha antes bug-os nga masabtan han aton mga paryente nga importante gud ha aton an pag-alagad kan Jehova. Pananglitan, han nagdesisyon hi Alice pagpayunir imbes nga kab-uton an karera nga karuyag han iya mga kag-anak para ha iya, nagtangis utro an iya nanay. Pero hi Alice nagpabilin nga marig-on. “Kon magpapapresyur ka ha usa nga butang,” siring ni Alice, “posible nga presyuron ka han imo pamilya ha iba pa nga butang. Pero kon buotan ka kondi marig-on ha imo pamilya, an iba ha ira bangin mamati ha imo.” Ito an nahitabo kan Alice. An iya mga kag-anak mga payunir na yana, ngan an iya tatay tigurang na.

15. Sumala ha Mateo 5:14-16 ngan 1 Pedro 2:12, paonan-o an “mag-opay nga mga buhat” han iba mahimo makabulig ha aton mga paryente?

¹⁵ Iginpapahirani ni Jehova ha iya an katawohan pinaagi han “mag-opay nga mga buhat” han Kristiano nga kongregasyon. (Basaha an Mateo 5:14-16; 1 Pedro 2:12.) Kon an imo padis diri Saksi ni Jehova, iginkita na ba hiya han imo mga kakongregasyon? Hi Pauline, nga gin-unabi kanina, nag-imbitar hin kabugtoan ngadto ha iya balay basi makilala hira han iya bana nga hi Wayne. Nahinunumdoman pa ni Wayne kon paonan-o hiya ginbuligan han usa nga brother basi mawara an iya sayop nga pagkakilala ha mga Saksi: “Nag-day off hiya basi updan ako pagkita  hin usa nga uyag. Ngan nasantop ko, ‘Normal hiya!’”

16. Kay ano nga kinahanglan naton imbitaron an aton mga paryente nga tumambong ha mga katirok?

¹⁶ Usa han maopay gud nga paagi ha pagbulig ha aton mga paryente amo an pag-imbitar ha ira nga tumambong ha mga katirok. (1 Cor. 14:24, 25) An siyahan nga katirok nga gintambongan ni Wayne amo an Memoryal kay ginhimo ito katapos han trabaho ngan halipot la an programa. “Waray ko masabti an pahayag,” siring niya, “pero nahinumdoman ko an mga tawo. Gindaop nira ako, gin-abiabi, ngan ginlamano. Masisiring ko nga mag-opay hira nga tawo.” Usa nga mag-asawa an nagin buotan gud kan Pauline, nabulig hira ha iya ngan ha iya anak ha mga katirok ngan ha ministeryo. Salit han nagdesisyon hi Wayne nga kinahanglan niya mas masabtan pa an bag-o nga gintotoohan ni Pauline, ginhangyo niya an bana nga dumarahan hiya hin pag-aram ha Biblia.

17. Ha ano nga kahimtang diri naton angay basulon an aton kalugaringon, kondi kay ano nga kinahanglan diri kita umundang ha pagbulig ha aton mga paryente?

¹⁷ Naglalaom kita nga an ngatanan naton nga paryente mag-aalagad liwat kan Jehova. Pero, bisan pa han ngatanan nga aton paningkamot nga buligan hira nga magin mga surugoon han Dios, bangin diri nira karawaton an kamatuoran. Kon ito an mahitabo, diri naton basulon an aton kalugaringon tungod han ira desisyon. Ha tinuod la, diri naton mapipirit an bisan hin-o nga karawaton an aton gintotoohan. Bisan pa hito, ayaw minosa an mahimo magin epekto ha imo mga paryente samtang nakikita nira an imo daku nga kalipay ha pag-alagad kan Jehova. Ig-ampo hira. Mataktika nga makiistorya ha ira. Ayaw pag-undang ha pagbulig ha ira! (Buh. 20:20) Sarig nga bibendisyonan ni Jehova an imo mga paningkamot. Ngan kon an imo mga paryente mamati ha imo, matatalwas hira!