An uniberso ba ngan an kinabuhi dida hito ginlarang han Dios o tigda la ito nga inulpot? An mga pulong han duha nga physicist nga ginkotar dinhi hini nga artikulo ngan an siyahan nga mga pulong han Biblia nagsusumat hin magkaiba gud nga baton hito nga pakiana. Ito nga duha pariho may marig-on nga mga nasuporta. Pero damu an diri sigurado. Gindidebatehan ito han mga tawo ha sikat nga mga libro ngan ha mga salida ha TV.

An imo mga titser bangin may kompyansa nga nagsiring nga an uniberso ngan an kinabuhi dida hito tigda la nga inulpot, ngan waray ito Maglalarang. Pero naghatag ba hira hin ebidensya nga waray Maglalarang? Ha luyo nga bahin, bangin nakabati ka na ha mga lider han relihiyon nga nagwawali nga may-ada Maglalarang. Pero naghatag ba hira hin ebidensya basi pamatud-an an ira ginyakan? O nagsiring hira nga kinahanglan mo la tumoo ha Dios bisan waray ebidensya?

Waray ruhaduha nga nahunahuna mo na ini nga pakiana ngan bangin inaabat mo nga waray sigurado nga makakasumat kon may-ada ba Maglalarang. Ngan bangin may usa ka pa nga pakiana: Importante gud ba nga mahibaroan an baton hito?

Siyahan, ipipresenta hini nga isyu han Pagpamata! an pipira nga ebidensya nga nakakombinse ha damu nga tumoo ha Maglalarang. Katapos, hihisgotan hini kon kay ano nga importante an baton ha pakiana parte ha kon paonan-o nagtikang an kinabuhi ha tuna.