AN GINSISIRING HAN PIPIRA

Iba-iba an gintotoohan han mga tawo mahitungod ha langit ngan ha katuyoan hito. Pananglitan:

• Damu han nag-aangkon nga Kristiano an nauyon ha New Catholic Encyclopedia, nga nasiring nga an langit “an ultimo nga urukyan han mga namatay nga may pag-uyon han Ginoo.”

• Ha Judaismo, mas importante an kinabuhi yana kay han kinabuhi katapos han kamatayon, siring ni Rabbi Bentzion Kravitz. Pero sugad hin iya iginpapasabot nga “ha langit, an kalag nakakaeksperyensya hin duro gud nga kalipay—usa nga mas hilarom nga kahibaro ngan pag-abat hin pagin duok ha Dios.” Ha pariho nga paagi, ginkakarawat ni Kravitz nga “bisan kon natoo ha langit an Judaismo, haros waray ginsisiring an Torah mahitungod hito.”

• An mga Hindu ngan mga Budhista natoo nga damu an espirituwal nga langit. Ini an temporaryo nga ginkakadtoan han tawo, katapos ipapanganak utro hiya ha tuna o madadangat niya an Nirvana o an Buddhahood—usa nga kahimtang nga mas mahimayaon kay ha langit.

• An iba diri natoo ha bisan ano nga ideya mahitungod ha langit ngan nasiring nga binatabata ito ngan waray pulos.

AN IGINTUTUTDO HAN BIBLIA

Ha Biblia, an pulong nga “langit” may-ada damu nga kahulogan. Pananglitan:

• Ha Genesis 1:20, ginhuhulagway an paglarang ha katamsihan nga ‘nagkakalupad ha [bawbaw] han tuna ha sakob han panganuron han langit.’ Hini nga kahimtang, an pulong nga “langit” nagtutudlok ha aton nakikita nga atmospera.

• An Isaias 13:10 naghihisgot mahitungod han “mga bitoon ha langit ngan [han] mga maghayag dida”—an aton gintatawag nga kawanangan.

• An Biblia naghihisgot mahitungod han ‘langit nga urukyan nga lugar’ han Dios ngan nagsiring nga may-ada “mga anghel ha langit.” (1 Hadi 8:30; Mateo 18:10) Tigamni nga an pulong nga “langit” diri la simboliko, kondi literal nga urukyan. *

“Tamod tikang ha langit ngan kitaa tikang ha puroy-anan han imo pagkabaraan ngan han imo himaya.”—Isaias 63:15.

An Biblia diri nagtututdo nga an tuna temporaryo la nga urukyan diin huhulaton naton an kamatayon basi mahingadto kita ha iba nga kinabuhi ha langit. Matin-aw nga ginsisiring han Biblia nga an kamatayon diri gud bahin han orihinal nga katuyoan han Dios para ha tawo. Tagda ini:

• An Dios nagsiring ha siyahan nga mag-asawa: “Magmabungahon kamo ngan magdamu ngan pun-on niyo an tuna.” (Genesis 1:28) An tuna an magigin permanente nga urukyan han tawo, diin mahimo hiya mabuhi hin waray kataposan. Mamamatay la an siyahan nga lalaki ngan babaye kon magtalapas hira ha Dios. Makasurubo, nagtalapas hira.—Genesis 2:17; 3:6.

• An pagtalapas hiton siyahan nga tawo nagresulta ha kamatayon, diri la han iya kamatayon, kondi pati han kamatayon han iya asawa ngan mga anak. (Roma 5:12) Waray na gud ba paglaom an mga tawo?

• An Biblia nasiring nga “ginpapamulat naton an iya iginsaad nga bag-o nga mga langit ngan bag-o nga tuna.” * (2 Pedro 3:13) Pinaagi han iya Ginhadian, ibabalik han Dios an tuna ha kahimtang nga iya karuyag para hito, “ngan mawawara na an kamatayon.” (Pahayag 21:3, 4) An ginhihisgotan ba dinhi an kinabuhi ha langit o ha tuna? Basi an usa nga butang ‘mawara na,’ kinahanglan nag-ieksister na ito. Kondi waray kamatayon ha langit. Salit makatadunganon la nga an teksto nagtutudlok ha kon ano an mahitatabo ha tuna, diin ginhimo basi aton pag-ukyan ngan diin ginhahandom naton nga makaupod an aton mga hinigugma. An Biblia nasiring liwat nga babanhawon an mga patay ngan makakaupod nira an ira mga hinigugma.—Juan 5:28, 29.

Damu an nalilipay ha paghibaro han tinuod nga igintututdo han Biblia mahitungod ha langit. Pananglitan, hi George nga Katoliko hadto, nagsiring: “Naliliaw ako ha igintututdo han Biblia mahitungod ha kinabuhi nga waray kataposan ha tuna. Makatadunganon ini kay ha pagkadto ha langit.” *

“An mga langit amo an mga langit ni Jehova; Kondi an tuna iya ihinatag ha mga anak han mga tawo.”—Salmo 115:16.