1. Ano an nawara nira Adan ngan Eva, ngan ano an resulta hito?

PARA ha imo, hin-o an sadang maghimo han mga suruklan ha kon ano an maopay ngan kon ano an maraot? Han kumaon hira Adan ngan Eva han bunga han kahoy han kahibaro han maopay ngan maraot, an ira ginbuhat may matin-aw nga mensahe: Diri hira nasarig kan Jehova ngan ha iya mga suruklan. Ginpili nira nga maghimo han ira kalugaringon nga suruklan han maopay ngan maraot. (Gen. 3:22) Pero hunahunaa la kon ano an ira nawara. Nawara nira an ira pakigsangkay kan Jehova. Nawara liwat nira an higayon nga mabuhi ha waray kataposan, ngan naipasa nira an sala ngan kamatayon ha ira mga anak. (Roma 5:12) An desisyon nira Adan ngan Eva nagresulta ha kabidoan.

2-3. (a) Ano an ginbuhat han Etiopiahanon nga yunuko han ginsangyawan hiya ni Felipe? (b) Ano nga mga bendisyon an aton nakakarawat kon nagpapabawtismo kita, ngan ano nga mga pakiana an aton hihisgotan?

² Itanding an ginbuhat nira Adan ngan Eva ha ginbuhat han Etiopiahanon nga yunuko han ginsangyawan hiya ni Felipe. Gin-apresyar gud han yunuko an mga ginbuhat ni Jehova ngan ni Jesus para ha iya salit nagpabawtismo dayon hiya. (Buh. 8:34-38) Kon igindidedikar naton an aton kalugaringon ha Dios ngan, pariho han yunuko, nagpapabawtismo, ini nga aton buhat may matin-aw nga mensahe. Iginpapakita naton nga gin-aapresyar naton an mga ginbuhat ni Jehova ngan ni Jesus para ha aton. Iginpapakita liwat naton nga nasarig kita kan Jehova ngan ginkikilala naton nga hiya la an sadang maghimo han suruklan ha kon ano an maopay ngan kon ano an maraot.

³ Hunahunaa an mga bendisyon nga aton nakakarawat kon nag-aalagad kita kan Jehova! An usa hito amo an pagkaada paglaom nga makarawat an ngatanan nga nawara nira Adan ngan Eva, upod na an higayon nga mabuhi ha waray kataposan. Tungod han aton pagtoo kan Jesu-Kristo, ginpapasaylo ni Jehova an aton mga sala  ngan gintatagan kita niya hin limpyo nga konsensya. (Mat. 20:28; Buh. 10:43) Nagigin bahin liwat kita han kan Jehova pamilya han inuuyonan nga mga surugoon nga may makalilipay nga tidaraon. (Juan 10:14-16; Roma 8:20, 21) Pero bisan pa hinin klaro nga mga bendisyon, an pipira nga nakilala na kan Jehova nag-aalang pagsubad ha ehemplo han Etiopiahanon nga yunuko. Ano an bangin nakakaulang ha ira nga magpabawtismo? Ngan paonan-o nira ito malalamposan?

4-5. Ano nga mga ulang an naeksperyensyahan han batan-on nga hira Avery ngan Hannah?

⁴ Kawaray-kompyansa. Saksi ni Jehova an mga kag-anak ni Avery. An iya tatay may maopay nga reputasyon sugad nga mahigugmaon nga amay ngan maduruto nga tigurang. Pero nag-alang hi Avery ha pagpabawtismo. Kay ano? “Baga hin diri ko kaya magkaada reputasyon nga pariho han akon tatay,” siring niya. Naghunahuna liwat hi Avery nga waray hiya kapas ha pagtuman han mga responsabilidad nga bangin ihatag ha iya ha tidaraon. “Nahahadlok ako nga paampoon ha publiko, padumarahon hin mga pahayag, o manguna ha grupo ha pagsangyaw.”

⁵ Hi Hannah nga 18 anyos, nakaeksperyensya hin duro nga kawaray-kompyansa. Ginpadaku hiya hin mga kag-anak nga nag-aalagad kan Jehova. Bisan pa hito, nagruhaduha hiya kon kaya ba niya magkinabuhi uyon ha mga suruklan ni Jehova. Kay ano? Minos gud an pagkita ni Hannah ha iya kalugaringon. May mga panahon nga inabat hiya hin duro nga kasubo nga tungod hito ginpasakitan niya an iya kalugaringon, nga nakadugang la lugod han problema. “Waray ako ginsumatan mahitungod han akon ginhimo, bisan an akon mga kag-anak,” siring niya, “ngan ginhunahuna ko nga diri gud maruruyag hi Jehova ha akon tungod han akon ginbubuhat ha akon kalugaringon.”

6. Ano an nakaulang kan Vanessa ha pagpabawtismo?

⁶ Impluwensya han kasangkayan. Hi Vanessa nga 22 anyos, nagsiring, “May maopay gud ako nga sangkay nga haros usa ka dekada ko na nga kilala.” Pero ini nga sangkay ni Vanessa diri nasuporta ha iya tumong nga magpabawtismo. Nasubo hito hi Vanessa ngan nagsiring, “Nakukurian ako pamiling hin sangkay, ngan nabaraka ako nga kon utdon ko an amon pagkamagsangkay, diri na ako makakaagi hin duok nga sangkay.”

7. Ano an nahadlokan han batan-on nga hi Makayla, ngan kay ano?

⁷ Kahadlok nga mapakyas. Singko anyos hi Makayla han ginpaiwas ha kongregasyon an iya kuya. Samtang nagtutubo hiya, nakita niya an duro nga kasubo han iya mga kag-anak tungod han ginbuhat han iya kuya. Hi Makayla nagsiring: “Nahadlok ako nga kon magpabawtismo ako, bangin makasala ako, mapaiwas ha kongregasyon, ngan makahatag hin dugang nga kasubo ha akon mga kag-anak.”

8. Ano an nahadlokan han batan-on nga hi Miles?

 ⁸ Kahadlok ha pagkontra. An tatay ngan pinakananay ni Miles nag-aalagad kan Jehova, pero an iya nanay diri Saksi. “Nag-ukoy ako kaupod an akon nanay ha sulod hin 18 ka tuig,” siring ni Miles, “ngan nahadlok ako nga sumatan hiya nga karuyag ko magpabawtismo. Nakita ko an iya reaksyon han nagin Saksi an akon tatay. Nahadlok ako nga bangin kontrahon niya ako.”

9. Ano an posible gud mahitabo kon mahibaroan mo kon mationan-o kamapailubon ngan kamahigugmaon hi Jehova?

⁹ Ginpili nira Adan ngan Eva nga diri mag-alagad kan Jehova tungod kay waray nira pahilaroma an ira gugma ha iya. Bisan pa hito, gintugotan ni Jehova nga mabuhi hira hin maiha basi magkaada mga anak ngan maghimo han ira kalugaringon nga mga suruklan ha pagpadaku han ira mga anak. Waray pag-iha, an mga resulta han desisyon nira Adan ngan Eva nga magin bulag kan Jehova nakita nga diri gud hira maaramon. Ginpatay han ira suhag an iya inosente nga bugto ngan ha urhi, an mga tawo nagin madarahog ngan makikalugaringon. (Gen. 4:8; 6:11-13) Kondi, hi Jehova naghimo hin paagi basi talwason an ngatanan nga anak nira Adan ngan Eva nga naruruyag mag-alagad ha iya. (Juan 6:38-40, 57, 58) Samtang mas nahibabaroan mo kon mationan-o kamapailubon ngan kamahigugmaon hi Jehova, an imo gugma ha iya posible gud maghilarom. Maaaghat ka nga diri subaron an ginbuhat nira Adan ngan Eva ngan pipilion mo nga idedikar an imo kinabuhi kan Jehova.

10. Kay ano nga an pagpamalandong han Salmos 19:7 makakabulig ha imo ha pag-alagad kan Jehova?

¹⁰ Ipadayon an pagkuha hin kahibaro mahitungod kan Jehova. Samtang mas nahibabaro ka mahitungod kan Jehova, mas nagkakaada ka kompyansa nga maglalampos ka ha pag-alagad ha iya. Hi Avery nga gin-unabi kanina, nagsiring: “Nagkaada ako kompyansa pinaagi ha pagbasa ngan pagpamalandong han saad nga mababasa ha Salmos 19:7.” (Basaha.) Han nakita ni Avery kon paonan-o gintutuman ni Jehova ito nga saad, an iya gugma ha Dios mas naghilarom. An gugma diri la nagpaparig-on han kompyansa, nabulig liwat ito ha aton nga magpokus kan Jehova ngan ha kon ano an iya karuyag. Hi Hannah nga gin-unabi kanina, nagsiring: “Pinaagi han  akon personal nga pagbasa ngan pag-aram han Biblia, nasantop ko nga kon ginpapasakitan ko an akon kalugaringon, ginpapasakitan ko liwat hi Jehova.” (1 Ped. 5:7) Hi Hannah nagin ‘magburuhat han pulong han Dios.’ (San. 1:22) Ano an resulta hito? Hiya nagsiring: “Han nakita ko kon paonan-o ako nagpahimulos ha pagsugot kan Jehova, naghilarom an akon gugma ha iya. Yana sigurado ako nga pirme ako gigiyahan ni Jehova kon kinahanglan ko an iya bulig.” Nalamposan ni Hannah an tendensya nga pasakitan an iya kalugaringon. Nagdedikar hiya kan Jehova ngan nagpabawtismo.

11. Ano an ginhimo ni Vanessa basi magkaada mag-opay nga kasangkayan, ngan ano an aton mahibabaroan tikang hini?

¹¹ Magin maaramon ha pagpili hin kasangkayan. Ha urhi, nasantop ni Vanessa, nga gin-unabi kanina, nga an iya sangkay nakakaulang ha iya ha pag-alagad kan Jehova. Salit gintapos niya an ira pagkamagsangkay. Pero diri la ito an iya ginbuhat. Nangalimbasog gud hiya nga magkaada bag-o nga kasangkayan, ha sulod han kongregasyon. Nagsiring hiya nga an susbaranan ni Noe ngan han iya pamilya nakabulig ha iya. “Napapalibotan hira hin mga tawo nga diri nahigugma kan Jehova,” siring niya, “pero may-ada hira maopay nga pakig-upod ha kada tagsa.” Katapos ni Vanessa magpabawtismo, nagpayunir hiya. Hiya nagsiring, “Nakabulig ini ha akon nga magkaada mag-opay nga kasangkayan diri la ha amon kongregasyon kondi pati liwat ha iba nga kongregasyon.” Mahimo ka liwat magkaada mag-opay nga kasangkayan pinaagi ha pakigbahin ha buruhaton nga igintoka ni Jehova ha aton tubtob nga posible.​—Mat. 24:14.

12. Ano nga klase hin kahadlok an waray hira Adan ngan Eva, ngan ano an resulta hito?

¹² Magkaada han husto nga klase hin kahadlok. May pipira nga klase hin kahadlok nga mapulsanon ha aton. Pananglitan, kinahanglan magkaada kita angayan nga kahadlok nga mapasubo hi Jehova. (Sal. 111:10) Kon nagkaada hira Adan ngan Eva hito nga klase hin kahadlok, diri unta hira magrirebelde kan Jehova. Kondi nagrebelde hira. Katapos han ira pagrebelde, naabrihan an ira mga mata nga tungod hito, nasantop nira nga makasasala hira. Sala ngan kamatayon la an ira naipasa ha ira mga anak. Tungod kay nasabtan nira an ira kahimtang, naawod hira ha ira pagin hubo ngan gintabonan nira an ira kalugaringon.​—Gen. 3:7, 21.

13-14. (a) Sumala ha 1 Pedro 3:21, kay ano nga diri kita kinahanglan magkaada sobra nga kahadlok ha kamatayon? (b) Ano an aton mga rason nga higugmaon hi Jehova?

 ¹³ Bisan kon kinahanglan kita magkaada angayan nga kahadlok kan Jehova, diri naton kinahanglan magkaada sobra nga kahadlok ha kamatayon. Naghimo hi Jehova hin paagi basi magkaada kita kinabuhi nga waray kataposan. Kon nakasala kita pero sinsero nga nagbabasol, papasayloon ni Jehova an aton mga sala. Papasayloon kita niya tungod han aton pagtoo ha halad-lukat han iya Anak. Usa han pinakaimportante nga paagi ha pagpakita hin pagtoo amo an pagdedikar han aton kinabuhi ha Dios ngan pagpabawtismo.​—Basaha an 1 Pedro 3:21.

¹⁴ Damu an aton rason nga higugmaon hi Jehova. Diri la hiya nagtatagana han mag-opay nga butang nga aton napapahimulosan kada adlaw, gintututdoan liwat kita niya han kamatuoran mahitungod ha iya ngan han iya mga katuyoan. (Juan 8:31, 32) Igintatagana niya an Kristiano nga kongregasyon basi maggiya ngan bumulig ha aton. Ginbubuligan kita niya nga mailob an aton mga problema yana, ngan gintatagan kita niya han paglaom nga mabuhi ha waray kataposan ha perpekto nga kahimtang. (Sal. 68:19; Pah. 21:3, 4) Kon ginpapamalandong naton an mga ginhimo na ni Jehova basi ipakita nga hinigugma kita niya, naaaghat kita nga higugmaon hiya. Ngan kon hinigugma naton hi Jehova, nagkakaada kita han husto nga klase hin kahadlok. Nahahadlok kita nga mapasubo an Usa nga aton hinigugma hinduro.

15. Paonan-o nalamposan ni Makayla an kahadlok nga mapakyas?

¹⁵ Nalamposan ni Makayla, nga gin-unabi kanina, an kahadlok nga mapakyas han nasabtan niya nga mapinasayloon gud hi Jehova. Hiya nagsiring: “Nasantop ko nga kita ngatanan diri perpekto ngan makakasayop kita. Pero nasabtan ko liwat nga hinigugma kita ni Jehova ngan papasayloon kita niya basado ha lukat.” An iya gugma kan Jehova nagpagios ha iya nga magdedikar ngan magpabawtismo.

16. Paonan-o nabuligan hi Miles nga malamposan an iya kahadlok ha pagkontra?

¹⁶ Hi Miles, nga nahadlok nga kontrahon han iya nanay an iya desisyon nga magpabawtismo, nangaro hin sagdon ha paramangno han sirkito. “Nagdaku liwat hiya ha pamilya nga usa la nga kag-anak an Saksi,” siring ni Miles. “Ginbuligan niya ako nga maghunahuna kon ano an akon iyayakan basi makombinse hi Nanay nga kalugaringon ko nga desisyon an pagpabawtismo ngan diri ako ginpipirit ni Tatay nga buhaton ito.” Waray malipay an nanay ni Miles ha iya desisyon. Ha urhi, kinahanglan niya bumaya ha ira balay, pero bisan pa hito, gintuman niya an iya desisyon. “An paghibaro mahitungod han mag-opay nga ginbuhat ni Jehova para ha akon nakabantad gud ha akon kasingkasing,” siring niya. “Han ginpamalandong ko an mahitungod han halad-lukat ni Jesus, nakita ko nga hinigugma gud ako ni Jehova. Ito an nagpagios ha akon nga magdedikar kan Jehova ngan magpabawtismo.”

17. Ano nga higayon an may-ada kita?

¹⁷ Han kumaon hi Eva han bunga han kahoy ha Eden, iginsalikway niya an iya Amay. Han kumaon liwat hi Adan hito, iginpakita niya nga waray gud hiya apresasyon ha ngatanan nga mag-opay nga ginbuhat ni Jehova para ha iya. Kita ngatanan may higayon nga ipakita nga diri gud kita nauyon ha desisyon nga ginhimo nira Adan ngan Eva. Pinaagi ha pagpabawtismo, iginpapakita naton kan Jehova nga natoo kita nga hiya an may awtoridad ha paghatag ha aton han suruklan ha kon ano an husto ngan kon ano an sayop. Ginpapamatud-an naton nga hinigugma naton an aton Amay ngan nasarig kita ha iya.

18. Paonan-o ka maglalampos ha pag-alagad kan Jehova?

¹⁸ Katapos han bawtismo, kinahanglan padayon naton nga buhaton kon ano an karuyag ni Jehova, diri an aton mga karuyag. Minilyon nga surugoon han Dios an nagkikinabuhi ha sugad nga paagi. Mahimo ka magin pariho ha ira kon padayon mo nga papahilarumon an imo pagsabot ha Pulong han Dios, an Biblia; regular nga makikig-upod ha kabugtoan; ngan madasigon nga isusumat ha iba an imo hinbabaroan mahitungod ha imo mahigugmaon nga Amay. (Heb. 10:24, 25) Kon naghihimo ka hin mga desisyon, pamati ha sagdon nga iginhahatag ni Jehova pinaagi han iya Pulong ngan organisasyon. (Isa. 30:21) Hini nga paagi, maglalampos an ngatanan mo nga ginbubuhat.​—Prob. 16:3, 20.

19. Ano an sadang mo hunahunaon pirme, ngan kay ano?

¹⁹ Kon pirme mo huhunahunaon an imo napapahimulosan ha pagsunod ha giya ni Jehova, maghihilarom an imo gugma ha iya ngan ha iya mga suruklan. Ngan an bisan ano nga igintatanyag ni Satanas diri makakapaundang ha imo ha pag-alagad kan Jehova. Hunahunaa an imo kalugaringon mga 1,000 ka tuig tikang yana. Masisiring mo gud nga an imo desisyon nga magpabawtismo amo an pinakamaopay nga desisyon nga imo ginhimo!