HAN binisita utro hi Toñi, ginbusaan na liwat hiya han babaye. Ano an iya reaksyon? “Makuri gud adto nga kahimtang,” siring niya. “Waray gud basihan an iya pagbusa.” Bisan pa hito, nangaro utro hi Toñi hin pasaylo ngan ginsidngan niya an babaye nga nasasabtan niya an iya makuri nga sitwasyon.

Kon ikaw hi Toñi, ano daw la an imo magigin reaksyon? Magpapabilin ka ba nga kalmado o masisina ka? Ha pagkamatuod, diri masayon an pagpabilin nga kalmado kon aada ka ha sugad hito nga sitwasyon. Oo, makuri an pagpabilin nga malumo kon aada kita ha kahimtang nga nakakaistres o nakakapasina ha aton.

Pero gin-aaghat han Biblia an mga Kristiano nga magin malumo. Ngani, gin-uunabi han Pulong han Dios nga an pagin malumo nagpapakita hin kinaadman. Hi Santiago nagsiring: “Hin-o ha iyo an makinaadmananon ngan masinabuton? Ipakita niya ito ha iya maopay nga panggawi pinaagi han mga buhat nga may pagkamalumo  nga resulta han kinaadman.” (San. 3:13) Ha ano nga paagi an pagin malumo nagpapakita hin kinaadman tikang ha Dios? Ngan paonan-o naton makukultibar inin maopay nga kalidad?

An pagin malumo nakakaiban han tensyon. “An malomo nga baton nakakapaiway han kapungot; kondi an mapait nga polong nakakapabokal han kasina.”​—Prob. 15:1.

An kasina nakakadugang la han tensyon kay sugad ito hin pagsungo ha kalayo. (Prob. 26:21) Ha kabaliktaran, an malumo nga baton kasagaran na nga nakakapakalma han sitwasyon. Mahimo pa ngani ito makaparong han kasina.

Naeksperyensyahan ito ni Toñi. Tungod han iya malumo nga baton, nakatangis an babaye. Ginsidngan han babaye hi Toñi nga nahimo niya adto kay damu an iya problema. Ginsangyawan hiya ni Toñi, ngan natikangan an pag-aram ha Biblia​—tungod ito han pagin kalmado ngan mamurayawon ni Toñi.

An pagin malumo nabulig ha aton nga magin malipayon. “Malipayon an mga mapainubsanon [o, malumo], kay mapapanunod nira an tuna.”​—Mat. 5:5.

Kay ano nga malipayon an mga malumo? Damu nga masisinahon hadto an malipayon na yana tungod kay ginkultibar nira an pagin malumo. Nagkaada hira tagbaw nga kinabuhi, ngan ginpapamulat gud nira an makalilipay nga tidaraon. (Col. 3:12) Nahinunumdoman ni Adolfo, usa nga paramangno han sirkito ha Espanya, an iya kinabuhi antes hiya mahibaro han kamatuoran.

“Waray katuyoan an akon kinabuhi,” siring ni Adolfo. “Madali gud ako masina salit bisan an pipira han akon kasangkayan nahahadlok ha akon tungod kay mapahitas-on ako ngan bayolente. Inabot an panahon nga nagbag-o ako. Nahitabo ito han nakig-away ako ngan nabuno hin unom ka beses nga haros mamatay ako.”

Yana, gintututdoan na ni Adolfo an iba nga magin malumo pinaagi han iya pulong ngan ehemplo. Damu an nagigin duok ha iya tungod han iya pagin buotan ngan makisangkayon. Hi Adolfo nagsiring nga nalilipay hiya ha mga pagbag-o nga iya ginhihimo. Ngan mapasalamaton gud hiya nga ginbuligan hiya ni Jehova nga makultibar an pagin malumo.

An usa nga malumo nakakapalipay kan Jehova. “Anak ko, pagmakinaadmanon, ngan himoa an akon kasingkasing nga malipayon, nga ako makabaton ha iya nga nagsasaway ha akon.”​—Prob. 27:11.

Gintatamay hi Jehova han iya nangunguna nga kaaway, an Yawa. May rason gud hi Jehova nga masina ha tinuyo nga pagpakaraot ha iya. Bisan pa hito, iginhuhulagway hiya han Biblia nga “mahinay ha pagkasina.” (Eks. 34:6) Kon nangangalimbasog kita nga subaron hi Jehova ha iya pagin mahinay ha kasina ngan pagin malumo, nagigin maaramon kita ngan napapalipay gud naton hiya.​—Efe. 5:1.

Nagkikinabuhi kita ha kalibotan nga kalyap an karaotan. Bangin nakakaupod naton an mga tawo nga “hambog, daku an buot, mapasiparahon, . . . mga parapakaraot, waray pagpugong ha kalugaringon, mapintas.” (2 Tim. 3:2, 3) Pero diri ito sadang makaulang ha mga Kristiano ha pagkultibar han pagin malumo. Ginpapahinumdoman kita han Pulong han Dios nga “an kinaadman nga tikang ha langit . . . mamurayawon, makatadunganon.” (San. 3:17) Pinaagi ha pagin mamurayawon ngan makatadunganon, iginpapakita naton nga may-ada kita han kinaadman tikang ha Dios. Ito nga kinaadman mabulig ha aton nga magin malumo ha pagbaton kon naaaghat kita nga masina ngan magin mas duok ha Surok han waray tubtoban nga kinaadman, hi Jehova.