May-ada Pa ba Yana Respeto ha Iba?
KON KAY ANO NGA IMPORTANTE AN RESPETO HA IBA
An pagrespeto ha iba nakakaiban hin tensyon ngan nakakabulig nga diri magtikagrabe an maraot nga sitwasyon.
-
Usa nga proberbio ha Biblia an nasiring: “An malumo nga baton nakakapawara hin kapungot, pero an mapintas nga pulong nakakaaghat hin kasina.” (Proberbios 15:1) An panyakan ngan buhat nga waray respeto nakakaaghat la hin kasina, ngan agsob nga nagriresulta hin kadaot.
-
Hi Jesus nagsiring: “Kon ano an nakakapuno ha kasingkasing amo an iginyayakan han baba.” (Mateo 12:34) Kon nagyayakan kita hin waray respeto, mahimo ini magpakita kon ano gud an aton inaabat ha mga tawo nga iba an lahi, tribo, nasyonalidad, o estado ha kinabuhi.
Hinin bag-o la nga surbey ha sobra 32,000 nga ginpakianhan ha 28 nga nasud, 65 porsyento an nagsiring nga yana pa la hira nakaeksperyensya hin duro nga kawaray-respeto han mga tawo.
AN PUYDI MO BUHATON
Aadto ka man ha eskwelahan o ha trabaho, respetoha an ngatanan nga tawo—bisan kon diri ka nauyon ha ira. Hibaroi an mga butang nga puydi niyo pagkauyonan. Mabulig ito ha imo nga diri ka maghukom ha iba o magin kritiko.
Tratara an iba ha paagi nga karuyag mo nga magin pagtratar ha imo han iba. Kon buotan ka ngan patas an imo pagtratar ha iba, mas daku an posibilidad nga trataron ka liwat nira ha sugad nga paagi.
Magin mapinasayloon. Palabya an nakakasakit nga mga pulong o buhat han iba ngan ayaw hunahuna nga karuyag ka nira pasakitan.
AN AMON GINBUBUHAT
Ha mga komunidad diin kami naukoy ngan nagtatrabaho, iginpapakita namon nga mga Saksi ni Jehova an respeto ha iba.
Nagtatanyag kami hin libre nga pagtutdo ha Biblia ha ngatanan nga tawo, pero diri namon ginpipirit ha iba an amon mga gintotoohan o opinyon. Lugod, nangangalimbasog kami nga iaplikar an sagdon ha Biblia pinaagi ha pagsumat han amon mensahe “nga may pagkamalumo ngan daku nga respeto.”—1 Pedro 3:15; 2 Timoteo 2:24.
Diri kami nagpapakita hin diskriminasyon ngan gin-aabiabi namon ha mga katirok an mga tawo nga iba-iba an gintikangan nga naruruyag mahibaro han igintututdo han Biblia. Nangangalimbasog kami nga magin makinarawaton ngan ‘tahuron an ngatanan nga mga tawo.’—1 Pedro 2:17, Maupay nga Sumat.
Ginrirespeto namon an awtoridad han gobyerno diin kami naukoy. (Roma 13:1) Ginsusugot namon an balaud ngan nagbabayad hin buhis. Ngan bisan kon nagpapabilin kami nga neutral ha politika, ginrirespeto namon an katungod han iba nga magdesisyon ha mga butang may kalabotan ha politika.
