1-2. Ano an urusahon nga nahitabo ha adlaw han Pentekostes han 33 C.E.?

DOMINGO nga aga adto ha Jerusalem, ha tuig han 33 C.E., ngan adlaw adto han Pentekostes. Usa nga grupo hin 120 nga disipulo an nagkakatirok ha kwarto ha igbaw han usa nga balay. (Buh. 1:13-15; 2:1) Pipira ka adlaw antes hito, naghatag hi Jesus hin instruksyon nga magpabilin hira ha Jerusalem kay makarawat hira hin espesyal nga regalo. (Buh. 1:4, 5) Ano an sunod nga nahitabo?

² “Tigda la nga may aringasa tikang ha langit, nga pariho hin haganas han makusog nga hangin.” Nabatian ha bug-os nga balay ito nga aringasa. Katapos, may “mga dila nga sugad hin kalayo” nga nakita ha igbaw han ulo han mga disipulo, ngan hira ngatanan “napuno han baraan nga espiritu.” (Buh. 2:2-4) Hiton urusahon nga paagi, iginbubo ni Jehova hito nga grupo an iya baraan nga espiritu. (Buh. 1:8) Hira an siyahan nga gindihogan han baraan nga espiritu * ngan gintagan hin paglaom nga magmando ha langit kaupod ni Jesus.

3. Kay ano nga an mga gindihogan han Pentekostes waray magruhaduha nga gindihogan hira han baraan nga espiritu?

³ Kon usa ka hadton mga disipulo nga nagkatirok ha igbaw nga kwarto hito nga adlaw, diri mo gud ito hingangalimtan. May hinugdon ha imo ulo nga sugad hin dila nga kalayo, ngan  nagtikang ka magyakan hin iba nga yinaknan! (Buh. 2:5-12) Sigurado nga diri ka magruruhaduha nga gindihogan ka han baraan nga espiritu. Kondi an ngatanan ba nga dinihogan han baraan nga espiritu gindidihogan ha urusahon nga paagi ngan ha parapriho nga panahon ha ira kinabuhi? Diri. Paonan-o naton ito nahibaroan?

4. An ngatanan ba nga dinihogan ha siyahan nga siglo gindihogan ha parapriho nga panahon ha ira kinabuhi? Isaysay.

⁴ Hisgotan naton kon san-o mahimo dihogan an usa. Diri la ito nga mga 120 nga Kristiano an gindihogan han baraan nga espiritu han Pentekostes, 33 C.E. Hito liwat nga adlaw, mga 3,000 pa an nakakarawat han iginsaad nga baraan nga espiritu. Gindihogan hira han ginbawtismohan hira. (Buh. 2:37, 38, 41) Pero han sumunod nga mga tuig, diri ngatanan nga dinihogan nga mga Kristiano gindihogan han ginbawtismohan hira. An mga Samaritano gindihogan katapos han ira bawtismo. (Buh. 8:14-17) Ngan naiiba gud an pagdihog kan Cornelio ngan ha iya panimalay kay gindihogan hira antes pa hira mabawtismohan.​—Buh. 10:44-48.

5. Sumala ha 2 Corinto 1:21, 22, ano an nahitatabo kon an usa gindidihogan han baraan nga espiritu?

⁵ Hisgotan liwat naton kon ano an nahitatabo kon gindidihogan an usa han baraan nga espiritu. An iba nga dinihogan bangin ha siyahan makurian ha pagkarawat nga ginpili hira ni Jehova. Bangin maghunahuna hira, ‘Kay ano nga ginpili ako han Dios?’ Posible nga diri sugad an reaksyon han iba. Ano man an inaabat han usa, ginsaysay ni apostol Pablo kon ano an nahitatabo ha ngatanan nga gindidihogan: “Katapos niyo tumoo, ginselyohan * kamo pinaagi ha iya upod an iginsaad nga baraan nga espiritu, nga amo an abanse nga garantiya han aton panurundon.” (Efe. 1:13, 14; ftn.) Salit ginagamit ni Jehova an iya baraan nga espiritu basi magin klaro gud hito nga mga Kristiano nga iya hira ginpili. Hito nga paagi, an baraan nga espiritu usa nga “garantiya [saad]” nga iginhahatag basi pasarigon hira nga ha tiarabot nga panahon  mabubuhi hira ha waray kataposan ha langit, diri ha tuna.​—Basaha an 2 Corinto 1:21, 22.

6. Ano an kinahanglan buhaton han usa nga dinihogan nga Kristiano basi makarawat niya an iya langitnon nga balos?

⁶ Kon dinihogan an usa nga Kristiano, sigurado na ba nga makakarawat niya an iya langitnon nga balos? Diri. Sigurado hiya nga ginpili hiya basi kumadto ha langit. Pero, kinahanglan niya hinumdoman ini nga sagdon: “Mga kabugtoan, magin maduruto gud kamo ha pagsiguro ha iyo kalugaringon han pagtawag ngan pagpili ha iyo, kay kon padayon nga ginbubuhat niyo ini, diri gud kamo mapapakyas.” (2 Ped. 1:10) Salit bisan kon an usa nga dinihogan nga Kristiano ginpili, o gintawag, nga kumadto ha langit, makakarawat la niya an iya balos kon padayon hiya nga magin matinumanon.​—Fil. 3:12-14; Heb. 3:1; Pah. 2:10.

7. Paonan-o nahibabaroan han mga dinihogan nga ginpili hira nga kumadto ha langit?

⁷ Paonan-o nahibabaroan han usa nga tawo nga ginpili hiya nga kumadto ha langit? An baton klaro nga makikita ha ginsiring ni Pablo ha mga aadto ha Roma nga “gintawag basi magin mga baraan.” Ginsidngan niya hira: “Waray kamo kumarawat hin espiritu han pagkauripon nga hinungdan nga mahadlok na liwat, kondi kumarawat kamo hin espiritu han pag-ampon sugad nga mga anak, nga pinaagi hito nga espiritu naguliat kita: ‘Abba, Amay!’ An espiritu mismo nagtitestigo upod han aton espiritu nga mga anak kita han Dios.” (Roma 1:7; 8:15, 16) Salit pinaagi han iya baraan nga espiritu, iginpapatin-aw han Dios hini nga mga dinihogan nga ginpili hira nga kumadto ha langit.​—1 Tes. 2:12.

8. Sumala ha 1 Juan 2:20, 27, kay ano nga an dinihogan nga mga Kristiano diri nagkikinahanglan hin kompirmasyon tikang ha iba nga dinihogan hira?

⁸ Ginpapahinabo ni Jehova nga an mga ginpili nga kumadto ha langit diri gud magkaada pagruhaduha ha ira hunahuna ngan kasingkasing. (Basaha an 1 Juan 2:20, 27.) Syempre, pariho han iba, an dinihogan nga mga Kristiano kinahanglan tutdoan ni Jehova pinaagi han kongregasyon. Pero diri nira kinahanglan hin kompirmasyon tikang ha iba nga dinihogan hira. Ginagamit ni Jehova an pinakagamhanan nga pwersa ha uniberso, an iya baraan nga espiritu, basi ipatin-aw gud ha ira nga mga dinihogan hira!

9. Sumala ha Efeso 1:18, ano nga pagbag-o an naieksperyensyahan han usa kon gindidihogan hiya?

⁹ An kadam-an han mga surugoon han Dios yana bangin makurian ha pagsabot kon ano an nahitatabo ha usa kon gindidihogan hiya han Dios. Normal la ito kay hira mismo diri mga dinihogan. Ginlarang han Dios an tawo basi mabuhi ha kadayonan ha tuna, diri ha langit. (Gen. 1:28; Sal. 37:29) Pero nagpili hi Jehova hin pipira basi mabuhi ha langit. Salit kon gindidihogan niya hira, tigda nga ginbabag-o niya an ira paglaom ngan paagi han paghunahuna, basi eksayted nga pamulaton nira an kinabuhi ha langit.​—Basaha an Efeso 1:18.

10. Ano an iginpapasabot han pagin “igin-anak utro”? (Kitaa liwat an footnote.)

¹⁰ Kon an mga Kristiano gindidihogan han baraan nga espiritu, “igin-anak utro” (“born again”) hira, o ‘igin-anak tikang ha kahitas-an.’ * Iginpakita liwat ni Jesus nga imposible gud maisaysay hin eksakto ha usa nga diri dinihogan kon ano an inaabat han pagin “igin-anak utro,” o pagin “igin-anak tikang ha espiritu.”​—Juan 3:3-8; ftn.

11. Isaysay an pagbag-o ha panhunahuna nga nahitatabo kon an usa gindidihogan.

¹¹ Ano nga pagbag-o ha panhunahuna an nahitatabo  kon gindidihogan an mga Kristiano? Antes dihogan ni Jehova ini nga mga Kristiano, naruruyagan gud nira an paglaom nga mabuhi ha kadayonan ha tuna. Eksayted gud nga ginpapamulat nira an panahon nga wawad-on ni Jehova an tanan nga karaotan ngan hihimoon niya nga paraiso an tuna. Posible nga gin-iimadyin nira an pagtapo ha ira kapamilya o sangkay nga ginbanhaw. Pero han gindihogan hira, nag-iba na an ira panhunahuna. Kay ano? Diri man nga nadiri na hira han paglaom nga mabuhi ha tuna. Diri man nga nagbag-o an ira panhunahuna tungod han duro nga istres ngan pag-antos. Diri man nga tigda nga inabat nira nga boring an pagkinabuhi ha tuna ha kadayonan. Lugod, gin-gamit ni Jehova an iya baraan nga espiritu basi bag-uhon an paagi han ira paghunahuna ngan an paglaom nga ira naruruyagan gud.

12. Sumala ha 1 Pedro 1:3, 4, ano an inaabat han dinihogan nga mga Kristiano mahitungod han ira paglaom?

¹² An usa nga dinihogan bangin umabat nga diri hiya angay para hini nga presyoso nga pribilehiyo. Pero diri gud hiya nagruruhaduha bisan la madali nga ginpili hiya ni Jehova. Nalilipay gud hiya ngan nagpapasalamat kon nahuhunahuna niya an iya paglaom nga mabuhi ha langit.​—Basaha an 1 Pedro 1:3, 4.

13. Ano an inaabat han mga dinihogan mahitungod han ira kinabuhi ha tuna?

¹³ Karuyag sidngon ba hito nga naruruyag mamatay an mga dinihogan? Ginbaton ni apostol Pablo ito nga pakiana. Iginpariho niya ha tolda an ira tawhanon nga lawas ngan nagsiring: “Ha pagkamatuod, kita nga aadi hini nga tolda naghaharoy, nga nabubug-atan, kay diri naton karuyag nga hukason ini, pero karuyag naton isul-ot an usa, basi an mortal malamoy han kinabuhi.” (2 Cor. 5:4) Ini nga mga Kristiano waray mawad-i hin interes hini nga kinabuhi, nga baga hin karuyag nira nga mamatay dayon. Ha kabaliktaran, nalilipay hira han kinabuhi ngan karuyag nira gamiton an tagsa nga adlaw ha pag-alagad kan Jehova kaupod an ira pamilya ngan kasangkayan. Pero, anoman an ira ginbubuhat, pirme nira gindudumdom an makaruruyag gud nga paglaom nga kakarawaton nira pag-abot han panahon.​—1 Cor. 15:53; 2 Ped. 1:4; 1 Juan 3:2, 3; Pah. 20:6.

14. Ano an diri nagpapamatuod nga an usa gindihogan han baraan nga espiritu?

¹⁴ Bangin naghuhunahuna ka kon gindihogan ka ba han baraan nga espiritu. Kon amo, tagda ini nga importante nga mga pakiana: May-ada ka ba makusog gud nga hingyap nga buhaton an kaburut-on ni Jehova? Inaabat mo ba nga duro an imo kadasig ha pagsangyaw nga buruhaton? Maduruto ka ba nga estudyante han Pulong han Dios nga naghihingyap nga mahibaro han “higlarom nga mga butang han Dios”? (1 Cor. 2:10) Inaabat mo ba nga an imo pagsangyaw ginbibendisyonan gud ni Jehova hin magpakaruruyag nga resulta? Inaabat mo ba nga may daku ka nga responsabilidad nga buligan an iba ha espirituwal? Nakikita mo ba an pamatuod nga nabulig hi Jehova ha imo kinabuhi ha damu nga espisipiko nga paagi? Kon oo an imo baton hini nga mga pakiana, nagpapamatuod ba ito nga ginpili ka basi kumadto ha langit? Diri. Kay ano? Kay an ngatanan nga surugoon han Dios mahimo liwat umabat hito, dinihogan man hira o diri. Ngan pinaagi han iya baraan nga espiritu, mahimo ihatag ni Jehova an pariho nga gahum ha bisan hin-o nga iya surugoon, anoman an iya paglaom. Ngani, kon nagruruhaduha ka kon gindihogan ka ba han baraan nga espiritu, ito mismo nga pagruhaduha nagpapasabot nga diri ka dinihogan. Adton gintawag ni Jehova diri na naghihinunahuna kon dinihogan ba hira o diri! Maaram gud hira hito!

15. Paonan-o naton nahibaroan nga diri ngatanan nga nakakarawat han espiritu han Dios ginpili basi kumadto ha langit?

 ¹⁵ Ha bug-os nga Biblia, damu an ehemplo han magtinumanon nga katawohan nga nakakarawat hin baraan nga espiritu; pero diri ha langit an ira paglaom. Hi David gin-giyahan han baraan nga espiritu. (1 Sam. 16:13) Ginbuligan hiya han baraan nga espiritu nga masabtan an higlarom nga butang mahitungod kan Jehova ngan gin-giyahan liwat hiya nga isurat an pipira nga bahin han Biblia. (Mar. 12:36) Bisan pa hito, hi apostol Pablo nagsiring nga hi David “waray sumaka ha langit.” (Buh. 2:34) Hi Juan Bawtista ‘napuno han baraan nga espiritu.’ (Luc. 1:13-16) Hi Jesus nagsiring nga waray tawo nga mas labaw kan Juan, pero katapos, nagsiring hiya nga hi Juan diri magigin bahin han Ginhadian ha langit. (Mat. 11:10, 11) Gin-gamit ni Jehova an iya baraan nga espiritu basi tagan ini nga kalalakin-an hin gahum ha pagbuhat hin urusahon nga mga butang, pero waray niya gamita ito nga espiritu basi pilion hira nga mabuhi ha langit. Iginpapasabot ba hini nga diri hira sugad kamatinumanon kompara ha mga ginpili nga magmando ha langit? Diri. Iginpapasabot la hito nga babanhawon hira ni Jehova ha Paraiso nga tuna.​—Juan 5:28, 29; Buh. 24:15.

16. Ano nga balos an ginpapamulat gud han kadam-an han surugoon han Dios yana?

¹⁶ An kadam-an han surugoon han Dios ha tuna yana waray paglaom nga mabuhi ha langit. Pariho kanda Abraham, Sarah, David, Juan Bawtista, ngan iba pa nga kalalakin-an ngan kababayin-an ha panahon han Biblia, ginpapamulat gud nira nga mabuhi ha tuna kon an Ginhadian han Dios magmando na ha ira.​—Heb. 11:10.

17. Ano nga mga pakiana an aton babatunon ha sunod nga artikulo?

¹⁷ Yana, may mga dinihogan pa nga kaupod han katawohan han Dios, salit natural la nga may mga pakiana nga nabangon. (Pah. 12:17) Pananglitan, ano an angay magin panhunahuna han mga dinihogan ha ira kalugaringon? Kon may kumaon o uminom han mga emblema ha Memoryal ha iyo kongregasyon, ano an angay mo nga magin pagtratar ha iya? Ngan paonan-o kon nagtitikadamu an nasiring nga dinihogan hira? Angay ka ba mabaraka hito? Babatunon naton ini nga mga pakiana ha sunod nga artikulo.