1-2. (a) Sumala han sugo ni Jesus nga mababasa ha Mateo 28:18-20, ano an nangunguna nga misyon han Kristiano nga kongregasyon? (b) Ano nga mga pakiana an aton hihisgotan hini nga artikulo?

SIGURADO nga eksayted gud an mga apostol samtang nagkakatirok hira ha usa nga dapit han bukid. Katapos banhawon hi Jesus, ginpakadto niya hira hito nga lugar basi makigkita ha ira. (Mat. 28:16) Posible nga dida hini nga hitabo “ha usa nga higayon nagpakita hiya ha sobra 500 nga kabugtoan.” (1 Cor. 15:6) Kay ano nga nakigkita hi Jesus ha iya mga disipulo? Basi tagan hira hin makalilipay nga misyon: “Lakat ngan panhimo kamo hin mga disipulo ha mga tawo han ngatanan nga nasud.”​—Basaha an Mateo 28:18-20.

² An mga disipulo nga nakabati han ginyakan ni Jesus nagin bahin han siyahan-siglo nga Kristiano nga kongregasyon. An nangunguna nga misyon hito nga kongregasyon amo an panhimo hin mas damu pa nga disipulo han Kristo. * Yana, may yinukot nga kongregasyon han tinuod nga mga Kristiano ha bug-os nga tuna, ngan amo la gihapon an nangunguna nga misyon hito nga mga kongregasyon. Hini nga artikulo, hihisgotan naton an upat nga pakiana: Kay ano nga importante gud an panhimo hin mga disipulo? Ano an nahiuupod hito? An ngatanan ba nga Kristiano may bahin ha panhimo hin mga disipulo? Ngan kay ano nga ini nga buruhaton nagkikinahanglan han aton pagpailob?

3. Sumala ha Juan 14:6 ngan 17:3, kay ano nga importante gud an panhimo hin mga disipulo?

³ Kay ano nga importante gud an panhimo hin mga disipulo? Kay an mga disipulo la han Kristo an mahimo magin sangkay han Dios. Dugang pa, adton mga nagsusunod han Kristo nagpapahimulos hin mas maopay nga pagkinabuhi yana ngan may paglaom nga mabuhi ha waray kataposan ha tiarabot nga panahon. (Basaha an Juan 14:6; 17:3.) Oo, gintagan kita ni Jesus hin importante nga responsabilidad, pero diri naton ini ginhihimo nga kita la. Hi apostol Pablo nagsurat mahitungod ha iya ngan ha iya iba pa nga duok nga kaupod: “Kami an mga igkasi-magburuhat han Dios.” (1 Cor. 3:9) Daku gud ini nga pribilehiyo nga iginhatag ni Jehova ngan han Kristo ha diri perpekto nga mga tawo!

4. Ano an aton mahibabaroan ha eksperyensya nira Ivan ngan Matilde?

⁴ An panhimo hin mga disipulo naghahatag ha aton hin daku nga kalipay. Tagda an ehemplo ni Ivan ngan han iya asawa nga hi Matilde, nga taga-Colombia. Nasangyawan nira an batan-on nga hi Davier, ngan nagsiring ha ira: “Karuyag ko magbag-o, pero diri ko kaya.” Hi Davier usa nga boksingero, adik, parahubog, ngan may ka-live-in nga hi Erika. Hi Ivan nagsiring: “Nagtikang kami pagdumara ha iya hin pag-aram ha Biblia ha ira interyor nga baryo, diin kinahanglan namon magbisikleta hin damu ka oras ha malapok nga dalan. Han nakita ni Erika nga nagbag-o an pamatasan ngan disposisyon ni Davier, nagpa-Bible study liwat hiya.” Ha urhi, inundang hi Davier pagdroga, paghinubog, ngan pagboksing. Ginpakasalan liwat niya hi Erika. Hi Matilde nagsiring: “Han nabawtismohan hira Davier ngan Erika han 2016, nahinumdoman namon an pirme ginsisiring ni Davier, ‘Karuyag ko magbag-o, pero diri ko kaya.’ Nakatangis gud kami.” Sigurado nga nalilipay gud kita kon may nabubuligan kita nga magin disipulo han Kristo.

5. Ano an siyahan nga pitad ha panhimo hin mga disipulo?

⁵ Ginbubuhat naton an siyahan nga pitad ha panhimo hin mga disipulo kon ‘ginbibiling’ naton adton may husto nga disposisyon an kasingkasing. (Mat. 10:11) Ginpapamatud-an naton nga tinuod kita nga mga Saksi ni Jehova kon ginsasangyawan naton an ngatanan nga aton nakakaistorya. Ginpapamatud-an naton nga tinuod kita nga mga Kristiano kon ginsusunod naton an sugo han Kristo nga magsangyaw.

6. Ano an mabulig ha aton nga magin malampuson ha ministeryo?

⁶ May pipira nga naruruyag mahibaro han mga kamatuoran ha Biblia, pero damu han aton nakakaistorya an baga hin diri interesado ha tinikangan. Bangin kinahanglan naton kultibaron an ira interes. Basi magin malampuson ha ministeryo, kinahanglan naton mag-andam hin maopay. Pagpili hin espisipiko nga mga topiko nga posible makapainteres ha imo makakaistorya. Katapos, planoha kon paonan-o mo ig-iistorya ito nga topiko.

7. Paonan-o ka mahimo makagtikang hin pakiistorya, ngan kay ano nga importante nga mamati ka ngan magpakita hin respeto?

⁷ Pananglitan, mahimo mo pakianhan an tagbalay: “Puydi ko ba aroon an imo opinyon mahitungod hini nga butang? Damu han problema nga aton naieksperyensyahan yana an nakakaapekto ha mga tawo ha bug-os nga kalibotan. Para ha imo, kinahanglan ba naton hin usa nga gobyerno ha bug-os nga kalibotan nga magsusulbad han mga problema han kalibotan?” Katapos, puydi mo hisgotan an Daniel 2:44. Mahimo ka liwat sumiring ha tagbalay: “Para ha imo, ano an kinahanglan buhaton basi mapadaku an imo mga anak nga may maopay nga pamatasan? Puydi ko ba hibaroan an imo opinyon?” Katapos, hisguti an Deuteronomio 6:6, 7. Anoman nga topiko an imo karuyag nga paghisgotan, hunahunaa  an mga tawo nga mamamati hito. Hunahunaa kon paonan-o hira magpapahimulos ha paghibaro ha kon ano gud an igintututdo han Biblia. Kon nakikiistorya ha ira, importante nga pamatian hira ngan respetuhon an ira panhunahuna. Hito nga paagi mas masasabtan mo hira, ngan posible nga mas maaghat hira nga mamati ha imo.

8. Kay ano nga an pagbalik-bisita nagkikinahanglan hin pagin mapinadayunon?

⁸ Antes magdesisyon an usa nga magpa-Bible study, bangin kinahanglan mo anay maggahin hin panahon ngan kusog ha mga pagbalik-bisita. Kay ano? Kay bangin diri puydi makaistorya an mga tawo ha imo pagbalik. Dugang pa, bangin kinahanglan mo anay bumalik hin pipira ka beses antes magin komportable ha imo an tagbalay ngan magpa-Bible study. Tigamni nga an usa nga tanom matubo la kon regular ito nga nasasaribohan. Sugad man, an gugma han interesado nga tawo para kan Jehova ngan ha Kristo posible la tumubo kon regular nga ginhihisgotan naton ha iya an Pulong han Dios.

9-10. Kay ano nga makakasiring kita nga an tagsa nga Kristiano nga ministro nakikigbahin ha pagpamiling ha mga tawo nga tangkod an kasingkasing?

⁹ An tagsa nga Kristiano nga ministro nakikigbahin ha pagpamiling ha mga tawo nga tangkod an kasingkasing. Maipapariho naton ini nga buruhaton ha pagpamiling hin nawawara nga bata. Ha ano nga paagi? Tagda an nahitabo ha usa nga tres anyos nga bata nga nawara. Ginpinamiling hiya hin mga 500 ka tawo. Paglabay hin mga 20 ka oras tikang han nawara an bata, nabilngan hiya ha uma han mga mais han usa nga boluntaryo. Waray angkona hini nga boluntaryo an kadungganan ha pakabiling ha bata. Nagsiring hiya: “Ginatos nga tawo an nagpinamiling ha iya.”

¹⁰ Damu nga tawo an pariho hito nga bata. Inaabat nira nga nawawara hira. Waray hira paglaom, pero nanginginahanglan hira hin bulig. (Efe. 2:12) Sobra walo ka milyon kita nga nakikigbahin ha pagpamiling hinin takos nga mga tawo.  Bangin diri ka mismo makabiling hin magpapa-Bible study ha imo. Pero an iba nga magwarali nga nagsasangyaw liwat hito nga teritoryo bangin makabiling hin tawo nga karuyag mahibaro han kamatuoran ha Pulong han Dios. Kon an usa nga bugto makabiling hin tawo ngan magin disipulo han Kristo, an ngatanan nga nakigbahin ha pagpamiling may maopay nga rason nga malipay.

11. Bisan kon waray ka Bible study, paonan-o ka makakabulig ha panhimo hin mga disipulo?

¹¹ Bisan kon waray ka yana Bible study, mahimo ka makabulig ha panhimo hin mga disipulo ha iba nga paagi. Pananglitan, puydi mo abiabihon ngan sangkayon an mga bag-o nga natambong ha Kingdom Hall. Hini nga paagi, makakabulig ka nga makombinse hira nga gugma an aton pangirilal-an sugad nga tinuod nga mga Kristiano. (Juan 13:34, 35) An imo mga komento ha katirok, bisan kon halipot la, mahimo magtutdo ha mga bag-ohan nga ipahayag an ira pagtoo ha sinsero ngan matinalahuron nga paagi. Mahimo mo liwat updan ha ministeryo an usa nga bag-o nga magwarali ngan buligan hiya nga gamiton an Kasuratan ha pangatadongan. Kon bubuhaton mo ini, gintututdoan mo hiya nga subaron an Kristo.​—Luc. 10:25-28.

12. Kinahanglan ba nga may-ada kita espesyal nga mga abilidad basi makahimo hin mga disipulo? Isaysay.

¹² Diri naton angay hunahunaon nga kinahanglan naton hin espesyal nga mga abilidad basi makagtutdo ha iba nga magin mga disipulo ni Jesus. Kay ano? Tagda an ehemplo ni Faustina, nga taga-Bolivia. Diri hiya nakakabasa han nagtikang hiya pakig-upod ha mga Saksi ni Jehova. Yana, medyo maaram na hiya magbasa. Bawtismado na hiya ngan nalilipay hiya ha pagtutdo ha iba. Kaurogan na nga nagdudumara hiya hin lima nga pag-aram kada semana. Bisan kon diri pa duro nga nakakabasa hi Faustina pati an kadam-an han iya mga Bible study, may unom hiya nga nabuligan nga magpabawtismo.​—Luc. 10:21.

13. Bisan kon sagipo gud kita, ano nga mga bendisyon an aton mapapahimulosan ha panhimo hin mga disipulo?

¹³ Damu nga Kristiano an sagipo gud ha pag-asikaso han importante nga mga responsabilidad. Pero bisan pa hito, may panahon pa gihapon hira ha pagdumara hin mga pag-aram, ngan nalilipay gud hira tungod hito. Tagda an ehemplo ni Melanie, nga taga-Alaska. Solo hiya nga kag-anak nga nagpapadaku hin otso anyos nga anak. May full-time liwat hiya nga trabaho ngan nabulig ha pag-ataman han iya kag-anak nga may kanser. Usa la hi Melanie nga Saksi ha ira interyor nga bungto. Pirme hiya nag-aampo para hin kusog nga mailob an kahagkot ngan makasangyaw kay karuyag gud niya makabiling hin Bible study. Ha urhi, nasangyawan niya hi Sara, nga nalipay han nahibaro nga may ngaran an Dios. Waray pag-iha, nagpa-Bible study hi Sara. Hi Melanie nagsiring: “Kada Biernes nga gab-i, kapoy na gud ako, pero pirme kami nagawas han akon anak basi dumarahon ito nga pag-aram ngan nagpahimulos kami hito. Nalilipay kami ha pagsaliksik han mga baton ha pakiana ni Sara, ngan nalipay  gud kami han nakita namon hiya nga nagin sangkay ni Jehova.” Maisugon nga gin-atubang ni Sara an pagkontra, ginbayaan an iya relihiyon, ngan nagpabawtismo.

14. (a) Paonan-o an panhimo hin mga disipulo maipapariho ha pagpangisda? (b) Ano an epekto ha imo han ginsiring ni Pablo ha 2 Timoteo 4:1, 2?

¹⁴ Bisan kon baga hin diri mabungahon an imo ministeryo, ayaw pag-undang ha pagbiling hin potensyal nga disipulo. Tigamni nga iginpariho ni Jesus ha pagpangisda an panhimo hin mga disipulo. An mga parapangisda bangin maggahin hin damu ka oras antes makadakop hin isda. Usahay, nangingisda hira ha katutnga han gab-i o ha maagahon, ngan usahay kinahanglan nira maglayag hin hirayo. (Luc. 5:5) Ha pariho nga paagi, an pipira nga nanhihimo hin mga disipulo naggagahin hin damu ka oras basi makabiling hin interesado ha iba-iba nga panahon ngan ha iba-iba nga lugar. Kay ano? Basi mas damu pa an ira masangyawan. Adton naniningkamot gud kaurogan na nga ginbabalosan pinaagi ha pakabiling hin mga tawo nga interesado ha aton mensahe. Mahimo ka ba magsangyaw ha panahon nga posible nga mas damu nga tawo an imo makakaistorya o ha lugar diin posible nga aadto hira?​—Basaha an 2 Timoteo 4:1, 2.

15. Kay ano nga an pagdumara hin mga pag-aram ha Biblia nagkikinahanglan hin pagpailob?

¹⁵ Kay ano nga an pagdumara hin mga pag-aram ha Biblia nagkikinahanglan hin pagpailob? An usa nga rason tungod kay labaw pa an kinahanglan naton buhaton kay ha pagbulig la ha estudyante nga hibaroan ngan higugmaon an mga katutdoan ha Biblia. Kinahanglan naton buligan an estudyante nga makilala ngan higugmaon an  Awtor han Biblia, hi Jehova. Ngan labot la ha pagtutdo ha estudyante ha kon ano an ginkikinahanglan ni Jesus ha iya mga disipulo, kinahanglan naton buligan an estudyante nga mahibaro kon paonan-o magkikinabuhi sugad nga tinuod nga Kristiano. Kinahanglan naton hiya mapailubon nga buligan samtang naniningkamot hiya nga iaplikar an mga prinsipyo ha Biblia. May iba nga kaya bag-uhon an ira panhunahuna ngan pamatasan ha sulod hin pipira la ka bulan; an iba mauruiha.

16. Ano an imo nahibaroan tikang ha eksperyensya ni Raúl?

¹⁶ Usa nga misyonero ha Peru an may eksperyensya nga nagpapakita han kapulsanan han pagin mapailubon. “Duha na nga libro an amon natapos han akon Bible study nga hi Raúl,” siring han misyonero. “Pero may-ada la gihapon hiya dagku nga problema. Masamok an ira pag-asawa, mahilig hiya mamuyayaw, ngan diri hiya ginrirespeto han iya mga anak. Pirme hiya natambong ha mga katirok, salit padayon ko hiya nga ginbibisita basi buligan hiya ngan an iya pamilya. Paglabay hin sobra tulo ka tuig tikang han nasangyawan ko hiya, nagin kwalipikado hiya para ha bawtismo.”

17. Ano an aton hihisgotan ha sunod nga artikulo?

¹⁷ Hi Jesus nagsugo ha aton, “lakat . . . panhimo kamo hin mga disipulo ha mga tawo han ngatanan nga nasud.” Basi matuman ito, kaurogan na nga kinahanglan naton makiistorya ha mga tawo nga iba gud an panhunahuna kay ha aton, pati na ha mga tawo nga waray relihiyon o diri natoo nga may Dios. Hihisgotan han sunod nga artikulo kon paonan-o naton maipipresenta ha sugad nga mga tawo an maopay nga sumat.