1-2. (a) Paonan-o an mensahe ha Isaias 41:10 nakabulig kan Sister Yoshiko? (b) Para kan kanay kapulsanan gintipigan ni Jehova ito nga mensahe?

HI Yoshiko nga usa nga matinumanon nga sister, nakakarawat hin maraot nga balita. An iya doktor nagsiring nga pipira na la ka bulan an iya kinabuhi. Ano an iya reaksyon? Ginhinumdom ni Yoshiko an usa nga paborito niya nga teksto, an Isaias 41:10. (Basaha.) Katapos, kalmado nga ginsidngan niya an iya doktor nga diri hiya nahahadlok, kay ginkakaptan ni Jehova an iya kamot. * An nakakaliaw nga mensahe hini nga teksto nakabulig ha aton hinigugma nga sister nga bug-os nga sumarig kan Jehova. Mabubuligan liwat kita hini nga teksto nga magpabilin nga kalmado kon naatubang kita hin duro nga mga pagsari. Basi mahibaroan naton kon paonan-o ini makakabulig ha aton, usisahon anay naton kon kay ano nga iginpasurat han Dios kan Isaias ito nga mensahe.

² Iginpasurat ni Jehova kan Isaias ito nga mensahe basi liawon an mga Judio nga magigin distyero ha Babilonya. Pero gintipigan ni Jehova ito nga mensahe diri la para ha kapulsanan han mga Judio nga distyero kondi para liwat ha ngatanan niya nga katawohan tikang hito nga panahon. (Isa. 40:8; Roma 15:4) Yana, nabubuhi kita ha “peligroso gud nga mga panahon nga makuri pakiangayan,” salit mas kinahanglan gud naton an pagparig-on nga mababasa ha libro han Isaias.​—2 Tim. 3:1.

3. (a) Ano nga mga pasarig an aton mababasa ha Isaias 41:10, an ginpili nga tinuig nga teksto para ha 2019? (b) Kay ano nga kinahanglan naton ini nga mga pasarig?

³ Hini nga artikulo, magpupokus kita ha tulo nga makaparig-on  ha pagtoo nga pasarig ni Jehova nga mababasa ha Isaias 41:10: (1) Hi Jehova maupod ha aton, (2) hiya an aton Dios, ngan (3) hiya mabulig ha aton. Kinahanglan naton ini nga mga pasarig * kay naatubang kita hin mga pagsari pariho kan Yoshiko. Nakakaeksperyensya liwat kita hin mga kakurian tungod han magraot nga panhitabo ha kalibotan. An pipira ha aton nag-aantos pa ngani hin pagtimaraot tikang ha gamhanan nga mga gobyerno. Hisgotan naton hin usa-usa an tulo nga pasarig.

4. (a) Ano an siyahan nga pasarig nga aton hihisgotan? (Kitaa liwat an footnote.) (b) Paonan-o iginpapahayag ni Jehova an iya pagbati para ha aton? (c) Ano an epekto ha imo han mga ginsiring ni Jehova?

⁴ Siyahan, ginpapasarig kita ni Jehova pinaagi hini nga mga pulong: “Ayaw kahadlok, kay kaupod mo ako.” * Iginpapakita ni Jehova nga upod hiya ha aton pinaagi ha paghatag ha aton han iya bug-os nga atensyon ngan han iya gugma. Tagda kon paonan-o iginpapahayag ni Jehova an iya malumo ngan hilarom nga pagbati para ha aton. ‘Ikaw nagin birilhon ha akon paniplatan, ngan ginpasidunggan, ngan ako nahigugma ha imo,’ siring ni Jehova. (Isa. 43:4) Waray bisan ano ha uniberso nga makakapaundang kan Jehova ha paghigugma hadton mga nag-aalagad ha iya; an iya pagin maunungon ha aton diri mawawara. (Isa. 54:10) An iya gugma ngan pakigsangkay nakakaparig-on gud ha aton. Papanalipdan kita niya yana, sugad la nga ginpanalipdan niya an iya sangkay nga hi Abram (Abraham). Hi Jehova nagsiring ha iya: “Ayaw kahadluk, Abram: Ako an imo taming.”​—Gen. 15:1.

5-6. (a) Paonan-o kita nahibaro nga karuyag gud ni Jehova nga buligan kita ha aton mga problema? (b) Ano an aton mahibabaroan ha ehemplo ni Yoshiko?

⁵ Maaram kita nga karuyag gud ni Jehova nga buligan kita ha aton mga problema kay nagsasaad hiya ha iya katawohan: “Kon ikaw maglatas han katubigan, ako maupud ha imo; ngan ha paglatas han kasalogan, hira diri malapwas ha imo: kon ikaw magtara han kalayo, diri ka masusunug, diri man an laga makakasarab ha imo.” (Isa. 43:2) Ano an iginpapasabot hini nga mga pulong?

⁶ Diri nagsasaad hi Jehova nga kukuhaon niya an mga pagsari nga nakakapakuri ha aton  kinabuhi, pero diri niya tutugotan an “kasalogan” han mga problema nga maglumos ha aton o “an laga” han mga pagsari nga magkaada permanente nga kadaot ha aton. Ginpapasarig kita niya nga maupod hiya ha aton ngan bubuligan kita niya nga ‘malatas’ ito nga mga pagsari. Ano an bubuhaton ni Jehova? Bubuligan kita niya nga mawara an aton kahadlok basi matipigan naton an aton integridad ha iya, bisan kon umatubang kita hin kamatayon. (Isa. 41:13) Ito gud an nahitabo kan Yoshiko nga gin-unabi kanina. An iya anak nagsiring: “Naimpres gud kami ha pagin kalmado ni Nanay. Nakita gud namon nga gintagan hiya ni Jehova hin murayaw nga hunahuna. Tubtob han iya kamatay, nakiistorya hi Nanay ha mga nars ngan mga pasyente mahitungod kan Jehova ngan han iya mga saad.” Ano an aton mahibabaroan ha ehemplo ni Yoshiko? Kon masarig kita ha saad han Dios nga “ako maupud ha imo,” magigin maisugon ngan marig-on liwat kita samtang gin-aatubang an mga pagsari.

7-8. (a) Ano an ikaduha nga pasarig nga aton hihisgotan, ngan ano an iginpapasabot hito? (b) Kay ano nga ginsidngan ni Jehova an mga Judio nga distyero: “Ayaw kabaraka”? (c) Ano nga mga pulong ha Isaias 46:3, 4 an sigurado nga nakapakalma ha kasingkasing han katawohan han Dios?

⁷ Tigamni an ikaduha nga pasarig nga iginpasurat kan Isaias: “Ayaw kabaraka, kay ako an imo Dios.” Ano an iginpapasabot hini nga mga pulong mahitungod ha kabaraka? Hini nga bersikulo, an orihinal nga pulong para ha “kabaraka” nag-uupod han ideya nga “paglingi-lingi tungod ha kahadlok han posible nga peligro” o “nalilisang sugad han usa nga aada ha delikado nga kahimtang.”

⁸ Kay ano nga ginsidngan ni Jehova an mga Judio nga magigin distyero ha Babilonya nga diri ‘mabaraka’? Kay maaram hiya nga mahahadlok an mga umurukoy hito nga lugar. Kay ano nga mahahadlok hira? Ha ikatarapos han 70 ka tuig nga pagin distyero han mga Judio, an Babilonya aatakehon han magkusog nga kasundalohan han Medo-Persia. Gagamiton ni Jehova ini nga kasundalohan basi talwason an iya katawohan tikang ha pagkabihag ha Babilonya. (Isa. 41:2-4) Han hinbaroan han mga taga-Babilonya ngan han mga tawo nga taga-iba nga nasud nga naukoy didto nga hirani na an ira mga kaaway, nangalimbasog hira nga tipigan an ira kaisog pinaagi ha pagsiring ha kada tagsa: “Pagpakaisug.” Naghimo liwat hira hin dugang nga mga dios-dios, kay naglalaom hira nga magpapanalipod ito ha ira. (Isa. 41:5-7) Ha luyo nga bahin, ginpakalma ni Jehova an kasingkasing han mga Judio nga distyero pinaagi ha pagsiring: “Ikaw, O Israel, [diri pariho han imo mga amyaw] akon surugoon . . . Ayaw kabaraka, kay ako an imo Dios.” (Isa. 41:8-10, nwt-E) Tigamni nga nagsiring hi Jehova: “Ako an imo Dios.” Pinaagi hini nga mga pulong, ginpasarig ni Jehova an iya maunungon nga mga magsiringba nga waray niya hira kalimti​—hiya pa gihapon an ira Dios, ngan hira pa gihapon an iya katawohan. Ginsidngan niya hira: “Akon [ka] pagpapasanon . . . ngan ihahatag [o, tatalwason].” Ini nga pasarig sigurado nga nakaparig-on ha mga Judio nga distyero.​—Basaha an Isaias 46:3, 4.

9-10. Kay ano nga diri kita angay mahadlok? Iilustrar.

⁹ An mga tawo yana mas labi nga nababaraka tungod han nagtitikaraot nga mga kahimtang ha kalibotan. Syempre, apektado liwat kita hito nga mga problema. Pero diri kita angay mahadlok. Ginsisidngan kita ni Jehova: “Ako an imo Dios.” Kay ano nga marig-on gud ini nga rason nga magpabilin nga kalmado?

¹⁰ Hunahunaa ini nga ilustrasyon: May duha nga pasahero nga hira Jim ngan Ben nga sakay hin eruplano nga ginbabay-og han makusog nga hangin. Samtang ginbabay-og an eruplano, an piloto nagsiring: “Siguroha nga nakasul-ot an iyo seat belt. Makakaeksperyensya kita hin maiha-iha nga turbulence.” Nabaraka gud hi Jim. Pero an piloto dugang nga nagsiring: “Ayaw kamo kabaraka. Ini an iyo piloto.” Hini nga takna, nagpilingpiling hi Jim ngan nagsiring: “Ano nga klase ito nga pasarig?”  Pero naobserbaran niya nga diri nababaraka hi Ben. Ginpakianhan ni Jim hi Ben: “Kay ano nga kalmado ka man hinduro?” Hiniyom hi Ben ngan nagsiring: “Kay kilala ko gud an piloto. Tatay ko hiya!” Katapos, hi Ben nagsiring: “Susumatan ko ikaw mahitungod ha akon tatay. Sigurado ako nga kon makilala mo hiya ngan mahibaroan mo an iya mga abilidad, magigin kalmado ka liwat.”

11. Ano an aton mahibabaroan ha ilustrasyon mahitungod ha duha nga pasahero?

¹¹ Ano an aton mahibabaroan hini nga ilustrasyon? Pariho kan Ben, kalmado kita kay kilala gud naton an aton langitnon nga Amay nga hi Jehova. Maaram kita nga gigiyahan kita niya basi malamposan naton an sugad-bagyo nga mga problema nga aton gin-aatubang durante han kataposan nga mga adlaw hini nga sistema. (Isa. 35:4) Nasarig kita kan Jehova, salit nakakapabilin kita nga kalmado samtang an iba nga tawo nakakaeksperyensya hin duro nga kahadlok. (Isa. 30:15) Nagios liwat kita pariho kan Ben kon iginsusumat naton ha aton mga amyaw an mga rason kon kay ano nga sadang sumarig ha Dios. Sugad nga resulta, makakasiguro liwat hira nga anoman nga pagsari an ira atubangon, bubuligan hira ni Jehova.

12. (a) Ano an ikatulo nga pasarig nga aton hihisgotan? (b) An pag-unabi han “butkon” ni Jehova nagpapahinumdom ha aton han ano nga kamatuoran?

¹² Tagda an ikatulo nga pasarig nga iginpasurat kan Isaias: “Paririg-unon ko ikaw, oo, bubuligan ko ikaw.” Iginsaysay na ni Isaias kon paonan-o ni Jehova paririg-unon, o pakukusgon, an iya katawohan pinaagi ha pagsiring: “Hi Jehova makanhi sugad hin usa nga makusganon, ngan an iya butkon maglalarang [o, magmamando] para ha iya.” (Isa. 40:10) Agsob gamiton han Biblia an pulong nga “butkon” sugad nga simbolo han gahum. Salit an mga pulong nga an butkon ni Jehova magmamando nagpapahinumdom ha aton nga hi Jehova usa nga gamhanan nga Hadi. Gin-gamit niya an iya waray katupong nga kusog basi buligan ngan depensahan an iya mga surugoon  ha naglabay, ngan padayon niya nga ginpaparig-on ngan ginpapanalipdan an mga nasarig ha iya yana.​—Deut. 1:30, 31; Isa. 43:10.

13. (a) Ha ano nga kahimtang labi nga gintutuman ni Jehova an iya saad nga paririg-unon kita? (b) Ano nga pasarig an nabulig ha aton nga magkaada kusog ngan kompyansa?

¹³ Gintutuman gud ni Jehova an iya saad nga “paririg-unon ko ikaw,” labi na kon gintitimaraot kita han aton mga kaaway. Ha pipira nga lugar ha kalibotan yana, nangangalimbasog an aton mga kaaway nga paundangon an aton pagsangyaw o igdiri an aton organisasyon. Bisan pa hito, diri kita sobra nga nababaraka ha sugad nga mga pag-atake. Gintatagan kita ni Jehova hin pasarig nga nabulig ha aton nga magkaada kusog ngan kompyansa. Nagsasaad hiya ha aton: “Waray hinganiban [o, armas] nga ginhitsura patok ha imo nga mauswag.” (Isa. 54:17) Ini nga mga pulong nagpapahinumdom ha aton han tulo nga importante nga kamatuoran.

14. Kay ano nga diri kita nahipapausa nga gin-aatake kita han mga kaaway han Dios?

¹⁴ Siyahan, sugad nga mga sumurunod han Kristo, ginlalaoman naton nga mapupungot ha aton an iba. (Mat. 10:22) Igintagna ni Jesus nga ha kataposan nga mga adlaw duro nga pagtitimarauton an iya mga disipulo. (Mat. 24:9; Juan 15:20) Ikaduha, an tagna ni Isaias nagpapahamangno ha aton nga an aton mga kaaway diri la mapupungot ha aton; magamit hira hin iba-iba nga armas kontra ha aton. Ito nga mga armas nag-uupod han tuso nga panlimbong, dayag nga kabuwaan, ngan duro nga pagtimaraot. (Mat. 5:11) Diri pupugngan ni Jehova an aton mga kaaway ha paggamit hini nga mga armas ha pakig-away ha aton. (Efe. 6:12; Pah. 12:17) Pero diri kita angay mahadlok. Kay ano?

15-16. (a) Ano an ikatulo nga kamatuoran nga kinahanglan naton hinumdoman, ngan paonan-o ini ginsusuportaran han Isaias 25:4, 5? (b) Paonan-o iginsasaysay han Isaias 41:11, 12 an dadangatan hadton nakikig-away ha aton?

¹⁵ Tagda an ikatulo nga kamatuoran nga kinahanglan naton hinumdoman. Nagsiring hi Jehova nga “waray hinganiban” nga ginagamit kontra ha aton nga “mauswag.” Pariho hin pader nga nagpapanalipod ha aton kontra ha makusog nga bagyo,  ginpapanalipdan kita ni Jehova kontra ha “puros han mga magpakalilisang [o, pagbuto han kasina han mga matalumpiguson].” (Basaha an Isaias 25:4, 5.) An aton mga kaaway diri gud maglalampos ha pagpahinabo hin bisan ano nga nagpapadayon nga kadaot ha aton.​—Isa. 65:17.

¹⁶ Dugang nga ginpaparig-on ni Jehova an aton pagsarig ha iya pinaagi ha pagsaysay hin detalyado han dadangatan hadton “nasisina” ha aton. (Basaha an Isaias 41:11, 12.) Bisan kon an aton mga kaaway maniguro gud ha pagkontra ha aton o bisan kon magin duro gud an away, pariho la an resulta: An ngatanan nga kaaway han Dios “masusugad hin waray, ngan mahahanaw.”

17-18. (a) Paonan-o an pagbasa ha Biblia makakaparig-on han aton pagsarig ha Dios? Paghatag hin ehemplo. (b) Paonan-o makakabulig ha aton an pagpamalandong ha tinuig nga teksto nga ginpili para ha 2019?

¹⁷ Mapaparig-on naton an aton pagsarig kan Jehova pinaagi ha pagkilala ha iya hin mas maopay. Ngan an amo la nga paagi basi makilala gud naton an Dios hin mas maopay amo an pagbasa ha Biblia ngan pagpamalandong han aton ginbabasa. An Biblia nagsusulod hin masasarigan nga rekord kon paonan-o ginpanalipdan ni Jehova an iya katawohan ha naglabay. Ini nga rekord naghahatag ha aton hin kompyansa nga mamangnoan liwat kita niya yana.

¹⁸ Tagda an usa nga maopay nga ilustrasyon nga gin-gamit ni Isaias basi ipakita kon paonan-o kita ginpapanalipdan ni Jehova. Gin-unabi niya hi Jehova sugad nga usa nga paraataman hin karnero ngan an mga surugoon han Dios sugad nga nati nga mga karnero. Hi Isaias nagsiring mahitungod kan Jehova: “Iya pagtitirokon an mga nati nga karnero dida ha iya butkon, ngan pagdadad-on hira ha iya dughan.” (Isa. 40:11) Kon inaabat naton nga ginkukugos kita han magkusog nga butkon ni Jehova, naabat kita hin pagin talwas ngan pagin kalmado. Basi buligan kita nga makapabilin nga kalmado bisan pa han mga problema nga aton gin-aatubang, ginpili han matinumanon ngan maaramon nga uripon an Isaias 41:10 sugad nga tinuig nga teksto para ha 2019, “Ayaw kabaraka, kay ako an imo Dios.” Pamalandonga ini nga pasarig. Magpaparig-on ini ha imo ha pag-atubang ha maabot nga mga pagsari.