1, 2. (a) Kay ano nga diri urusahon nga naabat kita hin kabaraka? (Kitaa an retrato hini nga pahina.) (b) Ano an aton hihisgotan hini nga artikulo?

NAGKIKINABUHI kita ha makuri gud nga panahon. Nasisina gud hi Satanas nga Yawa ngan “naglilinakat-lakat pariho hin nagngungurob nga leon, nga nagpipinamiling hin lalamyon.” (1 Ped. 5:8; Pah. 12:17) Salit diri urusahon nga bisan an mga surugoon han Dios usahay nababaraka. Ngani, an matinumanon nga mga surugoon ni Jehova hadto pariho kan Hadi David inabat hin kabaraka. (Sal. 13:2) Hinumdumi liwat nga hi apostol Pablo ‘nabaraka ha ngatanan nga kongregasyon.’ (2 Cor. 11:28) Pero ano an puydi naton buhaton kon naabat kita hin sobra nga kabaraka?

² Ginbuligan han aton mahigugmaon nga Amay ha langit an iya katawohan hadto nga diri sobra nga mabaraka, ngan karuyag liwat niya nga buligan kita yana. An Biblia nag-aaghat ha aton: ‘Ipasa ha iya an ngatanan niyo nga kabaraka, kay napaid hiya ha iyo.’ (1 Ped. 5:7) Paonan-o naton ito mahihimo? Hisgotan naton an upat nga paagi​—kinasingkasing nga pag-ampo, pagbasa ha pulong han Dios ngan pagpamalandong hito, pangaro hin baraan nga espiritu ni Jehova, ngan pagsumat han imo inaabat ha usa nga imo ginsasarigan.  Samtang ginhihisgotan naton ini nga mga paagi, hibaroi kon hain hini an karuyag mo pauswagon.

3. Ha imo pag-ampo, paonan-o mo ‘ibubutang kan Jehova an imo dinara’?

³ An siyahan nga mahihimo naton basi magkaada kamurayawan ha hunahuna amo an pagdaop kan Jehova pinaagi ha kinasingkasing nga pag-ampo. Kon may-ada ka ginkakahadlokan o ginkakabarak-an, isumat ito ngatanan ha imo mahigugmaon nga Amay ha langit. An salmista nga hi David nanginyupo kan Jehova: “Pamati-i an akon pagampo, O Dios.” Hito gihapon nga salmos, hiya nagsiring: “Ibutang an imo dinara ha bawbaw ni Jehova, ngan ikaw iya kabubuligan.” (Sal. 55:1, 22) Katapos buhaton an imo bug-os nga mahihimo ha pagsulbad han problema, an kinasingkasing nga pag-ampo makakabulig gud ha imo imbes nga magkinabaraka ka. Pero paonan-o an pag-ampo makakabulig ha imo nga malikyan an duro nga kasubo ngan kabaraka?​—Sal. 94:18, 19.

4. Kon nababaraka kita, kay ano nga importante gud an pag-ampo?

⁴ Basaha an Filipos 4:6, 7. Ginbabaton ni Jehova an aton sinsero, kinasingkasing, ngan padayon nga pangamuyo. Paonan-o? Pinaagi ha paghatag ha aton hin kamurayawan ha hunahuna basi mawara an aton negatibo nga pagbati ngan magin kalmado. Damu nga kabugtoan an makakagpamatuod hini kay naeksperyensyahan mismo nira ito. Imbes nga umabat hin kabaraka ngan kahadlok, ginbuligan hira han Dios nga umabat hin waray kapariho nga kamurayawan ha hunahuna nga diri bug-os nga mahahanduraw han tawo. Puydi mo liwat ito maeksperyensyahan. Oo, “an kamurayawan han Dios” mabulig ha imo nga malamposan an anoman nga problema nga bangin umabot ha imo. Makakasarig ka gud han mahigugmaon nga saad ni Jehova: “Ayaw kaholop, kay ako an imo Dios; ako magpaparig-on ha imo; oo, ako mabulig ha imo.”​—Isa. 41:10.

5. Paonan-o an Pulong han Dios nabulig ha aton nga magkaada kamurayawan ha hunahuna?

⁵ An ikaduha nga paagi basi magkaada kamurayawan ha hunahuna amo an pagbasa ha Biblia ngan pagpamalandong hito. Kay ano nga importante ito? An Biblia may praktikal nga mga giya nga makakabulig ha imo nga malikyan, maibanan, o malamposan an kabaraka. Tigamni nga an mga sagdon hito tikang mismo ha aton Maglalarang, salit makakabulig ngan makakaliaw gud ito ha imo. Samtang imo ginpapamalandong an panhunahuna han Dios​—adlaw o gab-i—​ngan ginhuhunahuna kon paonan-o ito maiaaplikar ha pinakamaopay nga paagi, sigurado nga mapaparig-on ka. Espisipiko nga gin-unabi ni Jehova nga an pagbasa ha Biblia nabulig ha usa nga magin ‘mabaskog ngan madasigon’ ngan ‘diri maholop.’​—Jos. 1:7-9.

6. Paonan-o makakabulig ha imo an mga pulong ni Jesus?

⁶ Mababasa naton ha Biblia an nakakaliaw nga mga pulong ni Jesus. An iya mga pulong ngan katutdoan nakakarepresko. Damu an namamati ha iya kay napaparig-on niya an mga nahuhulop ngan nanluluya, ngan naliliaw niya an mga nasusubo. (Basaha an Mateo 11:28-30.) Mahunahunaon gud hiya ha espirituwal, emosyonal, ngan pisikal nga panginahanglan han iba. (Mar. 6:30-32) Gintuman ni Jesus an iya saad nga bubuligan niya an mga apostol nga nakaupod niya hadto, salit sigurado nga bubuligan ka liwat niya yana. Diri kinahanglan nga literal nga makaupod mo hi Jesus basi makarawat ito. Sugad nga langitnon nga Hadi, padayon hiya nga nagpapakita hin empatiya. Salit kon nababaraka ka, mapinairon hiya nga ‘mabulig ha imo ha husto nga panahon.’ Oo, mabubuligan ka ni Jesus nga malamposan an mga kabaraka, ngan makakahatag  hiya ha imo hin paglaom ngan kaisog.​—Heb. 2:17, 18; 4:16.

7. Ano an kapulsanan nga imo makakarawat kon ihatag ha imo han Dios an baraan nga espiritu nga imo gin-aaro?

⁷ Nagpasarig hi Jesus nga kon mangangaro kita ha aton Amay ha langit han baraan nga espiritu, ihahatag gud Niya ito. (Luc. 11:10-13) Pinaagi hito makakarawat mo an ikatulo nga bulig basi maibanan an imo kabaraka​—an bunga han espiritu. An mag-opay nga kalidad nga bunga han aktibo nga pwersa ni Jehova nagpapakita mismo han personalidad han makagarahum-ha-ngatanan nga Dios. (Basaha an Galacia 5:22, 23; Col. 3:10) Samtang ginkukultibar mo an bunga han espiritu, nagkakaada ka maopay nga relasyon ha iba. Salit nalilikyan mo an mga sitwasyon nga mahimo magresulta hin kabaraka. Pamalandonga kon paonan-o an bunga han espiritu makakabulig ha imo.

8-12. Paonan-o an bunga han baraan nga espiritu han Dios makakabulig ha imo nga malamposan o malikyan an mga sitwasyon nga mahimo magresulta hin kabaraka?

⁸ “Gugma, kalipay, kamurayawan.” Kon nangangalimbasog ka nga respetuhon an mga tawo, bangin maobserbaran mo nga masayon mo malamposan an negatibo nga mga pagbati. Kay ano? Kay kon hinigugma, pinalangga, ngan ginpapasidunggan mo an kabugtoan, malilikyan mo an mga sitwasyon nga mahimo magresulta hin kabaraka.​—Roma 12:10.

⁹ “Pagpailob, pagkabuotan, pagkamaopay.” Nagkakaada ka mamurayawon nga relasyon ha iba kon ginsusunod mo ini nga sagdon: ‘Magin buotan ha usa kag usa, mapinairon, ngan kinasingkasing nga magpinasayloay.’ (Efe. 4:32) Kon bubuhaton mo ito, malilikyan mo an mga kahimtang nga mahimo makapabaraka ha imo. Malalamposan mo liwat an mga sitwasyon nga nabangon tungod han aton pagkadiri-hingpit.

¹⁰ “Pagtoo.” Yana, agsob nga nababaraka kita tungod han kwarta ngan materyal nga mga panag-iya. (Prob. 18:11) Salit, an pagkaada marig-on nga pagtoo nga hi Jehova mahigugmaon nga magtatagana ha imo makakabulig nga malamposan o malikyan an sugad nga kabaraka. Ha ano nga paagi? An pagsunod ha sagdon ni apostol Pablo nga magin ‘kontento ha mga butang nga aada’ ha aton makakabulig nga malikyan an duro nga kabaraka. Hiya nagdugang: “Kay [an Dios] nagsiring: ‘Diri ko gud ikaw babayaan ngan diri ko gud ikaw papabay-an.’ Salit makakasarig gud kita ngan makakasiring: ‘Hi Jehova an akon parabulig, diri ako mahahadlok. Ano an mahihimo han tawo ha akon?’”​—Heb. 13:5, 6.

¹¹ ‘Pagkamalumo, pagpugong ha kalugaringon.’ Praktikal gud ngan mapulsanon an pagpakita hini nga mga kalidad. Kon iginpapakita mo ini, posible nga malikyan mo an mga buhat nga mahimo makapabaraka ha imo, ngan magpapahimulos ka kon lilikyan mo an “pagdumot, kasina, kangalas, pagsinggit, ngan nakakasakit nga pulong.”​—Efe. 4:31.

¹² Ginkikinahanglan gud an pagpaubos kay mabulig ito ha imo nga karawaton an “gamhanan nga kamot han Dios” ngan ‘ipasa ha iya an ngatanan mo nga kabaraka.’ (1 Ped. 5:6, 7) Ngan kon kukultibaron mo an pagpaubos, makakarawat mo an pag-uyon ngan bulig han Dios. (Mika 6:8) Kon maaram ka han imo mga limitasyon ha pisikal, mental, ngan emosyonal ngan ginkikilala mo ito, mas magkakaada ka pagsarig ha Dios salit posible gud nga maibanan an imo kabaraka.

13. Ano an karuyag sidngon ni Jesus han hiya nagsiring: “Ayaw gud kamo kabaraka”?

¹³ Ha Mateo 6:34 (basaha), aton mababasa an maaramon nga sagdon ni Jesus: “Ayaw gud kamo kabaraka.” Baga hin makuri an pag-aplikar hito nga sagdon. Ano an karuyag sidngon hito ni Jesus? Matin-aw nga diri niya iginpapasabot nga  diri na gud mababaraka an mga surugoon han Dios; hinbaroan naton nga bisan hira David ngan Pablo inabat hin kabaraka. Lugod, ginbubuligan ni Jesus nga masabtan han iya mga disipulo nga an diri angayan, o sobra, nga kabaraka diri makakasulbad han mga problema. Kada adlaw may mga problema, salit diri kinahanglan dugangan han mga Kristiano an ira mga kabaraka yana pinaagi han paghinunahuna ha mga problema han naglabay o han mga mahitatabo ha tidaraon. Paonan-o mo maiaaplikar an sagdon ni Jesus basi diri ka na sobra nga mabaraka?

14. Paonan-o mahimo malamposan han usa an kabaraka tungod han iya nabuhat nga sayop han naglabay?

¹⁴ May mga tawo nga nababaraka tungod han ira nabuhat nga mga sayop han naglabay. Bangin nakukonsensya pa gihapon hira bisan kon maiha na ito. May mga panahon nga inabat ni Hadi David nga ‘nalulumos hiya han iya mga pagtalapas.’ Hiya nagsiring: “Masakit an akon kasingkasing ngan nag-aaraba ako hin kamaol-ol.” (Sal. 38:3, 4, 8, 18, Maupay nga Sumat) Hito nga kahimtang, ano an maaramon nga ginbuhat ni David? Sinarig hiya ha kalooy ngan pagpasaylo ni Jehova. May pagsarig hiya nga nagsiring: “Bulahan . . . hiya nga an iya pagsupak ginpasaylo.”​—Basaha an Salmos 32:1-3, 5.

15. (a) Kay ano nga diri ka sadang mabaraka ha imo kahimtang yana? (b) Ano an praktikal nga mga paagi nga puydi mo buhaton basi maibanan an imo kabaraka? (Kitaa an kahon nga “ Pipira nga Praktikal nga Paagi Basi Maibanan an Kabaraka.”)

¹⁵ Usahay, bangin nababaraka ka ha imo kahimtang yana. Pananglitan, han iginsurat ni David an Salmos 55, nahahadlok hiya nga patayon hiya. (Sal. 55:2-5) Bisan pa hito, waray niya tuguti nga mawara an iya pagsarig kan Jehova tungod han kabaraka. Sinsero nga igin-ampo ni David an iya mga problema, pero maaram liwat hiya nga importante an paghimo hin praktikal nga mga paagi basi maibanan an iya kabaraka. (2 Sam. 15:30-34) Ano nga leksyon an aton mahibabaroan kan David? Imbes nga sobra nga magkinabaraka, buhata an imo mahihimo basi masulbad an problema ngan isarig ito kan Jehova.

16. Paonan-o an kahulogan han ngaran han Dios nagpaparig-on han imo pagtoo?

¹⁶ Inaabat han usa nga Kristiano an diri angayan nga kabaraka kon naghihinunahuna hiya han posible nga mga problema ha tidaraon. Pero diri ka sadang magkinabaraka, o mahadlok, ha mga butang nga diri pa nahitatabo. Kay ano? Kay kasagaran na nga an nahitatabo diri sugad han imo ginkakahadlokan. Dugang pa, waray problema nga diri masusolusyonan han Dios​—an Usa nga aton mapapasahan han ngatanan naton nga kabaraka. An iya mismo ngaran nangangahulogan nga “Hiya Nagpapahinabo nga Magin.” (Eks. 3:14) An kahulogan han ngaran han Dios nagpapasarig ha aton nga kaya gud ni Jehova tumanon an iya mga katuyoan para ha iya katawohan. Makakasiguro ka nga babalosan han Dios an iya matinumanon nga mga surugoon ngan bubuligan hira nga malamposan an ira mga kabaraka yana, han naglabay, ngan ha tidaraon.

17, 18. Paonan-o an pakiistorya ha usa nga imo ginsasarigan mabulig ha imo nga malamposan an kabaraka?

¹⁷ An ikaupat nga paagi basi malamposan an  kabaraka amo an pag-istorya han imo inaabat ha usa nga imo ginsasarigan. Mahimo ka mabuligan han imo asawa o bana, duok nga sangkay, o han usa nga tigurang nga magkaada husto nga panhunahuna ha imo mga ginkakabarak-an. “An kabug-at ha kasingkasing han tawo nakakapaguku hini; kondi an maopay nga polong nakakalipay hini.” (Prob. 12:25) Makakabulig liwat an prangka ngan tangkod nga pakiistorya ha usa nga imo ginsasarigan basi mas masabtan mo an imo mga ginkakabarak-an ngan malamposan ito. An Biblia nasiring: “Kon hain an waray kasaragdonan, an mga tinguha napapakyas; kondi ha kadam-an nga magsaragdon ini natutukud.”​—Prob. 15:22.

¹⁸ Ginbubuligan liwat ni Jehova an mga Kristiano nga malamposan an mga kabaraka pinaagi han sinemana nga mga katirok ha kongregasyon. Ha mga katirok, nakakaupod mo an mga igkasi-tumuroo nga nahigugma ngan nagdadasig ha imo. (Heb. 10:24, 25) An sugad nga ‘pagdinasigay’ magpaparig-on han imo espirituwalidad ngan mabulig ha imo nga malamposan an bisan ano nga kabaraka.​—Roma 1:12.

19. Kay ano nga makakasiguro ka nga an imo duok nga relasyon ha Dios magpaparig-on ha imo?

¹⁹ Tagda kon paonan-o hinbaroan han usa nga tigurang ha Canada an importansya han pagpasa han ngatanan niya nga kabaraka kan Jehova. Nakakaistres gud an iya trabaho sugad nga maestro ngan guidance counselor ngan may-ada liwat hiya sakit nga anxiety disorder. Paonan-o niya ito nalamposan? Hiya nagsiring: “Labaw ha ngatanan, nakita ko nga an pangalimbasog nga maparig-on an akon relasyon kan Jehova amo gud an naghahatag ha akon hin kusog basi malamposan an mga problema ha emosyon. Daku an naibubulig han tinuod nga kasangkayan ngan kabugtoan ha kongregasyon durante han magkuri nga kahimtang. Tangkod nga iginsusumat ko ha akon asawa an akon mga pagbati. Daku gud an naibulig han akon mga igkasi-tigurang ngan han amon paramangno han sirkito nga magkaada ako husto nga panhunahuna ha akon kahimtang. Nagpakonsulta liwat ako ha doktor, naghimo hin mga pagbag-o ha paggamit han akon panahon, ngan naggahin hin panahon basi magpahalibway ngan mag-ehersisyo. Hinbaroan ko hin hinay-hinay kon paonan-o kukontrolon an akon kahimtang ngan mga pagbati. Kon diri ko kontrolado an usa nga butang, iginsasarig ko ito kan Jehova.”

20. (a) Paonan-o naton maipapasa ha Dios an aton mga kabaraka? (b) Ano an aton hihisgotan ha sunod nga artikulo?

²⁰ Hini nga artikulo, nasabtan naton nga importante gud nga ipasa ha Dios an aton mga kabaraka pinaagi ha sinsero nga pag-ampo ngan pagbasa han Biblia ngan pagpamalandong hito. Ginhisgotan liwat naton kon ano an naibubulig han pagkultibar han bunga han espiritu, pagsumat han aton inaabat ha usa nga aton ginsasarigan, ngan pakig-upod ha kabugtoan. Hihisgotan ha sunod nga artikulo kon paonan-o kita padayon nga ginbubuligan ni Jehova pinaagi ha pagpasarig ha aton nga babalosan kita niya.​—Heb. 11:6.