Matin-aw nga diri. An Yawa waray magsiring kan Eva nga kon kumaon hiya han bunga nga igindidiri han Dios, kunohay la nga mamamatay hiya pero may diri nakikita nga bahin ha iya (an gintatawag han iba yana sugad nga imortal nga kalag) nga magpapadayon nga buhi ha iba nga lugar. Pinaagi han halas, nagsiring hi Satanas nga kon kumaon hi Eva han bunga hito nga kahoy, ‘diri gud hiya mamamatay.’ Iya iginpasabot nga magpapadayon nga buhi hi Eva ngan magpapahimulos hin mas maopay nga kinabuhi ha tuna, pagkinabuhi nga bulag ha Dios.​—Gen. 2:17; 3:3-5.

Kon diri ha Eden nagtikang an buwa nga doktrina han imortal nga kalag nga igintututdo yana, kakan-o ito nagtikang? Diri kita makakasigurado han baton. Maaram kita nga an ngatanan nga buwa nga pagsingba nawara ha Baha ha panahon ni Noe. Waray bisan ano nga buwa nga katutdoan han relihiyon an nagpabilin kay hi Noe ngan an iya pamilya la, nga tinuod nga mga magsiringba, an nakatalwas.

Salit an katutdoan yana mahitungod han imortal nga kalag posible gud nga nagtikang katapos han Baha. Han ginsamok han Dios an linggwahe ha Babel ngan nagsarang an mga tawo “ha bawbaw han bug-os nga tuna,” sigurado nga dara nira an ideya nga an tawo may imortal nga kalag. (Gen. 11:8, 9) Kakan-o man nagtikang iton buwa nga katutdoan, makakasiguro kita nga “an amay han kabuwaan,” hi Satanas nga Yawa, an nag-aaghat hito ngan nalilipay hiya nga makita nga nagsasarang gud ito.​—Juan 8:44.