1-2. (a) Kay ano nga an Armagedon maopay nga sumat para ha katawohan? (b) Ano nga mga pakiana an aton hihisgotan hini nga artikulo?

NAKABATI ka na ba nga gin-gagamit an pulong nga “Armagedon” para ha usa nga nuklear nga girra o ha usa nga kalamidad? Kondi, an ginsisiring han Biblia mahitungod han Armagedon nag-uupod hin maopay nga sumat, usa nga hinungdan para ha kalipay! (Pah. 1:3) An girra han Armagedon diri magbubungkag han katawohan lugod magtatalwas! Paonan-o?

² Iginpapakita han Biblia nga an girra han Armagedon magtatalwas ha katawohan pinaagi ha pagtapos han pagmando han tawo. Ito nga girra magtatalwas ha katawohan pinaagi ha pagbungkag ha magraot ngan pagtipig nga buhi ha magtadong. Dugang pa, magtatalwas ito ha katawohan pinaagi ha pagpanalipod ha aton planeta tikang ha kabungkagan. (Pah. 11:18) Basi mabuligan kita nga mas masabtan ini nga mga katutdoan, hisgotan naton an upat nga pakiana: Ano an Armagedon? Ano an mga mahitatabo antes gud hito? Ano an aton bubuhaton basi matalwas ha Armagedon? Paonan-o kita makakapabilin nga matinumanon samtang nagtitikahirani an Armagedon?

3. (a) Ano an iginpapasabot han pulong nga “Armagedon”? (b) Sumala ha Pahayag 16:14, 16, kay ano nga masisiring naton nga an Armagedon diri literal nga lugar?

³ Basaha an Pahayag 16:14, 16. An pulong nga “Armagedon” usa la ka beses nga mababasa ha Kasuratan, ngan tikang ito ha Hebreo nga termino nga nangangahulogan “Bukid han Megido.” (Pah. 16:16; ftn.) An Megido usa nga syudad ha kadaan nga Israel. (Jos. 17:11) Pero an Armagedon diri nagtutudlok ha bisan ano nga literal nga lugar ha tuna. Lugod, nagtutudlok ito ha sitwasyon diin an “mga hadi ha bug-os nga inuukyan nga tuna” gintitirok kontra kan Jehova. (Pah. 16:14) Kondi, hini nga artikulo, gagamiton liwat naton an pulong nga “Armagedon” ha pagtudlok ha girra nga mahitatabo  katapos gud la matirok an mga hadi ha tuna. Kay ano nga makakasiring kita nga an Armagedon nagtutudlok ha usa nga simboliko nga lugar? Siyahan, waray literal nga bukid han Megido. Ikaduha, gutiay hinduro an lugar nga nakapalibot ha Megido salit diri maeksakto an “mga hadi ha bug-os nga inuukyan nga tuna” ngan an ira mga kasundalohan pati mga gamit nga pan-girra. Ikatulo, sugad han aton mahibabaroan hini nga artikulo, magtitikang an girra han Armagedon kon atakehon na han “mga hadi” han kalibotan an katawohan han Dios, nga nag-uukoy ha iba-iba nga dapit han bug-os nga tuna.

4. Kay ano nga an ultimo nga daku nga girra iginkonektar han Dios ha Megido?

⁴ Kay ano nga an ultimo nga daku nga girra iginkonektar ni Jehova ha Megido? Damu nga girra an nahitabo ha Megido ngan ha kahirani nga Walog han Jezreel. May mga panahon nga direkta nga nanginlabot hi Jehova hito nga mga girra. Pananglitan, “hirani ha katubigan han Megido,” ginbuligan han Dios an Israelita nga hi Hukom Barak ha pagpirde ha Canaanita nga kasundalohan nga ginpangunahan han lider nga hi Sisera. Hira Barak ngan propetisa Debora nagpasalamat kan Jehova tungod hinin milagroso nga kadaogan. Nagkanta hira: “Tikang ha langit an mga bitoon nakiggirra . . . kan Sisera. Gin-anod hira han masulog nga sapa han Kison.”​—Huk. 5:19-21.

5. Ano an importante nga kaibahan han girra han Armagedon ngan han girra nga ginpangunahan ni Barak?

⁵ Gintapos nira Barak nga Debora an ira kanta hini nga mga pulong: “Salit mapoo unta an imo mga kaaway, O Jehova, kondi an mga nahigugma ha imo magin pariho unta han adlaw nga nasirang ngan nagigin malamrag gud.” (Huk. 5:31) Ha Armagedon, mabubungkag liwat an mga kaaway han Dios, pero an mga nahigugma ha Dios matatalwas. Kondi may usa nga importante nga kaibahan inin duha nga girra. Ha Armagedon, an katawohan han Dios diri makikig-away. Diri ngani hira magkakaada armas! Magigin ‘makusog hira [tungod han ira] pagpabilin nga kalmado ngan pagsarig’ kan Jehova ngan ha iya langitnon nga kasundalohan.​—Isa. 30:15; Pah. 19:11-15.

6. Ano an mahimo gamiton ni Jehova ha pagpirde ha iya mga kaaway ha Armagedon?

⁶ Paonan-o pipirdihon han Dios an iya mga kaaway ha Armagedon? Mahimo hiya gumamit hin iba-iba nga paagi. Pananglitan, mahimo hiya gumamit hin linog, uran nga yelo, ngan kidlat. (Job 38:22, 23; Ezek. 38:19-22) Mahimo niya pahinaboon nga magparaptayay an iya mga kaaway. (2 Cron. 20:17, 22, 23) Mahimo liwat niya gamiton an iya mga anghel basi patayon an magraot. (Isa. 37:36) Anoman an gamiton han Dios, magdadaog gud hiya. Ngatanan niya nga kaaway mabubungkag. Ngan matatalwas an ngatanan nga magtadong.​—Prob. 3:25, 26.

7-8. (a) Sumala ha 1 Tesalonica 5:1-6, ano an naiiba gud nga proklamasyon nga paghihimoon han mga lider ha kalibotan? (b) Kay ano nga magigin peligroso ini nga buwa?

⁷ An pagproklamar hin “kamurayawan ngan kasigurohan” mahitatabo antes han “adlaw ni Jehova.” (Basaha an 1 Tesalonica 5:1-6.) Ha 1 Tesalonica 5:2, an “adlaw ni Jehova” nagtutudlok ha “daku nga kasakitan.” (Pah. 7:14) Paonan-o naton mahibabaroan nga magtitikang na ito nga kasakitan? Ginsusumatan kita han Biblia nga magkakaada kakaiba gud nga proklamasyon. Ito an magigin tigaman nga magtitikang na an daku nga kasakitan.

⁸ Ito an igintagna nga proklamasyon nga “kamurayawan ngan kasigurohan.” Kay ano nga makakagproklamar hito an mga lider ha kalibotan? Makikigbahin ba hito an mga lider han relihiyon? Posible. Kondi ito nga proklamasyon usa la han mga buwa nga tikang ha mga demonyo. Pero ini nga buwa labi nga magigin peligroso kay maghahatag ito ha mga tawo hin buwa nga paglaom nga may-ada na kasigurohan, kondi ha pagkamatuod magtitikang na an pinakadaku nga kasakitan ha kasaysayan han tawo. Oo, “hito nga panahon  tigda nga maabot dayon ha ira an kabungkagan, sugad han kasakit ha pagbatî han burod nga babaye.” Ano an mahitatabo ha maunungon nga mga surugoon ni Jehova? Bangin makalasan hira han tigda nga pag-abot han adlaw ni Jehova, pero magigin andam hira para hito.

9. Ano an pagkasurunod han pagbungkag han Dios ha kalibotan ni Satanas?

⁹ Diri pupoohon ni Jehova an bug-os nga kalibotan ni Satanas ha usa la ka higayon, sugad han iya ginbuhat ha panahon ni Noe. Lugod iya ito bubungkagon ha duha nga importante nga panhitabo. Siyahan, iya bubungkagon an Babilonya nga Gamhanan, an imperyo han buwa nga relihiyon ha kalibotan. Katapos, ha Armagedon, bubungkagon niya an iba pa nga bahin han kalibotan ni Satanas, upod na an mga sistema hito ha politika, militar, ngan komersyo. Hisgotan naton hin mas detalyado inin duha nga importante nga panhitabo.

10. Sumala ha Pahayag 17:1, 6 ngan 18:24, kay ano nga bubungkagon ni Jehova an Babilonya nga Gamhanan?

¹⁰ “An paghukom ha gamhanan nga hostes.” (Basaha an Pahayag 17:1, 6; 18:24.) Damu gud nga pasipara an iginhahatag han Babilonya nga Gamhanan ha ngaran han Dios. Nagtututdo hiya hin kabuwaan mahitungod ha Dios. Nagkikinabuhi hiya sugad nga hostes ha espirituwal pinaagi ha pakig-alyansa ha mga magmarando ha tuna. Ginagamit niya an iya gahum ngan impluwensya ha pamentaha ha iya mga membro. Ngan nagpapaagay hiya hin damu nga dugo, upod na an dugo han mga surugoon han Dios. (Pah. 19:2) Paonan-o bubungkagon ni Jehova an Babilonya nga Gamhanan?

11. Ano an “mapintas nga hayop nga an kolor malamrag an kapula,” ngan paonan-o ito gagamiton han Dios kontra ha Babilonya nga Gamhanan?

¹¹ Bubungkagon ni Jehova an “gamhanan nga hostes” pinaagi han “napulo nga sungay” han usa nga “mapintas nga hayop nga an kolor malamrag an kapula.” Iton simboliko nga mapintas nga hayop nagrirepresentar han United Nations. An napulo nga sungay nagrirepresentar han presente nga politikal nga mga gahum nga nasuporta hito nga organisasyon. Ha itinanda nga panahon han Dios, aatakehon hito nga politikal nga mga gahum an simboliko nga Babilonya. Ira “kukuhaon an  ngatanan niya nga panag-iya ngan paghuhuboan” pinaagi ha pagtikasa han iya bahandi ngan pagbuhayhag han iya karaotan. (Pah. 17:3, 16) Tungod hiton madagmit gud nga kabungkagan​—nga sugad hin usa la ka adlaw—​makakalasan adton mga nasuporta ha iya labi na kay naghihinambog hiya nga nasiring: “Nalingkod ako sugad nga rayna, ngan diri ako balo, ngan diri gud ako makakaeksperyensya hin kabido.”​—Pah. 18:7, 8.

12. Ano an diri itutugot ni Jehova nga buhaton han mga nasud, ngan kay ano?

¹² Diri tutugotan han Dios an mga nasud nga bungkagon an iya katawohan. Iginpapasigarbo han iya katawohan nga tawagon ha iya ngaran, ngan ira ginsusunod an iya sugo nga gumawas ha Babilonya nga Gamhanan. (Buh. 15:16, 17; Pah. 18:4) Naniniguro liwat hira nga buligan an iba nga gumawas ha Babilonya. Salit an mga surugoon ni Jehova diri ‘makakakarawat hin bahin han iya mga peste.’ Pero, masasarihan la gihap an ira pagtoo.

13. (a) Hin-o hi Gog? (b) Sumala ha Ezekiel 38:2, 8, 9, ano an makakaaghat kan Gog nga atakehon an katawohan han Dios?

¹³ An pag-atake ni Gog. (Basaha an Ezekiel 38:2, 8, 9.) Katapos mabungkag an ngatanan nga organisasyon han buwa nga mga relihiyon, an katawohan han Dios matindog pariho hin nag-uusahan nga kahoy nga nakatalwas ha makusog nga bagyo. Syempre, mangangalas gud hi Satanas. Iya papabuthon ito nga kangalas pinaagi ha paggamit hin mga propaganda han mga demonyo​—“mahugaw nga giniyahan nga kapahayagan”—​nga makakaaghat ha usa nga alyansa han mga nasud nga atakehon an mga surugoon ni Jehova. (Pah. 16:13, 14) Ito nga alyansa gintatawag nga “Gog ha tuna han Magog.” Kon tikangan na han mga nasud an ira pag-atake, magtitikang na an girra han Armagedon.​—Pah. 16:16.

14. Ano an masasantop ni Gog?

¹⁴ Hi Gog masarig ha iya “butkon nga unod”​—ha iya pwersa militar. (2 Cron. 32:8) Masarig kita kan Jehova nga aton Dios—​usa nga desisyon nga baga hin kalurongan ha mga nasud. Kay ano? An mga dios han makusog hadto nga Babilonya nga Gamhanan waray makatalwas ha iya tikang ha “mapintas nga hayop” ngan ha “napulo nga sungay” hito! (Pah. 17:16) Salit huhunahunaon ni Gog nga masayon la kita mabungkag. “Pariho hin mga dampog nga nagtatahob ha tuna,” iya aatakehon  an katawohan ni Jehova. (Ezek. 38:16) Pero diri mag-iiha, masasantop ni Gog nga nagtitipakadto hiya ha usa nga lit-ag. Pariho kan Paraon ha Dagat nga Pula, masasantop ni Gog nga nakikig-away hiya kan Jehova.​—Ex. 14:1-4; Ezek. 38:3, 4, 18, 21-23.

15. Paonan-o an Kristo bug-os nga magdadaog?

¹⁵ Papanalipdan han Kristo ngan han iya langitnon nga kasundalohan an katawohan han Dios ngan dudugmukon an mga nasud ngan an mga militar hito. (Pah. 19:11, 14, 15) Pero ano an mahitatabo ha nangunguna nga kaaway ni Jehova nga hi Satanas, diin an iya buwa nga propaganda amo an nakaaghat ha mga nasud nga atakehon an katawohan han Dios ha girra han Armagedon? Ilalabog hiya ni Jesus pati an iya mga demonyo ngadto ha kahiladman, diin piprisuhon hira ha sulod hin usa ka yukot ka tuig.​—Pah. 20:1-3.

16. (a) Paonan-o naton iginpapakita nga “kilala [naton] an Dios”? (b) Kay ano nga an aton pagkilala kan Jehova magigin bendisyon gud ha Armagedon?

¹⁶ Bag-ohan man kita o maiha na ha kamatuoran, basi matalwas ha Armagedon, kinahanglan ipakita naton nga “nakilala [kita] ha Dios” ngan “nasugot ha maopay nga sumat mahitungod han aton Ginoo nga hi Jesus.” (2 Tes. 1:7-9) ‘Kilala [naton] an Dios’ kon maaram kita han iya mga karuyag, diri karuyag, ngan mga suruklan. Iginpapakita liwat naton nga kilala naton hiya kon hinigugma naton hiya, nasugot kita ha iya, ngan iginhahatag ha iya an aton eksklusibo nga debosyon. (1 Juan 2:3-5; 5:3) Kon iginpapakita naton nga kilala naton an Dios, makakarawat naton an kadungganan han pagin “kilala niya,” nga amo an makakatalwas ha aton ha Armagedon! (1 Cor. 8:3) Kay ano? Tungod kay an pagin “kilala niya” nagpapasabot hin pagkaada han pag-uyon han Dios.

17. Ano an iginpapasabot han ‘pagsugot ha maopay nga sumat mahitungod han aton Ginoo nga hi Jesus’?

¹⁷ An “maopay nga sumat mahitungod han aton Ginoo nga hi Jesus” nag-uupod han ngatanan nga kamatuoran nga igintutdo ni Jesus, nga aada ha Pulong han Dios. Ginsusugot naton an maopay nga sumat kon igin-aaplikar naton ito ha aton kinabuhi. Ito nga pagsugot nag-uupod han padayon nga pag-una ha mga buruhaton han Ginhadian, pagkinabuhi ha matadong nga mga suruklan han Dios, ngan pagsangyaw mahitungod han Ginhadian  han Dios. (Mat. 6:33; 24:14) Nag-uupod liwat ito ha pagsuporta ha dinihogan nga kabugtoan han Kristo samtang ira gintutuman an ira magbug-at nga responsabilidad.​—Mat. 25:31-40.

18. Paonan-o babalosan han dinihogan nga kabugtoan han Kristo an pagkabuotan nga iginpakita ha ira?

¹⁸ Diri na maiha, babalosan han dinihogan nga mga surugoon han Dios an pagkabuotan nga iginpakita ha ira han “iba nga mga karnero.” (Juan 10:16) Paonan-o? Antes magtikang an girra han Armagedon, an ngatanan nga 144,000 gindara na ha langit sugad nga imortal nga mga espiritu. Magigin bahin hira han langitnon nga kasundalohan han Dios nga magdudugmok kan Gog ngan magpapanalipod ha “usa nga daku nga grupo” han katawohan ni Jehova. (Pah. 2:26, 27; 7:9, 10) Oo, pribilehiyo gud han daku nga grupo nga ginsuportaran nira an dinihogan nga mga surugoon ni Jehova samtang nakanhi pa hira ha tuna!

19-20. Bisan pa han mga pagsari, paonan-o kita makakapabilin nga matinumanon samtang nagtitikahirani an Armagedon?

¹⁹ Hinin makuri nga kataposan nga mga adlaw, damu nga katawohan ni Jehova an nakakaeksperyensya hin mga pagsari. Bisan pa hito, makakapailob kita nga may kalipay. (San. 1:2-4) An usa nga mabulig gud ha aton amo an padayon nga kinasingkasing nga pag-ampo. (Luc. 21:36) Labot la han pag-ampo, kinahanglan liwat naton pag-adman ngan pamalandungon an Pulong han Dios kada adlaw, upod na an makapainteres nga mga tagna mahitungod ha aton panahon. (Sal. 77:12) Ini nga mga buruhaton, pati na an bug-os nga pakigbahin ha ministeryo, padayon nga magpaparig-on han aton pagtoo ngan paglaom!

²⁰ Hunahunaa an imo daku nga kalipay kon mabungkag na an Babilonya nga Gamhanan ngan kon tapos na an Armagedon! Labaw ha ngatanan, imadyina an imo daku nga kalipay kon bug-os nga mabindikar na an ngaran han Dios ngan an iya pagkasoberano! (Ezek. 38:23) Oo, an Armagedon maopay nga sumat para hadton nakilala ha Dios, nasugot ha iya Anak, ngan nagpapailob tubtob ha kataposan.​—Mat. 24:13.