1-2. (a) Kay ano nga makakalaom kita nga magtatagana hi Jesus ha aton hin simple nga paagi ha pagsaurog han iya kamatayon? (b) Ano nga mga kalidad ni Jesus an aton hihisgotan?

MAISASAYSAY mo ba kon ano an nahitatabo ha tinuig nga Memoryal han kamatayon han Kristo? Sigurado nga kadam-an ha aton an nahinunumdom han importante nga mga detalye ha Panihapon han Ginoo. Kay ano? Tungod kay an panihapon diri gud komplikado. Pero, importante ini nga okasyon. Salit bangin magpakiana kita, ‘Kay ano nga simple hinduro an panihapon?’

² Durante han pagministeryo ni Jesus ha tuna, kilala hiya ha pagtutdo hin importante nga mga kamatuoran ha paagi nga simple, klaro, ngan masayon masabtan. (Mat. 7:28, 29) Ha pariho nga paagi, nagtagana hiya ha aton hin simple pero makahuluganon nga paagi ha pagsaurog * han iya kamatayon. Aton usisahon hin maopay ini nga panihapon ha Memoryal ngan an pipira nga ginsiring ngan ginbuhat ni Jesus. Mas masasabtan naton kon mationan-o gud kamapainubsanon, kamaisugon, ngan kamahigugmaon hi Jesus, ngan mahibabaroan naton kon paonan-o pa naton hiya masusubad hin mas maopay.

3. Sugad han mababasa ha Mateo 26:26-28, mationan-o kasimple an panihapon ha Memoryal nga gintikangan ni Jesus, ngan ano an ginsisimbolohan han duha nga simple nga butang?

³ Gintikangan ni Jesus an Memoryal han iya kamatayon kaupod an iya 11 nga matinumanon nga apostol. Iya ginkuha an nasalin ha  panihapon ha Paskua ngan ginhimo ini nga simple nga pagsaurog. (Basaha an Mateo 26:26-28.) Gin-gamit niya an tinapay nga waray libadura ngan an bino nga nakada na. Ginsidngan ni Jesus an iya mga apostol nga ito nga duha nga simple nga butang nagsisimbolo han iya perpekto nga lawas ngan dugo, nga ha diri maiha iya ihahatag para ha ira. An mga apostol bangin waray mahipausa han pagkasimple hinin importante nga bag-o nga panihapon. Kay ano?

4. Paonan-o an sagdon ni Jesus kan Marta mabulig ha aton nga masabtan kon kay ano nga gintipigan ni Jesus nga simple an panihapon ha Memoryal?

⁴ Tagda kon ano an nahitabo mga pipira ka bulan antes hito, durante han ikatulo ka tuig han ministeryo ni Jesus, han binisita hiya ha balay han iya duok nga mga sangkay​—hira Lasaro, Marta, ngan Maria. Hiton relaks nga kahimtang, nagtikang pagtutdo hi Jesus. Nakada hi Marta, pero nauulang hiya ha pag-andam hin damu nga pagkaon para ha iya dungganon nga bisita. Naobserbaran ito ni Jesus, ngan ha buotan nga paagi iya gintadong hi Marta, ginbuligan hiya nga masabtan nga diri man kinahanglan nga pirme damu an pagkaon. (Luc. 10:40-42) Ha urhi, mga pipira ka oras na la antes ni Jesus ighalad an iya kinabuhi, gin-aplikar niya an iya kalugaringon nga sagdon. Gintipigan niya nga simple an panihapon ha Memoryal. Ano an iginsusumat hini ha aton mahitungod kan Jesus?

5. Ano an iginpapakita han pagin simple hini nga panihapon mahitungod kan Jesus, ngan paonan-o ini nauyon ha ginsisiring han Filipos 2:5-8?

⁵ Ha ngatanan nga ginsiring ngan ginbuhat ni Jesus, mapainubsanon hiya. Salit diri urusahon nga nagpakita hiya hin daku nga pagpaubos ha kataposan nga gab-i han iya kinabuhi ha tuna. (Mat. 11:29) Maaram hiya nga hirani na niya ihatag an gidadakui nga halad ha kasaysayan han tawo ngan maaram hiya nga babanhawon hiya ni Jehova ngan tatagan hin mahimayaon nga posisyon ha langit. Bisan pa hito, waray hiya mangalimbasog nga makadani hin sobra nga atensyon pinaagi ha pagsugo nga isaurog ha komplikado nga paagi an iya kamatayon. Lugod, ginsidngan niya an iya mga disipulo nga makausa ha kada tuig sadang nira hinumdoman hiya pinaagi hini nga simple nga panihapon. (Juan 13:15; 1 Cor. 11:23-25) An simple pero angayan nga panihapon nagpapakita nga hi Jesus diri mapahitas-on. Nalilipay kita nga an pagkamapainubsanon usa han nangunguna nga kalidad han aton langitnon nga Hadi.​—Basaha an Filipos 2:5-8.

6. Paonan-o naton masusubad an pagkamapainubsanon ni Jesus kon naatubang kita hin mga pagsari?

⁶ Paonan-o naton masusubad an pagkamapainubsanon ni Jesus? Pinaagi ha pag-una han kaopayan han iba kay han aton. (Fil. 2:3, 4) Hunahunaa utro an ultimo nga gab-i han kinabuhi ni Jesus ha tuna.  Maaram hiya nga madaliay na la makakaeksperyensya na hiya hin masakit nga kamatayon; bisan pa hito, nabaraka gud hiya ha iya matinumanon nga mga apostol, nga ha diri maiha masusubo hinduro tungod ha iya. Salit iya gin-gamit an ultimo nga gab-i ha pagtutdo, pagdasig, ngan pagpasarig ha ira. (Juan 14:25-31) Mapainubsanon nga iginpakita ni Jesus nga mas gintatagad niya an kaopayan han iba kay han iya kalugaringon. Maopay gud nga susbaranan an iya iginpakita ha aton!

7. Paonan-o hi Jesus nagpakita hin daku gud nga kaisog kahuman gud la niya tikangan an Panihapon han Ginoo?

⁷ Kahuman gud la tikangan ni Jesus an Panihapon han Ginoo, nagpakita hiya hin daku gud nga kaisog. Paonan-o? Ginsunod ni Jesus an kaburut-on han iya Amay para ha iya, bisan kon maaram hiya nga an pagbuhat hito nagpapasabot nga papatayon hiya tungod han makaarawod nga krimen nga pagpasipara. (Mat. 26:65, 66; Luc. 22:41, 42) Nagtipig hi Jesus hin hingpit nga integridad basi mapasidunggan an ngaran ni Jehova, masuportaran an pagkasoberano han Dios, ngan maabrihan an dalan ngadto ha kinabuhi nga waray kataposan para ha mabinasulon nga katawohan. Ha pariho nga panahon, gin-andam ni Jesus an iya mga sumurunod ha mahitatabo ha ira ha tidaraon.

8. (a) Ano an ginsiring ni Jesus ha iya matinumanon nga mga apostol? (b) Paglabay hin mga tuig katapos mamatay hi Jesus, paonan-o ginsubad han iya mga disipulo an iya ehemplo ha pagpakita hin kaisog?

⁸ Nagpakita liwat hi Jesus hin kaisog pinaagi han diri paghunahuna han bisan ano nga kabaraka nga bangin inabat niya ngan pinaagi ha pagpokus han iya atensyon ha panginahanglan han iya matinumanon nga mga apostol. An simple nga panihapon, nga iya gintikangan katapos niya pagawson hi Judas, magpapahinumdom hadton magigin iya dinihogan nga mga sumurunod han kapulsanan han ginpaagay nga dugo ni Jesus ngan han pagin bahin han bag-o nga kasabotan. (1 Cor. 10:16, 17) Basi buligan hira nga pamatud-an nga takos hira han ira langitnon nga pagtawag, ginsumatan ni Jesus  an iya mga sumurunod kon ano an ginlalaoman niya ngan han iya Amay ha ira. (Juan 15:12-15) Ginsumatan liwat ni Jesus an iya mga apostol han mga pagsari nga ira maieksperyensyahan. Katapos, ha pag-unabi han iya kalugaringon nga ehemplo, gin-aghat niya hira nga “magmaisugon!” (Juan 16:1-4a, 33) Paglabay hin damu ka tuig, ginsusubad la gihapon han mga disipulo ni Jesus an iya ehemplo ha pagsakripisyo ha kalugaringon ngan ha pagpakita hin kaisog. Bisan kon magsakripisyo hira, ginsuportaran nira an usa kag usa ha iba-iba nga pagsari ha ira.​—Heb. 10:33, 34.

9. Paonan-o naton masusubad hi Jesus ha pagpakita hin kaisog?

⁹ Yana liwat, ginsusubad naton an ehemplo ni Jesus ha pagpakita hin kaisog. Pananglitan, nagkikinahanglan hin kaisog an pagbulig ha aton kabugtoan nga gintitimaraot tungod han ira pagtoo. Usahay, an aton kabugtoan bangin diri makatadunganon nga ginpipriso. Kon mahitabo ito, kinahanglan buhaton naton an ngatanan nga aton mahihimo para ha ira, lakip na an pagdepensa ha ira. (Fil. 1:14; Heb. 13:19) An usa pa nga paagi nga maipapakita naton an kaisog amo an padayon nga pagsangyaw hin “waray kahadlok.” (Buh. 14:3) Pariho kan Jesus, determinado kita nga isangyaw an mensahe han Ginhadian, bisan kon bangin kontrahon ngan timarauton kita. Pero usahay, bangin umabat kita nga kulang an aton kaisog. Ano an aton mahimo buhaton?

10. Ha mga semana antes han Memoryal, ano an sadang naton buhaton, ngan kay ano?

¹⁰ Mapaparig-on naton an aton kaisog pinaagi ha paghunahuna han paglaom nga nagin posible para ha aton tungod han halad lukat han Kristo. (Juan 3:16; Efe. 1:7) Ha mga semana antes han Memoryal, may-ada kita maopay nga higayon basi maparig-on an aton apresasyon ha lukat. Durante hito nga panahon, sunda an nakaeskedyol nga pagbasa ha Biblia ha Memoryal ngan pamalandonga ha mainampoon nga paagi an mga panhitabo may kalabotan han kamatayon ni Jesus.  Katapos, kon magkatirok na kita para ha Panihapon han Ginoo, mas masasabtan naton hin maopay an pagkaimportante han mga emblema ha Memoryal ngan an waray kapariho nga sakripisyo nga ginrirepresentaran hito. Kon nasasabtan naton kon ano an ginbuhat ni Jesus ngan ni Jehova para ha aton ngan kon ano an kapulsanan hito ha aton ngan ha aton mga hinigugma, mas napaparig-on an aton paglaom, ngan naaaghat kita nga magpailob nga maisugon tubtob ha kataposan.​—Heb. 12:3.

11-12. Ha aton mga ginhisgotan, ano an aton nahibaroan?

¹¹ Sugad han ginhisgotan na, nahibaroan naton nga an Panihapon han Ginoo nagpapahinumdom ha aton diri la han presyoso nga lukat kondi pati gihap han mag-opay gud nga mga kalidad ni Jesus, an pagpaubos ngan kaisog. Mapasalamaton gud kita nga hi Jesus padayon nga nagpapakita hini nga mga kalidad sugad nga aton langitnon nga Hitaas nga Saserdote, nga nakikimalooy para ha aton! (Heb. 7:24, 25) Basi ipakita an aton kinasingkasing nga apresasyon, kinahanglan maunungon nga isaurog naton an kamatayon ni Jesus, sugad han iya iginsugo. (Luc. 22:19, 20) Ginbubuhat naton ini ha adlaw nga katugbang han Nisan 14, an pinakaimportante nga petsa han tuig.

¹² Tikang ha simple nga pagsaurog han Panihapon han Ginoo may mahibabaroan kita nga iba pa nga kalidad nga nagpagios kan Jesus nga mamatay para ha aton. Sugad nga tawo dinhi ha tuna, kilala hiya hini nga kalidad. Ano ito?

13. Paonan-o iginhuhulagway han Juan 15:9 ngan 1 Juan 4:8-10 an gugma nga iginpakita ni Jehova ngan ni Jesus, ngan hin-o an nagpapahimulos han ira gugma?

¹³ Hingpit nga iginpakita ni Jesus an daku nga gugma ni Jehova para ha aton ha ngatanan nga iya ginbuhat. (Basaha an Juan 15:9; 1 Juan 4:8-10.) Labaw ha ngatanan, kinasingkasing nga iginhatag niya an iya kinabuhi para ha aton. Kaapi man kita ha mga dinihogan o ha “iba nga mga karnero,” nagpapahimulos kita han gugma nga iginpakita ha aton ni Jehova ngan han iya Anak pinaagi hito nga halad. (Juan 10:16; 1 Juan 2:2) Hunahunaa liwat an mga emblema nga gin-gamit ha panihapon ha Memoryal; nagpapakita ito han gugma ngan konsiderasyon ni Jesus ha iya mga disipulo. Paonan-o?

14. Ha ano nga paagi iginpakita ni Jesus an iya gugma ha iya mga disipulo?

¹⁴ Iginpakita ni Jesus an iya gugma ha iya dinihogan han espiritu nga mga sumurunod pinaagi ha pagtikang, diri hin komplikado nga rituwal, kondi hin simple nga panihapon nga ira isasaurog. Paglabay han panahon, adton dinihogan nga mga disipulo kinahanglan magsaurog han Memoryal kada tuig, ginbubuhat ito ha iba-iba nga mga kahimtang, upod na ha prisohan. (Pah. 2:10) Nahimo ba nira nga sugton hi Jesus? Oo!

15-16. Paonan-o naisaurog han pipira an Panihapon han Ginoo ilarom ha makuri nga mga kahimtang?

¹⁵ Tubtob ha moderno nga panahon, an tinuod nga mga Kristiano nangangalimbasog nga isaurog an kamatayon ni Jesus. Ginsunod nira an paagi ha pagsaurog han Panihapon han Ginoo ha pinakamaopay nga ira mahihimo, usahay ilarom ha makuri nga mga kahimtang. Tagda an masunod nga mga ehemplo. Samtang nakabartolina ha usa nga prisohan ha Tsina, hi Bugto Harold King kinahanglan mamiling hin paagi basi iya maisaurog an Memoryal. Sekreto nga iya igin-andam an mga emblema ha Memoryal, ginagamit kon ano an may-ada hiya. Iya liwat ginbanabana hin maopay an petsa han Memoryal. Pag-abot han oras para ha pagsaurog, hiya​—nga nag-uusahan ha iya selda—​nagkanta, nag-ampo, ngan nagpahayag basado ha Kasuratan.

¹⁶ May lain pa nga ehemplo. Usa nga grupo han mga sister nga ginpriso ha kampo nga prisohan durante han Girra ha Kalibotan II an nagbutang ha peligro han ira mga kinabuhi basi maisaurog an Panihapon han Ginoo. Pero, tungod kay simple la an panihapon, sekreto nga naisaurog nira an Memoryal. Hira nagsiring: “Tinindog kami nga  nakapalibot ngan magsarapit, ha butnga namon may bangkito nga ginsapinan hin busag nga tela diin nakabutang an mga emblema. Kandila an amon suga kay kon bombilya bangin mahibaroan an amon ginbubuhat. . . . Iginpahayag namon utro an amon sinsero nga mga saad ha aton Amay nga gamiton an ngatanan namon nga kusog para ha pagbindikar han Iya baraan nga ngaran.” Daku gud nga pagtoo an ira iginpakita! Ngan daku gud nga gugma an iginpakita ni Jesus han ginhimo niya nga posible para ha aton nga maisaurog an Memoryal bisan ha makuri nga mga kahimtang!

17. Ano nga mga pakiana an mahimo naton igpakiana ha aton kalugaringon?

¹⁷ Samtang nagtitikahirani an Memoryal, maopay nga pakianhan naton an aton kalugaringon han masunod nga mga pakiana: ‘Paonan-o ko mas masusubad hi Jesus ha pagpakita hin gugma? Mas ginhuhunahuna ko ba an mga panginahanglan han akon mga igkasi-magsiringba kay han akon? Naglalaom ba ako ha mga kabugtoan hin labaw kay han ira mahihimo, o maaram ako han ira mga limitasyon?’ Hinaot pirme naton subaron hi Jesus ngan magpakita hin “pagpaid.”​—1 Ped. 3:8.

18-19. (a) Ha ano kita makakasiguro? (b) Ano an imo determinasyon?

¹⁸ An sugo nga isaurog an Memoryal han kamatayon han Kristo diri na magpapadayon hin maiha nga panahon. Kon ‘umabot’ na hi Jesus durante han daku nga kasakitan, iya titirukon an nanhibilin han iya “mga pinili” ngadto ha langit, ngan matatapos na an pagsaurog han Memoryal.​—1 Cor. 11:26; Mat. 24:31.

¹⁹ Bisan ha panahon nga an Memoryal diri na isasaurog, makakasiguro kita nga an katawohan ni Jehova malilipay ha paghinumdom hinin simple nga panihapon sugad nga simbolo han pinakadaku nga pagpaubos, kaisog, ngan gugma nga iginpakita han usa nga tawo. Hito nga panahon, adton nakagsaurog hinin talagsahon gud nga panihapon sigurado nga magsusumat mahitungod hito para ha kapulsanan han mga nabubuhi hito nga panahon. Pero basi makapahimulos yana tikang hini nga panihapon, kinahanglan magin determinado kita nga subaron an kan Jesus pagpaubos, kaisog, ngan gugma. Kon buhaton naton ito, makakasarig kita nga makakarawat naton an aton balos tikang kan Jehova.​—2 Ped. 1:10, 11.