“Padayon nga . . . hura nga magpasaylo ha usa kag usa bisan kon may hinungdan an bisan hin-o nga magreklamo kontra ha iba.”​—COLOSAS 3:13.

Kita ngatanan nagsasayop. Bangin makapasubo kita ha iba, o hira an makapasubo ha aton. Karuyag sidngon, kita ngatanan kinahanglan magpasaylo ngan pasayloon. Kon nagpapasaylo kita, diri kita nagdudumot ha nakapasubo ha aton. Diri kita ‘nabulos hin maraot ha maraot,’ ngan diri naton ginbabalik-balik ha iya an iya sayop o kaluyahan. (Roma 12:17) Pero ano man kon nasakitan gud kita ngan diri nawawara ha aton hunahuna an nahitabo? Kon sugad, kinahanglan matinalahuron nga ipakiistorya naton ito ha iya nga waray iba nga tawo. Kinahanglan nga an aton tumong makigmurayaw, diri ipakita kon hin-o an sayop.​—Roma 12:18.

“May pagkamapainubsanon nga iyo tagdon an iba nga labaw ha iyo.”​—FILIPOS 2:3.

Kon mapainubsanon ngan matinalahuron kita, nalilipay an mga tawo nga makig-upod ha aton. Maaram hira nga magigin buotan ngan makonsiderasyon kita ngan diri naton tutuyoon nga masakitan hira. Pero kon ginhuhunahuna naton nga labaw kita ha iba  o kon pirme naton iginpipirit an aton karuyag, makakahimo kita hin samok ngan tensyon. Lilikayan kita han mga tawo, ngan gutiay la an aton magigin sangkay, kon may-ada man.

“An Dios waray pinaurog, kondi ha tagsa nga nasud an tawo nga may kahadlok ha iya ngan nagbubuhat han husto ginkakarawat niya.”​—BUHAT 10:34, 35.

An aton Maglalarang diri naghuhunahuna nga mas maopay an iba nga tawo tungod han ira nasyonalidad, yinaknan, kahimtang ha kinabuhi, o kolor han panit. “Tikang ha usa nga tawo ginhimo niya an tagsa nga nasud han mga tawo.” (Buhat 17:26) Karuyag sidngon, an ngatanan nga tawo magburugto. Kon may dignidad ngan pagkabuotan an aton pagtratar ha ngatanan, napapalipay naton hira, mas malipayon kita, ngan napapalipay naton an aton Maglalarang.

“Pagsul-ot kamo han . . . pagkamalumo.”​—COLOSAS 3:12.

Kon malumo kita, nagigin komportable ha aton an iba. Diri hira nag-aalang nga kaistoryahon ngan tadungon pa ngani kita kay maaram hira nga magpapabilin kita nga kalmado. Ngan kon may nasisina ha aton, an aton malumo nga baton posible makapakalma hito nga tawo. “An malumo nga baton nakakapawara hin kapungot, pero an mapintas nga pulong nakakaaghat hin kasina,” siring han Proberbios 15:1.

“Mas daku an kalipay ha paghatag kay ha pagkarawat.”​—BUHAT 20:35.

Damu yana an hakog ngan naghuhunahuna han ira la kalugaringon. Pero an tinuod nga malipayon amo an mga tawo nga mahinatagon. (Lucas 6:38) Malipayon an mga mahinatagon kay mas hinigugma nira an mga tawo kay ha materyal nga mga butang. Ito gihapon nga gugma an nagpapagios ha ira nga magin mapasalamaton ngan ipakita an ira apresasyon kon may mahinatagon ha ira. (Colosas 3:15) Pakianhi an imo kalugaringon, ‘Hin-o an karuyag ko nga makaupod​—an kuripot ngan diri mapasalamaton o an mahinatagon ngan mapasalamaton?’ Ano an leksyon? Magin an klase han pagkatawo nga karuyag mo makita ha iba.​—Mateo 7:12.