Espirituwalidad
Sugad han ginsiring han siyahan nga artikulo, damu an natoo nga an Biblia baraan nga libro. Nakita nira nga kon ginbabasa ngan ginsusunod nira an mga giya hito, nagigin duok hira ha Dios ngan nasasabtan nira an katuyoan han kinabuhi.
Ginagamit han Biblia an pulong nga “espirituwalidad” para magtudlok ha disposisyon han usa ha kinabuhi. (Judas 18, 19) Diri pariho ha tawo nga nakapokus la ha kalugaringon, an tawo nga mahunahunaon ha espirituwal nagpapabili ha giya han Dios.—Efeso 5:1.
PAGLAOM
PRINSIPYO HA BIBLIA: “Kon manluya ka ha mga panahon han kakurian, magigin gutiay gud an imo kusog.”—Proberbios 24:10, footnote.
AN KARUYAG SIDNGON: An panluya ha emosyon nakakaubos han kusog nga kinahanglan naton basi maatubang an mga problema. Ha luyo nga bahin, an paglaom maghahatag ha aton hin kaisog basi makapadayon. Nakakaliaw hibaroan nga an mga problema yana temporaryo la, ngani bangin may maihatag ito nga kaopayan ha aton.
AN IMO PUYDI HIMOON: Hunahunaa an mag-opay nga mahitatabo ha maabot nga mga panahon. Imbes nga magkinabaraka ha posible mahitabo o maghinulat la hin maopay nga tyempo, gios uyon ha imo mga tumong. Oo, puydi mahitabo an “diri ginlalaoman” nga mga butang. (Eclesiastes 9:11) Kondi, kasagaran nga mas maopay an nahitatabo kay han aton ginlalaoman. Salit, gamit an ehemplo han pag-uma, an Biblia nasiring: “Igsabwag an imo binhi ha aga ngan ayaw papahuwaya an imo kamot tubtob ha gab-i; kay diri ka maaram kon hain hito an matubo, ini ba o adto, o bangin tumubo ito nga duha.”—Eclesiastes 11:6.
BATON HA IMPORTANTE NGA MGA PAKIANA
PRINSIPYO HA BIBLIA: ‘Tagi ako hin pagsabot. An imo pulong kamatuoran.’—Salmo 119:144, 160.
AN KARUYAG SIDNGON: Ginbabaton han Biblia an mga pakiana han kadam-an, sugad han
-
Diin kita nagtikang?
-
Kay ano nga aanhi kita?
-
Ano an mahitatabo kon mamatay an usa?
-
Sugad na la ba hini an kinabuhi?
Napaopay han minilyon nga tawo ha bug-os nga kalibotan an ira kinabuhi pinaagi ha pag-usisa han baton han Biblia hito nga mga pakiana ngan han iba pa.
AN IMO PUYDI HIMOON: Usisaha kon ano an igintututdo han Biblia. Hangyoa an usa han mga Saksi ni Jehova nga buligan ka nga masabtan ito. Kitaa an amon website nga jw.org/war o tambong ha usa han amon katirok—waray ito bayad ngan abrido ha ngatanan.
IBA PA NGA PRINSIPYO HA BIBLIA
Kitaa an video nga Kay Ano nga Kinahanglan Pag-adman an Biblia? ha jw.org/war. Makikita ito ha sobra 880 nga yinaknan
HUNAHUNAA AN IMO ESPIRITUWAL NGA PANGINAHANGLAN.
“Malipayon an mga mahunahunaon han ira espirituwal nga panginahanglan.”—MATEO 5:3.
MAHIBARO HIN DUGANG MAHITUNGOD HA DIOS.
‘Pamilnga an Dios, ngan mahiaagian [mo] gud hiya, diri hiya hirayo ha tagsa ha aton.’—BUHAT 17:27.
BASAHA NGAN PAMALANDONGA AN MENSAHE HAN BIBLIA.
“An iya kalipay aada ha balaud ni Jehova, * ngan ginpapamalandong niya an Iya balaud ha adlaw ngan gab-i. . . . An ngatanan nga iya ginbubuhat maglalampos.”—SALMO 1:2, 3, footnote.
^ par. 23 Ha Biblia, Jehova an ngaran han Dios.
Bangin Maruyagan Mo Liwat
AN BARANTAYAN
Paonan-o Mapapauswag han Biblia an Akon Kinabuhi?
Mababasa dinhi hinin kadaan nga libro an mapulsanon nga mga sagdon.
