1-2. Sugad han iginpapakita ha Buhat 8:27-31, 35-38, ano an nagpagios ha opisyal nga taga-Etiopia nga magpabawtismo?

KARUYAG mo ba magpabawtismo basi magin disipulo han Kristo? An gugma ngan apresasyon nag-aaghat o nagpapagios ha damu nga buhaton ito. Hunahunaa an ehemplo han usa nga opisyal nga nagserbi ha rayna han Etiopia.

² An opisyal nga taga-Etiopia ginios dayon uyon ha iya nahibaroan ha Kasuratan. (Basaha an Buhat 8:27-31, 35-38.) Ano an nagpagios ha iya? Matin-aw nga may apresasyon hiya ha Pulong han Dios kay nagbabasa hiya hin mga teksto ha libro han Isaias samtang nakasakay ha karuwahe. Ngan han nakiistorya ha iya hi Felipe, an opisyal nagkaada apresasyon ha ginbuhat ni Jesus para ha iya. Pero kay ano nga nagbiyahe an opisyal ngadto ha Jerusalem? Kay nagkaada na hiya gugma kan Jehova. Paonan-o kita nahibaro? Nahuman pa la hiya magsingba kan Jehova ha Jerusalem. Baga hin ginbayaan hini nga lalaki an iya ginmat-an nga relihiyon ngan nakig-upod ha amo la nga nasud nga dedikado ha tinuod nga Dios. Ito gihap nga iya gugma kan Jehova an nagpagios ha iya nga buhaton an usa pa nga importante nga pitad​—an pagpabawtismo ngan pagin disipulo han Kristo.​—Mat. 28:19.

3. Ano an mahimo makapugong ha usa ha pagpabawtismo? (Kitaa an kahon nga “ Ano an Aada ha Imo Kasingkasing?”)

³ An gugma kan Jehova mahimo magpagios ha imo nga magpabawtismo. Pero an gugma mahimo liwat magpugong ha imo nga buhaton ito. Paonan-o? Hunahunaa an pipira nga ehemplo. Bangin hinigugma mo gud an imo diri tumuroo nga mga kapamilya ngan kasangkayan, ngan bangin nababaraka ka nga kon magpabawtismo  ka, masisina gud hira ha imo. (Mat. 10:37) O bangin hinigugma mo an pipira nga buhat nga imo na nahiaraan nga maaram ka nga nadidirian han Dios, ngan bangin nakukurian ka nga iundang ito. (Sal. 97:10) O bangin nagdaku ka nga nagsiselebrar hin mga kustomre nga konektado ha buwa nga relihiyon. Bangin importante ha imo an makalilipay nga mga hinumdoman ha pagsaurog hito nga mga selebrasyon. Sugad nga resulta, bangin nakukurian ka nga iundang an pagselebrar han mga kustomre nga diri nakakapalipay kan Jehova. (1 Cor. 10:20, 21) Salit kinahanglan mo magdesisyon, “Ano o hin-o an akon pinakahinigugma gud?”

4. Ano an nangunguna nga rason nga magpapagios ha imo ha pagpabawtismo?

⁴ May-ada ka damu nga mag-opay nga butang nga angay higugmaon ngan apresyaron. Pananglitan, antes ka pa mag-aram han Biblia ha mga Saksi ni Jehova, bangin may daku ka na nga apresasyon ha Biblia. Ngan bangin may gugma ka na kan Jesus. Yana nga nakilala mo na an mga Saksi ni Jehova, bangin maruyag ka nga makig-upod ha ira. Pero an paghigugma hiton mag-opay nga butang kasagaran na nga diri magpapagios ha imo nga idedikar an imo kalugaringon kan Jehova ngan magpabawtismo. An nangunguna nga rason nga magpapagios ha imo ha pagpabawtismo amo an imo gugma mismo kan Jehova nga Dios. Kon hinigugma mo hi Jehova labaw ha ngatanan, diri mo tutugotan an bisan ano o bisan hin-o nga magpugong ha imo ha pag-alagad ha iya. An gugma kan Jehova magpapagios ha imo nga magpabawtismo ngan mabulig liwat ito ha imo nga magpabilin nga matinumanon ha iya katapos han imo bawtismo.

5. Ano nga mga pakiana an aton hihisgotan?

⁵ Hi Jesus nagsiring nga kinahanglan higugmaon naton hi Jehova ha aton bug-os nga kasingkasing, kalag, hunahuna, ngan kusog. (Mar. 12:30) Paonan-o ka mahibabaro ha paghigugma ngan pagrespeto kan Jehova hin sugad kahilarom? An pagpamalandong han gugma ni Jehova ha aton nagpapagios ha aton nga higugmaon liwat hiya. (1 Juan 4:19) Ano pa nga mga pag-abat ngan buhat an natural na la nga magkakaada ka kon makultibar mo na ito nga gugma kan Jehova? *

6. Sumala ha Roma 1:20, ano an usa nga paagi nga mahibabaro ka mahitungod kan Jehova?

⁶ Mahibaro mahitungod kan Jehova pinaagi han iya mga ginhimo. (Basaha an Roma 1:20; Pah. 4:11) Pamalandonga an kinaadman ni Jehova nga makikita ha pagkadisenyo han mga tanom ngan hayop. Mahibaro mahitungod ha maopay nga pagkahimo han imo lawas. (Sal. 139:14) Ngan hunahunaa an gahum o enerhiya nga iginbutang ni Jehova ha aton adlaw, nga kon iisipon usa la ito han binilyon nga mga bitoon. * (Isa. 40:26) Kon bubuhaton mo ito, maghihilarom an imo respeto kan Jehova. Pero an paghibaro nga maaramon ngan gamhanan hi Jehova bahin la han pundasyon han imo relasyon ha iya. Basi magkaada marig-on nga gugma kan Jehova, kinahanglan mahibaro ka hin dugang pa mahitungod ha iya.

7. Basi maghilarom an imo gugma kan Jehova, kinahanglan magin kombinsido ka ha ano?

⁷ Kinahanglan magin kombinsido ka nga hinigugma ka gud ni Jehova. Nakukurian ka ba tumoo nga napapansin ka han Maglalarang han langit ngan tuna ngan nahigugma hiya ha imo? Kon oo, hinumdumi nga hi Jehova “diri . . . hirayo ha tagsa ha aton.” (Buh. 17:26-28) “Gin-uusisa ni Jehova an ngatanan nga kasingkasing,” ngan nagsasaad hiya ha imo, sugad han ginsiring ni David kan Solomon, nga “kon pamilngon  mo hiya, itutugot niya nga maagian mo hiya.” (1 Cron. 28:9) Ngani, nag-aaram ka yana han Biblia tungod kay sugad la han siring ni Jehova, “iginpahirani ko ikaw ha akon.” (Jer. 31:3) Samtang nahibabaroan mo an tanan nga ginhimo ni Jehova para ha imo, mas naghihilarom an imo gugma ha iya.

8. Paonan-o mo maipapakita nga mapasalamaton ka ha gugma ni Jehova?

⁸ Usa nga paagi nga maipapakita mo nga mapasalamaton ka ha gugma ni Jehova amo an pakiistorya ha iya ha pag-ampo. Magtutubo an imo gugma ha Dios samtang iginsusumat mo ha iya an imo mga kabaraka ngan ginpapasalamatan mo hiya ha tanan nga iya ginbubuhat para ha imo. Ngan magririg-on an imo relasyon kan Jehova samtang nakikita mo kon paonan-o niya ginbabaton an imo mga pag-ampo. (Sal. 116:1) Magigin kombinsido ka nga nasasabtan ka niya. Pero basi magin duok kan Jehova, kinahanglan masabtan mo an iya panhunahuna. Ngan kinahanglan mo hibaroan kon ano an iya iginsusugo ha imo. An paagi la basi magkaada ka hito nga kahibaro amo an pag-aram han iya Pulong, an Biblia.

9. Paonan-o mo maipapakita nga gin-aapresyar mo an Biblia?

⁹ Mahibaro ha pag-apresyar ha Pulong han Dios, an Biblia. Ha Biblia la mababasa an kamatuoran mahitungod kan Jehova ngan ha iya katuyoan para ha imo. Iginpapakita mo nga gin-aapresyar mo an Biblia pinaagi ha pagbasa hito kada adlaw, pagpangandam para ha iyo eskedyol ha pag-Bible study, ngan pag-aplikar han imo nahibabaroan. (Sal. 119:97, 99; Juan 17:17) May eskedyol ka ba para ha personal nga pagbasa han Biblia? Ginsusunod mo ba ito basi masiguro nga mabasa mo an Biblia kada adlaw?

10. Ano an usa nga rason nga espesyal gud an Biblia?

¹⁰ An usa nga rason nga espesyal gud an Biblia kay nagsusulod ito hin mga report tikang ha mga tawo nga nakakita kan Jesus. Ito la an libro nga husto nga nagsasaysay han mga ginbuhat ni Jesus para ha imo. Samtang nahibabaroan mo an mga ginbuhat ngan ginsiring ni Jesus, mapapagios ka nga makigsangkay ha iya.

11. Paonan-o ka mahibabaro ha paghigugma kan Jehova?

¹¹ Mahibaro ha paghigugma kan Jesus, ngan an imo gugma kan Jehova magtutubo. Kay ano?  Kay perpekto nga ginsubad ni Jesus an mga kalidad han iya Amay. (Juan 14:9) Salit samtang mas nahibabaro ka mahitungod kan Jesus, mas masasabtan ngan maaapresyar mo hi Jehova. Hunahunaa an pagpaid nga iginpakita ni Jesus ha mga tawo nga ginmiminos han iba​—an mga pobre, may sakit, ngan magluya. Hunahunaa liwat an praktikal nga sagdon nga iya iginhahatag ha imo ngan kon paonan-o nagigin maopay an imo kinabuhi kon ginsusunod mo ito nga sagdon.​—Mat. 5:1-11; 7:24-27.

12. Samtang nahibabaro ka mahitungod kan Jesus, posible nga mapagios ka nga buhaton an ano?

¹² An imo gugma kan Jesus posible nga mas magrig-on samtang ginpapamalandong mo an sakripisyo nga iya ginhimo basi mapasaylo an aton mga sala. (Mat. 20:28) Kon nasasabtan mo nga kinaburut-on nga namatay hi Jesus para ha imo, posible nga mapagios ka nga magbasol ngan mangaro han pagpasaylo ni Jehova. (Buh. 3:19, 20; 1 Juan 1:9) Ngan samtang mas ginhihigugma mo hi Jesus ngan hi Jehova, mas maruruyag ka nga magin duok hadton mga nahigugma liwat ha ira.

13. Ano an igintatagana ni Jehova para ha imo?

¹³ Mahibaro ha paghigugma han pamilya ni Jehova. Bangin diri masabtan han imo diri tumuroo nga mga kapamilya ngan kasangkayan hadto kon kay ano nga karuyag mo idedikar an imo kalugaringon kan Jehova. Bangin ka pa ngani kontrahon nira. Bubuligan ka ni Jehova pinaagi ha pagtagana hin espirituwal nga pamilya. Kon magpapabilin ka nga duok hito nga espirituwal nga pamilya, makakarawat mo an gugma ngan suporta nga imo kinahanglan. (Mar. 10:29, 30; Heb. 10:24, 25) Ha maabot nga panahon, bangin mag-alagad liwat kan Jehova an imo mga kapamilya ngan sumunod ha iya mga suruklan.​—1 Ped. 2:12.

14. Sugad han ginsisiring han 1 Juan 5:3, ano an imo naoobserbaran mahitungod ha mga suruklan ni Jehova?

¹⁴ Mahibaro ha pag-apresyar ngan pag-aplikar han mga suruklan ni Jehova. Antes makilala hi Jehova, bangin naghimo ka na han imo kalugaringon nga mga suruklan, pero yana nakikita mo nga mas maopay an mga suruklan ni Jehova. (Sal. 1:1-3; basaha an 1 Juan 5:3.) Hunahunaa an sagdon han Biblia para ha mga bana, asawa, kag-anak, ngan mga anak. (Efe. 5:22–6:4) Samtang ginsusunod mo ito nga sagdon, nakita mo ba nga nagin mas malipayon an imo pamilya? Nagin mas maopay ka ba nga tawo tungod ha pagsunod han sagdon ni Jehova nga magin maaramon ha pagpili hin kasangkayan? Mas malipayon ka ba yana? (Prob. 13:20; 1 Cor. 15:33) Posible nga oo an baton hito nga mga pakiana.

15. Ano an mahimo mo buhaton kon kinahanglan mo hin bulig ha pag-aplikar han mga prinsipyo ha Biblia?

¹⁵ Usahay, bangin makurian ka ha paghibaro kon paonan-o iaaplikar an mga prinsipyo ha Biblia nga imo nahibabaroan. Ito an rason nga ginagamit ni Jehova an iya organisasyon basi magtagana ha imo hin mga publikasyon nga iginbase ha Biblia nga makakabulig ha imo nga masabtan kon ano an husto ngan sayop. (Heb. 5:13, 14) Kon babasahon ngan pag-aadman mo ito nga mga publikasyon, makikita mo nga praktikal ngan espisipiko gud ito, ngan posible nga maaghat ka nga magin bahin han organisasyon ni Jehova.

16. Paonan-o gin-organisar ni Jehova an iya katawohan?

¹⁶ Mahibaro ha paghigugma ngan pagsuporta ha organisasyon ni Jehova. Gin-organisar ni Jehova an iya katawohan basi magin mga kongregasyon; an iya Anak nga hi Jesus an ulo hito ngatanan. (Efe. 1:22; 5:23) Nagpili hi Jesus hin gutiay nga grupo hin dinihogan nga kalalakin-an basi manguna ha pag-organisar ha buruhaton nga ginpapabuhat niya yana. Gintawag ni Jesus ini nga grupo han kalalakin-an sugad nga “an matinumanon ngan maaramon nga uripon,” ngan ginsiseryoso gud nira an ira responsabilidad ha pagpakaon ngan pagprotektar ha imo ha espirituwal. (Mat. 24:45-47) Usa han mga paagi  nga nabulig an matinumanon nga uripon ha pagmangno ha imo amo an pagsiguro nga may kwalipikado nga mga tigurang nga ginpili basi mag-ataman ha imo. (Isa. 32:1, 2; Heb. 13:17; 1 Ped. 5:2, 3) Andam an mga tigurang nga buhaton an tanan nira nga mahihimo para liawon ka ngan buligan ka nga magin mas duok gud kan Jehova. Pero usa han pinakaimportante nga mahihimo nira para ha imo amo an pagbulig ha imo nga tutdoan an iba mahitungod kan Jehova.​—Efe. 4:11-13.

17. Sumala ha Roma 10:10, 13, 14, kay ano nga nag-iistorya kita ha iba mahitungod kan Jehova?

¹⁷ Buligi an iba nga mahibaro ha paghigugma kan Jehova. Ginsugo ni Jesus an iya mga sumurunod nga tutdoan an iba mahitungod kan Jehova. (Mat. 28:19, 20) Masusunod naton ito nga sugo kay maaram kita nga obligasyon naton ito. Pero kon magtubo na an imo gugma kan Jehova, aabaton mo an pariho han inabat nira apostol Pedro ngan Juan nga nagsiring: “Diri namon mahihimo nga umundang ha pagyakan mahitungod han mga butang nga amon nakita ngan nabatian.” (Buh. 4:20) Magigin malipayon gud kita kon mabuligan naton an iba nga higugmaon hi Jehova. Hunahunaa la an daku nga kalipay han ebanghelisador nga hi Felipe han nabuligan niya an lalaki nga taga-Etiopia nga mahibaro han kamatuoran nga aada ha Kasuratan ngan magpabawtismo! Kon ginsusubad mo hi Felipe ngan ginsusunod an sugo ni Jesus nga magsangyaw, ginpapamatud-an mo nga karuyag mo magin usa han mga Saksi ni Jehova. (Basaha an Roma 10:10, 13, 14.) Hito nga takna, posible nga ipakiana mo liwat an iginpakiana han taga-Etiopia: “Ano man an nakakaulang ha akon ha pagpabawtismo?”​—Buh. 8:36.

18. Ano an aton hihisgotan ha sunod nga artikulo?

¹⁸ Hihimoon mo an pinakaimportante nga pitad ha imo kinabuhi kon magdesisyon ka nga magpabawtismo. Tungod kay seryoso gud ito nga pitad, kinahanglan hunahunaon mo hin maopay kon ano an nahiuupod hito. Ano an kinahanglan mo hibaroan mahitungod ha bawtismo? Ano an kinahanglan mo buhaton antes ngan katapos han imo bawtismo? Ito nga mga pakiana babatunon ha sunod nga artikulo.