1. Sumala ha Colosas 2:4, 8, paonan-o naniningkamot hi Satanas nga mabihag an aton panhunahuna?

KARUYAG ni Satanas nga ipahirayo kita kan Jehova. Basi makab-ot niya ito nga iya tumong, naniningkamot hiya nga impluwensyahan an aton panhunahuna, nga sugad hin ginbibihag niya an aton hunahuna ngan ginpapasunod ha iya karuyag. Nananalinguha hiya nga makombinse o malimbongan kita nga buhaton an iya karuyag pinaagi ha paggamit hin mga butang nga nakakaengganyo ha aton.​—Basaha an Colosas 2:4, 8.

2-3. (a) Kay ano nga sadang naton tagan hin atensyon an pahamangno nga mababasa ha Colosas 2:8? (b) Ano an aton hihisgotan hini nga artikulo?

² Namimeligro gud ba kita nga malimbongan ni Satanas? Oo! Tigamni nga an pahamangno ni Pablo ha Colosas 2:8 iginsurat diri para ha mga diri tumuroo. Iginsurat niya ito para ha mga Kristiano nga gindihogan han baraan nga espiritu. (Col. 1:2, 5) Ito nga mga Kristiano nameligro hadto, ngan mas namimeligro gud kita yana. (1 Cor. 10:12) Kay ano? Iginlabog na hi Satanas nganhi ha tuna, ngan nakapokus hiya ha paglimbong ha matinumanon nga mga surugoon han Dios. (Pah. 12:9, 12, 17) Dugang pa, nagkikinabuhi na kita ha panahon diin an magraot nga mga tawo ngan mga impostor ‘mas nagtitikaraot pa gud.’​—2 Tim. 3:1, 13.

³ Hini nga artikulo, aton hihisgotan kon paonan-o ginagamit ni Satanas an “waray pulos nga panlimbong” basi maimpluwensyahan an aton panhunahuna. Uusisahon naton an tulo han iya “tuso nga mga buhat,” o “mga pamaagi.” (Efe. 6:11; ftn.) Ngan ha sunod nga artikulo, aton hihisgotan kon paonan-o wawad-on an magraot nga epekto han iya mga taktika ha aton panhunahuna. Hisgotan anay naton kon paonan-o ginlimbongan ni Satanas an mga Israelita han nakadto na hira ha Tuna nga Iginsaad.

4-6. Sumala ha Deuteronomio 11:10-15, ano nga bag-o nga mga pamaagi ha pag-uma an kinahanglan himoon han mga Israelita han nakadto na hira ha Tuna nga Iginsaad?

⁴ Tuso nga ginsulay ni Satanas an mga Israelita nga magbuhat hin idolatriya. Paonan-o niya ito ginhimo? Ginsalingabot niya an ira panginahanglan ha pagkaada hin pagkaon. Han sinulod an mga Israelita ha Tuna nga Iginsaad, kinahanglan nira bag-uhon an ira mga pamaagi ha pag-uma. Han nakadto an mga Israelita ha Ehipto, an ira ginagamit nga irigasyon ha pag-uma nagtitikang ha Nilo. Pero, an sistema han agrikultura ha Tuna nga Iginsaad diri nakadepende ha irigasyon nga tikang ha haluag nga salog, kondi ha panapanahon nga uran ngan ha tun-og nga nagsasaribo ha mga pananom. (Basaha an Deuteronomio 11:10-15; Isa. 18:4, 5) Salit, an mga Israelita kinahanglan mahibaro hin bag-o nga mga pamaagi ha pag-uma. Diri ito masayon tungod kay an kadam-an hadton may mga eksperyensya ha pag-uma nagkamatay na ha kamingawan.

⁵ Iginsaysay ni Jehova ha iya katawohan nga nagbag-o na an ira kahimtang. Katapos, gin-unabi niya an masunod nga pahamangno, nga ha siyahan nga pagkita baga hin waray ito kalabotan ha pag-uma: “Pag-ikmat nga diri madani an iyo kasingkasing nga sumimang ngan magsingba ha iba nga mga dios ngan magyukbo ha ira.” (Deut. 11:16, 17) Kay ano nga nagpahamangno hi Jehova kontra ha pagsingba ha buwa nga mga dios nga an iya man ginhihisgotan an bag-o nga mga pamaagi ha pag-uma?

⁶ Maaram hi Jehova nga an mga Israelita mahimo masulay nga mag-aram han pipira nga lokal nga pamaagi ha pag-uma han mga pagano nga nakapalibot ha ira. Syempre, mas eksperyensyado ha pag-uma an mga nasud nga hirani ha mga Israelita, ngan an katawohan han Dios mahimo mahibaro hin mapulsanon nga mga pamaagi  tikang ha ira, pero may-ada ito peligro. An panhunahuna han parauma nga mga Canaanita impluwensyado han ira pagtoo kan Baal. Ginhuhunahuna nira nga hi Baal an tag-iya han langit ngan an parahatag han uran. Diri karuyag ni Jehova nga malimbongan an iya katawohan hito nga buwa nga katutdoan. Pero pauroutro nga ginpili han mga Israelita nga magsingba kan Baal. (Num. 25:3, 5; Huk. 2:13; 1 Hadi 18:18) Yana, obserbari kon paonan-o nabihag ni Satanas an mga Israelita.

7. Paonan-o nasarihan an pagtoo han mga Israelita han nakadto na hira ha Tuna nga Iginsaad?

⁷ An siyahan nga taktika nga gin-gamit ni Satanas amo an natural nga hingyap nga umuran ha ira tuna. Kada tuig, talagsa gud la umuran ha Tuna nga Iginsaad tikang ha kataposan han Abril tubtob ha Septyembre. An kinabuhi ngan hura nga ani han mga Israelita nakadepende ha uran nga kaurogan nagtitikang ha mga bulan han Oktubre. Ginlimbongan ni Satanas an mga Israelita nga tumoo nga basi magkaada hura nga ani, kinahanglan nira subaron an mga kustomre han pagano nga mga nasud nga nakapalibot ha ira. Ito nga mga nasud natoo nga kinahanglan an pipira nga rituwal basi magpadara an ira mga dios han ginkikinahanglan nga uran. Adton waray pagtoo kan Jehova naghunahuna nga ito la an paagi basi malikyan an maiha nga huraw, salit nagbuhat hira hin pagano nga mga rituwal basi pasidunggan an buwa nga dios nga hi Baal.

8. Ano an ikaduha nga taktika nga gin-gamit ni Satanas? Isaysay.

⁸ An ikaduha nga taktika nga gin-gamit ni Satanas ha mga Israelita amo an imoral nga mga hingyap. Ginsisingba han pagano nga mga nasud an ira mga dios pinaagi hin malaw-ay ngan imoral nga mga buhat. Ini nga sayop nga paagi han pagsingba nag-uupod han pagbuhat han mga babaye ngan lalaki hin prostitusyon ha templo. Waray la itugot an homoseksuwalidad ngan iba pa nga klase han seksuwal nga imoralidad, kondi nagin normal na la ito! (Deut. 23:17, 18; 1 Hadi 14:24) Natoo an mga pagano nga ini nga mga rituwal nakakaaghat ha ira mga dios nga himoon an tuna nga mabungahon. Damu nga Israelita an nadani ha imoral nga seksuwal nga mga rituwal han mga pagano ngan gintugotan nira nga mahilit-ag hira ha pagsingba ha buwa nga mga dios. Ha pagkamatuod, nabihag hira ni Satanas.

9. Uyon ha Hosea 2:16, 17, paonan-o naningkamot hi Satanas nga diri magin matin-aw ha panhunahuna han mga Israelita hi Jehova?

⁹ Ginamit hi Satanas hin ikatulo nga taktika. Naningkamot hiya nga diri magin matin-aw ha panhunahuna han mga Israelita hi Jehova. Ha panahon ni propeta Jeremias, nagsiring hi Jehova nga ginpahinabo han buwa nga mga propeta nga hingalimtan han Iya katawohan an Iya ngaran “tungod kan Baal.” (Jer. 23:27) Posible nga waray na gamita han katawohan han Dios an ngaran ni Jehova ngan ginsaliwnan ito han ngaran nga Baal, nga nangangahulogan nga “Tag-iya” o “Agaron.” Pinaagi hini, nagin diri matin-aw ha panhunahuna han mga Israelita an kaibahan ni Jehova ngan ni Baal, salit nagin masayon ha ira nga pagtampuhon an mga rituwal ha pagsingba kan Baal ngan an pagsingba kan Jehova.​—Basaha an Hosea 2:16, 17 ngan an footnote.

10. Ano nga mga taktika an ginagamit ni Satanas yana?

¹⁰ Amo la gihapon nga mga taktika an ginagamit ni Satanas yana. Ginbibihag niya an mga tawo pinaagi ha pagsalingabot han ira natural nga mga hingyap, pag-aghat ha pagbuhat hin seksuwal nga imoralidad, ngan paningkamot nga diri magin matin-aw ha ira panhunahuna hi Jehova. Hisgotan anay naton an ikatulo nga taktika.

11. Ano an ginbubuhat ni Satanas basi diri magin matin-aw ha panhunahuna han mga tawo hi Jehova?

 ¹¹ Naniningkamot hi Satanas nga diri magin matin-aw ha panhunahuna han mga tawo hi Jehova. Kamatay han mga apostol ni Jesus, an pipira han nag-aangkon nga mga Kristiano nagtikang pagpasarang hin buwa nga mga katutdoan. (Buh. 20:29, 30; 2 Tes. 2:3) Ini nga mga apostata naningkamot nga diri magin matin-aw an pangirilal-an han amo la nga tinuod nga Dios. Pananglitan, waray na nira gamita an ngaran han Dios ha ira mga kopya han Biblia ngan ginpili nira nga gamiton an mga titulo sugad han “Ginoo.” Han gintanggal nira an personal nga ngaran han Dios ngan ginsaliwanan ito han titulo nga “Ginoo,” nagin makuri para ha magbarasa han Biblia nga makita an kaibahan ni Jehova ha iba nga “mga ginoo” nga gin-uunabi ha Kasuratan. (1 Cor. 8:5) Gin-gamit nira an amo gihapon nga titulo, an “Ginoo,” para kan Jehova ngan kan Jesus, nga tungod hito nagin makuri masabtan nga magkaiba nga persona hi Jehova ngan an iya Anak, ngan magkaiba an ira posisyon. (Juan 17:3) Inin diri matin-aw nga pangirilal-an nagin usa nga hinungdan nga nahimo an doktrina han Trinidad​—doktrina nga diri igintututdo han Pulong han Dios. Sugad nga resulta, damu an natoo nga misteryo an Dios ngan imposible nga makilala naton hiya. Buwa gud ito!​—Buh. 17:27.

12. Sugad han gin-uunabi ha Roma 1:28-31, ano an igin-aaghat han buwa nga relihiyon, ngan ano an resulta hito?

¹² Ginagamit ni Satanas an imoral nga mga hingyap. Ha panahon han kadaan nga Israel, gin-gamit ni Satanas an buwa nga relihiyon ha pag-aghat nga magbuhat hin imoralidad. Yana, ito gihapon an iya ginhihimo. Igintutugot han buwa nga relihiyon an imoral nga mga buhat ngan ira pa ngani ito igin-aaghat. Tungod hito, damu han nag-aangkon nga nag-aalagad ha Dios an waray na magsunod han iya matin-aw nga mga suruklan ha moral. Iginhulagway ni apostol Pablo ha iya surat ha mga taga-Roma an nagin resulta. (Basaha an Roma 1:28-31.) An “mga butang nga diri kaangayan” nag-uupod han ngatanan nga klase han seksuwal nga imoralidad, pati na an homoseksuwalidad. (Roma 1:24-27, 32; Pah. 2:20) Importante gud nga sundon naton an matin-aw nga mga katutdoan han Biblia!

13. Ano an usa pa nga taktika nga ginagamit ni Satanas?

¹³ Ginagamit ni Satanas an natural nga mga hingyap. May-ada kita natural nga hingyap nga mahibaro hin mga abilidad nga mabulig ha aton  basi magkaada kita han aton mga panginahanglan, pati han aton pamilya. (1 Tim. 5:8) Kaurogan na nga nahibabaroan naton ito nga mga abilidad pinaagi ha pag-eskwela ngan pagin maduruto nga estudyante. Pero sadang kita magin maikmat. An mga eskwelahan ha damu nga nasud diri la nagtututdo hin praktikal nga mga abilidad, kondi pati liwat han mga pilosopiya han tawo. Pananglitan, gin-aaghat nira an mga estudyante nga magruhaduha nga may-ada Dios ngan igbalewaray an Biblia. Gintututdoan nira an mga estudyante nga an ngatanan nga baltok natoo nga an ebolusyon amo an tinikangan han kinabuhi. (Roma 1:21-23) An sugad nga mga katutdoan nakontra ha “kinaadman han Dios.”​—1 Cor. 1:19-21; 3:18-20.

14. Ano an ginkukultibar han pilosopiya han tawo?

¹⁴ An pilosopiya han tawo nagbabalewaray o nakontra ha matadong nga mga suruklan ni Jehova. Ginkukultibar hito diri an bunga han espiritu han Dios, kondi an “mga buhat han unod.” (Gal. 5:19-23) Nag-aaghat ito hin pagin mapahitas-on ngan hambog, ngan sugad nga resulta, an mga tawo nagigin “mahigugmaon ha ira kalugaringon.” (2 Tim. 3:2-4) Ito nga mga kalidad kabaliktaran han maaghop ngan mapainubsanon nga disposisyon nga igin-aaghat nga kultibaron han mga surugoon han Dios. (2 Sam. 22:28) An panhunahuna han pipira nga Kristiano nga nanalinguha nga makaeskwela ha unibersidad namolde han panhunahuna han tawo imbes nga han panhunahuna han Dios. Hisgotan naton an usa nga ehemplo nga posible mahitabo.

15-16. Ano an imo nahibaroan ha eksperyensya han usa nga sister?

¹⁵ Usa nga sister nga sobra 15 ka tuig na nga nag-aalagad hin bug-os-panahon an nagsiring:  “Sugad nga bawtismado nga Saksi, nababasa ngan nababatian ko na an mga peligro han pag-eskwela ha unibersidad, pero ginbalewaray ko la ito nga mga pahamangno. Kahuna ko nga ito nga sagdon diri aplikado ha akon.” Ano nga mga pagsari an iya naeksperyensyahan? Hiya nagsiring: “Daku nga panahon ngan kusog an akon igin-gagahin ha pag-inaram nga tungod hito waray na ako panahon ha pag-ampo kan Jehova pariho han akon ginhihimo hadto, kapoy na gud ako salit waray na ako gana makig-istorya ha iba mahitungod ha Biblia, ngan diri na ako nakakapangandam hin maopay ha mga katirok. Maopay na la, han nakita ko nga an pag-eskwela ha hitaas nga edukasyon nakakaguba han akon relasyon kan Jehova, nasantop ko nga kinahanglan ko umundang. Ngan ito gud an akon ginbuhat.”

¹⁶ Paonan-o naapektohan han hitaas nga edukasyon an panhunahuna hini nga sister? Hiya nagsiring: “Makaarawod man aminon, pero an edukasyon nga akon ginkab-ot nagtutdo ha akon nga magin kritiko, labi na ha kabugtoan, maglaom hin labaw kay han ira mahihimo, ngan magpahirayo ha ira. Nag-iha anay antes ko mawara ito nga panhunahuna. Ini nga eksperyensya nagtutdo ha akon nga peligroso gud an pagbalewaray han mga pahamangno nga iginhahatag han aton langitnon nga Amay pinaagi han iya organisasyon. Mas kilala ako ni Jehova kay han akon pagkilala ha akon kalugaringon. Kon namati la unta ako!”

17. (a) Ano an sadang naton magin determinasyon? (b) Ano an aton hihisgotan ha sunod nga artikulo?

¹⁷ Magin determinado nga diri mabihag “han pilosopiya ngan waray pulos nga panlimbong” han kalibotan ni Satanas. Padayon nga magbantay ha mga taktika ni Satanas. (1 Cor. 3:18; 2 Cor. 2:11) Ayaw gud tuguti nga himoon niya nga magin diri matin-aw ha imo panhunahuna hi Jehova. Pagkinabuhi uyon ha hitaas nga mga suruklan ni Jehova ha moral. Ngan ayaw tuguti nga limbongan ka ni Satanas nga balewarayon an sagdon ni Jehova. Pero ano man kon maobserbaran mo nga naiimpluwensyahan ka na han panhunahuna hini nga kalibotan? Hihisgotan han sunod nga artikulo kon paonan-o an Pulong han Dios makakabulig ha aton nga tumbahon bisan an panhunahuna ngan mga nahiaraan nga “marig-on an pagkatindog.”​—2 Cor. 10:4, 5.