ARADMAN NGA ARTIKULO 38
“Kadi ha Akon, . . . Ngan Tatagan Ko Kamo hin Karepreskohan”
“Kadi ha akon, kamo ngatanan nga kinakapoy ngan binubug-atan, ngan tatagan ko kamo hin karepreskohan.”—MAT. 11:28.
KARANTAHON 17 “Karuyag Ko”
MAHITUNGOD HAN ARTIKULO *
1. Sumala ha Mateo 11:28-30, ano an iginsaad ni Jesus?
NAGHIMO hi Jesus hin makaruruyag nga saad ha damu nga tawo nga namamati ha iya. Nagsiring hiya: “Kadi ha akon, . . . ngan tatagan ko kamo hin karepreskohan.” (Basaha an Mateo 11:28-30.) Diri ini kay waray la pulos nga saad. Pananglitan, hunahunaa an ginbuhat niya ha usa nga babaye nga nag-aantos hin grabe nga sakit.
2. Ano an ginbuhat ni Jesus ha may sakit nga babaye?
2 An babaye nanginginahanglan gud hin bulig. Damu na nga doktor an iya ginkadtoan, ngan naglalaom hiya nga matatambal hiya. Dose ka tuig na hiya nga nag-iinantos ngan waray la gihapon hiya katatambal. Sumala han Balaud, mahugaw hiya. (Lev. 15:25) Katapos, nabatian niya nga hi Jesus nakakatambal hadton may mga sakit, salit ginbiling niya hiya. Han nabilngan niya hi Jesus, ginkaptan niya an sidsid han bado ni Jesus, ngan natambal dayon hiya! Pero an ginbuhat ni Jesus labaw pa kay ha pagtambal la ha iya—iginbalik ni Jesus an iya dignidad. Pananglitan, han nakikiistorya hi Jesus hini nga babaye, iginpakita niya an gugma ngan respeto pinaagi ha pagtawaga ha iya nga “anak.” Sigurado gud nga narepreskohan, o naparig-on, ito nga babaye!—Luc. 8:43-48.
3. Ano nga mga pakiana an aton babatunon?
3 Tigamni nga ito nga babaye kinadto kan Jesus. Hiya an nag-una pagdaop kan Jesus. Ha pariho nga paagi, kinahanglan maningkamot kita pagdaop kan Jesus. Yana, diri milagroso nga tatambalon ni Jesus an mga sakit hadton nadaop ha iya. Pero nag-iimbitar la gihapon hiya: “Kadi ha akon, . . . ngan tatagan ko kamo hin karepreskohan.” Hini nga artikulo, babatunon naton an lima nga pakiana: Paonan-o kita makakadaop kan Jesus? Ano an iginpapasabot ni Jesus han nagsiring hiya: “Pas-ana niyo an akon yugo”? Ano an aton mahibabaroan kan Jesus? Kay ano nga nakakarepresko an buruhaton nga iya iginpapabuhat ha aton? Ngan paonan-o kita padayon nga marirepreskohan ha pagpas-an han yugo ni Jesus?
“KADI HA AKON”
4-5. Ano an pipira nga paagi nga makakadaop kita kan Jesus?
4 Usa nga paagi ha pagdaop kan Jesus amo an pag-aram tubtob ha aton mahihimo mahitungod han iya mga ginsiring ngan ginbuhat. (Luc. 1:1-4) Waray iba nga magbubuhat hini para ha aton—kinahanglan kita mismo an mag-aram hini nga mga asoy. Nadaop liwat kita kan Jesus kon nagdidesisyon kita nga magpabawtismo ngan magin usa nga disipulo han Kristo.
5 Usa pa nga paagi ha pagdaop kan Jesus amo an paghirani ha mga tigurang kon nanginginahanglan kita hin bulig. Ginagamit ni Jesus ini nga “regalo nga mga lalaki” basi mangnoan an iya panon. (Efe. 4:7, 8, 11; Juan 21:16; 1 Ped. 5:1-3) Kinahanglan mag-una kita pangaro hin bulig ha ira. Diri naton hunahunaon nga nababasa han mga tigurang an aton hunahuna ngan maaram na hira han aton panginahanglan. Tagda an ginsiring han brother nga hi Julian: “Kinahanglan ko bumaya ha Bethel tungod han akon problema ha kahimsog, ngan ginsidngan ako han usa ko nga sangkay nga maghangyo ako ha mga tigurang nga ig-shepherding ako. Ha siyahan, waray ako maghunahuna nga kinahanglan ko ito. Pero ha urhi nangaro ako hin bulig, ngan ito nga pag-shepherding usa han pinakamaopay nga regalo nga akon nakarawat.” An maunungon nga mga tigurang, sugad han duha nga nagbisita kan Julian, makakabulig ha aton nga mahibaroan an “panhunahuna han Kristo,” karuyag sidngon, masabtan ngan masubad an iya panhunahuna ngan disposisyon. (1 Cor. 2:16; 1 Ped. 2:21) Ini gud an usa han pinakamaopay nga regalo nga maihahatag nira ha aton.
“PAS-ANA NIYO AN AKON YUGO”
6. Ano an iginpapasabot ni Jesus han nagsiring hiya: “Pas-ana niyo an akon yugo”?
6 Han nagsiring hi Jesus: “Pas-ana niyo an akon yugo,” bangin an iya karuyag sidngon nga “Karawata an akon awtoridad.” Posible liwat nga an iya karuyag sidngon “Pas-ana an yugo kaupod ko, ngan magkaupod kita nga magbubuhat para kan Jehova.” Hain man hito an kahulogan, an yugo nagpapasabot hin buruhaton.
7. Sumala ha Mateo 28:18-20, ano nga buruhaton an iginpapabuhat ha aton, ngan ha ano kita makakasiguro?
7 Ginkakarawat naton an imbitasyon ni Jesus kon igindidedikar naton an aton kinabuhi kan Jehova ngan nagpapabawtismo. Ito nga imbitasyon para ha ngatanan—diri gud isasalikway ni Jesus an bisan hin-o nga sinsero nga naruruyag mag-alagad ha Dios. (Juan 6:37, 38) Ngatanan nga sumurunod han Kristo gintagan hin pribilehiyo nga makigbahin ha buruhaton nga iginpapabuhat ni Jehova kan Jesus. Makakasiguro kita nga pirme kita bubuligan ni Jesus basi mahimo ito nga buruhaton.—Basaha an Mateo 28:18-20.
“MAHIBARO KAMO TIKANG HA AKON”
Magin makarepresko ha iba sugad han ginbuhat ni Jesus (Kitaa an parapo 8-11) *
8-9. Kay ano nga naruyag paghirani kan Jesus an mga mapainubsanon, ngan ano an kinahanglan naton ipakiana ha aton kalugaringon?
8 An mapainubsanon nga mga tawo naruyag paghirani kan Jesus. (Mat. 19:13, 14; Luc. 7:37, 38) Kay ano? Tagda an kaibahan ni Jesus ngan han mga Pariseo. Ito nga mga lider han relihiyon diri mahigugmaon ngan mga arogante. (Mat. 12:9-14) Hi Jesus mahigugmaon ngan mapainubsanon. An mga Pariseo mga ambisyoso ngan iginhahambog nira an ira hitaas nga posisyon ha sosiedad. Hi Jesus nagsiring nga diri maopay an pagin ambisyoso, ngan gintutdoan niya an iya mga disipulo nga hunahunaon an ira kalugaringon sugad nga ubos nga mga surugoon. (Mat. 23:2, 6-11) An mga Pariseo nagdominar ha iba pinaagi han panhadlok ngan panarhog. (Juan 9:13, 22) Hi Jesus nakarepresko ha iba pinaagi han iya mahigugmaon nga mga buhat ngan mapinairon nga mga pulong.
9 Masusubad mo ba ito nga mga leksyon tikang kan Jesus? Pakianhi an imo kalugaringon: ‘Kilala ba ako ha pagin malumo ngan mapainubsanon? Kinaburut-on ba ako nga nagbubuhat hin minos nga buruhaton para serbihan an iba? Buotan ba ako ha iba?’
10. Ano an inabat han mga igkasi-magburuhat ni Jesus samtang kaupod nira hiya ha buruhaton?
10 Ginhimo ni Jesus nga mamurayawon ngan makalilipay para ha iya mga igkasi-magburuhat an pagbuhat han buruhaton samtang kaupod niya hira, ngan nalipay hiya pagbansay ha ira. (Luc. 10:1, 19-21) Gin-aghat niya an iya mga disipulo nga magpakiana, ngan ginpamatian niya an ira mga opinyon. (Mat. 16:13-16) Sugad hin mga tanom ha inataman hin maopay nga garden, an mga disipulo nag-uswag. Nahibaroan nira an mga leksyon nga igintutdo ni Jesus ngan namunga hira hin mag-opay nga buhat.
Magin masayon madaop ngan makisangkayon
Magin aktibo ngan madasigon
Magin mapainubsanon ngan maduruto *
11. Ano an kinahanglan naton igpakiana ha aton kalugaringon?
11 May awtoridad ka ba ha iba? Kon may-ada, pakianhi an imo kalugaringon: ‘Paonan-o ko gintatratar an akon mga katrabaho o kapamilya? Ginhihimo ko ba nga magin mamurayawon an kahimtang? Gin-aaghat ko ba an iba nga magpakiana? Ngan andam ba ako mamati han ira mga opinyon?’ Diri gud naton karuyag nga magin pariho ha mga Pariseo, nga nasisina hadton nagpapakiana ha ira ngan nagtitimaraot hadton nagpapahayag hin opinyon nga diri nauyon ha ira opinyon.—Mar. 3:1-6; Juan 9:29-34.
“MARIREPRESKOHAN KAMO”
12-14. Kay ano nga makarepresko an buruhaton nga iginhatag ha aton ni Jesus?
12 Kay ano nga nakakarepresko ha aton an pagbuhat han buruhaton nga iginhatag ha aton ni Jesus? Damu an rason, pero hisgotan naton an pipira la hito.
13 May-ada kita pinakamaopay nga mga paramangno. Hi Jehova, nga aton Supremo nga Paramangno, maapresyaron o diri mapintas nga agaron. Gin-aapresyar niya an aton ginbubuhat. (Heb. 6:10) Ngan gintatagan kita niya han kusog nga aton ginkikinahanglan basi madara an aton pinas-an nga responsabilidad. (2 Cor. 4:7; Gal. 6:5, ftn.) Sugad man, hi Jesus, nga aton Hadi, nagpapakita hin maopay nga susbaranan ha paggamit han iya awtoridad. (Juan 13:15) Ngan an mga tigurang nga nag-aataman ha aton naniningkamot pagsubad kan Jesus, an “harangdon nga paraataman.” (Heb. 13:20; 1 Ped. 5:2) Naniningkamot hira nga magin buotan, makaparig-on, ngan maisugon samtang ginpapakaon ngan ginpuproteksyonan kita nira.
14 May-ada kita pinakamaopay nga kasangkayan. Waray iba nga katawohan nga may mapulsanon nga buruhaton o may bugkos han gugma nga pariho han aton. Hunahunaa la: May pribilehiyo kita nga magbuhat kaupod han katawohan nga may pinakahitaas nga suruklan ha moral pero diri nagpapakamatadong ha kalugaringon. Damu an ira abilidad pero mapainubsanon hira, ngan ginhuhunahuna nira an iba nga labaw ha ira. Gintatratar kita nira diri la sugad nga mga igkasi-magburuhat kondi sugad nga kasangkayan. Ngan an ira gugma ha aton marig-on gud salit andam hira mamatay para ha aton!
15. Ano an kinahanglan naton abaton mahitungod han buruhaton nga aton ginbubuhat?
15 May-ada kita pinakamaopay nga buruhaton. Igintututdo naton ha katawohan an kamatuoran mahitungod kan Jehova ngan iginbubuhayhag an kabuwaan han Yawa. (Juan 8:44) Ginpapakurian ni Satanas an katawohan pinaagi hin mga pinas-an nga diri nira kaya. Pananglitan, karuyag niya nga tumoo kita nga diri papasayloon ni Jehova an aton mga sala ngan diri kita angay higugmaon. Mabug-at gud ito nga pinas-an, ngan daku gud ito nga buwa! Kon nadaop kita ha Kristo, ginpapasaylo an aton mga sala. Ngan ha tinuod la, kita ngatanan hinigugma gud ni Jehova. (Roma 8:32, 38, 39) Makalilipay gud nga mabuligan an mga tawo nga sumarig kan Jehova ngan makita hira nga nagigin mas maopay an ira kinabuhi!
PADAYON NGA MAREPRESKOHAN HA PAGPAS-AN HAN YUGO NI JESUS
16. Kay ano nga an pinas-an nga iginpapapas-an ha aton ni Jesus iba kay ha mga pinas-an nga kinahanglan naton dad-on?
16 An pinas-an nga iginpapapas-an ha aton ni Jesus iba kay ha mga pinas-an nga kinahanglan naton dad-on. Pananglitan, katatapos han adlaw ha sekular nga trabaho, damu an kinakapoy ngan diri malipayon. Ha kabaliktaran, katapos han paggahin hin panahon ha pag-alagad kan Jehova ngan ha Kristo, naabat kita hin daku nga kalipay. Bangin kapoy kita katapos han magkulop nga trabaho ngan kinahanglan naton piriton an aton kalugaringon basi tumambong ha katirok hito nga gab-i. Pero kaurogan nga nauli kita tikang ha katirok nga narepreskohan ngan naparig-on. Pariho liwat hito an aton inaabat kon naniningkamot kita pagsangyaw ngan pagbuhat han aton personal nga pag-aram ha Biblia. An balos nga aton nakakarawat labaw gud kay ha kusog nga aton gin-gamit!
17. Kay ano nga kinahanglan kita magin reyalistiko ngan mabinantayon?
17 Kinahanglan magin reyalistiko kita. Iba-iba an limitasyon han aton kusog. Salit kinahanglan magbantay kita kon paonan-o naton ito gagamiton. Pananglitan, mahimo naton karagan an aton kusog ha pagpinaniguro nga magkaada damu nga materyal nga panag-iya. Tigamni an ginsiring ni Jesus ha riko nga batan-on nga nagpakiana ha iya: “Ano an kinahanglan ko buhaton basi mapanunod an kinabuhi nga waray kataposan?” Ginsusugot na hini nga batan-on an Balaud. Sigurado nga maopay hiya nga tawo tungod kay espisipiko nga gin-unabi ha Ebanghelyo ni Marcos nga hi Jesus “inabat hin gugma ha iya.” Gin-imbitar ni Jesus an batan-on nga magmarando. “Lakat, ibaligya an mga butang nga imo gintatag-iya,” siring ni Jesus, “ngan kadi sunod ha akon.” Karuyag hini nga lalaki nga sumunod kan Jesus, pero baga hin diri niya kaya bayaan an iya ‘damu nga panag-iya.’ (Mar. 10:17-22) Salit, ginsalikway niya an yugo nga igintanyag ha iya ni Jesus ngan padayon nga nagpauripon “ha Karikohan.” (Mat. 6:24) Ano daw la an imo pipilion?
18. Ano an kinahanglan naton buhaton ha panapanahon, ngan kay ano?
18 Ha panapanahon, maopay nga usisahon naton an aton mga prayoridad ha kinabuhi. Kay ano? Basi masiguro naton nga an aton kusog ginagamit naton hin maaramon. Tagda an ginsiring han batan-on nga hi Mark: “Ha damu nga katuigan, kahuna ko nagkikinabuhi ako hin simple. Payunir ako, pero pirme ako naghihinunahuna mahitungod han kwarta ngan kon paonan-o magigin mas komportable an akon kinabuhi. Diri ko masabtan kon kay ano nga nagin problemado an akon kinabuhi. Katapos, nasantop ko nga mas gin-uuna ko an akon mga karuyag ngan sobra na la nga panahon ngan kusog an iginhahatag ko kan Jehova.” Ginbag-o ni Mark an iya panhunahuna ngan pagkinabuhi basi mas damu an iya mahimo ha pag-alagad kan Jehova. “Usahay nababaraka ako,” siring ni Mark, “pero tungod han bulig ni Jehova ngan ni Jesus, nalalamposan ko an akon mga problema.”
19. Kay nga importante gud an pagkaada husto nga panhunahuna?
19 Padayon nga marirepreskohan kita ha pagpas-an han yugo ni Jesus kon bubuhaton naton an tulo nga butang. Siyahan, tipigi an husto nga panhunahuna. An aton ginbubuhat buruhaton ni Jehova, salit kinahanglan himoon ito ha paagi ni Jehova. Kita an mga trabahador, ngan hi Jehova an Agaron. (Luc. 17:10) Kon bubuhaton naton an iya buruhaton ha aton paagi, pakukurian naton an aton kalugaringon. Bisan an usa nga makusog nga baka posible gud nga madaot ngan makapoy kon padayon nga mapakadto hiya ha karuyag niya nga direksyon ngan kukontrahon an yugo nga ginkukontrol han iya agaron. Ha luyo nga bahin, mahihimo naton an diri ordinaryo nga mga butang ngan malalamposan an bisan ano nga ulang kon susundon naton an giya ni Jehova. Hinumdumi nga waray bisan hin-o nga makakapugong nga matuman an iya kaburut-on!—Roma 8:31; 1 Juan 4:4.
20. Ano an kinahanglan naton nga magin motibo ha pagpas-an han yugo ni Jesus?
20 Ikaduha, pagbuhat nga may husto nga motibo. An aton tumong amo an pagdayaw ha aton mahigugmaon nga Amay, hi Jehova. An mga tawo ha siyahan nga siglo nga ginpagios han kahakog o pagin makikalugaringon waray pag-iha nagin diri malipayon ngan ginbayaan nira an yugo ni Jesus. (Juan 6:25-27, 51, 60, 66; Fil. 3:18, 19) Ha kabaliktaran, adton ginpagios han diri makikalugaringon nga gugma ha Dios ngan gugma ha igkasi-tawo malipayon nga nagpas-an hito nga yugo ha ira bug-os nga kinabuhi ha tuna, ngan may paglaom hira nga mag-alagad kaupod han Kristo ha langit. Pariho ha ira, padayon kita nga magigin malipayon kon papas-anon naton nga may husto nga motibo an yugo ni Jesus.
21. Sumala ha Mateo 6:31-33, ano an malalaoman naton nga bubuhaton ni Jehova?
21 Ikatulo, magkaada husto nga mga ginlalaoman. Ginpili naton an pagkinabuhi nga nagkikinahanglan hin pagsakripisyo ngan paningkamot. Ginpahamangnoan kita ni Jesus nga pagtitimarauton kita. Pero makakalaom kita nga tatagan kita ni Jehova hin kusog basi makailob ha anoman nga pagsari. Samtang mas nagpapailob kita, mas nagigin marig-on kita. (San. 1:2-4) Makakalaom liwat kita nga itatagana ni Jehova an aton panginahanglan, aatamanon kita ni Jesus, ngan paparig-unon kita han aton kabugtoan. (Basaha an Mateo 6:31-33; Juan 10:14; 1 Tes. 5:11) May kulang pa ba nga aton gud ginkikinahanglan?
22. Ha ano kita mapasalamaton?
22 An babaye nga gintambal ni Jesus narepreskohan ha adlaw mismo nga natambal hiya. Pero marirepreskohan la hiya ha waray kataposan kon nagin maunungon hiya nga disipulo han Kristo. Ha imo hunahuna, ano an iya ginbuhat? Kon ginpili niya nga pas-anon an yugo ni Jesus, hunahunaa an balos—mag-aalagad hiya ha langit kaupod ni Jesus! Magigin bawi gud an bisan ano nga iya iginsakripisyo ha pagsunod ha Kristo. Anoman an aton paglaom—mabuhi ha waray kataposan ha langit o ha tuna—mapasalamaton gud kita nga ginkarawat naton an imbitasyon ni Jesus: “Kadi ha akon”!
KARANTAHON 13 An Kristo an Aton Susbaranan
^ par. 5 Gin-iimbitar kita ni Jesus nga dumaop ha iya. Ano an nahiuupod ha pagkarawat han iya imbitasyon? Babatunon hini nga artikulo ito nga pakiana, ngan magpapahinumdom ini ha aton kon paonan-o kita marirepreskohan pinaagi ha pagbuhat kaupod han Kristo.
