1-2. (a) Ano an nabulig ha aton nga makapailob ha kada adlaw? Isaysay. (b) Ano an aton hihisgotan hini nga artikulo?

“KON ginhihinumdom ko an mga pagsari nga akon gin-atubang, maaram ako nga diri ko ito makakaya kon ako la.” Nakayakan ka na ba hin sugad hito? Damu ha aton an nakayakan na hito. Bangin nayakan mo ito katapos hunahunaon kon paonan-o mo nakaya atubangon an usa nga grabe nga sakit o an kamatyi hin hinigugma. Kon ginhihinumdom mo ito nga mga pagsari, inaabat mo nga nakapailob ka ha kada adlaw tungod la kay gintagan ka han baraan nga espiritu ni Jehova hin “diri ordinaryo nga gahum.”​—2 Cor. 4:7-9.

² Nasarig liwat kita ha baraan nga espiritu basi maatohan an impluwensya hinin maraot nga kalibotan. (1 Juan 5:19) Dugang pa, kinahanglan liwat naton makig-away ha “magraot nga mga espiritu.” (Efe. 6:12) Hihisgotan naton yana an duha nga paagi nga ginbubuligan kita han baraan nga espiritu nga maatohan ini nga mga problema. Katapos, hihisgotan naton kon ano an aton mahimo buhaton basi bug-os nga mapahimulosan an bulig han baraan nga espiritu.

3. Ano an usa nga paagi nga ginbubuligan kita ni Jehova nga mailob an mga pagsari?

³ An baraan nga espiritu ni Jehova nabulig ha aton pinaagi ha paghatag hin gahum, o kusog, basi matuman an aton mga responsabilidad bisan pa han mga pagsari. Inabat ni apostol Pablo nga nakapadayon hiya ha pag-alagad bisan pa han mga pagsari kay sinarig hiya ha “gahum han Kristo.” (2 Cor. 12:9) Ha ikaduha nga pagbiyahe ni Pablo sugad nga misyonero, nagin maduruto hiya ha pagsangyaw ngan labot pa hito, ginsuportaran liwat niya ha pinansyal an iya kalugaringon. Nag-ukoy hiya ha Corinto ha balay nira Aquila ngan Priscila. Parahimo hira hin tolda. Tungod kay ito liwat an trabaho ni Pablo, may mga adlaw nga nagtatrabaho hiya kaupod nira. (Buh. 18:1-4) An baraan nga espiritu naghatag kan Pablo hin kusog basi makagtrabaho ngan matuman niya an iya ministeryo.

4. Sumala ha 2 Corinto 12:7b-9, ano nga pagsari an gin-atubang ni Pablo?

 ⁴ Basaha an 2 Corinto 12:7b-9. Hini nga teksto, ano an iginpapasabot ni Pablo han nagsiring hiya nga may-ada hiya “tunok ha unod”? Kon may tunok nga natusok ha imo lawas, masakit gud ito. Salit iginpapasabot ni Pablo nga nakakaeksperyensya hiya hin masakit nga pagsari. Gintawag niya ini sugad nga “usa nga anghel ni Satanas” nga padayon nga “nagtatampalo” (“nagkakastigo,” ftn.) ha iya. Posible nga diri hi Satanas o an iya mga demonyo an direkta nga nagpahinabo han mga pagsari ni Pablo, nga baga hin gintutusok hiya hin tunok. Pero han nakita hinin magraot nga espiritu ito nga “tunok,” posible nga karuyag gud nira iduon ito, siring pa, basi madugangan an kasakit ni Pablo. Ano an ginbuhat ni Pablo?

5. Paonan-o ginbaton ni Jehova an pag-ampo ni Pablo?

⁵ Ha tinikangan, karuyag ni Pablo nga matanggal an “tunok.” Hiya nagsiring: “Tulo ka beses nga nakimalooy ako ha Ginoo [hi Jehova] . . . nga mawara ito ha akon.” Pero bisan kon gin-inampo ito ni Pablo, waray mawara an tunok ha unod. Nagpapasabot ba ini nga waray batona ni Jehova an mga pag-ampo ni Pablo? Diri. Ginbaton niya ito. Waray kuhaa ni Jehova an problema, pero gintagan niya hi Pablo hin kusog basi makapailob. Hi Jehova nagsiring: “An akon gahum nagigin perpekto ha maluya.” (2 Cor. 12:8, 9) Ha bulig han Dios, natipigan ni Pablo an iya kalipay ngan murayaw nga hunahuna!​—Fil. 4:4-7.

6. (a) Paonan-o mahimo batunon ni Jehova an aton mga pag-ampo? (b) Ha gin-unabi nga mga teksto, ano nga mga pasarig an nakakaparig-on ha imo?

⁶ Pariho kan Pablo, nakimalooy ka na ba kan Jehova nga kuhaon ha imo an usa nga pagsari? Kon nagpapadayon la gihapon an problema​—o nagduro pa ngani—​bisan pa han imo duro nga pakimalooy, inaabat mo ba nga bangin diri nalilipay ha imo hi Jehova? Kon ito an imo kahimtang, hinumdumi an ehemplo ni Pablo. Sugad la nga ginbaton ni Jehova an iya pag-ampo, sigurado nga babatunon liwat Niya an imo pag-ampo! Posible nga diri kuhaon ni Jehova an problema. Pero pinaagi han baraan nga espiritu, tatagan ka niya han kusog nga imo ginkikinahanglan basi makaya an pagsari. (Sal. 61:3, 4) Bangin ‘matumba’ ka, pero diri ka papabay-an ni Jehova.​—2 Cor. 4:8, 9; Fil. 4:13.

7-8. (a) Ha ano nga paagi nga an baraan nga espiritu pariho han hangin? (b) Paonan-o iginhulagway ni Pedro an paggios han baraan nga espiritu?

⁷ Ano an usa pa nga paagi nga ginbubuligan kita han baraan nga espiritu? Pariho han hangin nga nagduduso ha sakayan nga de layag dida ha mabalud nga dagat basi talwas nga makaabot ha destinasyon hito, an baraan nga espiritu nagpapagios ha aton nga magpadayon ha pag-alagad bisan pa han mga pagsari tubtob nga makaabot kita ha bag-o nga kalibotan han Dios.

⁸ Sugad nga parapangisda, pamilyar hi apostol Pedro mahitungod ha pagbiyahe ha dagat. Salit makatirigamnan nga iginhulagway niya an paggios han baraan nga espiritu pinaagi ha paggamit hin pulong nga baga hin may koneksyon ha pagbiyahe ha dagat. Hiya nagsurat: “Waray pa gud tagna nga iginpahayag pinaagi han kaburut-on han tawo, lugod an mga tawo nagyakan hin tikang ha Dios samtang ginpapagios hira han baraan nga espiritu.” An Griego nga pulong nga iginhubad nga “ginpapagios” literal nga nangangahulogan nga “gintutugwayan; gin-gigiyahan.”​—2 Ped. 1:21; ftn.

9. Ano an iginhuhulagway ni Pedro han naggamit hiya han pulong nga “gin-gigiyahan”?

⁹ Ano an iginhuhulagway ni Pedro han naggamit hiya han pulong nga “gin-gigiyahan”? Hi Lucas, an parasurat han Buhat, naggamit hin puropariho nga porma han amo gihapon nga Griego nga pulong ha paghulagway hin barko nga ‘nadadára’ han hangin. (Buh. 27:15) Usa nga eskolar han Biblia an nagsiring nga han nagsurat hi Pedro nga an mga parasurat han Biblia “gin-gigiyahan,” naggamit hiya hin “makapainteres nga metapora may kalabotan ha pagbiyahe ha dagat.” Baga hin nasiring hi Pedro nga sugad la nga an barko ginduduso han hangin basi makaabot ha destinasyon hito, an mga propeta ngan an mga parasurat han Biblia  gin-giyahan han baraan nga espiritu basi matuman an ira toka. An amo gihapon nga eskolar nagsiring: “Ginbuklad han mga propeta an ira layag, siring pa.” Ginbuhat ni Jehova an iya papel. Igintagana niya “an hangin,” o baraan nga espiritu. Ginbuhat han mga parasurat han Biblia an ira papel. Ginios hira uyon ha paggiya hito nga espiritu.

10-11. Ano an duha nga pitad nga kinahanglan naton buhaton basi masiguro nga ginpapagios kita han baraan nga espiritu? Iilustrar.

¹⁰ Syempre, tapos na yana an panahon han pagsurat han mga libro han Biblia. Pero, padayon nga nagios an baraan nga espiritu ha katawohan han Dios. Ginbubuhat pa gihapon ni Jehova an iya papel. Paonan-o naton mapapahimulosan an bulig han baraan nga espiritu? Kinahanglan siguruhon naton nga pirme naton ginbubuhat an aton papel. Paonan-o naton ito ginhihimo?

¹¹ Tagda ini nga pagtanding. Basi makapahimulos ha hangin, kinahanglan buhaton han marinero an duha nga butang. Siyahan, kinahanglan niya dad-on an sakayan kon diin nahuyop an hangin. An sakayan diri maabante kon an marinero magpapabilin ha pantalan nga hirayo ha lugar diin nahuyop an hangin. Ikaduha, kinahanglan niya bug-os nga buklaron an layag. Bisan kon makusog an hangin, maabante la an iya sakayan kon maigo na han hangin an layag. Ha pariho nga paagi, makakapadayon la kita ha pag-alagad kon nakakarawat naton an bulig han baraan nga espiritu. Basi mapahimulosan an bulig han espiritu, kinahanglan naton buhaton an duha nga pitad. Siyahan, kinahanglan naton ibutang an aton kalugaringon kon diin nagios an espiritu han Dios pinaagi ha pakigbahin ha buruhaton nga ginigiyahan hito nga espiritu. Ikaduha, kinahanglan naton buklaron an aton layag, siring pa, pinaagi ha bug-os nga pakigbahin hini nga mga buruhaton ha pinakamaopay naton nga mahihimo. (Sal. 119:32) Kon bubuhaton naton ini, tatagan kita han baraan nga espiritu hin kusog nga makaya an mga pagkontra ngan pagsari ngan mabulig ito ha aton nga makapabilin nga matinumanon ngan makaabot ha bag-o nga kalibotan han Dios.

12. Ano an aton hihisgotan yana?

¹² Aton na nahisgotan an duha nga paagi kon paonan-o  nabulig ha aton an baraan nga espiritu. An baraan nga espiritu naghahatag ha aton hin gahum ngan nabulig ha aton nga makapabilin nga matinumanon bisan kon naatubang hin mga pagsari. An baraan nga espiritu nagpapagios liwat ha aton nga magpadayon ha pag-alagad ngan nabulig nga makapabilin kita ha dalan ngadto ha kinabuhi nga waray kataposan. Yana, hihisgotan naton an upat nga kinahanglan buhaton naton basi bug-os nga mapahimulosan an bulig han baraan nga espiritu.

13. Sumala ha 2 Timoteo 3:16, 17, ano an nahihimo ha aton han Kasuratan, pero ano an kinahanglan naton buhaton?

¹³ Siyahan, pag-admi an Pulong han Dios. (Basaha an 2 Timoteo 3:16, 17.) An Griego nga pulong nga iginhubad nga “giniyahan han Dios” literal nga nangangahulogan nga “gininhawaan han Dios.” Gin-gamit han Dios an iya espiritu basi ibutang an iya panhunahuna ha hunahuna han mga parasurat han Biblia. Kon nagbabasa kita han Biblia ngan ginpapamalandong ito, an instruksyon han Dios naisisilsil ha aton hunahuna ngan kasingkasing. Inin giniyahan nga mga instruksyon nagpapagios ha aton nga ipahiuyon an aton kinabuhi ha kaburut-on han Dios. (Heb. 4:12) Pero basi bug-os nga mapahimulosan an bulig han baraan nga espiritu, kinahanglan kita maggahin hin panahon ha regular nga pag-aram ha Biblia ngan pagpamalandong han aton nababasa. Sugad nga resulta, an Pulong han Dios makakaimpluwensya ha ngatanan nga aton ginyayakan ngan ginbubuhat.

14. (a) Kay ano nga nakasiring kita nga sugad hin nahuyop an hangin ha aton mga katirok? (b) Paonan-o kita natambong ha katirok nga sugad hin nakabuklad an aton mga layag?

¹⁴ Ikaduha, urosa nga magsingba ha Dios. (Sal. 22:22) An aton mga katirok mga buruhaton diin nahuyop an hangin, siring pa. Nagios dida hito an baraan nga espiritu ni Jehova. (Pah. 2:29) Kay ano nga nakasiring kita hito? Kay kon nagkakatirok kita para ha pagsingba kaupod an aton mga igkasi-Kristiano, nag-aampo kita para han giya han baraan nga espiritu, nagkakanta hin mga kanta han Ginhadian nga basado ha Pulong han Dios, ngan namamati ha basado ha Biblia nga mga instruksyon nga iginpipresenta han mga brother nga ginpili pinaagi han baraan nga espiritu. Ngan ito liwat nga espiritu an nabulig ha mga sister basi maiandam ngan maipresenta an ira mga bahin. Hito nga paagi, natambong kita ha mga katirok nga nakabuklad an aton mga layag, siring pa.

15. Paonan-o kita mabubuligan han baraan nga espiritu ha aton pagsangyaw?

¹⁵ Ikatulo, makigbahin ha pagsangyaw. Kon ginagamit naton an Biblia ha pagsangyaw ngan pagtutdo, gintutugotan naton an baraan nga espiritu nga buligan kita ha aton ministeryo. (Roma 15:18, 19) Kondi, basi bug-os nga mapahimulosan an bulig han espiritu han Dios, kinahanglan regular ka nga magsangyaw ngan pirme mo gamiton an Biblia tubtob nga posible. Usa nga paagi basi magin epektibo ka ha ministeryo amo an paggamit han sampol nga mga pakiistorya ha Workbook Para ha Katirok ha Pagkinabuhi Ngan Ministeryo.

16. Ano an pinakadirekta nga paagi basi magkaada han baraan nga espiritu?

¹⁶ Ikaupat, pag-ampo kan Jehova. (Mat. 7:7-11; Luc. 11:13) An pinakadirekta nga paagi basi magkaada baraan nga espiritu amo an pag-aro hito kan Jehova ha pag-ampo. Waray makakaulang ha aton pag-ampo nga makaabot kan Jehova o waray makakapugong han maopay nga regalo han Dios nga baraan nga espiritu nga makaabot ha aton. Diri ito mapupugngan han bisan ano nga prisohan ngan bisan ni Satanas. (San. 1:17) Paonan-o kita mag-aampo basi bug-os nga mapahimulosan an bulig han baraan nga espiritu? Basi mabaton ito, usisahon naton hin detalyado an mahitungod ha pag-ampo pinaagi ha paghisgot han ilustrasyon nga makikita la ha Ebanghelyo ni Lucas. *

17. Ha ilustrasyon ni Jesus nga mababasa ha Lucas 11:5-9, 13, ano nga leksyon mahitungod ha pag-ampo an aton mahibabaroan?

¹⁷ Basaha an Lucas 11:5-9, 13. Iginpapakita han ilustrasyon ni Jesus kon paonan-o kita mag-aampo basi mangaro han baraan nga espiritu. Ha ilustrasyon, nakarawat han lalaki an iya ginkikinahanglan “tungod han iya padayon nga pagpirit.” Waray hiya mag-alang pangaro hin bulig ha iya sangkay bisan kon hilarom na an kagab-ihon. (Kitaa an study note han Lucas 11:8.) Paonan-o igin-aplikar ni Jesus ha pag-ampo ini nga ilustrasyon? Hiya nagsiring: “Padayon nga mangaro, ngan tatagan kamo; padayon nga mamiling, ngan makakaagi kamo; padayon nga magtuktok, ngan aabrihan kamo.” Ano an leksyon? Basi makarawat an bulig han baraan nga espiritu, kinahanglan mapinadayunon nga aroon naton ito ha pag-ampo.

18. Sumala ha ilustrasyon ni Jesus, kay ano nga makakasarig kita nga tatagan kita ni Jehova han iya baraan nga espiritu?

¹⁸ An ilustrasyon ni Jesus nabulig liwat ha aton nga mahibaroan kon kay ano nga tatagan kita ni Jehova han iya baraan nga espiritu. Karuyag han lalaki ha ilustrasyon nga atamanon hin maopay an iya bisita. Inabat niya nga obligado hiya pagpakaon ha iya bisita nga gab-i na inabot, pero waray hiya maihahatag ha iya. Nagsiring hi Jesus nga naghatag hin tinapay an sangkay hito nga lalaki tungod han iya padayon nga pagpirit. Ano an igintututdo ni Jesus? Kon an diri perpekto nga tawo disidido bumulig ha iya igkasi-tawo nga padayon nga nangangaro, labi na gud nga mahatag hin baraan nga espiritu an aton buotan nga Amay ha langit hadton padayon nga nangangaro hito! Salit, makakasarig kita nga babatunon ni Jehova an aton mga pag-ampo para hin baraan nga espiritu.​—Sal. 10:17; 66:19.

19. Kay ano nga makakasiguro kita nga magigin madaugon kita?

¹⁹ Makakasiguro kita nga bisan pa han paningkamot ni Satanas nga pirdihon kita, magigin madaugon kita. Kay ano? Kay an baraan nga espiritu nabulig ha aton ha duha nga paagi. Siyahan, naghahatag ito ha aton hin gahum nga makaya an pagsari. Ikaduha, nagpapagios ito ha aton nga magpadayon ha pag-alagad kan Jehova tubtob nga makaabot kita ha bag-o nga kalibotan. Hinaot magin determinado kita nga bug-os nga mapahimulosan an bulig han baraan nga espiritu!