An pagpasaylo nangangahulogan nga palabyon naton an nahimo nga sala ngan an kasina nga resulta hito. Diri ito nag-oobligar nga konsinteron naton an sayop o magpakunokuno nga baga hin waray ito mahitabo.

PRINSIPYO HAN BIBLIA: “Padayon nga magpailob ha usa kag usa ngan hura nga magpasaylo ha usa kag usa bisan kon may hinungdan an bisan hin-o nga magreklamo kontra ha iba.”—Colosas 3:13.

“Kon hinigugma mo an usa, diri ka nagpupokus ha iya kaluyahan, kondi ha klase han tawo nga karuyag niya magin.”—Aaron.

Kon magtitipig ka hin kasina, mahimo ka madaot ha pisikal ngan ha emosyonal, pati na an iyo pag-asawa.

“Usa ka beses nangaro hin pasaylo an akon bana ha butang nga nakasakit gud ha akon. Nakurian ako pagpasaylo ha iya. Kondi ha urhi ginpasaylo ko hiya, pero nagbasol ako nga waray ko dayon ito himoa. Nakaapekto ito ha amon relasyon.”—Julia.

SARIHI AN IMO KALUGARINGON

Ha sunod nga masakitan ka ha ginyakan o ginbuhat han imo padis, pakianhi an imo kalugaringon:

• ‘Sobra ba ako kasensitibo?’

• ‘Seryoso gud ba an nahimo nga sala nga kinahanglan pa niya mangaro hin pasaylo, o puydi ko na la ito palabyon?’

IPAKIISTORYA HA IMO ASAWA

• Mationan-o kaiha kita magpasaylo ha kada tagsa?

• Ano an puydi naton buhaton basi mas madagmit kita magpasaylo ha kada tagsa?

SUHESTYON

• Kon nasakitan ka, ayaw hunahunaa nga may maraot nga motibo an imo padis.

• Pasensyahi an nabuhat han imo padis, ngan hinumdumi nga “kita ngatanan nahipapakdol hin damu ka beses.”—Santiago 3:2.

“Masayon la magpasaylo kon pariho kami nakasayop, kondi mas makuri kon baga hin usa la an nakasayop. An pagkarawat hin pagpasaylo ngan an pagpasaylo nagkikinahanglan hin tinuod nga pagpaubos.”—Kimberly.

PRINSIPYO HAN BIBLIA: “Pakigtuhay dayon.”—Mateo 5:25.