AN BATA ngan lagas nga wizard, seksi nga aswang, ngan maghusay ngan gwapo nga bampira, pipira la han ‘diri sugad ha aton’ nga mga tawohan nga nagin bahin ha industriya han libro, pelikula, ngan video game. Kay ano nga naruyagan gud ito?

“An pagtoo ha mga aswang tigda nga nagin mas sikat ha naglabay pa la nga mga dekada, tikang ha usa ha kada napulo ngadto ha usa ha kada tulo nga Amerikano an natoo hito,” siring han propesor ha sosyolohiya nga hi Claude Fischer. “Haros doble ha kadamu han mga lagas an kadamu han mga batan-on ha Amerika an nasiring nga nagpapakonsulta hira ha mga saykik, natoo ha mga aswang, ngan natoo ha mga balay nga may naukoy nga mga espiritu.”

Salit diri urusahon nga nasikat na liwat an mga istorya mahitungod han magraot nga espiritu nga nasulod ha lawas han tawo. “An hinungdan han pagin sikat utro han demonismo ha popular nga kultura amo an duro nga pagsikat han zombie, tawo nga lobo, ngan bampira ha naglabay nga dekada,” siring ni Michael Calia han The Wall Street Journal.

Usa nga report an nasiring nga “tikang ha mga 25-50 porsyento han mga tawo ha bug-os nga kalibotan an natoo ha aswang, ngan an mga aswang sikat ha literatura han kadam-an nga lugar.” Ngan an usa nga surbey ha Estados Unidos han mga propesor ha sosyolohiya nga hira Christopher Bader ngan Carson Mencken “nagpapakita nga an urusahon nga 70-80 porsyento han mga Amerikano an marig-on nga natoo ha diri maminos usa nga klase hin buruhaton nga may kalabotan ha espiritismo.”

An pakigbahin ba ha espiritismo usa la nga kaliawan nga diri nakakadaot?