1. Kay ano nga kinahanglan kita magpasakop kan Jehova?

KINAHANGLAN kita magpasakop * kan Jehova kay hiya an aton Maglalarang. Salit, hiya an may katungod nga maghimo hin mga suruklan para ha iya mga linarang. (Pah. 4:11) Pero may usa pa kita nga mabug-at nga rason para sugton hiya​—an iya paagi han pagmando amo an pinakamaopay. Ha bug-os nga kasaysayan, damu nga tawhanon nga magmarando an nagkaada gahum ngan awtoridad ha iba. Pero kon ikukompara ha ira, hi Jehova an pinakamaaramon, pinakamahigugmaon, pinakamaloloy-on, ngan pinakamapinairon nga Magmarando.​—Ex. 34:6; Roma 16:27; 1 Juan 4:8.

2. Sumala ha Hebreo 12:9-11, kay ano nga kinahanglan kita magpasakop kan Jehova?

² Karuyag ni Jehova nga sugton naton hiya, diri la tungod kay nahahadlok kita ha iya, kondi tungod kay hinigugma naton hiya ngan ginkikilala naton hiya sugad nga aton mahigugmaon nga Amay. Ha surat ni Pablo ha mga Hebreo, iginsaysay niya nga kinahanglan kita “magpasakop hin . . . kinaburut-on ha Amay” kay ginbabansay kita niya “para ha aton kaopayan.”​—Basaha an Hebreo 12:9-11.

3. (a) Paonan-o naton iginpapakita nga nagpapasakop kita kan Jehova? (b) Ano nga mga pakiana an aton hihisgotan?

³ Nagpapasakop kita kan Jehova kon ginbubuhat naton an aton bug-os nga mahihimo basi sugton hiya ha ngatanan nga butang  ngan gin-aatohan an tendensya nga sumarig ha aton kalugaringon nga pagsabot. (Prob. 3:5) Mas masayon para ha aton nga magpasakop kan Jehova kon mas damu an aton nahibabaroan mahitungod han iya mag-opay nga kalidad. Kay ano? Kay ini nga mga kalidad nakikita ha ngatanan nga iya ginbubuhat. (Sal. 145:9) Samtang mas damu an aton nahibabaroan mahitungod kan Jehova, mas hihigugmaon naton hiya. Ngan kon hinigugma naton hi Jehova, diri naton kinahanglan hin hilaba nga listahan han mga surundon han angay ngan diri angay buhaton. Maniningkamot kita ha pagpahiuyon han aton panhunahuna ngan emosyon ha kon ano an maopay ngan ha paglikay ha kon ano an maraot. (Sal. 97:10) Pero usahay, bangin makurian kita pagsugot kan Jehova. Kay ano? Ngan ano an mahibabaroan han mga tigurang, tatay, ngan nanay tikang ha ehemplo ni Gobernador Nehemias; Hadi David; ngan Maria nga nanay ni Jesus? Ini nga mga pakiana babatunon hini nga artikulo.

4-5. Sumala ha Roma 7:21-23, kay ano nga bangin makuri an pagpasakop kan Jehova?

⁴ An usa nga rason nga bangin nakukurian kita pagpasakop kan Jehova amo an aton napanunod nga sala ngan pagin diri perpekto. Salit may tendensya kita nga magin rebelyoso. Katapos magrebelde nira Adan ngan Eva ha Dios ngan kumaon han igindidiri nga bunga, naghimo hira hin ira kalugaringon nga mga suruklan. (Gen. 3:22) Yana, mas ginpipili pa gihapon han kadam-an nga tawo nga igbalewaray hi Jehova ngan maglugaring pagdesisyon kon ano an husto ngan sayop.

⁵ Bisan adton nakilala ngan nahigugma kan Jehova mahimo makurian pagpasakop hin bug-os ha iya. Ito an naeksperyensyahan ni apostol Pablo. (Basaha an Roma 7:21-23.) Pariho kan Pablo, karuyag naton buhaton kon ano an husto para kan Jehova. Pero kinahanglan naton padayon nga atohan an tendensya nga magbuhat hin maraot.

6-7. Ano an usa pa nga rason nga bangin makuri an pagpasakop kan Jehova? Paghatag hin ehemplo.

⁶ Usa pa nga rason nga bangin makuri an pagpasakop kan Jehova tungod kay impluwensyado kita han aton gindak-an nga kultura. Damu nga ideya han tawo an supak ha kaburut-on ni Jehova, salit bangin makuri an padayon nga paningkamot nga diri kita maimpluwensyahan han ira panhunahuna. Tagda an usa nga ehemplo.

⁷ Ha pipira nga lugar, komon an pagpresyur ha mga batan-on nga gamiton an ira kinabuhi ha pagpinamiling hin damu nga kwarta. Ito an naeksperyensyahan han sister nga hi Mary. * Antes mahibaro mahitungod kan Jehova, nag-eskwela hiya ha usa han pinakakilala nga eskwelahan ha ira nasud. Karuyag gud han pamilya ni Mary nga magkaada hiya trabaho nga hitaas an sweldo ngan ginrirespeto han mga tawo. Ito liwat an iya karuyag. Pero han nahibaro hiya mahitungod kan Jehova ngan nagkaada gugma ha Iya, ginbag-o niya an iya mga tumong. Bisan pa hito, hiya nagsiring: “Usahay may nakikita ako nga nakakaengganyo nga mga oportunidad ha negosyo nga puydi ako magkaada damu nga kwarta pero makakaulang han akon espirituwal nga rutina. Tungod han akon gindak-an, nakukurian pa gihapon ako nga magdumiri. Kinahanglan ko mangaro hin bulig kan Jehova nga maatohan an pagsulay nga kumarawat hin trabaho nga makakaulang han akon pag-alagad ha iya.”​—Mat. 6:24.

8. Ano an aton hihisgotan?

⁸ Nagpapahimulos kita kon nagpapasakop kita kan Jehova. Pero adton gintagan hin awtoridad, sugad han mga tigurang, tatay, ngan nanay, may dugang nga rason nga magpasakop ha Dios; may higayon hira nga mabuligan an iba. Hisgotan naton an pipira nga ehemplo ha Biblia nga nagtututdo ha aton kon paonan-o gagamiton an awtoridad ha paagi nga nakakalipay kan Jehova.

9. Ano nga mga pagsari an gin-atubang ni Nehemias?

⁹ Igintapod ni Jehova ha mga tigurang an importante nga responsabilidad ha pag-ataman han iya katawohan. (1 Ped. 5:2) Damu an mahibabaroan han mga tigurang ha pag-usisa kon paonan-o gintratar ni Nehemias an katawohan ni Jehova. Sugad nga gobernador han Juda, daku an awtoridad ni Nehemias. (Neh. 1:11; 2:7, 8; 5:14) Hunahunaa an pipira nga pagsari nga gin-atubang ni Nehemias. Nahibaroan niya nga ginhugawan han katawohan an templo ngan diri nira ginsusuportaran ha pinansyal an mga Levita sugad han iginsusugo han Balaud. Gintatalapas han mga Judio an balaud han Sabbath, ngan an pipira ha ira nag-asawa hin mga babaye nga taga-iba nga nasud. Kinahanglan panginanoon ni Gobernador Nehemias inin makuri nga sitwasyon.​—Neh. 13:4-30.

10. Paonan-o gin-atubang ni Nehemias an mga pagsari?

¹⁰ Waray abusoha ni Nehemias an iya awtoridad pinaagi ha pagpirit ha katawohan han Dios nga sundon an iya kalugaringon nga mga suruklan. Lugod, nangaro hiya han giya ni Jehova pinaagi ha sinsero nga pag-ampo, ngan gintutdoan niya an katawohan han Balaud ni Jehova. (Neh. 1:4-10; 13:1-3) Mapainubsanon nga ginbuligan liwat ni Nehemias an iya kabugtoan, ginbuligan pa ngani hira ha pagtukod utro han mga pader han Jerusalem.​—Neh. 4:15.

11. Sumala ha 1 Tesalonica 2:7, 8, ano an angay magin pagtratar han mga tigurang ha kabugtoan ha kongregasyon?

¹¹ An mga tigurang bangin diri umatubang hin mga problema pariho han kan Nehemias, pero masusubad nira hiya ha damu nga paagi. Pananglitan, naniningkamot hira ha pagbulig ha ira kabugtoan. Ngan diri nira ginhuhunahuna nga labaw hira ha iba tungod han ira awtoridad. Lugod, mahigugmaon nga gintatratar nira an kongregasyon. (Basaha an 1 Tesalonica 2:7, 8.) An ira hilarom nga gugma ngan pagin mapainubsanon nakakaapekto kon paonan-o hira nakikiistorya ha iba. Hi Andrew, nga maiha na nga tigurang, nagsiring: “Naobserbaran ko nga kasagaran na nga  nababantad an kasingkasing han kabugtoan kon buotan ngan mahigugmaon an tigurang. Ini nga mga kalidad nagpapagios ha kongregasyon nga magkooperar ha mga tigurang.” Usa pa nga maiha na nga tigurang nga hi Tony an nagsiring: “Naniniguro ako ha pag-aplikar han sagdon ha Filipos 2:3 ngan padayon nga naniningkamot nga hunahunaon an iba nga labaw ha akon. Nabulig ini ha akon nga diri magin diktador.”

12. Kay ano nga kinahanglan magin mapainubsanon an mga tigurang?

¹² Kinahanglan magin mapainubsanon an mga tigurang, sugad la nga hi Jehova mapainubsanon. Bisan kon hi Jehova an Soberano ha uniberso, “natamod hiya” basi ibangon “an ubos tikang ha tapotapo.” (Sal. 18:35; 113:6, 7) Ngani, mangil-ad kan Jehova an mga mapahitas-on ngan hambog.​—Prob. 16:5.

13. Kay ano nga kinahanglan kontrolon han mga tigurang an ira dila?

¹³ An usa nga tigurang nga nagpapasakop kan Jehova kinahanglan ‘kontrolon an iya dila.’ Kay kon diri, bangin makayakan hiya hin diri maopay kon may magpakita hin kawaray-respeto ha iya. (San. 1:26; Gal. 5:14, 15) Hi Andrew nga gin-unabi kanina nagsiring: “Usahay, karuyag ko yaknan hin diri maopay an usa nga bugto nga baga hin diri narespeto ha akon. Pero, ginpamalandong ko an susbaranan han matinumanon nga kalalakin-an ha Biblia, ngan nakabulig ito ha akon nga masantop an pagkaimportante han pagin mapainubsanon ngan maaghop.” Iginpapakita han mga tigurang nga nagpapasakop hira kan Jehova pinaagi ha pagin mahigugmaon ngan buotan kon nakikiistorya hira ha ira mga kakongregasyon, upod na ha ira mga igkasi-tigurang.​—Col. 4:6.

14. Ano nga toka an iginhatag ni Jehova ha mga tatay, ngan ano an iya ginlalaoman ha ira?

¹⁴ Igintoka ni Jehova an tatay sugad nga ulo han pamilya, ngan naglalaom an Dios nga babansayon ngan didisiplinahon niya an iya mga anak. (1 Cor. 11:3; Efe. 6:4) Pero limitado an awtoridad han usa nga tatay​—may baratunon hiya kan Jehova, nga tikang ha iya nakarawat han tagsa nga pamilya an ngaran hito. (Efe. 3:14, 15) Nagpapasakop an mga tatay kan Jehova kon ginagamit nira an ira awtoridad ha paagi nga nakakalipay ha Dios. Damu an ira mahibabaroan ha pag-usisa han kinabuhi ni Hadi David.

15. Kay ano nga maopay nga usisahon han mga tatay an susbaranan ni Hadi David?

¹⁵ Igintoka ni Jehova hi David sugad nga ulo diri la han iya pamilya kondi pati han bug-os nga nasud han Israel. Sugad nga hadi, daku an awtoridad ni David. May panahon nga sayop nga gin-gamit niya ito nga awtoridad salit nakahimo hiya hin seryoso nga mga sala. (2 Sam. 11:14, 15) Pero iginpakita niya an iya pagpasakop kan Jehova pinaagi ha pagkarawat hin disiplina. Iginsumat niya  kan Jehova an ngatanan nga nakada ha iya kasingkasing pinaagi ha pag-ampo. Ngan ginhimo niya an ngatanan basi sugton an sagdon ni Jehova. (Sal. 51:1-4) Dugang pa, mapainubsanon gud hiya kay ginkarawat niya an mag-opay nga sagdon diri la han kalalakin-an kondi pati han kababayin-an. (1 Sam. 19:11, 12; 25:32, 33) Nahibaro hi David hin leksyon tikang ha iya mga sala ngan nagpokus hiya ha pag-alagad kan Jehova.

16. Ano nga mga leksyon an mahibabaroan han mga tatay ha ehemplo ni David?

¹⁶ Tagda an pipira la han mga leksyon nga mahibabaroan han mga tatay ha ehemplo ni Hadi David: Ayaw abusoha an awtoridad nga iginhatag ha imo ni Jehova. Aksiptara an imo sayop, ngan karawata an sagdon han iba nga basado ha Biblia. Kon bubuhaton mo ini, rirespetuhon ka han imo pamilya tungod han imo pagkamapainubsanon. Kon nag-aampo upod han imo pamilya, isumat kan Jehova an ngatanan nga aada ha imo kasingkasing​—ipabati ha ira nga nasarig ka gud ha iya. Ngan labaw ha ngatanan, himoa nga prayoridad an imo pag-alagad kan Jehova. (Deut. 6:6-9) An imo maopay nga ehemplo usa han pinakabirilhon nga regalo nga imo maihahatag ha imo pamilya.

17. Ano nga toka an iginhatag ni Jehova ha mga nanay?

¹⁷ Gintokahan ni Jehova an nanay hin dungganon nga papel ha pamilya, ngan gintagan niya hiya hin pipira nga awtoridad ha iya mga anak. (Prob. 6:20) Ngani, an impluwensya han nanay ha iya mga anak mahimo makaapekto ha bug-os nira nga kinabuhi. (Prob. 22:6) Tigamni kon ano an mahibabaroan han mga nanay ha susbaranan ni Maria nga nanay ni Jesus.

18-19. Ano an mahibabaroan han mga nanay ha ehemplo ni Maria?

¹⁸ Pamilyar gud hi Maria ha Kasuratan. Nakultibar niya an daku nga respeto kan Jehova ngan nagkaada duok gud nga relasyon ha iya. Andam hiya nga sundon an sugo ni Jehova, bisan kon nagpapasabot ito nga mababag-o an iya bug-os nga kinabuhi.​—Luc. 1:35-38, 46-55.

¹⁹ Mga nanay, masusubad niyo hi Maria ha damu nga paagi. Paonan-o? Siyahan, pinaagi ha pagtipig han iyo duok nga relasyon kan Jehova pinaagi ha personal nga pag-aram ha Biblia ngan personal nga mga pag-ampo. Ikaduha, pinaagi ha pagin andam ha paghimo hin mga pagbag-o ha iyo kinabuhi basi mapalipay hi Jehova. Pananglitan, bangin ginpadaku kamo hin mga kag-anak nga madali masina ngan masakit magyakan ha ira mga anak. Salit bangin nagdaku kamo nga naghuhunahuna nga normal la ito nga paagi ha pagtratar ha pamilya. Bisan han nahibaro na kamo han mga suruklan ni Jehova, bangin nakukurian la gihapon kamo ha pagpabilin nga kalmado ngan pasensyoso ha iyo mga anak, labi na kon nagpipinasaway hira kon kapoy kamo. (Efe. 4:31) Ha sugad nga mga panahon, labi nga kinahanglan niyo sumarig kan Jehova pinaagi ha pag-ampo. An nanay  nga hi Lydia nagsiring: “Usahay, kinahanglan ko maniguro pag-ampo basi diri ko mabusaan an akon anak kon diri hiya nasugot ha akon. Gin-uutod ko pa ngani an akon ginyayakan ngan hilom nga nag-aampo para ha bulig ni Jehova. An pag-ampo nakakabulig nga magpabilin ako nga kalmado.”​—Sal. 37:5.

20. Ano nga problema an gin-aatubang han pipira nga nanay, ngan paonan-o ito malalamposan?

²⁰ May usa pa nga problema nga bangin gin-aatubang han mga nanay​—nakukurian hira nga ipahayag an ira gugma ha ira mga anak. (Tito 2:3, 4) An pipira nga babaye nagdaku ha pamilya nga an mga kag-anak waray duok nga relasyon ha ira mga anak. Kon ito an paagi han pagpadaku ha imo, diri mo kinahanglan utruhon an sayop han imo mga kag-anak. An nanay nga nagpapasakop ha kaburut-on ni Jehova bangin kinahanglan mag-aram ha pagpahayag han iya gugma ha iya mga anak. Bangin makuri para ha iya nga bag-uhon an paagi han iya paghunahuna, pagbati, ngan panggawi. Pero posible ito, ngan magpapahimulos hiya ngan an iya pamilya hito nga mga pagbag-o.

21-22. Sumala ha Isaias 65:13, 14, ano an aton napapahimulosan kon nagpapasakop kita kan Jehova?

²¹ Maaram hi Hadi David han mga kapulsanan han pagpasakop kan Jehova. Hiya nagsurat: “An mga turumanon nga tikang kan Jehova matadong, nakakapalipay ha kasingkasing; an sugo ni Jehova limpyo, nakakapalamrag han mga mata. Pinaagi hito napapahamangnoan an imo surugoon; ha pagsunod hito, may daku nga balos.” (Sal. 19:8, 11) Yana, nakikita naton an kaibahan hadton nagpapasakop kan Jehova ngan hadton nagsasalikway han iya mahigugmaon nga sagdon. Adton nagpapasakop kan Jehova ‘nasinggit hin malipayon tungod han maopay nga kahimtang han kasingkasing.’​—Basaha an Isaias 65:13, 14.

²² Kon an mga tigurang, tatay, ngan nanay kinaburut-on nga nagpapasakop kan Jehova, nagkakaada hira mas maopay nga kinabuhi, mas malipayon nga pamilya, ngan an bug-os nga kongregasyon mas nagkakaurosa. Labaw ha ngatanan, napapalipay nira an kasingkasing ni Jehova. (Prob. 27:11) May-ada pa ba balos nga mas maopay hito?