Mababaton mo ba ini nga mga pakiana basado ha 2019 nga An Barantayan?

Ano an iginpapasabot han saad han Dios: “Waray armas nga ginporma kontra ha imo an maglalampos”? (Isa. 54:17)

Makakasarig kita nga papanalipdan kita han Dios tikang ha nakakabungkag nga mga pwersa pariho han “pagbuto han kasina han mga matalumpiguson.” (Isa. 25:4, 5) An aton mga kaaway diri makakapahinabo hin bisan ano nga nagpapadayon nga kadaot ha aton.​—w19.01, p. 6-7.

Paonan-o an pagtratar han Dios ha mga Canaanita ngan ha matinalapason nga mga Israelita nagpapakita han iya hustisya?

Ginhukman han Dios adton nagbubuhat hin mangil-ad nga mga pakighilawas o adton nagmamaltrato ha kababayin-an ngan kabataan. Ginbendisyonan niya an mga tawo nga masinugtanon ha iya ngan patas an pagtratar ha iba.​—w19.02, p. 22-23.

Ano an angay naton himoon kon presente kita samtang nag-aampo an diri naton igkasi-tumuroo?

Mahimo kita magpabilin nga hilom ngan matinalahuron, pero diri kita masiring hin “amen” o makikigkapotay ha iba nga presente. Mahimo kita mag-ampo hin hilom la.​—w19.03, p. 31.

Ano kaseryoso an pag-abuso ha bata?

An pag-abuso ha bata sala kontra ha biktima, ha kongregasyon, ha gobyerno, ngan ha Dios. Kon igin-oobligar han balaud han gobyerno nga ireport an mga aligasyon nga may kalabotan han pag-abuso, nasunod an mga tigurang.​—w19.05, p. 9-10.

Paonan-o mo mababag-o o mapapauswag an imo paagi han paghunahuna?

Ini an importante nga mga pitad: Pakiistorya kan Jehova ha pag-ampo. Pamalandong nga an tumong amo an pag-usisa ha kalugaringon. Magin maaramon ha pagpili hin kasangkayan.​—w19.06, p. 11.

Ano an mahimo naton buhaton yana basi magin andam para ha pagtimaraot?

Kinahanglan naton parig-unon an aton relasyon kan Jehova. Sarig nga hinigugma kita niya ngan diri gud kita niya papabay-an. Basaha an Biblia kada adlaw, ngan regular nga mag-ampo. Magin kombinsido nga matutuman an mga bendisyon han Ginhadian. Pagmemorya hin paborito nga mga teksto ngan mga kanta para ha pagdayaw.​—w19.07, p. 2-4.

Ano an mahimo naton buhaton basi matalwas an aton mga paryente?

Importante nga magpakita kita hin empatiya, maopay nga panggawi, ngan magin mapailubon ngan mataktika.​—w19.08, p. 15-17.

Paonan-o kita narirepreskohan, sugad han iginsaad ni Jesus ha Mateo 11:28?

May-ada kita mahigugmaon nga Kristiano nga mga paramangno, pinakamaopay nga kasangkayan, ngan pinakamaopay nga buruhaton.​​—w19.09, p. 23.

Paonan-o kita mahimo tagan han Dios han hingyap ngan han gahum ha pagbuhat? (Fil. 2:13)

Samtang ginbabasa naton an Pulong han Dios ngan ginpapamalandong ito, napapakusog kita han Dios ngan nagkakaada kita han hingyap ngan han gahum ha pagbuhat han iya kaburut-on. Mahimo pauswagon han iya espiritu an aton mga abilidad.​—w19.10, p. 21.

Ano nga maaramon nga mga pitad an angay naton buhaton antes maghimo hin seryoso nga desisyon?

Ini an lima nga pitad: Pag-ampo para hin kinaadman. Pagsaliksik hin maopay. Usisaha an imo mga motibo. Magin espisipiko. Magin reyalistiko.​—w19.11, p. 27-29.

An ginsiring ba ni Satanas kan Eva amo an gintikangan han ideya han imortal nga kalag?

Matin-aw nga diri. Hi Satanas waray magsiring nga kunohay la nga mamamatay hi Eva, lugod nagsiring hiya nga diri mamamatay hi Eva. Sigurado nga waray bisan ano nga buwa nga katutdoan han relihiyon an nakatalwas ha Baha. An katutdoan mahitungod ha imortal nga kalag posible nga nagtikang antes igsarang han Dios an mga tawo nga nagtutukod han torre han Babel.​—w19.12, p. 15.