1-2. (a) Ano an nakikita ni Jehova kon an minilyon nagtitirirok para ha Panihapon han Ginoo? (Kitaa an retrato ha kobre han magasin.) (b) Ano an aton hihisgotan hini nga artikulo?

HUNAHUNAA kon ano an nakikita ni Jehova kon an minilyon ha bug-os nga kalibotan nagtitirirok para ha Panihapon han Ginoo. Ginkikita niya diri la an kadamu han mga tawo; nakikita niya an tagsa nga indibiduwal nga presente. Pananglitan, nakikita niya an mga matinumanon nga natambong kada tuig. An pipira ha ira bangin natambong bisan pa han duro nga pagtimaraot. An iba diri regular nga natambong ha iba nga mga katirok, pero gintatagad nira an pagtambong ha Memoryal sugad nga seryoso nga obligasyon. Nakikita liwat ni Jehova adton bangin siyahan pa la nga tinambong ha Memoryal, bangin tungod kay karuyag la nira mag-usisa.

² Sigurado nga nalilipay hi Jehova nga makita nga damu gud an natambong ha Memoryal. (Luc. 22:19) Pero an pinakaimportante kan Jehova diri an kadamu han mga tawo nga natambong. Mas interesado hiya ha rason han ira pagtambong; an motibo importante kan Jehova. Hini nga artikulo, hihisgotan naton an usa nga importante gud nga pakiana: Kay ano nga natambong kita diri la ha tinuig nga pagsaurog han Memoryal kondi pati liwat ha sinemana nga mga katirok nga igintatagana ni Jehova ha mga nahigugma ha iya?

3-4. (a) Kay ano nga natambong kita ha mga katirok? (b) Ano an iginsusumat mahitungod ha aton han aton pagtambong ha mga katirok? (c) Uyon ha ginsisiring ha 1 Corinto 11:23-26, kay ano nga sadang kita tumambong ha Memoryal?

³ An nangunguna nga rason kon kay ano nga natambong kita ha mga katirok han kongregasyon tungod kay bahin ito han aton pagsingba.  Natambong liwat kita tungod kay gintututdoan kita ni Jehova ha mga katirok. An mapahitas-on nga mga tawo diri natoo nga kinahanglan hira tutdoan hin bisan ano. (3 Juan 9) Ha kabaliktaran, karuyag gud naton nga tutdoan ni Jehova ngan han organisasyon nga iya ginagamit.​—Isa. 30:20; Juan 6:45.

⁴ An aton pagtambong ha mga katirok nagpapakita nga mapainubsanon kita​—andam ngan disidido magpatutdo. Ha gab-i han Memoryal han kamatayon ni Jesus, natambong kita hinin importante nga okasyon diri la tungod kay obligado kita kondi tungod liwat kay mapainubsanon nga nasugot kita ha sugo ni Jesus: “Padayon nga buhata niyo ini sugad nga hinumdoman ha akon.” (Basaha an 1 Corinto 11:23-26.) Ito nga katirok nagpaparig-on han aton paglaom ha tidaraon ngan nagpapahinumdom ha aton han kadaku han gugma ni Jehova ha aton. Pero maaram hi Jehova nga kinahanglan kita parig-unon ngan pasarigon diri la makausa ha usa ka tuig. Salit nagtatagana hiya ha aton hin mga katirok kada semana ngan gin-aaghat kita nga tumambong hito. An pagkamapainubsanon nagpapagios ha aton nga sumugot. Nagahin kita hin pipira ka oras kada semana ha pagpangandam ngan pagtambong hito nga mga katirok.

5. Kay ano nga ginkakarawat han mapainubsanon nga mga tawo an imbitasyon ni Jehova?

⁵ Kada tuig, damu nga mapainubsanon nga tawo an nakarawat han imbitasyon ni Jehova nga tutdoan niya. (Isa. 50:4) Nalilipay hira ha pagtambong ha Memoryal, ngan nagtitikang hira pagtambong ha iba pa nga mga katirok. (Sak. 8:20-23) Nalilipay kita nga urosa nga tutdoan ngan giyahan ni Jehova, an “[aton] parabulig ngan [aton] parabawi.” (Sal. 40:17) May-ada pa ba mas makalilipay​—o mas importante—​kay han pagkarawat han imbitasyon nga tutdoan ni Jehova ngan ni Jesus, an Anak nga hinigugma gud niya?​—Mat. 17:5; 18:20; 28:20.

6. Paonan-o an pagkamapainubsanon nakabulig ha usa nga lalaki nga tumambong ha Memoryal?

⁶ Kada tuig, nangangalimbasog kita nga imbitaron an pinakadamu tubtob ha mahihimo basi tumambong ha Memoryal han kamatayon ni Jesus. Damu nga mapainubsanon nga tawo an nagpapahimulos tungod kay ginkarawat nira an aton imbitasyon. Tagda an usa nga ehemplo. Pipira ka tuig na an naglabay, usa nga lalaki an nakakarawat hin inimprinta nga imbitasyon ha Memoryal, pero ginsidngan niya an brother nga naghatag hito nga diri hiya makakatambong. Pero ha gab-i han Memoryal, nahipausa an brother nga makita ito nga lalaki nga nasulod ha Kingdom Hall. Bumilib gud an lalaki ha pag-abiabi ha iya salit nagtikang hiya pagtambong ha aton sinemana nga mga katirok. Ngani, tulo la nga katirok an waray niya matambongi ha bug-os nga tuig. Ano an nakabulig ha iya nga buhaton ito? Maaghop hiya salit ginbag-o niya an iya panhunahuna. An brother nga nag-imbitar ha iya nagsiring ha urhi, “Mapainubsanon gud hiya.” Waray ruhaduha nga ginpahirani ni Jehova ini nga lalaki basi magsingba ha Iya, ngan yana bawtismado na hiya.​—2 Sam. 22:28; Juan 6:44.

7. Paonan-o an aton nahibabaroan ha mga katirok ngan nababasa ha Biblia makakabulig ha aton nga magin mapainubsanon?

⁷ An aton nahibabaroan ha mga katirok ngan nababasa ha Biblia makakabulig ha aton nga magin mapainubsanon. Ha mga semana antes han Memoryal, an aton mga katirok kasagaran nga nakapokus ha ehemplo ni Jesus ngan ha pagkamapainubsanon nga iya iginpakita han iginhatag niya an iya kinabuhi sugad nga lukat. Ngan ha mga adlaw antes han Memoryal, gin-aaghat kita nga basahon an mga asoy ha Biblia mahitungod ha mga panhitabo nga may kalabotan ha kamatayon ngan pagkabanhaw ni Jesus. An aton nahibabaroan ha sugad nga mga katirok ngan nababasa hito nga mga asoy ha Biblia nagpapahilarom han aton apresasyon ha pagsakripisyo ni Jesus para ha aton. Napapagios kita nga subaron an iya mapainubsanon nga disposisyon ngan buhaton an kaburut-on ni Jehova, bisan ha mga panahon nga makuri ito ha aton.​—Luc. 22:41, 42.

8. Paonan-o nagpakita hin kaisog hi Jesus?

⁸ Karuyag liwat naton subaron hi Jesus ha pagpakita hin kaisog. Hunahunaa an kaisog nga iya iginpakita ha mga adlaw antes hiya mamatay. Bug-os nga maaram hiya nga diri mag-iiha papakaalohan, kakastiguhon, ngan papatayon hiya han iya mga kaaway. (Mat. 20:17-19) Bisan pa hito, andam hiya mamatay. Han inabot na an takna, nagsiring hiya ha iya matinumanon nga mga apostol, nga kaupod niya ha Getsemani: “Buhát kamo, pagkalakat kita. Kitaa! Tikanhi na an magtatraydor ha akon.” (Mat. 26:36, 46) Ngan han nagkaabot an armado nga mga tawo basi arestuhon hiya, gintapo niya hira, nagpakilala, ngan ginsugo an mga sundalo nga palakton an iya mga apostol. (Juan 18:3-8) Makatirigamnan gud an kaisog nga iginpakita ni Jesus! Yana, an dinihogan nga mga Kristiano ngan an iba nga mga karnero nangangalimbasog nga subaron hi Jesus ha pagpakita hin kaisog. Paonan-o?

9. (a) Kay ano nga bangin kinahanglan kita magpakita hin kaisog basi regular nga makatambong ha mga katirok? (b) Paonan-o an aton ehemplo mahimo makaapekto ha aton kabugtoan nga napriso tungod han ira pagtoo?

⁹ Basi regular nga makatambong ha mga katirok, bangin kinahanglan kita magpakita hin kaisog kon naatubang hin magkuri nga mga kahimtang. An pipira han aton kabugtoan natambong ha mga katirok bisan pa han kasubo, panluya, o problema ha kahimsog. An iba maisugon nga natambong ha mga katirok bisan pa han duro nga pagkontra han pamilya o han gobyerno. Hunahunaa hin madaliay kon paonan-o an aton ehemplo nakakaapekto ha aton kabugtoan nga napriso tungod han ira pagtoo. (Heb. 13:3) Kon nababatian nira nga padayon kita nga nag-aalagad kan Jehova bisan pa han mga pagsari ha aton, napaparig-on hira nga tipigan an ira pagtoo, kaisog, ngan integridad. Hi apostol Pablo may puropariho nga eksperyensya. Han priso hiya ha Roma, nalilipay hiya kon nababatian niya nga an iya kabugtoan matinumanon nga nag-aalagad ha Dios. (Fil. 1:3-5, 12-14) Han hirani na hiya pagawson o katapos gud hito, ginhimo niya an iya surat ha mga Hebreo. Hito nga surat gin-aghat niya ito nga matinumanon nga mga Kristiano nga ‘ipadayon an ira minagburugto nga gugma’ ngan diri gud pabay-an an pagkatirok.​—Heb. 10:24, 25; 13:1.

10-11. (a) Hin-o an sadang naton imbitaron ha Memoryal? (b) Ano nga rason an iginhahatag han Efeso 1:7 kon kay ano nga ginbubuhat naton ito?

¹⁰ Nagpapakita kita hin kaisog kon gin-iimbitar naton ha Memoryal an aton mga paryente, mga katrabaho, ngan mga amyaw. Kay ano nga gin-iimbitar naton hira? Mapasalamaton gud kita ha ginbuhat ni Jehova ngan ni Jesus para ha aton salit diri naton mapugngan nga imbitaron an iba nga tumambong ha Memoryal. Karuyag naton hira mahibaro kon paonan-o liwat hira makakapahimulos han “diri-matupngan nga pagkabuotan” ni Jehova pinaagi han lukat.​—Basaha an Efeso 1:7; Pah. 22:17.

¹¹ Kon nagpapakita kita hin kaisog pinaagi ha pagkatirok, nagpapakita liwat kita hin usa pa nga presyoso nga kalidad, usa nga kalidad nga pariho iginpakita han Dios ngan han iya Anak ha makatirigamnan nga mga paagi.

12. (a) Paonan-o an aton mga katirok nagpapahilarom han aton gugma kan Jehova ngan kan Jesus? (b) Ano an igin-aaghat han 2 Corinto 5:14, 15 nga buhaton naton sugad nga pagsubad kan Jesus?

¹² An aton gugma kan Jehova ngan kan Jesus nagpapagios ha aton nga tumambong ha mga katirok. Sugad nga resulta, an aton nahibabaroan ha mga katirok nagpapahilarom han aton gugma kan Jehova ngan ha iya Anak. Ha mga katirok regular nga napapahinumdoman kita han ira ginbuhat para ha aton. (Roma 5:8) An Memoryal labi na nga nagpapahinumdom ha aton han kahilarom han ira gugma, bisan ha mga tawo nga diri pa nagpapabili han lukat. Tungod kay mapasalamaton gud, nangangalimbasog kita nga subaron hi Jesus ha aton pagkinabuhi kada adlaw. (Basaha an 2 Corinto 5:14, 15.) Dugang pa, an aton kasingkasing nagpapagios ha aton nga dayawon hi Jehova tungod han pagtagana han lukat. Usa nga paagi nga madadayaw naton hiya amo an kinasingkasing nga pagkomento ha aton mga katirok.

13. Paonan-o naton maipapakita an kahilarom han aton gugma kan Jehova ngan ha iya Anak? Isaysay.

¹³ Maipapakita naton an kahilarom han aton gugma kan Jehova ngan ha iya Anak pinaagi ha pagin andam ha pagsakripisyo para ha ira. Agsob nga kinahanglan naton maghimo hin iba-iba nga klase hin sakripisyo basi makatambong ha aton mga katirok. Damu nga kongregasyon an nagkakatirok ha mga oras katapos han trabaho diin posible nga kapoy na kita. Ngan an usa pa nga katirok ginhihimo ha kataposan han semana diin an iba nga mga tawo napahuway. Nakikita ba ni Jehova nga natambong kita ha aton mga katirok bisan kon kapoy kita? Oo! Ha pagkatinuod, samtang mas nangangalimbasog kita, mas gin-aapresyar ni Jehova an gugma nga iginpapakita naton ha iya.​—Mar. 12:41-44.

14. Paonan-o iginpakita ni Jesus an susbaranan ha pagpakita hin nagsasakripisyo nga gugma?

¹⁴ Iginpakita ni Jesus ha aton an susbaranan ha pagpakita hin nagsasakripisyo nga gugma. Andam hiya, diri la nga mamatay para ha iya mga disipulo, kondi magkinabuhi liwat kada adlaw nga gin-uuna an ira kaopayan kay han iya kalugaringon. Pananglitan, nakig-upod hiya ha iya mga sumurunod bisan han kapoy hiya ngan nasasakit. (Luc. 22:39-46) Ngan nagpokus hiya ha kon ano an iya maihahatag ha iba, diri ha kon ano an iya makukuha tikang ha ira. (Mat. 20:28) Kon an aton gugma kan Jehova ngan ha aton kabugtoan sugad karig-on, bubuhaton naton an ngatanan basi makatambong ha Panihapon han  Ginoo pati na ha iba pa nga mga katirok han kongregasyon.

15. Hin-o an labi na nga karuyag naton buligan?

¹⁵ Bahin kita han uusa la nga tinuod nga Kristiano nga pagminagburugto, ngan nalilipay kita ha paggahin hin damu gud nga panahon tubtob ha mahihimo ha pag-imbitar ha mga bag-ohan nga umupod ha aton. Pero labi na nga karuyag naton buligan an mga “kapariho naton hin pagtoo” kondi nagin diri aktibo. (Gal. 6:10) Ginpapamatud-an naton nga hinigugma naton hira pinaagi ha pag-aghat ha ira nga tumambong ha aton mga katirok, labi na ha Memoryal. Pariho kan Jehova ngan kan Jesus, nalilipay gud kita kon an usa nga diri aktibo nabalik kan Jehova, an aton mahigugmaon nga Amay ngan Paraataman.​—Mat. 18:14.

16. (a) Paonan-o naton madadasig an usa kag usa, ngan ano an mahihimo ha aton han aton mga katirok? (b) Kay ano nga maopay ini nga panahon han tuig ha paghinumdom han ginsiring ni Jesus ha Juan 3:16?

¹⁶ Ha maabot nga mga semana, imbitara an pinakadamu nga tawo tubtob ha mahihimo nga tumambong ha Memoryal ha Biernes han gab-i, Abril 19, 2019. (Kitaa an kahon nga “ Iimbitaron Mo ba Hira?”) Ha bug-os nga tuig, hinaot dasigon naton an usa kag usa pinaagi ha regular nga pagtambong ha ngatanan nga katirok nga igintatagana ni Jehova ha aton. Samtang nagtitikahirani an kataposan hini nga sistema, kinahanglan naton an aton mga katirok basi buligan kita nga magpabilin nga mapainubsanon, maisugon, ngan mahigugmaon. (1 Tes. 5:8-11) Ha bug-os naton nga kasingkasing, ipakita naton an aton inaabat para kan Jehova ngan ha iya Anak tungod han ira daku gud nga gugma ha aton!​—Basaha an Juan 3:16.