Kon oo an baton, karuyag sidngon may mahihimo kita basi maibanan an aton mga pag-antos.

Ano kadaku an naiaamot han tawo ha masunod nga mga hinungdan han pag-antos?

• Pag-abuso.

  Ginbabanabana han World Health Organization (WHO) nga 1 ha 4 nga adulto an nag-antos hin pisikal nga pag-abuso han bata pa hira ngan 1 ha 3 nga babaye an nakaeksperyensya hin pisikal o seksuwal nga pag-abuso (o hito nga duha) ha ira kinabuhi.

• Kamatyi hin Hinigugma.

  “Ginbabanabana nga 477,000 an ginpatay ha bug-os nga kalibotan han 2016,” siring han World Health Statistics 2018, nga iginpublikar han WHO. Diri pa hini upod an 180,000 nga ginhuhunahuna nga namatay ha mga girra ngan araway hito nga tuig.

• Problema ha Kahimsog.

  Ha usa nga artikulo han magasin nga National Geographic, an parasurat nga hi Fran Smith nagsiring nga sobra usa ka bilyon an naninigarilyo, ngan tabako an usa nga rason han nangunguna nga hinungdan han kamatayon sugad han sakit ha kasingkasing, istrok, ngan lung cancer.

• Diskriminasyon.

  “An kapobrehan, diskriminasyon tungod ha estado ha kinabuhi, lahi, sekso han usa, pagin dayo, ngan pakigkompetensya nakakadugang ha mental nga pag-antos,” siring han psychologist nga hi Jay Watts.

  MAHIBARO HIN DUGANG

  Kitaa ha jw.org an video nga Kay Ano nga Ginlarang han Dios an Tuna?

Mga tawo an hinungdan han kadam-an nga pag-antos yana.

An kaurogan han pag-antos resulta han abusado nga mga gobyerno nga nagpapakuri han kinabuhi han mga tawo nga ira nasasakopan.

“Ginmamandoan han tawo an iya igkasi-tawo ha iya ikakadaot.”​—ECLESIASTES 8:9.

Puydi maibanan an pag-antos.

An mga prinsipyo ha Biblia nabulig nga magkaada maopay nga kahimsog ngan mamurayawon nga relasyon ha iba.

“An kalmado nga kasingkasing naghahatag hin kinabuhi ha lawas, pero an pangabugho kadunotan ha mga tul-an.”​—PROBERBIOS 14:30.

“Bayai niyo an ngatanan nga klase hin pagdumot, kasina, kapungot, pagsinggit, ngan nakakadaot nga panyakan, sugad man an ngatanan nga karaotan.”​—EFESO 4:31.