An edukasyon tikang ha Biblia may-ada urusahon nga gahum ha pagbag-o han kinabuhi. Tagda an ehemplo nira Ricardo ngan Andres.

RICARDO: Han 15 anyos ako, inapi ako hin gang. An akon bag-o nga barkada nakaimpluwensya gud ha akon. Ngani, nagin ambisyon ko nga mapriso hin napulo ka tuig! Baga hin diri normal ito nga panhunahuna. Kondi ha amon lugar, gindadayaw ngan ginrirespeto an mga napriso. Ngan karuyag ko magin sugad ha ira.

Naeksperyensyahan ko an tanan nga ginbubuhat han membro hin gang—droga, seksuwal nga imoralidad, ngan pagin bayolente. Usa ka gab-i, nahidabi ako hin purupsilay. Kahuna ko mamamatay na ako, kondi nakapalagiw ako. Katapos hito, nakapamurubuot gud ako mahitungod han akon kinabuhi ngan kabubuwason, ngan nagdesisyon ako nga magbag-o. Pero paonan-o? Diin ako makakabiling hin bulig?

Diri malipayon an kadam-an han akon kapamilya. Damu an ira problema. Pero diri sugad hito an pamilya han usa ko nga tiyo. Mag-opay hira nga tawo ngan nagkikinabuhi uyon ha mga prinsipyo han Biblia. Ngani, hinbaroan ko ha ira nga Jehova an ngaran han Dios. Salit waray pag-iha katapos han purupsilay, nag-ampo ako ha Dios nga ginagamit an iya ngaran ngan nanginyupo ako han iya bulig. Nahipausa gud ako kay kinabuwasan, may Saksi ni Jehova nga bumisita ha amon balay! Ngan hiya an nagdumara ha akon hin pag-aram ha Biblia.

Waray pag-iha, nagkaada ako daku nga problema. Agsob tumawag an akon mga barkada hadto, karuyag nira nga magkirigta kami. Bisan kon makuri, nagdumiri ako. Determinado ako nga ipadayon an akon pag-aram ha Biblia, ngan maopay na la nga ginbuhat ko ito! Daku gud an akon iginbag-o, ngan nagin tinuod ako nga malipayon.

Nahinumdoman ko nga makausa nag-ampo ako ha Dios nga karuyag ko mapriso hin napulo ka tuig basi respetuhon ako sugad nga membro han gang. Pero han nagin Saksi ako, naghangyo ako ha iya nga tugotan ako nga mag-alagad sugad nga bug-os-panahon nga ministro bisan la napulo ka tuig basi mabuligan ko liwat an iba. Ginbaton gud ito han Dios, kay 17 ka tuig na ako ha bug-os-panahon nga pag-alagad! Ngan ini pa, waray gud ako mapriso.

Damu han akon barkada hadto an priso pa tubtob yana. An iba patay na. Kon nahuhunahuna ko an akon naglabay, mapasalamaton gud ako ha akon Saksi nga mga kapamilya. Determinado hira nga magin iba ngan magkinabuhi uyon ha Biblia. Mas ginrirespeto ko hira kay han akon mga barkada. Labaw ha ngatanan, mapasalamaton ako ha Dios kay gintutdoan niya ako han gimaopayi nga pagkinabuhi.

 ANDRES: Natawo ngan nagdaku ako ha pobre nga lugar diin komon an droga, panikas, pamatay, ngan prostitusyon. Parahubog ngan adik hi Tatay. Pirme hira nag-aaway ni Nanay, ngan usahay nagigin pisikal na an ira away.

Bata pa ako han nagtikang ako pag-ininom ngan pagdroga. Haros ada ako pirme ha kakalsadahan, nangangawat ngan nagbabaligya han akon kinawat. Samtang nagtitikadaku ako, nangalimbasog hi Tatay nga magin duok ha akon, pero ha sayop nga paagi. Iya ako gintutdoan ha pagbaligya hin droga ngan hin iba pa nga kontrabando. Madagmit ako nga nagriko. Usa ka adlaw, may mga pulis nga inabot ha balay. Gin-aresto nira ako, ngan ginsentensyahan hin lima ka tuig nga kapriso tungod hin attempted murder.

Usa ka aga, igin-anunsyo ha prisohan nga gin-iimbitar han mga Saksi ni Jehova an mga priso nga tumambong hin pakighisgot ha Biblia. Tinambong ako. Naruyagan ko an akon hinbatian, salit nag-aram ako han Biblia kaupod han mga Saksi. Iginsumat nira kon ano gud an ginsisiring han Biblia ngan iginpakita an hitaas nga suruklan han Dios ha moral.

Waray pag-iha nasantop ko nga diri ko mahihimo an ginkikinahanglan nga pagbag-o kon waray an bulig han iba, labi na han mga panahon nga gintatarhog ako han akon mga igkasi-priso nga nadiri han akon ginbubuhat. Salit nag-ampo ako para hin kusog ngan kinaadman, ngan ginbuligan ako ni Jehova. Ngani, waray ako magpadara ha ira, lugod ginsumatan ko an iba nga priso mahitungod ha Biblia.

Han papagawson na ako ha prisohan, nabaraka gud ako nga karuyag ko na la nga mas mag-iha pa didto! Han tigawas na ako, damu han akon igkasi-priso an nagbabay. An iba mahigugmaon pa ngani nga nagsiring, “Uli na, Pastor.”

Diri ko gud nahuhunahuna kon ano daw la an akon nagin kinabuhi kon waray ako magpatutdo ha Dios. Mapasalamaton gud ako nga hinigugma ako han Dios ngan waray niya ako tagda nga diri na gud magbabag-o. a