Naisaysay ba han mga syentista kon paonan-o nagtikang an uniberso ngan an kinabuhi? Waray. May mga nasiring nga an mga syentista nga nag-aaram hin cosmology makakagsaysay kon paonan-o nagtikang an uniberso. Pero hi Marcelo Gleiser, nga propesor han astronomy ha Dartmouth College ngan usa nga agnostiko, nagsiring: “Waray gud namon maisaysay kon paonan-o nagtikang an uniberso.”

Parte naman ha kon paonan-o nagtikang an kinabuhi, usa nga artikulo ha Science News nga magasin an nagsiring: “Bangin imposible mahibaroan kon paonan-o gud nagtikang an kinabuhi ha Tuna: An kadam-an nga bato ngan fossil nga makakagsumat kon ano gud an nahitabo ha siyahan nga mga adlaw han Tuna maiha na nga nawara.” Makikita naton ha ira ginsiring nga waray pa mabaton han syensya an pakiana nga, Paonan-o nagtikang an uniberso ngan an kinabuhi?

Pero bangin mahunahuna mo, ‘Kon an kinabuhi ha tuna gindisenyo, hin-o an nagdisenyo hito?’ Bangin naipakiana mo liwat an masunod: ‘Kon may maaramon ngan mahigugmaon nga Maglalarang, kay ano nga tutugotan niya an iya linarang nga mga tawo nga mag-antos? Kay ano nga tutugotan niya an damu hinduro nga relihiyon? Kay ano nga tutugotan niya an iya mga magsiringba nga magbuhat hin damu gud nga magraot nga butang?’

Diri mababaton han syensya ito nga mga pakiana. Pero diri karuyag sidngon nga diri ka makakabiling hin makapatagbaw nga baton. Ngani, damu an nakabiling hin masasarigan nga baton ha Biblia.

Kon karuyag mo mahibaroan kon kay ano nga an pipira nga syentista nga nag-aram han Biblia nasiring nga natoo hira ha Maglalarang, bisitaha an jw.org. Pamilnga an “punto de bista ha gintikangan han kinabuhi.”