Baga hin diri makatadunganon kon nag-aantos an mag-opay nga tawo. May mga nasiring liwat nga waray pulos an pagin maopay nga tawo kon mag-aantos man la.

May mga natoo nga an mga tawo pauroutro nga namamatay ngan igin-aanak. Nasiring hira nga adton nagbuhat hin maopay igin-aanak utro ha mas maopay nga kahimtang, samtang adton nagbuhat hin maraot igin-aanak utro ha kinabuhi nga puno hin pag-antos. Sumala hito nga katutdoan, bisan an maopay nga tawo mahimo mag-antos kon nakabuhat hiya hin maraot ha iya “naglabay nga kinabuhi.” Pero . . .

• Ano an katuyoan hito nga pag-antos kon an usa nga tawo nga ig-aanak utro diri man nahinunumdom ha iya naglabay nga kinabuhi?

• Ano an pulos han aton pagpinaniguro nga magin mahimsog ngan makalikay ha aksidente kon an aton kinabuhi yana nakadepende man ngay-an ha aton ginbuhat ha naglabay nga kinabuhi?

  MAHIBARO HIN DUGANG

  Kitaa ha jw.org an video nga Kay Ano nga Gintutugotan han Dios an Pag-antos?

An pag-antos diri sirot han Dios.

Ha kabaliktaran, kaurogan han pag-antos resulta han diri ginlalaoman nga panhitabo, tungod kay an usa aada ha sayop nga lugar ngan ha sayop nga panahon.

“Diri pirme an maglaksi an nagdadaog ha rumba, diri pirme an magkusog an nagdadaog ha girra, diri pirme an mga maaramon an nagkakaada han pagkaon, diri pirme an mga baltok an nagkakaada han mga bahandi, ngan diri pirme an mga may kahibaro an naglalampos, kay an panahon ngan diri ginlalaoman nga mga hitabo naabot ha ira ngatanan.”​—ECLESIASTES 9:11.

An aton pagin makasasala nakakadugang han aton pag-antos.

Kasagaran na nga ginagamit han mga tawo an pulong nga “sala” basi magtudlok ha maraot nga ginbubuhat han usa. Pero ginagamit liwat ito ha Biblia basi ihulagway an usa nga kahimtang nga napanunod han ngatanan​—maopay ngan maraot nga tawo.

“Igin-anak ako nga salaan, ngan makasasala tikang han iginburod ako han akon nanay.”​—SALMO 51:5, Footnote.

An aton napanunod nga sala may maraot nga epekto ha mga tawo.

Tungod hito, nadaot an aton maopay nga relasyon ha Dios, ngan diri na kita kahiusa han iba pa Niya nga linarang. Nagresulta ito hin duro nga pag-antos, ha tagsa nga indibiduwal ngan ha katawohan ha kabug-osan.

“Kon karuyag ko buhaton an husto, an maraot an aadi ha akon.”​—ROMA 7:21.

“An ngatanan nga linarang padayon nga naghaharoy nga magkaurupod ngan nagsasakit nga magkaurupod tubtob yana.”​—ROMA 8:22.