HAN Mierkoles han aga, Enero 24, 2018, nalipay an pamilya han Bethel ha Estados Unidos ngan Canada ha pakabati han espesyal nga pahibaro: Hi Bugto Kenneth Cook, Jr., usa na nga membro han Nagmamando nga Lawas han mga Saksi ni Jehova.

Hi Bugto Cook natawo ngan nagdaku ha south-central Pennsylvania, E.U.A. Hinbaroan niya an kamatuoran tikang ha iya kaklase antes la hiya maggradwar ha hayskul, ngan nabawtismohan hiya han Hunyo 7, 1980. Nagtikang hiya han iya bug-os-panahon nga pag-alagad sugad nga regular payunir han Septyembre 1, 1982. Paglabay hin duha ka tuig, gin-imbitar hiya mag-alagad ha Bethel ha Wallkill, New York, han Oktubre 12, 1984.

Han sumunod nga 25 ka tuig, hi Bugto Cook igintoka ha iba-iba nga buruhaton ha Printery ngan ha Bethel Office. Han 1996, iginkasal hiya kan Jamie, nga nag-alagad liwat ha Bethel ha Wallkill. Han Disyembre 2009, iginbalhin hira ha Watchtower Educational Center ha Patterson, New York, diin igintoka hi Bugto Cook ha Writing Correspondence Department. Han Abril 2016, katapos han madaliay nga pagbalik ha Wallkill, iginbalhin hira ha Brooklyn, New York. Paglabay hin lima ka bulan, gin-imbitar hira mag-alagad ha world headquarters ha Warwick, New York. Han Enero 2017, igintoka hi Bugto Cook sugad nga kabulig han Writing Committee han Nagmamando nga Lawas.