HAN nangangandam an mga Israelita pagtabok ha Salog Jordan samtang tipakadto hira ha tuna nga iginsaad ha ira han Dios, may mga binisita ha ira. Ini nga mga bisita dayo nga kababayin-an nga nag-imbitar ha kalalakin-an para ha usa nga panagtawo. Baga hin talagsahon ini nga oportunidad. Nakakaengganyo an pagkaada bag-o nga kasangkayan, sarayaw, ngan pangaon hin magrasa nga pagkaon. Bisan kon an kustomre ngan moralidad hini nga kababayin-an diri uyon han Balaud han Dios nga iginhatag ha Israel, bangin an pipira nga kalalakin-an nga Israelita naghunahuna: ‘Diri kami nira maiimpluwensyahan. Maghihirot kami.’

 Ano an nahitabo? An giniyahan nga asoy nasiring: “An katawohan nagbuhat hin seksuwal nga imoralidad upod han mga anak nga babaye ha Moab.” Ha pagkamatuod, karuyag han kababayin-an nga ito nga mga Israelita nga kalalakin-an magsingba ha buwa nga mga dios. Ngan ito gud an ira ginbuhat! Salit natural la nga “hi Jehova nasina hinduro ha Israel.”​—Num. 25:1-3.

Ginsupak hito nga mga Israelita an Balaud han Dios ha duha nga paagi: Nagsingba hira ha mga idolo, ngan nagbuhat hira hin seksuwal nga imoralidad. Yinukot an nagkamatay tungod han ira pagin diri masinugtanon. (Ex. 20:4, 5, 14; Deut. 13:6-9) Ano pa an dugang nga nakapasakit hini nga panhitabo? An tayming. Kon waray unta supaka hini nga kalalakin-an an Balaud han Dios, matabok na unta ha Jordan iton yinukot nga Israelita ngadto ha Tuna nga Iginsaad.​—Num. 25:5, 9.

Mahitungod hito nga panhitabo, hi apostol Pablo nagsurat: “Ini ngatanan nahitabo ha ira sugad nga mga ehemplo, ngan iginsurat ito basi pahamangnoan kita nga nabubuhi ha mga kataposan han mga sistema han mga butang.” (1 Cor. 10:7-11) Sigurado nga nalipay hi Satanas nga an pipira nga Israelita nakabuhat hin seryoso nga sala salit waray na hira magin kwalipikado nga makasulod ha Tuna nga Iginsaad. Maaramon gud nga seryosohon naton ito nga pahamangno, kay maaram kita nga waray iba nga karuyag hi Satanas kondi nga pugngan kita nga makasulod ha bag-o nga kalibotan han Dios!

Ginbibiktima ni Satanas an mga Kristiano, nagamit hiya hin mga taktika nga eksperto hiya ngan nagin epektibo ha damu nga tawo. Sugad han nahitabo ha mga Israelita, gin-gamit niya an seksuwal nga imoralidad. Yana, peligroso la gihapon nga lit-ag an imoralidad. Usa nga epektibo nga paagi nga mahimo kita mahilit-ag hito amo an pornograpiya.

Yana, mahimo na magkita an usa hin pornograpiya nga waray nahibabaro han iya ginbibinuhat. Ha naglabay nga mga dekada, an naruruyag magkita hin pornograpiya bangin kinahanglan kumadto pa ha sinehan basi magkita hin maglaw-ay nga pelikula o ha pan-adulto nga mga bookstore basi pumalit hin pornograpiko nga barasahon. Posible nga diri na la nakadto hini nga mga lugar an damu nga tawo tungod kay naaawod hira nga may makakita ha ira. Pero yana, an usa nga konektado ha Internet mahimo magkita hin pornograpiya didto ha iya trabaho o bisan ngani ha nakaparada nga awto. Ngan ha damu nga lugar, an usa nga lalaki o babaye mahimo magkita hin pornograpiya bisan ha ira balay.

Diri la ito. Tungod ha mga gadyet, nagin mas masayon an pagkita hin pornograpiya. Samtang an mga tawo naglalakat o sakay hin bus o tren, mahimo hira magkita hin maglaw-ay nga retrato ha ira gadyet.

Tungod kay nagin mas masayon na an pagkita hin pornograpiya ngan an pagtago nga an usa nagbibinuhat hito, mas damu nga tawo an nadadaot yana han pornograpiya kay han hadto. Damu hinduro nga nagkikita hin pornograpiya an nadaot an ira pag-asawa, dignidad, ngan konsensya. An mas maraot pa gud, iginbubutang nira ha peligro an ira pakigsangkay ha Dios. Husto la nga makasiring ka nga an pornograpiya nakakadaot ha mga nagkikita hito. Ha damu nga kahimtang, nagriresulta ito hin higlarom nga samad ha emosyon. Ito nga mga samad bangin hinay-hinay nga matambal pero mahimo ito magbilin hin ulat nga maiha gud mapara.

Kondi, tigamni nga hi Jehova naghahatag hin proteksyon tikang hini nga lit-ag ni Satanas. Kon karuyag naton nga proteksyonan kita ni Jehova, kinahanglan naton buhaton adton waray mabuhat han kalalakin-an nga mga Israelita​—an ‘pagsugot gud’ ha iya. (Ex. 19:5) Kinahanglan naton hinumdoman nga nangangalas an Dios ha pornograpiya. Kay ano nga masisiring naton ito?

Hunahunaa ini: An mga balaud nga iginhatag han Dios ha nasud han Israel iba gud ha mga balaud han iba nga nasud ha kadaan nga panahon. Pariho hin pader, makakapanalipod ito ha Israel tikang ha mga tawo nga nakapalibot ha ira ngan ha magraot nga buhat hito nga mga tawo. (Deut.  4:6-8) Ito nga mga balaud matin-aw nga nagsusumat hin importante nga kamatuoran: Nangangalas hi Jehova ha seksuwal nga imoralidad.

Han gin-unabi an magraot nga buhat han kahirani nga mga nasud, ginsidngan ni Jehova an mga Israelita: “Ayaw niyo buhata an ginbubuhat han mga tawo ha tuna han Canaan nga akon pagdadad-an ha iyo. . . . An ira tuna nagin mahugaw, sisirotan ko an mga umurukoy ha tuna tungod han ira sala.” Para ha baraan nga Dios han Israel, maraot gud an pagkinabuhi han mga Canaanita nga tungod hito an tuna nga ira gin-uukyan nagin mahugaw.​—Lev. 18:3, 25.

Bisan kon ginsirotan ni Jehova an mga Canaanita, an iba nga katawohan nagpadayon ha pagbuhat hin seksuwal nga imoralidad. Paglabay hin sobra 1,500 ka tuig, iginhulagway ni Pablo an mga nasud nga gin-uukyan han mga Kristiano sugad nga “diri na . . . maaram han mga suruklan ha moral.” Ngani, “igintubyan nira an ira kalugaringon ha mapasiparahon nga panggawi basi magbuhat han ngatanan nga klase hin kahugawan nga may kahakog.” (Efe. 4:17-19) Yana, damu liwat an imoral nga mga tawo ngan diri nira ito iginkakaawod. Tubtob nga posible, kinahanglan gud likyan han tinuod nga mga magsiringba an pagkinita han imoral nga mga buhat hini nga kalibotan.

An pornograpiya nagpapakita hin duro nga kawaray-respeto ha Dios. Iya ginlarang an mga tawo uyon ha iya dagway ngan pariho ha iya ngan gintagan kita hin abilidad nga hibaroan an husto ngan sayop. Maaramon nga naghatag an Dios hin makatadunganon nga limitasyon mahitungod ha seksuwal nga relasyon. Katuyoan niya nga mag-asawa la an magpahimulos hito. (Gen. 1:26-28; Prob. 5:18, 19) Pero ano an ginbubuhat hadton naghihimo hin pornograpiko nga mga materyal ngan nag-aaghat hito? Ginbabalewaray gud nira an mga suruklan han Dios ha moral. Oo, an mga tawo nga nag-aaghat hin pornograpiya diri narespeto kan Jehova. Huhukman han Dios adton nagbabalewaray han iya mga suruklan pinaagi han ira paghimo hin imoral nga mga materyal o pag-aghat hito.​—Roma 1:24-27.

Pero kumusta man an mga tawo nga tinuyo nga nagbibinasa o nagkikinita hin pornograpiya? Bangin abaton han pipira nga diri ito nakakadaot nga kaliawan. Pero ha pagkamatuod, nasuporta hira ha mga nagbabalewaray han mga suruklan ni Jehova. Bangin diri ini an ira katuyoan han nagtikang  hira magkita hin pornograpiya. Kondi matin-aw nga an mga magsiringba han tinuod nga Dios sadang gud mangalas ha pornograpiya. An Biblia nagsasagdon: “O kamo nga nahigugma kan Jehova, kangalasi an maraot.”​—Sal. 97:10.

Bisan adton naruruyag maglikay ha pornograpiya mahimo makurian ha pagbuhat hito. Diri kita perpekto, salit bangin kinahanglan mangalimbasog kita pag-ato ha maghugaw nga seksuwal nga hingyap. Dugang pa, an aton diri perpekto nga kasingkasing bangin mamiling hin paagi nga igbalewaray an balaud han Dios. (Jer. 17:9) Pero damu han nagin Kristiano an nagdaog hini nga pakig-away. Kon nakikig-away ka ha pornograpiya, an paghibaro hini maghahatag ha imo hin kompyansa nga maglalampos ka liwat. Tagda kon paonan-o an Pulong han Dios mabulig ha imo nga malikyan an lit-ag ni Satanas nga pornograpiya.

Sugad han gin-unabi na, ginpabay-an han damu nga Israelita an ira sayop nga mga hingyap nga makadaot ha ira. Mahimo liwat ito mahitabo yana. Iginhulagway han bugto ha nanay ni Jesus nga hi Santiago an peligro: “An kada tagsa . . . nadadara ngan nadadani han iya kalugaringon nga hingyap. Katapos, an hingyap kon burod na ito, nag-aanak hin sala.” (San. 1:14, 15) Kon may malaw-ay nga hingyap nga tumubo ha kasingkasing han usa, posible gud nga makasala hiya. Salit kinahanglan wad-on naton ha aton hunahuna an imoral nga mga butang, diri na ito paghinunahunaon.

Kon nakakahunahuna ka hin imoral nga mga butang, gios dayon. Hi Jesus nagsiring: “Salit kon an imo kamot o an imo tiil nagigin hinungdan han imo kahipakdol, utda ito ngan ilabog. . . . Sugad man, kon an imo mata nagigin hinungdan han imo kahipakdol, lukata ito ngan ilabog.” (Mat. 18:8, 9) Diri karuyag sidngon ni Jesus nga literal nga may tatanggalon kita ha aton lawas. Iginpapakita la niya nga kinahanglan magin determinado kita nga tanggalon dayon an hinungdan han kahipakdol. May kalabotan ha pornograpiya, paonan-o naton maiaaplikar ini nga sagdon?

Kon makakita ka hin pornograpiya, ayaw paghunahuna, ‘Diri ako maaapektohan hini.’ Lingiw dayon. Paronga dayon an TV. Paronga dayon an kompyuter o gadyet. Pagpokus utro ha butang nga limpyo. An pagbuhat hini mabulig ha imo nga  makontrol an imo panhunahuna imbes nga pabay-an mo nga kontrolon ka han sayop nga mga hingyap.

Ano man kon naiundang mo na an pagkinita hin pornograpiya, pero may panahon nga nahuhunahuna mo la gihap ito? An maglaw-ay nga mga retrato o mga butang mahimo magpabilin ha hunahuna hin maiha nga panahon. Mahimo ito umulpot ha imo hunahuna ha bisan ano nga panahon. Kon mahitabo ito, bangin maaghat ka ha pagbuhat hin malaw-ay, sugad han masturbasyon. Salit laumi nga mahimo umulpot hin tigda an sugad nga panhunahuna, ngan magin andam ha pag-ato hito.

Magin determinado gud nga ipahiuyon an imo panhunahuna ngan buhat ha kaburut-on han Dios. Magin pariho kan apostol Pablo nga andam nga ‘kastiguhon an iya lawas ngan uripunon ito.’ (1 Cor. 9:27) Ayaw tuguti nga uripunon ka han imo maghugaw nga hingyap. “Magbag-o . . . pinaagi ha pagbag-o han [imo] panhunahuna, basi mapamatud-an [mo] ha [imo] kalugaringon an maopay ngan kinakarawat ngan hingpit nga kaburut-on han Dios.” (Roma 12:2) Hinumdumi: An paghunahuna ngan pagbuhat uyon ha kaburut-on han Dios magriresulta hin mas daku gud nga kalipay kay ha pagsunod ha makasasala nga mga hingyap.

Pagmemorya hin espisipiko nga mga teksto. Katapos, kon may sumulod ha imo hunahuna nga imoral nga mga butang, hunahunaa ito nga mga teksto. An mga teksto sugad han Salmo 119:37; Isaias 52:11; Mateo 5:28; Efeso 5:3; Colosas 3:5; ngan 1 Tesalonica 4:4-8 mabulig ha imo nga maipahiuyon an imo panhunahuna ha panhunahuna ni Jehova ha pornograpiya ngan kon ano an iya ginlalaoman ha imo.

Ano man kon may mga panahon nga haros diri mo na kaya atohan an imo hingyap ha pagkita o paghunahuna hin imoral nga mga butang? Subara hin maopay an ginbuhat han aton susbaranan nga hi Jesus. (1 Ped. 2:21) Katapos han bawtismo ni Jesus, padayon hiya nga ginsulay ni Satanas. Ano an ginbuhat hi Jesus? Padayon hiya nga inato. Gumamit hiya hin mga teksto ha pag-ato ha mga pagsulay ni Satanas. Hiya nagsiring: “Iwas, Satanas!” ngan ginbayaan hiya ni Satanas. Sugad la nga waray gud umundang hi Jesus ha pakig-away ha Yawa, kinahanglan diri ka liwat umundang. (Mat. 4:1-11) Hi Satanas ngan an iya kalibotan padayon nga maniniguro nga pun-on an imo hunahuna hin imoral nga mga butang, pero ayaw pag-undang ha pag-ato hito. Mahimo mo madaog an pornograpiya. Ha bulig ni Jehova, mapipirde mo an imo kaaway.

Padayon nga sumarig kan Jehova pinaagi han pag-ampo. Hi Pablo nagsiring: “Ipahibaro niyo ha Dios an iyo mga hangyo; ngan an kamurayawan han Dios nga labaw ha ngatanan nga pagsabot magbabantay han iyo kasingkasing ngan han iyo panhunahuna pinaagi kan Kristo Jesus.” (Fil. 4:6, 7) An kamurayawan han Dios mabulig ha imo nga maatohan an pagbuhat hin sala. Kon maduok ka kan Jehova, “magigin duok hiya ha [imo].”​—San. 4:8.

An pinakamaopay nga proteksyon kontra ha bisan ano nga peligro amo an pagin duok ha Soberano han uniberso. Hi Jesus nagsiring: “Tiabot an magmarando han kalibotan [nga hi Satanas], ngan hiya waray gahum ha akon.” (Juan 14:30) Kay ano nga may sugad hito nga kompyansa hi Jesus? Makausa, hiya nagsiring: “Hiya nga nagsugo ha akon kaupod ko; waray niya ako pabay-i nga mag-usahan, kay ginbubuhat ko pirme an mga butang nga nakakapalipay ha iya.” (Juan 8:29) Kon bubuhaton mo an mga butang nga nakakapalipay kan Jehova, diri ka gud liwat niya babayaan. Likyi an lit-ag han pornograpiya, ngan diri ka mabibiktima ni Satanas.