Kay Ano nga Importante an Baton?
Kay ano nga importante kon may-ada ba Maglalarang? Kon makombinse ka han ebidensya nga may Makagarahum-ha-ngatanan nga Dios, bangin maruyag ka pag-usisa han ebidensya nga giniyahan niya an Biblia. Ngan kon nasarig ka ha ginsisiring han Biblia, mahimo ka magpahimulos ha masunod nga mga paagi.
Magigin mas malipayon an imo kinabuhi
AN BIBLIA NASIRING: “Nagbuhat [an Dios] hin maopay pinaagi ha paghatag ha iyo hin uran tikang ha langit ngan hin mabungahon nga mga panahon, nga gintatagan kamo hin damu nga pagkaon ngan ginpupuno an iyo kasingkasing hin kalipay.”—Buhat 14:17.
AN KARUYAG SIDNGON HITO: An tanan nga natural nga butang nga imo nai-enjoy regalo tikang ha Maglalarang. Mas maaapresyar mo pa gud ini nga mga regalo kon mahibaroan mo kon ano ka kahinigugma han Humaratag hito.
Magkakaada ka masasarigan nga giya para ha adlaw-adlaw nga pagkinabuhi
AN BIBLIA NASIRING: “Masasabtan mo an pagin matadong, an hustisya, ngan an pagin patas, an bug-os nga pamaagi han pagin maopay.”—Proberbios 2:9.
AN KARUYAG SIDNGON HITO: Sugad nga imo Maglalarang, maaram an Dios kon ano an imo kinahanglan basi magin malipayon. Kon uusisahon mo an Biblia, damu an imo mahibabaroan nga makakabulig ha imo yana.
Mababaton an imo mga pakiana
AN BIBLIA NASIRING: “Hiaagian mo an kahibaro mahitungod ha Dios.”—Proberbios 2:5.
AN KARUYAG SIDNGON HITO: An paghibaro nga may Maglalarang makakabulig ha imo nga mabaton an importante nga mga pakiana sugad han: Ano an katuyoan han kinabuhi? Kay ano nga duro an pag-antos? Ano an mahitatabo kon mamatay kita? Makakabiling ka hin masasarigan nga mga baton ha Biblia.
Magkakaada ka paglaom para ha tiarabot
AN BIBLIA NASIRING: “‘Maaram gud ako han akon mga ginhuhunahuna para ha iyo,’ nasiring hi Jehova. ‘Karuyag ko magkaada kamo hin kamurayawan, diri hin kadaot. Karuyag ko kamo tagan hin kabubuwason ngan hin paglaom.’”—Jeremias 29:11.
AN KARUYAG SIDNGON HITO: An Dios nagsasaad nga ha tiarabot wawad-on niya an karaotan, pag-antos, ngan bisan an kamatayon. Kon nasarig ka ha mga saad han Dios, an imo paglaom ha sugad nga tiarabot mabulig ha imo nga magkaada kaisog ha pag-atubang han imo mga problema.
Bangin Maruyagan Mo Liwat
PAGPAMATA!
An Dalan han Kalipay—Katuyoan ha Kinabuhi
An pakabiling hin makapatagbaw nga baton ha importante nga mga pakiana ha kinabuhi importante basi magin malipayon kita.
