May-ada Pa ba Yana Respeto ha Kalugaringon?
KON KAY ANO NGA IMPORTANTE AN RESPETO HA KALUGARINGON
Maaatubang han mga tawo nga may respeto ha kalugaringon an mga problema nga may kompyansa. Diri hira madali sumurender.
-
Iginpapakita han pag-research nga adton hamubo an pagkita ha ira kalugaringon madali mabaraka, magkaada hin depresyon, ngan hin eating disorder. Ngan mas daku an posibilidad nga maghubog hira ngan gumamit hin droga.
-
Adton may respeto ha kalugaringon naglilikay pagkompara han ira kalugaringon ha iba, salit mas masayon para ha ira an pakig-upod ngan pagkaada marig-on nga pakigsangkay. Pero adton hamubo an respeto ha kalugaringon may tendensya nga magin kritiko, nga puydi makadaot ha ira relasyon ha iba.
-
Adton may respeto ha kalugaringon nagpapabilin nga marig-on bisan kon may mga problema; diri nira ito gintutugotan nga makaulang ha pagkab-ot han ira tumong. Pero adton hamubo an respeto ha kalugaringon agsob maghunahuna nga daku nga ulang an gudti nga problema salit nasurender hira dayon.
AN PUYDI MO BUHATON
Pagpili hin makaparig-on nga kasangkayan. Pakig-upod ha mga tawo nga may respeto, interesado gud han imo kaopayan, ngan magpaparig-on ha imo.
Buligi an iba. Kon buotan ka ngan nagbubuhat hin maopay ha iba—upod na ha mga tawo nga diri makakabalos ha imo—maieksperyensyahan mo an tinuod nga kalipay tungod han paghatag. Magigin malipayon ka bisan kon waray makita han iba an imo ginbuhat nga maopay.
Buligi an imo mga anak nga mahibaro ha pagrespeto ha kalugaringon. An usa nga paagi amo an pagtugot ha ira nga sulbaron an ira kalugaringon nga mga problema, tubtob ha ira makakaya. Mabulig ito ha ira nga mahibaro kon paonan-o malalamposan o masusulbad an mga problema. Kon mahibabaro hira ha pagbuhat hito, mas magkakaada hira respeto ha ira kalugaringon yana, tubtob nga magin adulto hira.
AN AMON GINBUBUHAT
An mga katirok ngan programa ha pag-aram ha Biblia han mga Saksi ni Jehova nabulig ha mga tawo nga magin mas maopay an ira kinabuhi ngan magkaada respeto ha kalugaringon.
AN AMON SINEMANA NGA MGA KATIROK
An amon sinemana nga mga katirok libre ngan abrido ha publiko. Didto, nagpapahimulos kami hin basado ha Biblia nga mga pahayag nga may-ada mga suhestyon kon paonan-o magkakaada respeto ha kalugaringon. Pananglitan, didto, mahibabaro ka . . .
-
kon kay ano nga importante ka ha Dios
-
kon paonan-o mabibilngan an tinuod nga katuyoan han kinabuhi
-
kon paonan-o magkakaada marig-on ngan nagpapadayon nga pakigsangkay
May makikilala ka nga tinuod nga kasangkayan nga ‘nagtatagad ha usa kag usa.’—1 Corinto 12:25, 26.
Basi mahibaro pa parte ha amon mga katirok, i-search ha jw.org an halipot nga video nga Ano an Ginbubuhat ha Kingdom Hall?
AN AMON PAG-ARAM HA BIBLIA
Nagtatanyag kami hin libre nga interactive nga pag-aram ha Biblia gamit an libro nga Mabuhi hin Malipayon ha Waray Kataposan! Ini nga libro nagpi-feature hin mga teksto, klaro nga pangatadongan, epektibo nga mga pakiana, makapainteres nga mga video, ngan mag-opay nga piktyur. Ini nga pag-aram ha Biblia nabulig ha mga tawo nga magkaada dignidad ngan mas maopay nga kinabuhi.
Basi mahibaro kon paonan-o ka magpapahimulos han pag-aram ha Biblia kaupod han mga Saksi ni Jehova, i-search ha jw.org an halipot nga video nga Kay Ano nga Kinahanglan Pag-adman an Biblia?
Bangin Maruyagan Mo Liwat
PAGPAMATA!
Kon Paonan-o Magpapakita hin Respeto
An pagtahod ha imo padis diri kalidad nga sadang ipakita hin panalagsa la; importante gud ito. Paonan-o mo maipapakita nga gintatahod mo an imo padis?
MAHITUNGOD HA AMON
Paghangyo nga May Bumisita ha Imo
Hisgotan an usa nga pakiana ha Biblia, o mahibaro hin dugang mahitungod ha mga Saksi ni Jehova.
MAHITUNGOD HA AMON
Atender ha mga Katirok han mga Saksi ni Jehova
Hibaroi an amon katirokan ngan kon paonan-o kami nagsisingba. Imbitado an ngatanan ngan waray pangulekta hin kwarta nga hihimoon.
