May-ada Pa ba Yana Respeto ha Kinabuhi?
KON KAY ANO NGA IMPORTANTE AN RESPETO HA KINABUHI
An mga buhat nga nagpapakita hin kawaray-respeto ha kinabuhi mahimo makadaot gud ha imo kahimsog ngan ha kahimsog han iba.
-
An pagsigarilyo diri la nagigin hinungdan hin kanser kondi nagpapaluya liwat ito ha abilidad han lawas nga atohan ito nga sakit. Mga 90 porsyento han namatay tungod han kanser ha baga resulta han pagsigarilyo o pakahinggot hin aso hin sigarilyo.
-
An pamusil nagigin hinungdan hin truma ha emosyon para ha damu kada tuig. Usa nga report han Stanford University an nasiring: “Iginpapakita han pag-research nga bisan adton nakatalwas [ha pamusil ha eskwelahan] may-ada la gihapon mga problema ha emosyon ngan hunahuna bisan kon naglabay na an damu ka tuig katapos mahitabo ito.”
-
An mga nagdadrayb nga nakainom o naka-drugs nagigin hinungdan nga mameligro an iba nga aada ha kalsada o bisan adton naglalakat ha ligid han kalsada. Kon ginbabalewaray han mga tawo an pagkaimportante han kinabuhi, mahimo mag-antos bisan an inosente nga mga tawo.
AN PUYDI MO BUHATON
Proteksyuni an imo kahimsog. Diri pa urhi an ngatanan basi iundang an nakakadaot nga mga bisyo sugad han pagsigarilyo, pag-vape, sobra nga pag-inom, o paggamit hin droga. An sugad nga mga bisyo nakakadaot han imo kinabuhi ngan nagpapakita hin kawaray-respeto ha kinabuhi han mga nakapalibot ha imo, upod na an imo pamilya.
Magin mahunahunaon ha safety. Basi malikyan an mga aksidente, mintinara hin maopay an imo balay. Paghirot ha pagdrayb, ngan tipigi nga maopay an kondisyon han imo sarakyan. Ayaw pagpapresyur ha iba ha mga buruhaton nga mahimo magin hinungdan hin seryoso nga injury o kamatayon.
Magin buotan ha iba. An pagrespeto ha kinabuhi nangangahulogan nga buotan kita ha iba anoman an ira lahi, nasyonalidad, o estado ha kinabuhi. Importante ito kay an diskriminasyon ngan kangalas amo gud an mga hinungdan han kamadarahog ngan araway ha kalibotan.
AN AMON GINBUBUHAT
An mga Saksi ni Jehova nag-aaghat hin balanse ngan mahimsog nga estilo han pagkinabuhi. An amon programa ha pagtutdo parte ha Biblia nakabulig ha mga tawo nga malamposan an ira mga adiksyon ngan nakakadaot nga mga bisyo.
Ginsusunod gud namon hin maopay an mga suruklan ha safety ha amon mga proyekto han pagpanukod. Ginti-train an mga nagbuboluntaryo ha pagtukod han amon mga lugar han katirokan ngan iba pa nga pasilidad nga ginagamit ha pagsuporta ha amon pagtutdo ha Biblia nga buruhaton basi malikyan an mga aksidente. Regular nga gin-iinspeksyon an amon mga pasilidad basi masiguro nga nasusunod hito an mga balaud ha safety hito nga lugar.
Nabulig kami ha mga tawo nga nakakaeksperyensya hin mga kalamidad. Hinin naglabay nga 12 ka bulan, nagresponde kami ha mga 200 nga makamaratay nga mga kalamidad ha bug-os nga kalibotan ngan naggasto hin hirani 12 ka milyon ka dolyar hin donasyon basi maghatag hin relief ha mga biktima.
Han nagsarang an Ebola, nga nagin hinungdan nga mag-antos an mga tawo ha West Africa (2014) ngan ha Democratic Republic of Congo (2018), gintutdoan namon an mga tawo kon paonan-o malilikyan an pagsarang han makamaratay nga sakit. Nagpadara kami hin mga representante basi magpahayag ha mga grupo ha topiko nga “An Pagin Masinugtanon Nagtatalwas hin mga Kinabuhi.” Nagbutang kami hin mga hurunawan ha entrada han kada lugar han pagsingba ngan ginpabug-atan an pagkaimportante han paghunaw ngan iba pa nga praktikal nga butang basi malikayan an pagsarang han sakit.
Ha Sierra Leone, usa nga anunsyo ha radyo an naghatag hin kumendasyon ha mga Saksi ni Jehova ha pagbulig ha mga Saksi ngan diri Saksi ha komunidad basi malikayan an Ebola virus.
Hurunawan ha Kingdom Hall han nagsarang an Ebola virus ha Liberia han 2014
a Ha kadaan nga panahon ha Middle East, ito nga maaramon nga surundon nagpapakita han pagin mahunahunaon ha safety ha mga membro han pamilya ngan ha iba.
