“Kon an magraot manurok pariho hin mga banwa ngan kon an ngatanan nga magburuhat hin sala mag-uswag, pupoohon la gihapon hira ha kadayonan.”​—SALMO 92:7.

Sugad han aton nahibaroan ha nahiuna nga artikulo, padayon nga nagtitikaduro an karaotan. Diri kita angay mahipausa hini, kay igintagna ha Biblia ha 2 Timoteo 3:1-5 nga ha “kataposan nga mga adlaw” an mga tawo magigin maraot hinduro. Kataposan nga mga adlaw han ano? Hini nga kalibotan han diri diosnon nga mga tawo. Diri na maiha, wawad-on han Dios adton nadiri pagbag-o han ira maraot nga pagkinabuhi. Katapos, an mag-opay la nga tawo​—adton nasugot ha Dios​—an magpapabilin. “An magtadong magtatag-iya han tuna, ngan maukoy hira dida ha waray kataposan.”​—Salmo 37:29.

“An Dios nga naghahatag hin kamurayawan hirani na magbungkag kan Satanas.”​—ROMA 16:20.

Kon mawara na an ngatanan nga magraot, upod na hi Satanas ngan an mga demonyo, magkakaada na kamurayawan ha bug-os nga tuna. Nagsasaad an aton Maglalarang: “Waray bisan hin-o nga makakapahadlok ha [iyo].”​—Micas 4:4.

“An tolda han Dios aada ha katawohan . . . Ngan papahiron niya an ngatanan nga luha ha ira mga mata, ngan mawawara na an kamatayon, pati an kabidoan, pagtangis, ngan kasakit.”​—PAHAYAG 21:3, 4.

Matatapos an pag-antos ngan sakit kay wawad-on han Dios an ngatanan nga kadaot nga ginhimo ni Satanas, nira Adan ngan Eva, ngan han aton mismo pagin diri perpekto. Salit bisan ‘an kamatayon mawawara na.’ An mga tawo nga nahigugma ngan nasugot ha Maglalarang mabubuhi ha waray kataposan. Pero diin hira maukoy?

“An kamingawan ngan an uga nga tuna magrarayhak, ngan an disyerto nga kapatagan magkakalipay ngan mamumukad pariho han tanom nga safron.”​—ISAIAS 35:1.

Kon wad-on na han Dios an magraot, magigin paraiso an tuna! Magkakaada damu nga mag-opay nga parke ngan garden, ngan magkakaada hura nga pagkaon. (Salmo 72:16) An kadagatan, mga linaw, ngan mga salog magigin limpyo ngan mapupuno hin buhi nga mga linarang. Bisan an pulong nga “polusyon” posible nga mawara na ha aton bokabularyo! An mga tawo maukoy ha mga balay nga hira an naghimo ngan hira liwat an tag-iya. Ngan waray na gud bisan hin-o nga waray urukyan, gutóm, o pobre.​—Isaias 65:21, 22.

“Magkakaada pagkabanhaw.”​—BUHAT 24:15.

Karuyag mo ba makita utro an imo mga hinigugma nga namatay na? Bubuhion hira​—o babanhawon​—han makagarahum-ha-ngatanan nga Dios ha Paraiso nga tuna. Makikilala mo hira, ngan makikilala ka nira. Imadyina an imo kalipay ngan an ira liwat! Kay ano nga makakasiguro kita hini nga paglaom? Kay an Biblia naghahatag ha aton hin mga ehemplo han mga adulto ngan kabataan nga ginbuhi ngan nakaupod utro an ira pamilya. Dugang pa, kasagaran na nga ginbabanhaw ni Jesus an mga patay ha atubangan han damu nga tawo.​—Lucas 8:49-56; Juan 11:11-14, 38-44.