1. Ano an inaabat ni Jehova ha mga mapainubsanon? Isaysay.

HINIGUGMA ni Jehova an mga mapainubsanon. Adton tinuod la nga mapainubsanon an magkakaada mahigugmaon ngan duok nga relasyon ha iya. “Pero hirayo hiya ha mga mapahitas-on.” (Sal. 138:6) Karuyag naton ngatanan nga mapalipay hi Jehova ngan magin duok hiya ha aton, salit may maopay kita nga mga rason nga kultibaron an pagkamapainubsanon.

2. Ano an aton hihisgotan hini nga artikulo?

² Hini nga artikulo, aton hihisgotan an baton hinin tulo nga pakiana: (1) Ano an pagkamapainubsanon? (2) Kay ano nga kinahanglan naton kultibaron ito nga kalidad? (3) Ha ano nga mga kahimtang mahimo masarihan an aton pagkamapainubsanon? Sugad han aton mahibabaroan, kon aton kukultibaron an pagkamapainubsanon, mapapalipay naton hi Jehova ngan kita mismo magpapahimulos.​—Prob. 27:11; Isa. 48:17.

3. Ano an pagkamapainubsanon?

³ An pagkamapainubsanon amo an pagpaubos han hunahuna ngan pagin diri mapahitas-on o hambog. Iginpapakita han Biblia nga an mapainubsanon may husto nga panhunahuna ha iya relasyon kan Jehova nga Dios ngan ha iya igkasi-tawo. Gin-aaksiptar niya nga an ngatanan nga tawo mas labaw ha iya ha pipira nga paagi.​—Fil. 2:3, 4.

4-5. Kay ano nga adton mapainubsanon la pagkit-on diri nagpapasabot nga mapainubsanon gud hiya?

⁴ An pipira nga tawo mapainubsanon la pagkit-on. Bangin awdanon hira. Bangin matinalahuron hira tungod han ira kultura ngan han paagi han pagpadaku ha ira. Pero bangin mapahitas-on  ngay-an hira. Ha urhi, maibubuhayhag nira kon ano gud hira.​—Luc. 6:45.

⁵ Ha luyo nga bahin, an mga tawo nga baga hin may kompyansa o diri nag-aalang pag-istorya diri nagpapasabot nga hambog hira. (Juan 1:46, 47) Pero, adton diri awdanon kinahanglan maghirot nga diri sumarig ha ira natural nga abilidad. Awdanon man kita o diri, kita ngatanan kinahanglan maningkamot ha pagkultibar hin mapainubsanon nga kasingkasing.

6. Sugad han iginpapakita ha 1 Corinto 15:10, ano an aton mahibabaroan ha ehemplo ni apostol Pablo?

⁶ Tagda an ehemplo ni apostol Pablo. Gin-gamit gud hiya ni Jehova ha pag-establisar hin bag-o nga mga kongregasyon ha damu nga syudad. Posible nga mas damu an iya nahimo ha ministeryo kay ha iba nga apostol ni Jesu-Kristo. Pero waray maghunahuna hi Pablo nga mas importante hiya kay ha iya kabugtoan. Mapainubsanon nga nagsiring hiya: “Ako an pinakaubos ha mga apostol, ngan diri ako takos tawagon nga apostol, kay gintimaraot ko an kongregasyon han Dios.” (1 Cor. 15:9) Katapos, husto nga nagsiring hi Pablo nga nagkaada hiya maopay nga relasyon kan Jehova, diri tungod han iya mag-opay nga kalidad o mga nahimo, kondi tungod han diri matupngan nga pagkabuotan han Dios. (Basaha an 1 Corinto 15:10.) Maopay gud nga leksyon han pagkamapainubsanon an igintutdo han surat ni Pablo ha mga taga-Corinto​—labi na kay may pipira nga kalalakin-an hito nga kongregasyon nga naghuhunahuna nga mas labaw hira kan Pablo!​—2 Cor. 10:10.

7. Paonan-o nagpakita hin pagkamapainubsanon an pipira nga kilala nga kabugtoan ha moderno nga panahon? Paghatag hin ehemplo.

⁷ Damu han katawohan ni Jehova an nadadasig han istorya han kinabuhi ni Bugto Karl F. Klein, nga nagin membro han Nagmamando nga Lawas. Ha istorya han iya kinabuhi, mapainubsanon nga iginsumat ni Bugto Klein an mahitungod han damu nga ayat nga iya gin-atubang  ha sulod hin katuigan. Pananglitan, han dekada han 1920, nakurian gud hiya ha pagsangyaw ha balay-balay salit katapos han iya siyahan nga pagsangyaw, waray na niya ito buhata ha sulod hin mga duha ka tuig. Ha urhi, han nag-aalagad hiya ha Bethel, nagdumot hiya hin madaliay katapos makakarawat hin sagdon. Nag-antos liwat hiya hin nervous breakdown, pero ha urhi nakarekober hiya. Bisan pa hito, nagkaada liwat hiya damu nga mag-opay nga pribilehiyo. Hunahunaa la, nagkinahanglan gud hin daku nga pagpaubos inin kilala nga bugto basi maisumat an iya mga kaluyahan! Damu nga kabugtoan an nalilipay paghinumdom kan Bugto Klein ngan han tangkod ngan makaruruyag nga istorya han iya kinabuhi. *

8. Paonan-o an 1 Pedro 5:6 nabulig ha aton nga masabtan nga an pagkamapainubsanon nakakapalipay kan Jehova?

⁸ An pinakaimportante nga rason nga ginkukultibar naton an pagkamapainubsanon tungod kay nakakapalipay ito kan Jehova. Iginpatin-aw ini ni apostol Pedro. (Basaha an 1 Pedro 5:6.) Mahitungod han ginsiring ni Pedro, an libro nga “Kadi, Sunod ha Akon” nagkomento: “An pagpahitaas pariho hin hilo. Mahimo makadaot an mga epekto hito. Usa ito nga kalidad nga makakahimo ha pinakamaabilidad nga tawo nga magin waray pulos ha Dios. Ha luyo nga bahin, an pagpaubos makakahimo bisan ha pinakaminos nga tawo nga magin birilhon gud kan Jehova. . . . Malilipay . . . [hiya] ha pagbalos ha imo tungod han imo pagkamapainubsanon.” * May mas maopay pa ba kita nga mahihimo kay ha lipayon an kasingkasing ni Jehova?​—Prob. 23:15.

9. Kay ano nga an iba nga tawo naruruyag magin duok ha aton kon mapainubsanon kita?

⁹ Labot la nga nakakapalipay ito kan Jehova, damu an aton napapahimulosan kon ginkukultibar naton an pagkamapainubsanon. Kon mapainubsanon kita, an mga tawo naruruyag magin duok ha aton. Basi masabtan naton kon kay ano, ibutang naton an aton kalugaringon ha kahimtang han iba. (Mat. 7:12) Gutiay la ha aton an naruruyag pakig-upod ha mga tawo nga pirme iginpipirit an ira karuyag ngan diri nakarawat hin mga suhestyon. Ha kabaliktaran, nalilipay kita pakig-upod ha aton igkasi-tumuroo kon nagpapakita hira hin “simpatiya, minagburugto nga gugma, malumo nga pagpaid, ngan [pagin] mapainubsanon.” (1 Ped. 3:8) Kon naruruyag kita magin duok ha sugad nga mga tawo, posible nga naruruyag liwat hira magin duok ha aton​—kon mapainubsanon kita.

10. Kay ano nga nagigin mas masayon an aton kinabuhi kon mapainubsanon kita?

 ¹⁰ Nagigin mas masayon liwat an aton kinabuhi kon mapainubsanon kita. Ha tinuod la, mahimo kita makakita hin mga butang nga baga hin diri husto o diri patas. An maaramon nga hi Hadi Solomon nagsiring: “May nakita ako nga mga surugoon nga nakakabayo kondi may-ada liwat mga prinsipe nga nagbabaktas sugad la hin mga surugoon.” (Ecles. 10:7) Usahay, adton may mag-opay nga abilidad diri nakakakarawat hin kadungganan. Ngan usahay, adton diri duro nga maabilidad nakakakarawat hin mas daku nga kadungganan. Bisan pa hito, nasantop ni Solomon nga maaramon para ha aton nga karawaton an reyalidad imbes nga masubo ha negatibo nga mga kahimtang. (Ecles. 6:9) Kon mapainubsanon kita, magigin mas masayon para ha aton nga karawaton nga sugad hito an kinabuhi​—diri sugad han aton ginhuhunahuna nga karuyag naton mahitabo.

11. Ano an kinahanglan naton buhaton kon ginsasagdonan kita?

¹¹ Kada adlaw, damu an aton oportunidad nga maipakita an pagkamapainubsanon. Tagda an pipira nga sitwasyon. Kon ginsasagdonan kita. Kinahanglan naton hinumdoman nga kon an usa naniningkamot pagsagdon ha aton, posible nga nakahimo kita hin mas daku nga sayop kay ha aton ginhuhunahuna. Ha sugad nga kahimtang, bangin an aton siyahan nga reaksyon amo an diri pagkarawat han sagdon. Bangin pakarauton naton an nagsagdon o an paagi han iya pagsagdon. Pero kon mapainubsanon kita, maniningkamot kita nga ipakita an husto nga disposisyon.

12. Sumala ha Proberbios 27:5, 6, kay ano nga kinahanglan naton apresyaron an usa nga nagsasagdon ha aton? Iilustrar.

¹² Gin-aapresyar han mapainubsanon an sagdon. Ha pag-ilustrar: Imadyina nga natambong ka ha katirok. Katapos mo makig-istorya ha pipira nga kabugtoan, ginpakadto ka ha piliw han usa ha ira basi sekreto nga sumatan ka nga may nasuksok nga pagkaon ha imo ngipon. Sigurado nga maaawod ka. Pero diri ba aapresyaron mo nga ginsumatan ka niya? Ngani, bangin hingyapon mo nga may nagsiring unta ha imo hin mas temprano! Sugad man, kinahanglan mapainubsanon nga apresyaron naton an igkasi-tumuroo nga nagkaada kaisog ha pagsagdon ha aton han kinahanglan naton ito. Ginhuhunahuna naton an nagsagdon sugad nga aton sangkay, diri kaaway.​—Basaha an Proberbios 27:5, 6; Gal. 4:16.

13. Paonan-o naton maipapakita an pagkamapainubsanon kon an iba nakakakarawat hin mga pribilehiyo ha pag-alagad?

¹³ Kon an iba nakakakarawat hin mga pribilehiyo ha pag-alagad. “Kon nakakakarawat an  iba hin mga pribilehiyo, usahay nahuhunahuna ko kon kay ano nga waray ako pilia,” siring han tigurang nga hi Jason. Inabat ka na ba hin sugad hito? Diri sayop ‘magtalinguha pagkab-ot’ hin mga pribilehiyo ha pag-alagad. (1 Tim. 3:1) Pero, kinahanglan naton bantayan an aton panhunahuna. Kay kon diri, mapapabay-an naton nga tumubo ha aton kasingkasing an pagin mapahitas-on. Pananglitan, an usa nga brother mahimo magtikang paghunahuna nga hiya an pinakakwalipikado para ha espisipiko nga toka. O an usa nga Kristiano nga asawa bangin maghunahuna, ‘An akon bana mas kwalipikado kay kan Polano!’ Pero kon tinuod kita nga mapainubsanon, lilikyan naton an sugad nga mapahitas-on nga disposisyon.

14. Ano an aton mahibabaroan ha reaksyon ni Moises han an iba nakakarawat hin mga pribilehiyo?

¹⁴ May mahibabaroan kita ha reaksyon ni Moises han an iba nakakarawat hin mga pribilehiyo. Gin-apresyar ni Moises an iya toka ha pagpanguna ha nasud han Israel. Ano an reaksyon ni Moises han gintugotan ni Jehova an iba nga magbuhat han pipira nga buruhaton ni Moises? Waray hiya mangabugho. (Num. 11:24-29) Mapainubsanon nga gintugotan niya an iba nga bumulig ha iya ha paghukom ha katawohan. (Ex. 18:13-24) Tungod han igintoka nga mga hukom, natagan hin mas maopay nga serbisyo an mga Israelita. Iginpapakita hito nga mas importante kan Moises an kaopayan han iba kay han iya pribilehiyo. Maopay gud ito nga ehemplo para ha aton! Hinumdoman naton nga kon karuyag gud naton magpagamit kan Jehova, kinahanglan mas importante ha aton an pagkamapainubsanon kay ha aton abilidad. “Bisan kon hi Jehova naukoy ha kahitas-an, nakikita niya an mga mapainubsanon.”​—Sal. 138:6.

15. Ano nga mga pagbag-o an naeksperyensyahan han damu nga kabugtoan?

¹⁵ Kon nagbabag-o an aton kahimtang. Hinin bag-o la nga mga tuig, damu nga kabugtoan nga nag-aalagad kan Jehova hin mga dekada na an nakakarawat hin bag-o nga toka. Pananglitan,  han 2014, an mga paramangno han distrito ngan an ira asawa nakakarawat hin iba nga toka han bug-os-panahon nga pag-alagad. Hito gihapon nga tuig, an mga paramangno han sirkito maundang na ha ira toka kon mag-70 anyos na hira. Ngan an mga brother nga 80 anyos na o sobra pa diri na mag-aalagad ha kongregasyon sugad nga koordinetor han lawas han mga tigurang. Dugang pa, ha naglabay nga mga tuig, damu nga Bethelite an igintoka sugad nga mga payunir. An iba naman kinahanglan umundang ha ira espesyal nga bug-os-panahon nga pag-alagad tungod han problema ha kahimsog, obligasyon ha pamilya, o iba pa nga personal nga hinungdan.

16. Paonan-o iginpakita han aton kabugtoan an pagkamapainubsanon samtang nagpapahiuyon hira ha bag-o nga toka?

¹⁶ Diri masayon para hini nga kabugtoan an sugad nga mga pagbag-o. Matin-aw nga hinigugma na gud nira an ira toka hadto, nga ha pipira nga kahimtang maiha na nira nga ginbubuhat. Inabat an pipira hin duro nga kasubo samtang nagpapahiuyon hira ha ira bag-o nga toka. Pero paglabay han panahon, nakapahiuyon hira. Kay ano? Labaw ha ngatanan, tungod ito kay hinigugma nira hi Jehova. Maaram hira nga nagdedikar hira ha Dios​—diri ha usa nga trabaho, pribilehiyo, o toka. (Col. 3:23) Malipayon hira ha padayon nga pag-alagad kan Jehova hin mapainubsanon anoman an ira toka. Ira “iginpapasa ha iya an ngatanan [nira] nga kabaraka,” kay maaram hira nga hinigugma niya hira.​—1 Ped. 5:6, 7.

17. Kay ano nga mapasalamaton kita nga an Pulong han Dios nag-aaghat ha aton nga kultibaron an pagkamapainubsanon?

¹⁷ Diri ba kita mapasalamaton nga an Pulong han Dios nag-aaghat ha aton nga kultibaron an pagkamapainubsanon? Kon ginkukultibar naton ini nga makaruruyag nga kalidad, nagpapahimulos kita pati an iba. Mas nakakaya naton an mga problema. Labaw ha ngatanan, nagigin mas duok kita ha aton Amay ha langit. Nalilipay gud kita ha paghibaro nga bisan kon “Hitaas ngan Harangdon [hiya] nga Dios,” hinigugma ngan importante gud ha iya an iya mapainubsanon nga mga surugoon!​—Isa. 57:15.