1. Ano an ginsiring ni Jehova nga mahitatabo ha aton panahon?

HI Jehova nagtagna mahitungod ha aton panahon: “Napulo nga lalaki tikang ha ngatanan nga yinaknan han mga nasud an makapot, oo, makapot hira hin maopay ha hilaba nga bado han usa nga Judio, nga nasiring: ‘Karuyag namon umupod ha iyo, kay nabatian namon nga an Dios kaupod niyo.’” (Zac. 8:23) An “Judio” dinhi nagrirepresentar hadton mga gindihogan han Dios han baraan nga espiritu. Gintatawag liwat hira nga “Israel han Dios.” (Gal. 6:16) An “napulo nga lalaki” nagrirepresentar hadton may paglaom nga mabuhi ha tuna hin waray kataposan. Maaram hira nga ginpili ni Jehova ini nga grupo han mga dinihogan ngan inaabat nira nga pribilehiyo nga magsingba ha iya kaupod nira.

2. Paonan-o an “napulo nga lalaki” ‘naupod’ ha mga dinihogan?

² Bisan kon imposible nga hibaroan an ngaran han tagsa nga membro han mga dinihogan ha tuna yana, * adton may paglaom nga mabuhi ha tuna mahimo “umupod” ha mga dinihogan. Paonan-o? An Biblia nasiring nga an “napulo nga lalaki” ‘makapot hin maopay ha hilaba nga bado han usa nga Judio, nga nasiring: “Karuyag namon umupod ha iyo, kay nabatian namon nga an Dios kaupod niyo.”’ An teksto nag-uunabi hin usa nga Judio. Pero an “iyo” ngan “niyo” nagtutudlok hin sobra usa ka tawo. Iginpapasabot hini nga ini nga Judio diri la usa nga tawo kondi nagrirepresentar ha bug-os nga grupo han mga dinihogan. Adton mga diri dinihogan nag-aalagad kan Jehova kaupod han mga dinihogan. Pero, diri nira gintatratar an mga dinihogan sugad nga ira lider, kay maaram hira nga hi Jesus an ira Lider.​—Mat. 23:10.

3. Ano nga mga pakiana an babatunon hini nga artikulo?

³ Tungod kay may mga dinihogan pa nga kaupod han katawohan han Dios yana, an pipira bangin maghunahuna: (1) Ano an angay magin panhunahuna han mga dinihogan ha ira kalugaringon?  (2) Ano an angay naton magin pagtratar hadton mga nakaon ngan nainom han mga emblema ha Memoryal? (3) Angay ba kita mabaraka kon nagtitikadamu an mga nakaon ngan nainom han mga emblema? Babatunon hini nga artikulo ito nga mga pakiana.

4. Ano nga pahamangno nga mababasa ha 1 Corinto 11:27-29 an kinahanglan hunahunaon hin seryoso han mga dinihogan, ngan kay ano?

⁴ Kinahanglan hunahunaon hin seryoso han mga dinihogan an pahamangno nga mababasa ha 1 Corinto 11:27-29. (Basaha.) Paonan-o an usa nga dinihogan mahimo kumaon ngan uminom nga “diri takos” han mga emblema ha Memoryal? Mahimo ito mahitabo kon kumaon ngan uminom hiya han mga emblema pero diri nasunod ha mga balaud ni Jehova. (Heb. 6:4-6; 10:26-29) Maaram gud an mga dinihogan nga kinahanglan nira magpabilin nga matinumanon kon karuyag nira “makarawat an premyo nga langitnon nga pagtawag han Dios pinaagi kan Kristo Jesus.”​—Fil. 3:13-16.

5. Ano an angay nga magin pag-abat han mga dinihogan ha ira kalugaringon?

⁵ An baraan nga espiritu ni Jehova nabulig ha iya mga surugoon nga magin mapainubsanon,  diri mapahitas-on. (Efe. 4:1-3; Col. 3:10, 12) Salit diri inaabat han mga dinihogan nga mas maopay hira kay ha iba. Maaram hira nga diri naghahatag hi Jehova hin mas damu nga baraan nga espiritu ha mga dinihogan kay ha iba niya nga surugoon. Diri hira naghuhunahuna nga nasasabtan nira an Biblia hin mas maopay kay ha iba. Ngan diri gud nira sisidngan an usa nga tawo nga dinihogan liwat hiya ngan kinahanglan niya kumaon ngan uminom han mga emblema ha Memoryal. Lugod, mapainubsanon nga ginkakarawat nira nga hi Jehova la an nag-iimbitar ha mga tawo nga kumadto ha langit.

6. Sumala ha 1 Corinto 4:7, 8, ano an angay nga magin paggawi han dinihogan nga mga Kristiano?

⁶ Bisan kon inaabat han mga dinihogan nga pribilehiyo an maimbitar ngadto ha langit, diri hira naglalaom nga tatrataron hira han iba ha espesyal nga paagi. (Fil. 2:2, 3) Maaram liwat hira nga han gindihogan hira ni Jehova, waray niya ito igpahibaro ha bisan hin-o. Salit an usa nga dinihogan diri napapausa kon an iba diri dayon natuod nga gindihogan hiya. Maaram hiya nga ginsisidngan kita han Biblia nga diri dayon tumuod ha usa nga tawo nga nasiring nga gintagan hiya han Dios hin espesyal nga responsabilidad. (Pah. 2:2) Tungod kay nadiri hiya nga tagan hin sobra nga atensyon, an usa nga dinihogan diri nagsusumat ha mga tawo nga nakikilala pa la niya nga dinihogan hiya. Ngan diri gud ito niya ighahambog ha iba.​—Basaha an 1 Corinto 4:7, 8.

7. Ano an lilikyan nga buhaton han mga dinihogan, ngan kay ano?

⁷ An dinihogan nga mga Kristiano diri naabat nga kinahanglan la nira makig-upod ha ira mga igkasi-dinihogan, nga baga hin membro hira hin eksklusibo nga grupo. Diri nira ginbibiling an iba nga mga dinihogan basi hisgotan an ira pagin dinihogan o magporma hin pribado nga mga grupo basi adman an Biblia. (Gal. 1:15-17) Diri magkakaurosa an kongregasyon kon bubuhaton ito han mga dinihogan. Magios hira kontra han baraan nga espiritu, nga nabulig ha katawohan han Dios nga magkaada kamurayawan ngan pagkaurosa.​—Roma 16:17, 18.

8. Kay ano nga kinahanglan naton maghirot ha aton pagtratar ha mga nakaon ngan nainom han mga emblema ha Memoryal? (Kitaa liwat an footnote.)

⁸ Ano an angay naton magin pagtratar ha dinihogan nga kabugtoan? Magigin sayop kon sobra kita nga mabilib ha usa nga tawo, bisan kon dinihogan hiya nga bugto han Kristo. (Mat. 23:8-12) Kon an Biblia naghihisgot mahitungod ha mga tigurang, gin-aaghat kita hito nga ‘subaron an ira pagtoo,’ pero diri ito nagsusumat ha aton nga puydi naton himoon nga aton lider an  bisan hin-o nga tawo. (Heb. 13:7) Oo, an Biblia nasiring nga an pipira “angay han doble nga kadungganan.” Pero tungod ini kay “nangunguna [hira] ha maopay nga paagi” ngan “maduruto ha pagyakan ngan pagtutdo,” diri tungod kay dinihogan hira. (1 Tim. 5:17) Kon tatagan naton hin sobra nga pagdayaw ngan atensyon an mga dinihogan, bangin diri hira magin komportable. * O mas maraot pa, mahimo naton hira maaghat nga magin mapahitas-on. (Roma 12:3) Waray bisan usa ha aton an maruruyag nga magbuhat hin bisan ano nga mahimo magin hinungdan nga an usa han dinihogan nga kabugtoan han Kristo makahimo hin seryoso nga sayop!​—Luc. 17:2.

9. Paonan-o naton maipapakita nga ginrirespeto naton an dinihogan nga mga Kristiano?

⁹ Paonan-o naton maipapakita nga ginrirespeto naton adton mga gindihogan ni Jehova? Diri naton hira papakianhan kon paonan-o hira nagin dinihogan. Personal ini nga butang, diin waray kita katungod nga hibaroan. (1 Tes. 4:11; 2 Tes. 3:11) Ngan diri liwat kita maghunahuna nga an ira bana o asawa, mga kag-anak, o iba nga kapamilya dinihogan liwat. Diri napapanunod han usa an iya langitnon nga paglaom tikang ha iya pamilya. Nakarawat niya ito tikang ha Dios. (1 Tes. 2:12) Kinahanglan liwat naton likyan an mga pakiana nga makakasakit ha iba. Pananglitan, diri kita magpapakiana ha asawa han usa nga dinihogan kon ano an iya inaabat ha iya paglaom nga mabuhi ha waray kataposan ha tuna nga waray an iya bana. Makakasiguro gud kita nga ha bag-o nga kalibotan, ‘tatagbawon [ni Jehova] an hingyap han tagsa nga buhi nga linarang.’​—Sal. 145:16.

10. Paonan-o naton napuproteksyonan an aton kalugaringon kon ginlilikyan naton an ‘pagdayaw ha mga tawo’?

¹⁰ Kon diri naton gintatratar an mga dinihogan nga mas importante kay ha iba, ginpuproteksyonan liwat naton an aton kalugaringon. Paonan-o? An Biblia nasiring nga an iba nga mga dinihogan bangin diri magpabilin nga matinumanon. (Mat. 25:10-12; 2 Ped. 2:20, 21) Pero kon lilikyan naton an ‘pagdayaw ha mga tawo,’ diri gud kita masunod ha ira, bisan ha mga dinihogan o mga kilalá o hadton maiha na nga nag-aalagad kan Jehova. (Jud. 16, ftn.) Katapos, kon diri hira magin matinumanon o kon bumaya hira ha kongregasyon, diri mawawara an aton pagtoo kan Jehova o diri kita maundang ha pag-alagad ha iya.

11. Ano an nahitatabo ha ihap han mga nakaon ngan nainom han mga emblema ha Memoryal?

¹¹ Ha sulod hin damu ka tuig, nagtikaguti an ihap han mga nakaon ngan nainom han mga emblema ha Memoryal. Pero hinin naglabay la nga mga tuig, ito nga ihap nagtitikadamu. Angay ba kita mabaraka hito? Diri. Aton hisgotan an pipira nga mga rason.

12. Kay ano nga diri kita angay mabaraka ha kadamu han mga nakaon ngan nainom han mga emblema ha Memoryal?

¹² “Kilala ni Jehova kon hin-o an iya.” (2 Tim. 2:19) Diri pariho kan Jehova, diri maaram an kabugtoan nga nag-iihap han mga nakaon ngan nainom han mga emblema ha Memoryal kon hin-o gud an dinihogan. Salit an ihap nag-uupod han mga naghuhunahuna nga mga dinihogan hira pero diri ngay-an. Pananglitan, an pipira nga nakaon ngan nainom han mga emblema hadto inundang ha urhi. An iba bangin may sakit ha hunahuna o emosyon salit natoo hira nga magmamando hira kaupod han Kristo ha langit. Matin-aw, diri kita maaram han eksakto nga kadamu han mga dinihogan nga aanhi pa ha tuna.

13. Ginsusumat ba han Biblia kon pira nga mga dinihogan an aanhi pa ha tuna kon magtikang na an daku nga kasakitan?

 ¹³ May mga dinihogan pa ha damu nga bahin han tuna kon umabot na hi Jesus basi dad-on hira ha langit. (Mat. 24:31) An Biblia nasiring nga ha kataposan nga mga adlaw, pipira na la nga dinihogan an mahibibilin ha tuna. (Pah. 12:17) Pero diri ito nagsusumat kon pira an aanhi pa ha tuna kon magtikang na an daku nga kasakitan.

14. Sugad han iginpapakita ha Roma 9:11, 16, ano an aton mahibabaroan mahitungod ha pagpili hin mga dinihogan?

¹⁴ Hi Jehova an nagdidesisyon kon san-o hiya magpipili hin mga dinihogan. (Roma 8:28-30) Nagtikang hi Jehova ha pagpili hin mga dinihogan katapos mabanhaw hi Jesus. Baga hin ha siyahan nga siglo, an ngatanan nga Kristiano mga dinihogan. Ha sumunod nga mga siglo, kadam-an han mga nasiring nga Kristiano hira an diri gud nasunod ha Kristo. Bisan pa hito, gindihogan ni Jehova hito nga mga tuig an pipira nga tinuod nga mga Kristiano. Sugad hira hin mga trigo nga ginsiring ni Jesus nga matubo ha butnga han mga banwa. (Mat. 13:24-30) Hinin kataposan nga mga adlaw, padayon nga nagpipili hi Jehova hin mga tawo nga magigin bahin han 144,000. * Salit kon magpipili an Dios hin pipira ha ira antes gud han kataposan, diri gud naton angay kwestyunon an iya kinaadman. (Basaha an Roma 9:11, 16.) * Kinahanglan maghirot kita nga diri kita magreak pariho han mga trabahador nga ginhulagway ni Jesus ha usa han iya mga ilustrasyon. Nagreklamo hira ha paagi  han pagtratar han ira agaron hadton mga nagtikang magtrabaho ha ultimo nga oras.​—Mat. 20:8-15.

15. An ngatanan ba nga dinihogan kaapi han “matinumanon ngan maaramon nga uripon,” nga gin-unabi ha Mateo 24:45-47? Isaysay.

¹⁵ Diri ngatanan nga may paglaom nga mabuhi ha langit kaapi han “matinumanon ngan maaramon nga uripon.” (Basaha an Mateo 24:45-47.) Sugad la han siyahan nga siglo, gin-gagamit ni Jehova ngan ni Jesus yana an pipira nga kabugtoan basi pakaunon, o tutdoan, an damu. Pipira la nga dinihogan nga mga Kristiano ha siyahan nga siglo an gin-gamit basi igsurat an Kristiano Griego nga Kasuratan. Yana, pipira la nga dinihogan nga mga Kristiano an may responsabilidad ha paghatag ha katawohan han Dios hin “pagkaon ha husto nga panahon.”

16. Ano an imo nahibaroan hini nga artikulo?

¹⁶ Ano an igintututdo ha aton hini nga artikulo? Nagdesisyon hi Jehova nga tagan hin kinabuhi nga waray kataposan an kadam-an han iya katawohan ngan hin kinabuhi ha langit an pipira nga magmamando kaupod ni Jesus. Ginbabalosan ni Jehova an ngatanan niya nga surugoon​—an “Judio” sugad man an “napulo nga lalaki”—​ngan gin-oobligar niya hira nga sundon an pariho nga mga balaud ngan magpabilin nga matinumanon. An ngatanan kinahanglan magpabilin nga mapainubsanon. An ngatanan kinahanglan mag-alagad ha iya nga nagkakaurosa. Ngan an ngatanan kinahanglan maningkamot nga tipigan an kamurayawan ha kongregasyon. Samtang nagtitikahirani an kataposan, padayon kita nga mag-alagad kan Jehova ngan sundon an Kristo sugad nga “usa nga panon.”​—Juan 10:16.