GINHUHUNAHUNA mo ba an imo kalugaringon sugad nga mapasalamaton? Angay pamalandungon han tagsa ha aton ito nga pakiana. Igintagna han Biblia nga ha aton panahon damu nga tawo an magigin “diri mapasalamaton.” (2 Tim. 3:2) Posible nga may mga kilala ka nga naglalaom nga kinahanglan may himoon an iba para ha ira o maghatag hin mga butang ha ira. Baga hin inaabat nira nga diri nira kinahanglan magin mapasalamaton ha ira mga nakakarawat. Maruruyag ka ba pakig-upod ha sugad nga mga tawo?

Ha kabaliktaran, an mga surugoon ni Jehova ginsusugo: “Ipakita an iyo pagkamapasalamaton.” Kinahanglan “magpasalamat [kita] tungod han ngatanan nga butang.” (Col. 3:15; 1 Tes. 5:18) Ngani, nakakaopay ha aton an pagin mapasalamaton. May pipira nga rason kon kay ano nga nakakaopay ito.

An usa nga importante nga rason kon kay ano nga nakakaopay an pagin mapasalamaton tungod kay nabulig ito nga magkaada kita positibo nga panhunahuna ha aton kalugaringon. An tawo nga nagpapasalamat posible gud nga nagigin maopay an pag-abat ha iya kalugaringon, ngan an ginpapasalamatan naabat liwat hin sugad hito. Kay ano nga an pagin mapasalamaton nakakapalipay ha aton ngan ha iba? Tagda ini nga ehemplo: Kon an usa nga tawo andam magbuhat hin butang para ha imo, iginpapakita hito nga para ha iya angayan ka hito. Importante ka ha iya. Kon abaton mo nga importante ka ha iya, magigin maopay an imo pag-abat ha imo kalugaringon. Ito an aton mahuhunahuna ha kahimtang ni Ruth. Nagin mahinatagon hi Boaz kan Ruth. Sigurado nga nalipay gud hi Ruth han nahibaroan niya nga importante hiya para kan Boaz.​—Ruth 2:10-13.

Labi na nga angayan kita magin mapasalamaton ha Dios. Sigurado nga nahuhunahuna mo ha panapanahon an damu nga espirituwal ngan pisikal nga regalo nga iya iginhatag ngan padayon nga iginhahatag. (Deut. 8:17, 18; Buh. 14:17) Pero imbes nga hunahunaon hin madaliay la an pagkamaopay han Dios, paggahin hin panahon ha pagpamalandong han damu nga bendisyon nga iginhatag han Dios ha imo ngan ha imo mga hinigugma. An pagpamalandong han pagin mahinatagon han imo Maglalarang magdudugang han imo apresasyon ha iya ngan mas aabaton mo nga hinigugma ngan gin-aapresyar ka gud niya.​—1 Juan 4:9.

Pero labot la ha paghunahuna han iya pagkamahinatagon ngan pagpamalandong han iya mga bendisyon, kinahanglan magpasalamat liwat kita kan Jehova tungod han iya pagkamaopay. (Sal. 100:4, 5) May mga nasiring nga “an pagpahayag hin pagpasalamat daku an naibubulig ha kalipay han tawo.”

Usa pa nga rason kon kay ano nga nakakaopay an pagin mapasalamaton tungod kay nabulig ito nga magin duok an pagkamagsangkay. Kita ngatanan nagkikinahanglan hin pag-apresyar han iba. Kon sinsero ka nga nagpapasalamat ha usa tungod han iya maopay nga ginhimo, nagigin duok kamo ha usa kag usa. (Roma 16:3, 4) Dugang pa, adton mapasalamaton kaurogan na nga nagigin mabinuligon. Nakikita nira an pagkabuotan nga iginpapahayag ha ira han iba ngan naaaghat hira nga magin buotan liwat ha iba. Oo, an pagbulig ha iba nagriresulta ha kalipay. Uyon ito ha ginsiring ni Jesus: “Mas daku an kalipay ha paghatag kay ha pagkarawat.”​—Buh. 20:35.

Hi Robert Emmons, nga usa han mga direktor  han proyekto han pag-aram han University of California mahitungod ha pagpasalamat, nagsiring: “Basi magin mapasalamaton, kinahanglan masantop naton nga nakadepende kita ha usa kag usa. Usahay kita an nahatag ngan usahay naman kita an nakarawat.” Ha pagkatinuod, an aton kinabuhi ngan kalipay nakadepende ha iba ha damu nga paagi. Pananglitan, mahimo kita nira tagan hin pagkaon o medikal nga bulig. (1 Cor. 12:21) Matin-aw nga gin-aapresyar gud han mapasalamaton nga tawo an ginhihimo han iba para ha iya. Kon amo, pirme ka ba nagpapasalamat ha ginhihimo han iba para ha imo?

Usa pa nga rason kon kay ano nga nakakaopay an pagin mapasalamaton tungod kay nabulig ito nga magpokus ka ha positibo imbes nga ha negatibo. An imo utok sugad hin nagigin sara. Nabulig ito nga makapokus ka ha partikular nga mga butang samtang ginsasara an iba nga butang. Mas nakikita mo an positibo nga mga butang ngan diri nagpupokus ha mga problema. Kon mas mapasalamaton ka, mas damu nga maopay nga butang an imo makikita, ngan sugad nga resulta, mas nagigin mapasalamaton ka pa. Kon magpupokus ka ha mga butang nga angay mo igpasalamat, mabulig ito nga mabuhat mo an igin-aghat ni apostol Pablo: “Magrayhak kamo pirme ha Ginoo.”​—Fil. 4:4.

An pagin mapasalamaton nabulig ha imo nga diri magkaada negatibo nga panhunahuna. Makuri gud pagdunganon an pag-abat hin pagkamapasalamaton ngan pag-abat hin kaawa, kasubo, ngan pagdumot, diri ba? An mapasalamaton nga mga tawo kasagaran na nga diri materyalistiko. Gin-aapresyar nira kon ano an may-ada hira ngan diri na hira naniningkamot nga magkaada hin dugang pa.​—Fil. 4:12.

Sugad nga Kristiano, maaram ka nga karuyag ni Satanas nga masubo ka ngan manluya tungod han kakurian nga imo naieksperyensyahan hinin kataposan nga mga adlaw. Malilipay hiya kon magkaada ka negatibo ngan mareklamuhon nga disposisyon. An sugad nga disposisyon magriresulta nga diri ka magin epektibo nga parasamwak han maopay nga sumat. Ha pagkamatuod, konektado an pagin mapasalamaton ha bunga han espiritu han Dios. Pananglitan, naabat kita hin kalipay kay nakikita naton an mag-opay nga butang nga igintatagana han Dios ha aton ngan may pagtoo kita ha iya mga saad.​—Gal. 5:22, 23.

Sugad nga usa han katawohan ni Jehova, posible nga nauyon ka ha mga ginhisgotan hini nga artikulo mahitungod ha pagin mapasalamaton. Kondi, maaram ka nga diri pirme masayon an pagin mapasalamaton ngan pagin positibo. Pero diri ka angay manluya tungod hito. Puydi mo makultibar ngan matipigan an pagin mapasalamaton. Paonan-o? Paggahin hin panahon kada adlaw ha pagpamalandong han pipira nga butang ha imo kinabuhi nga mahimo mo igpasalamat. Kon pirme mo ito bubuhaton, magigin mas masayon ha imo an pagin mapasalamaton. Mas magigin malipayon ka kompara hadton nagpupokus ha mga problema ha kinabuhi. Hunahunaa pirme an mag-opay nga butang nga ginhihimo han Dios ngan han iba nga nakakadasig ngan nakakapalipay ha imo. Puydi mo ito isurat ha usa nga notbuk. Dida hito, puydi ka maglista hin duha o tulo nga butang nga imo iginpapasalamat ha kada adlaw.

An pipira nga nag-aaram may kalabotan hini nga topiko nagsiring nga an “regular nga pagpasalamat mahimo makagbag-o han paggana han mga neuron han aton utok basi magin mas masayon ha aton nga magin positibo.” An mapasalamaton nga tawo mas malipayon. Salit, pirme hunahunaa an mga bendisyon ha imo, pamalandonga an imo positibo nga mga eksperyensya, ngan pirme pagpasalamat! Imbes nga igbalewaray an mag-opay nga butang, “pagpasalamat kan Jehova, kay hiya maopay.” Oo, “magpasalamat kamo tungod han ngatanan nga butang.”​—1 Cron. 16:34; 1 Tes. 5:18.