AN Biblia puno hin kinasingkasing nga mga kapahayagan tikang ha mga tawo nga “may mga pagbati nga pariho han aton.” (San. 5:17) Pananglitan, nasasabtan dayon naton an inaabat ni Pablo ha iya ginsiring ha Roma 7:21-24: “Kon karuyag ko buhaton an husto, an maraot an aadi ha akon. . . . Kairo ko nga tawo!” Kon nakikig-away kita ha aton kaluyahan, napaparig-on kita kay bisan an usa nga matinumanon nga tawo nga pariho kan Pablo inabat gihapon han sugad nga mga pagbati.

Nagpahayag liwat hi Pablo hin iba pa nga sinsero nga pagbati. Hiya nagsiring nga an “Anak han Dios . . . nahigugma ha akon ngan nagtubyan han iya kalugaringon para ha akon.” (Gal. 2:20) Kombinsido gud hito hi Pablo. Ito ba liwat an imo inaabat? Bangin diri pirme.

Kon nakikig-away kita han pag-abat hin kawaray-pulos tungod han naglabay nga mga sala, bangin makurian kita pagkarawat han gugma ngan pagpasaylo ni Jehova, pati na han halad-lukat sugad nga personal nga regalo ha aton. Karuyag gud ba ni Jesus nga hunahunaon naton an lukat sugad nga regalo? Kon amo, ano an makakabulig ha aton ha pagbuhat hito? Usisahon naton ito nga duha nga pakiana.

Oo, karuyag ni Jesus nga hunahunaon naton an iya halad sugad nga personal nga regalo. Paonan-o kita makakasiguro hito? Imadyina an sitwasyon nga mababasa ha Lucas 23:39-43. May usa nga lalaki nga iginbitay ha pasakitan nga kahoy hirani kan Jesus. Aminado hiya nga nakabuhat hiya hin sala. Sigurado nga seryoso nga krimen an iya nabuhat kay an sugad kamadarahog nga sirot iginpapadapat la ha mga kriminal nga nakahimo hin maraot gud nga butang. Tungod han duro nga kasubo ha iya kahimtang, nakimalooy hiya kan Jesus: “Hinumdumi ako kon aadto ka na ha imo Ginhadian.”

Ano an ginbuhat ni Jesus? Imadyina an kasakit ni Jesus samtang nalingi hiya basi kitaon an lalaki. Bisan kon nasasakit, naningkamot hiya paghiyom ngan ginpasarig an lalaki: “Ha pagkamatuod susumatan ko ikaw yana nga adlaw, makakaupod ko ikaw ha Paraiso.” Puydi la unta pahinumdoman ni Jesus an lalaki nga “an Anak han tawo kinanhi . . . basi . . . maghatag han iya kinabuhi sugad nga lukat para ha damu.” (Mat. 20:28) Pero napansin mo ba nga may pagkabuotan nga ginpabug-atan ni Jesus nga an iya halad personal nga regalo? Makisangkayon nga iginyakan niya an mga pulong nga “ikaw” ngan “ko.” Ngan gin-unabi ni Jesus an personal nga mapapahimulosan han lalaki tungod han lukat: mabubuhi hiya ha paraiso nga tuna.

Matin-aw, karuyag ni Jesus nga karawaton hini nga lalaki an iya halad sugad nga personal nga regalo. Kon ini an inabat ni Jesus ha usa nga kriminal nga waray ngani higayon mag-alagad ha Dios, sigurado nga ini an iya inaabat ha usa nga bawtismado nga Kristiano nga nag-aalagad ha Dios. Kon sugad, ano an mabulig ha aton basi tumoo gud kita nga an halad han Kristo personal naton nga mapapahimulsan bisan pa han aton naglabay nga mga sala?

An ministeryo ni Pablo nakabulig ha iya nga masantop nga namatay hi Jesus para ha iya. Paonan-o? Hiya nagsaysay: “Nagpapasalamat ako kan  Kristo Jesus nga aton Ginoo, nga naghatag ha akon hin gahum, kay gintagad ako niya nga matinumanon pinaagi ha pagtoka ha akon hin ministeryo, bisan kon hadto parapasipara ako ngan paratimaraot ngan arogante nga tawo.” (1 Tim. 1:12-14) An toka ni Pablo nagpasarig ha iya han kalooy, gugma, ngan pagtapod ha iya ni Jesus. An tagsa ha aton gintaporan liwat ni Jesus hin toka nga ministeryo. (Mat. 28:19, 20) Ito ba nga toka makakabulig ha aton nga masantop nga hi Jesus namatay liwat para ha aton?

Hi Albert, nga bag-o la nga binalik kan Jehova katapos ma-disfellow hin haros 34 ka tuig, nagsiring: “An akon mga sala aadi pirme ha akon atubangan. Pero kon nagmiministeryo ako, inaabat ko nga pariho kan apostol Pablo, gintagan liwat ako ni Jesus hin toka nga ministeryo. Napaparig-on ako hito ngan naghahatag ito ha akon hin positibo nga panhunahuna ha akon kalugaringon, kinabuhi, ngan kabubuwason.”​—Sal. 51:3.

Hi Allan, nga bayolente ngan nakabuhat hin damu nga krimen antes mahibaro han kamatuoran, nagsiring: “Ginhihinunahuna ko pa gihapon an kadaot nga akon nahimo ha mga tawo. Usahay, nadidepres ako tungod hito. Pero nagpapasalamat ako kan Jehova nga gintugotan niya an makasasala nga pariho ha akon ha pagpasamwak han maopay nga sumat ha iba. Kon ginkakarawat han mga tawo an kamatuoran, napapahinumdoman ako hito nga maopay gud ngan mahigugmaon hi Jehova. Inaabat ko nga ginagamit niya ako ha pagbulig ha iba nga nag-aagi liwat han akon gin-agian.”

An aton toka nga ministeryo nabulig ha aton nga gamiton an aton kusog ha mag-opay nga buhat ngan panhunahuna. Nagpapasarig ito ha aton han kalooy, gugma, ngan pagtapod ni Jesus ha aton.

Samtang diri pa nawawara an maraot nga sistema ni Satanas, bangin padayon kita nga hukman han aton kasingkasing tungod han aton naglabay nga mga sayop. Ano an makakabulig ha aton nga maatohan an sugad nga pag-abat?

“Nalilipay ako nga ‘an Dios mas daku kay ha aton kasingkasing,’” siring ni Jean, nga agsob umabat hin kakonsensya tungod han iya doble nga pagkinabuhi han batan-on pa hiya. (1 Juan 3:19, 20) Maliliaw liwat kita ha paghibaro nga mas nasasabtan ni Jehova ngan ni Jesus an aton makasasala nga kahimtang kay ha aton. Tigamni nga mahigugmaon nga igintagana nira an lukat diri para ha perpekto nga mga tawo, kondi para ha mabinasulon nga magpakasasala.​—1 Tim. 1:15.

Magigin kombinsido kita hini nga presyoso nga kamatuoran kon sinsero nga papamalandungon naton an paagi han pagtratar ni Jesus ha diri perpekto nga mga tawo ngan kon bubuhaton naton an pinakamaopay basi bug-os nga matuman an ministeryo nga igintoka ha aton. Pinaagi ha pagbuhat hini, pariho kan Pablo, makakasiring kita: Hi Jesus “nahigugma ha akon ngan nagtubyan han iya kalugaringon para ha akon.”