1. Ano an kahimtang ni apostol Juan ha ikatarapos han siyahan nga siglo C.E.?

HA IKATARAPOS han siyahan nga siglo C.E., makuri hinduro an sitwasyon ni apostol Juan. Lagas na hiya, priso ha isla han Patmos, ngan posible nga hiya na la an buhi nga apostol. (Pah. 1:9) Nahibaro hiya nga an mga parakontra nagtututdo hin mga buwa ngan nagpapahinabo hin pagkabahin-bahin ha mga kongregasyon. Baga hin an sugad hin nag-iidlap-idlap na la nga Kristianidad hirani na maparong.​—Jud. 4; Pah. 2:15, 20; 3:1, 17.

2. Sumala ha Pahayag 7:9-14, ano nga eksayting nga matagnaon nga bisyon an nakarawat ni Juan? (Kitaa an retrato ha kobre.)

² Hinin makuri nga mga kahimtang, nakakarawat hi Juan hin eksayting nga matagnaon nga bisyon. Hito nga bisyon, may mga anghel nga ginsidngan nga pugngan an nakakabungkag nga mga hangin han daku nga kasakitan tubtob nga makarawat han usa nga grupo han mga uripon an ultimo nga pagselyo. (Pah. 7:1-3) Ito nga grupo ginkukompwesto han 144,000 nga magmamando kaupod ni Jesus ha langit. (Luc. 12:32; Pah. 7:4) Katapos, nag-unabi hi Juan hin usa pa nga grupo, daku hinduro nga grupo nga tungod hito nakasinggit hiya: “Kitaa!”​—usa nga termino nga mahimo magpasabot hin kahipausa ha nakita nga butang nga diri ginlalaoman. Ano an nakita ni Juan? “Usa nga daku nga grupo, nga waray tawo nga makaihap, tikang ha ngatanan nga nasud ngan mga tribo ngan mga katawohan ngan mga pinulongan, nga natindog ha atubangan han trono ngan ha atubangan han Kordero.” (Basaha an Pahayag 7:9-14.) Hunahunaa an daku nga kalipay ni Juan han nahibaroan niya nga may minilyon nga katawohan nga magbubuhat hin tinuod nga pagsingba ha tiarabot nga panahon!

3. (a) Kay ano nga an bisyon ni Juan magpaparig-on han aton pagtoo? (b) Ano an aton hibabaroan hini nga artikulo?

³ Ito nga bisyon sigurado nga nagparig-on han pagtoo ni Juan.  Labi na gud nga mapaparig-on hito an aton pagtoo kay nagkikinabuhi na kita ha panahon han katumanan han bisyon! Nakikita naton an pagtirok ha minilyon nga tawo nga may paglaom nga makatalwas ha daku nga kasakitan ngan mabuhi ha tuna ha waray kataposan. Hini nga artikulo, mahibabaroan naton kon paonan-o iginpahayag ni Jehova ha iya katawohan an pangirilal-an hito nga daku nga grupo, sobra walo ka dekada na an naglabay. Katapos, aton hihisgotan an duha nga butang may kalabotan hito nga grupo: (1) an kadaku hito ngan (2) an iba-iba nga gintikangan han mga membro hito. Ini nga mga punto magpaparig-on han pagtoo han ngatanan nga naglalaom nga magin membro hito nga binendisyonan nga grupo.

4. Ano nga Kasuratanhon nga kamatuoran an waray masabti han Kakristianohan, ngan may kalabotan hini, paonan-o naiiba an mga Estudyante han Biblia?

⁴ An Kakristianohan diri nagtututdo han Kasuratanhon nga kamatuoran nga usa ka adlaw an masinugtanon nga katawohan mabubuhi ha tuna ha waray kataposan. (2 Cor. 4:3, 4) Yana, kadam-an han mga relihiyon han Kakristianohan nagtututdo nga an ngatanan nga maopay nga tawo makadto ha langit kon mamatay hira. Pero, iba an igintutdo han gutiay nga grupo han mga Estudyante han Biblia nga nagpupublikar han Watch Tower tikang pa han ikatarapos han dekada han 1800. Nasabtan nira nga ipapahiuli han Dios an nawara nga Paraiso ha tuna ngan an minilyon nga masinugtanon nga katawohan mabubuhi dinhi ha tuna​—diri ha langit. Kondi, naglabay anay an panahon antes nira nasabtan hin matin-aw kon hin-o ini nga magigin masinugtanon nga katawohan.​—Mat. 6:10.

5. Ano an gintotoohan han mga Estudyante han Biblia mahitungod han 144,000?

⁵ Syempre, nasabtan liwat han mga Estudyante han Biblia tikang ha Kasuratan nga may usa nga grupo hin katawohan nga ‘papaliton tikang ha tuna’ basi magmando kaupod ni Jesus ha langit. (Pah. 14:3) Ito nga grupo kukompwestuhon han 144,000, nga madasigon ngan dedikado nga mga Kristiano, nga matinumanon nga nag-alagad ha Dios han nakanhi pa hira ha tuna. Kumusta man an daku nga grupo?

6. Ano an gintotoohan han mga Estudyante han Biblia mahitungod han daku nga grupo?

⁶ Ha bisyon ni Juan, nakita niya ito nga grupo nga “natindog ha atubangan han trono ngan ha atubangan han Kordero.” (Pah. 7:9) Tungod hito, an mga Estudyante han Biblia naghunahuna nga ito nga daku nga grupo maukoy liwat ha langit pariho han 144,000. Kon an 144,000 ngan an daku nga grupo pariho maukoy ha langit, ano an magigin kaibahan nira? Naghunahuna an mga Estudyante han Biblia nga an magkukompwesto han daku nga grupo amo an mga Kristiano nga waray bug-os nga magin masinugtanon ha Dios han nakanhi pa hira ha tuna. Bisan kon limpyo an ira pagkinabuhi, an pipira ha ira bangin nagpapabilin nga membro han Kakristianohan. Naghunahuna an mga Estudyante han Biblia nga ito nga grupo nagpapakita hin kadasig pero kulang ito para magin kwalipikado magmando kaupod ni Jesus. Tungod kay kulang an ira gugma ha Dios, an daku nga grupo magigin kwalipikado nga umukoy ha langit ha atubangan han trono pero diri hira malingkod ha mga trono.

7. Sumala ha mga Estudyante han Biblia, hin-o an maukoy ha tuna durante han Milenyo, ngan ano an gintotoohan han mga Estudyante han Biblia mahitungod han matinumanon nga kalalakin-an ha kadaan nga panahon?

⁷ Kon sugad, hin-o an maukoy ha tuna? Natoo an mga Estudyante han Biblia nga katapos tirukon ha langit an 144,000 ngan an daku nga grupo, may minilyon nga iba pa nga tutugotan nga umukoy ha tuna basi magpahimulos han mga bendisyon han Usa ka Yukot ka Tuig nga Pagmando han Kristo. Waray hunahunaa han mga Estudyante han Biblia nga ito nga minilyon mag-aalagad kan Jehova antes magtikang an Pagmando han Kristo. Lugod, ginhunahuna nira nga ini  nga grupo tututdoan han mga paagi ni Jehova durante han Milenyo. Katapos, an mga nagsunod han mga suruklan ni Jehova bibendisyonan hin kinabuhi nga waray kataposan ha tuna, ngan bubungkagon naman an mga nagrebelde. Ginhunahuna liwat han mga Estudyante han Biblia nga posible nga an pipira hadton nag-aalagad sugad nga “mga prinsipe” hito nga panahon​—upod na an ginbanhaw nga “kilala nga mga tawo ha kadaan nga panahon” (matinumanon nga kalalakin-an nga namatay antes an Kristo)—​babalosan hin langitnon nga kinabuhi ha kataposan han Milenyo.​—Sal. 45:16.

8. Ano an tulo nga grupo nga baga hin may papel ha katuyoan han Dios?

⁸ Salit, ginhunahuna han mga Estudyante han Biblia nga may-ada tulo nga grupo: (1) an 144,000 nga magmamando kaupod ni Jesus ha langit; (2) an daku nga grupo han mga Kristiano nga diri bug-os nga madasigon, nga matindog ha atubangan han trono ni Jesus ha langit; ngan (3) an minilyon nga katawohan nga tututdoan han mga paagi ni Jehova dinhi ha tuna durante han Usa ka Yukot ka Tuig nga Pagmando han Kristo. * Pero ha itinanda nga panahon ni Jehova, nagtikalamrag an kahayag han kamatuoran mahitungod hini nga topiko.​—Prob. 4:18.

9. (a) Ha ano nga paagi an daku nga grupo ha tuna makakatindog “ha atubangan han trono ngan ha atubangan han kordero”? (b) Kay ano nga ini nga pagsabot ha Pahayag 7:9 makatadunganon?

⁹ Han 1935, nagin matin-aw an pangirilal-an han daku nga grupo ha bisyon ni Juan. Nasantop han mga Saksi ni Jehova nga an daku nga grupo diri kinahanglan literal nga kumadto ha langit basi tumindog “ha atubangan han trono ngan ha atubangan han Kordero.” Lugod, bubuhaton nira ito ha simboliko nga paagi. Bisan kon an daku nga grupo maukoy ha tuna, makakatindog hira “ha atubangan han trono” pinaagi ha pagkilala han awtoridad ni Jehova ngan pagpasakop han iya soberanya. (Isa. 66:1) Makakatindog hira “ha atubangan han kordero” pinaagi ha pagpakita hin pagtoo ha halad-lukat ni Jesus. Sugad man, an Mateo 25:31, 32 nasiring nga “an ngatanan nga nasud”​—upod na an magraot—​‘titirukon ha atubangan’ ni Jesus ha iya mahimayaon nga trono. Matin-aw nga ini ngatanan nga nasud diri aadto ha langit, kondi aanhi ha tuna. Ini nga bag-o nga pagsabot makatadunganon. Pinaagi hini, nagin matin-aw kon kay ano nga waray magsiring an Biblia nga an daku nga grupo makadto ha langit. Usa la nga grupo an ginsaaran hin waray kataposan nga kinabuhi ha langit​—an 144,000, nga “magmamando . . . sugad nga mga hadi ha bawbaw han tuna” kaupod ni Jesus.​—Pah. 5:10.

10. Kay ano nga kinahanglan tutdoan an daku nga grupo mahitungod han mga paagi ni Jehova antes an Milenyo?

¹⁰ Tikang han 1935, nasabtan na han mga Saksi ni Jehova nga an daku nga grupo ha bisyon ni Juan ginkukompwesto hin usa nga grupo han matinumanon nga mga Kristiano nga may paglaom nga mabuhi ha tuna ha kadayonan. Basi matalwas ha daku nga kasakitan, an daku nga grupo kinahanglan tutdoan han mga paagi ni Jehova antes magtikang an Milenyo. Kinahanglan hira magpakita hin marig-on nga pagtoo basi “maglampos . . . ha pagpalagiw hini ngatanan nga butang nga kinahanglan mahitabo” antes an Usa ka Yukot ka Tuig nga Pagmando han Kristo.​—Luc. 21:34-36.

11. Kay ano nga ginhunahuna han pipira nga mga Estudyante han Biblia nga may mga tawo nga makadto ha langit ha kataposan han Milenyo?

¹¹ Kumusta man adton ideya nga an pipira hadton mag-opay nga tawo ha tuna makadto ha langit ha kataposan han Milenyo? Ito nga posibilidad gin-unabi han Pebrero 15, 1913, nga isyu han The Watch Tower. An usa mahimo mangatadongan,  ‘Kay ano nga an matinumanon nga kalalakin-an ha kadaan nga panahon makakakarawat hin tunan-on la nga panurundon samtang an mga Kristiano nga waray bug-os nga magin matinumanon babalosan hin kinabuhi ha langit?’ Syempre, ito nga panhunahuna impluwensyado han duha nga sayop nga ideya: (1) nga an daku nga grupo maukoy ha langit ngan (2) an magkukompwesto han daku nga grupo amo an mga Kristiano nga diri bug-os nga madasigon.

12-13. Ano an nahibabaroan han mga dinihogan ngan han daku nga grupo may kalabotan han ira balos?

¹² Kondi sugad han aton nahibaroan, tikang han 1935, nasabtan na hin matin-aw han mga Saksi ni Jehova nga an mga makakatalwas ha Armagedon amo an daku nga grupo ha bisyon ni Juan. ‘Matatalwas hira ha daku nga kasakitan’ dinhi mismo ha tuna, ngan ‘padayon hira nga maguliat ha daku nga tingog, nga nasiring: “An katalwasan utang naton ha aton Dios, nga nalingkod ha trono, ngan ha Kordero.”’ (Pah. 7:10, 14) Dugang pa, igintututdo han Kasuratan nga adton babanhawon ha langitnon nga kinabuhi may “mas maopay” nga paglaom kay hadton matinumanon nga kalalakin-an han kadaan nga panahon. (Heb. 11:40) Tungod hito nga kahayag, an aton kabugtoan nagtikang mangimbitar hin madasigon ha mga tawo nga mag-alagad kan Jehova basi magkaada paglaom nga mabuhi ha tuna ha kadayonan.

¹³ An daku nga grupo malipayon gud ha ira paglaom. Nasasabtan nira nga hi Jehova an nagbubuot kon diin mag-aalagad an iya matinumanon nga mga magsiringba, kon ha langit ba o ha tuna. Maaram an mga dinihogan ngan an daku nga grupo nga an ira balos nagin posible la tungod han diri matupngan nga pagkabuotan ni Jehova nga iya iginpakita pinaagi han halad-lukat ni Jesu-Kristo.​—Roma 3:24.

14. Katapos han 1935, kay ano nga damu an naghunahuna kon paonan-o matutuman an tagna mahitungod han daku nga grupo?

¹⁴ Han nagin matin-aw na an pagsabot han katawohan ni Jehova han 1935, damu la gihapon an naghunahuna kon paonan-o adton may tunan-on nga paglaom magigin daku nga grupo. Pananglitan, 12 anyos hi Ronald Parkin han nagin matin-aw na an pangirilal-an han daku nga grupo. “Hito nga panahon,” siring niya, “mga 56,000 an magwarali ha bug-os nga kalibotan ngan damu ha ira, bangin kadam-an, mga dinihogan. Salit an daku nga grupo baga hin diri sugad kadaku.”

15. Paonan-o an pagtirok ha daku nga grupo padayon nga nag-uuswag?

¹⁵ Kondi han sumunod nga mga dekada, nagpadara hin mga misyonero ha damu nga nasud, ngan padayon nga nagtikadamu an mga Saksi ni Jehova. Katapos, han 1968, gintikangan  an usa nga programa ha pag-aram ha Biblia gamit an libro nga An Kamatuoran nga Nagtutugway Ngadto ha Kinabuhi nga Waray Katapusan. An simple nga pagsaysay hito han kamatuoran ha Biblia nakadani hin mas damu gud nga maaghop nga mga tawo. Ha sulod hin upat ka tuig, sobra tunga ka milyon an nabawtismohan sugad nga bag-o nga mga disipulo. Samtang nagtitikaluya an gahum han Romano Katoliko ha Latin Amerika ngan ha iba pa nga nasud ngan han ginwara na an mga pagdiri ha aton buruhaton ha Este nga Europa ngan ha pipira nga lugar han Aprika, minilyon pa an nabawtismohan. (Isa. 60:22) Han sumunod nga katuigan, an organisasyon ni Jehova naghimo hin damu nga iba pa nga epektibo nga mga garamiton basi buligan an mga tawo nga mahibaro han igintututdo han Biblia. Matin-aw nga an usa nga daku nga grupo​—yana may kadamu na nga sobra walo ka milyon—​natitirok na.

16. Tikang diin gintitirok an daku nga grupo?

¹⁶ Han iginsurat ni Juan an iya bisyon, hiya nagsiring nga an daku nga grupo magtitikang ha “ngatanan nga nasud ngan mga tribo ngan mga katawohan ngan mga pinulongan.” Antes pa hito, hi propeta Zacarias nagtagna hin puropariho hito. Hiya nagsurat: “Hito nga mga adlaw napulo nga lalaki tikang ha ngatanan nga yinaknan han mga nasud an makapot, oo, makapot hira hin maopay ha hilaba nga bado han usa nga Judio,  nga nasiring: ‘Karuyag namon umupod ha iyo, kay nabatian namon nga an Dios kaupod niyo.’”​—Zac. 8:23.

17. Ano an ginbubuhat basi buligan an mga tawo tikang ha ngatanan nga nasud ngan pinulongan?

¹⁷ Nasantop han mga Saksi ni Jehova nga basi matirok an katawohan tikang ha ngatanan nga yinaknan, an maopay nga sumat kinahanglan isangyaw ha damu nga yinaknan. Sobra 130 ka tuig na nga naghuhubad kita hin mga garamiton para ha pag-aram ha Biblia, pero yana nagbubuhat kita han pinakadamu nga paghubad ha bug-os nga kasaysayan ha ginatos nga linggwahe. Matin-aw, nagbubuhat hi Jehova hin milagro ha aton panahon​—gintitirok an usa nga daku nga grupo tikang ha iba-iba nga nasud. Tungod han pagkaada espirituwal nga pagkaon ha damu gud nga linggwahe, ini nga grupo nagkakaurosa ha pagsingba. Ngan an mga Saksi kilala ha ira madasigon nga pagsangyaw ngan ha ira minagburugto nga gugma. Makaparig-on gud ito ha pagtoo!​—Mat. 24:14; Juan 13:35.

18. (a) Sumala ha Isaias 46:10, 11, kay ano nga diri kita nahipapausa nga gintutuman ni Jehova an tagna mahitungod han daku nga grupo? (b) Kay ano nga adton may paglaom nga mabuhi ha tuna diri naghuhunahuna nga ginbabalewaray hira?

¹⁸ Damu gud an aton rason nga malipay ha tagna mahitungod han daku nga grupo! Diri kita nahipapausa nga gintutuman ni Jehova ito nga tagna ha milagroso nga paagi. (Basaha an Isaias 46:10, 11.) An mga membro han daku nga grupo mapasalamaton gud ha paglaom nga iginhatag ha ira ni Jehova. Diri hira naghuhunahuna nga ginbabalewaray hira tungod kay waray hira dihugi pinaagi han espiritu han Dios basi mag-alagad ha langit kaupod ni Jesus. Ha bug-os nga Kasuratan, may mababasa kita mahitungod han matinumanon nga kalalakin-an ngan kababayin-an nga gin-giyahan han baraan nga espiritu, pero diri hira bahin han 144,000. An usa nga ehemplo amo hi Juan Bawtista. (Mat. 11:11) An usa pa, hi David. (Buh. 2:34) Hira ngan an diri maihap nga iba pa babanhawon ha paraiso nga tuna. Hira ngatanan​—upod an daku nga grupo—​magkakaada higayon nga ipakita an ira pagkamaunungon kan Jehova ngan ha iya soberanya.

19. Paonan-o an katumanan han bisyon ni Juan mahitungod han daku nga grupo nagpapabug-at han pagin apurado han aton panahon?

¹⁹ Ha kasaysayan han tawo, ini an siyahan nga higayon nga gin-uurosa han Dios an minilyon nga katawohan tikang ha ngatanan nga nasud. Ha langit man o ha tuna an aton paglaom, kinahanglan buligan naton an mas damu pa tubtob nga posible nga magin membro han daku nga grupo han “iba nga mga karnero.” (Juan 10:16) Diri mag-iiha, papahinaboon na ni Jehova an igintagna nga daku nga kasakitan nga magbubungkag han mga gobyerno ngan mga relihiyon nga nagpapaantos ha katawohan. Daku gud nga pribilehiyo an naghuhulat ha ngatanan nga membro han daku nga grupo​—an pag-alagad kan Jehova dinhi ha tuna ha kadayonan!​—Pah. 7:14.