An polusyon ha hangin puydi makamatay han mga may kinabuhi ha tuna. Usa la ka porsyento han populasyon ha tuna an nakakahinggot hin limpyo nga hangin sumala ha World Health Organization.

An polusyon ha hangin mahimo magin hinungdan han sakit ha baga, kanser ha baga, ngan sakit ha kasingkasing. Ito liwat an hinungdan han temprano nga kamatay han mga 7,000,000 nga tawo kada tuig.

An aton planeta may natural nga abilidad basi padayon nga makagsuplay hin limpyo nga hangin ha ngatanan nga buhi nga linarang ha tuna. Pero inin natural nga mga proseso magigin mas epektibo la kon diri duro nga huhugawan han mga tawo an palibot. Pansina an pipira la nga ehemplo.

• Damu an maaram nga an kagurangan may abilidad nga maka-absorb hin carbon dioxide tikang ha hangin. Pero gutiay la an maaram nga mas daku an nahihimo han kabakhawan nga natubo ha matubig nga dapit nga hirani ha baybayon. Lima ka pilo nga carbon dioxide an natatanggal hito kay han kagurangan.

• Iginpapakita han bag-o nga mga pag-aram nga an pipira nga dagku nga banwa ha dagat sugad han kelp nakakag-absorb hin carbon dioxide ha atmospera ngan nakakaglubong liwat hito. An mga blade han kelp nga puropariho hin dahon may-ada sugad hin mga pantog nga puno hin hangin nga nabulig basi makalutaw ito hin hirayo. Kon hirayo na ha baybayon, nabuto iton sugad hin mga pantog, ngan an kelp nga puno hin carbon dioxide nalunod ha salad han kadagatan. Didto, nalulubong ito pati an carbon dioxide nga aada hito ha sulod hin damu ka siglo.

• An abilidad han aton atmospera nga makarekober tikang ha nakakadaot nga polusyon nakita han nagkaada lockdown tungod han COVID-19. Han 2020, han an mga pabrika ngan mga awto ha kalibotan haros waray na pagbubuga hin aso, madagmit nga nag-uswag an kalidad han hangin. Sumala han “2020 World Air Quality Report,” sobra 80 porsyento han nasud nga ira gin-estudyohan an nagsiring nga nagkaada hira mas malimpyo nga hangin waray pag-iha katapos ig-implementar an lockdown.

Padayon nga ginsisidngan han mga gobyerno an mga negosyante nga maghimo hin mga paagi para maibanan an polusyon ha hangin. An mga syentista liwat padayon nga nagdidiskobre hin bag-o nga mga paagi para maibanan an mga epekto han polusyon. Pananglitan, an usa nga proseso nagamit hin mga mikrobyo basi an mga hugaw magin diri nakakahilo nga mga substansya. Dugang pa, gin-aaghat han mga eksperto an mga tawo nga magbaktas o magbisikleta na la imbes nga sumakay hin awto ngan mamiling hin mga paagi nga maibanan an paggamit hin enerhiya ha ira balay.

Pero labaw pa hito an ginkikinahanglan, sugad han iginpapakita han 2022 nga report nga gintarampo han internasyonal nga mga ahensya, upod na an World Health Organization ngan an World Bank.

An report nasiring nga han 2020, mga tulo ka bahin han populasyon ha bug-os nga kalibotan an nagamit hin mga butang nga naghahatag hin polusyon ha hangin ha ira pagluto. Ha damu nga lugar, pipira la an nakakapalit hin bag-o nga mga stove o may access ha alternatibo nga mga fuel.

“Ini an siring han tinuod nga Dios, hi Jehova, an Maglalarang han kalangitan ngan . . . Hiya nga nagpahamutang han tuna ngan han ngatanan nga aada hito, Hiya nga naghatag hin gininhawa ha mga tawo nga aada hito.”—Isaias 42:5.

Ginlarang han Dios an hangin nga aton gin-giginhawa ngan an natural nga mga sikolo nga naglilimpyo han hangin, ngan waray tubtoban an iya gahum ngan pati an iya gugma ha mga tawo. Salit diri ba makatadunganon tumoo nga wawad-on niya an mga polusyon ha hangin? Kitaa an artikulo nga “An Dios Nagsasaad nga Masasalbar an Aton Planeta.”