An Biblia waray espisipiko nga ginsisiring mahitungod han legal nga mga katungod han pagpakasal han duha nga pariho an sekso. Salit an mas importante nga pakiana amo an, Ano an ginsisiring han Biblia mahitungod han homoseksuwalidad?

Waray usisaha hin maopay han damu an Biblia, pero naghuhunahuna hira nga maaram hira han baton—kondi an ira baton diri nagkakauruyon! May mga nasiring nga klaro nga nakontra an Biblia ha homoseksuwalidad. An iba nasiring nga an sugo han Biblia nga “higugmaa an imo igkasi-tawo” nasuporta ha bisan ano nga seksuwal nga estilo han pagkinabuhi.—Roma 13:9.

Para ha imo, hain hini an husto?

1. An Biblia nagkukondenar han homoseksuwal nga mga buhat.

2. An Biblia nagkukonsinter han homoseksuwal nga mga buhat.

3. An Biblia nag-aaghat hin homophobia (kangalas o diskriminasyon kontra ha mga homoseksuwal).

BATON:

1. HUSTO. An Biblia nasiring: “[An] mga lalaki nga nakikigrelasyon ha igkasi-lalaki . . . diri makakapanunod han Ginhadian han Dios.” (1 Corinto 6:9, 10) Ini nga prinsipyo aplikado liwat ha kababayin-an.—Roma 1:26.

2. SAYOP. An Biblia nasiring nga an sex para la ha lalaki ngan babaye nga mag-asawa.—Genesis 1:27, 28; Proberbios 5:18, 19.

3. SAYOP. Bisan kon ginkukondenar han Biblia an homoseksuwal nga mga buhat, diri ito nag-aaghat hin diskriminasyon, mga krimen tungod han kangalas ha mga homoseksuwal, o iba pa nga klase hin pagmaltrato ha ira.—Roma 12:18. ^[1]

An mga Saksi ni Jehova natoo nga an mga balaud han Biblia ha moral amo an gimaopayi nga suruklan ha pagkinabuhi, ngan ginpili nira nga sundon ito. (Isaias 48:17) ^[2] Nangangahulogan ini nga ginsasalikway nira an tanan nga sayop nga seksuwal nga mga buhat, upod na an homoseksuwalidad. (1 Corinto 6:18) ^[3] Ito an ginpili nga estilo han pagkinabuhi han mga Saksi, ngan may-ada hira katungod hito.

Dugang pa, an mga Saksi ni Jehova nangangalimbasog nga “makigmurayaw ha ngatanan nga tawo.” (Hebreo 12:14) Bisan kon ginkukondenar nira an homoseksuwal nga mga buhat, diri nira iginpipirit ha iba an ira gintotoohan, diri hira nakikigbahin ha mga krimen tungod ha kangalas ha mga homoseksuwal ngan diri hira nalilipay hito nga mga krimen. Nangangalimbasog hira nga sundon an Bulawanon nga Surundon pinaagi ha pagtratar ha iba sugad han paagi nga karuyag nira nga trataron hira.—Mateo 7:12.

May mga nasiring nga gin-aaghat han Biblia an diskriminasyon kontra ha mga homoseksuwal ngan adton nagsusunod han balaud hito ha moral sarado an hunahuna. ‘Iginsurat an Biblia ha panahon nga diri abrido an panhunahuna han tawo,’ siring nira. ‘Ginkakarawat naton yana an ngatanan nga tawo anoman an ira kultura, nasyonalidad, ngan seksuwalidad.’ Para ha ira, an pagdumiri ha homoseksuwalidad pariho ha pagdumiri ha mga tawo nga iba an nasyonalidad. Makatadunganon ba ito nga pagtanding? Diri. Kay ano?

Tungod kay magkaiba an pagdumiri ha homoseksuwal nga mga buhat ngan an pagdumiri ha homoseksuwal nga mga tawo. An Biblia nagsusugo ha mga Kristiano nga tahuron an ngatanan nga klase hin tawo. (1 Pedro 2:17) ^[4] Pero diri ito nagpapasabot nga obligado an mga Kristiano nga karawaton an ngatanan nga klase hin buhat.

Tagda ini nga pagtanding: Gintatagad mo nga nakakadaot ngan makangaralas pa ngani an pagsigarilyo. Kondi ano man kon may-ada ka katrabaho nga nagsisigarilyo? Masisiring ba nga diri abrido an imo panhunahuna tungod kay iba an imo prinsipyo mahitungod ha pagsigarilyo? Tungod ba kay diri ka nagsisigarilyo ngan hiya nagsisigarilyo nagpapasabot nga ginmiminos mo hiya? Kon piriton ka han imo katrabaho nga bag-uhon an imo panhunahuna mahitungod ha pagsigarilyo, diri ba ito magpapakita nga diri abrido an iya panhunahuna?

Ginpili han mga Saksi ni Jehova nga magkinabuhi uyon ha balaud han Biblia ha moral. Diri nira gin-uuyonan an mga buhat nga igindidiri han Biblia. Pero diri nira gintatamay o ginmamaltrato an mga tawo nga an mga buhat iba han ira.

Kumusta man an mga tawo nga may tendensya nga magin bayot o tomboy? Igin-anak ba hira nga sugad hito? Kon oo, kawaray-pagpaid ba an pagsiring nga sayop nga buhaton nira an ira mga hingyap?

An Biblia waray ginsisiring mahitungod ha bayolohikal nga hinungdan han homoseksuwalidad, bisan kon ginkikilala hito nga may mga kinaiya nga makuri makuha. Kondi, nasiring ito nga an pipira nga buhat—upod na an homoseksuwal nga mga buhat—kinahanglan likyan basi mapalipay naton an Dios.—2 Corinto 10:4, 5.

May mga nasiring nga waray pagpaid an ginsisiring han Biblia. Kondi iginbasar nira ito ha opinyon nga natural gud la gumios uyon ha aton mga hingyap o nga an seksuwal nga mga hingyap importante hinduro salit diri ito sadang kontrolon—ngan diri ngani ito makukontrol. Pero gintatagan han Biblia hin dignidad an tawo pinaagi ha pagsiring nga mahimo nira atohan an ira mga hingyap. Diri pariho ha mga hayop, mahimo nira pilion nga diri gumios uyon ha ira hingyap.—Colosas 3:5. ^[5]

Tagda ini nga pagtanding: May mga eksperto nga nasiring nga an pipira nga pamatasan, sugad han pagin masayon masina, may-ada bayolohikal nga hinungdan. An Biblia waray mag-unabi mahitungod ha bayolohikal nga hinungdan  han kasina, kondi ginkikilala hito nga may mga tawo nga masayon ‘masina’ ngan “mapungtanon.” (Proberbios 22:24; 29:22) Bisan pa hito, an Biblia nasiring: “Bayai an kasina, ngan bayai an kangalas.”—Salmo 37:8; Efeso 4:31.

May mga tawo nga diri mauyon hito nga sagdon o masiring nga diri ito pagin makonsiderasyon para hadton may-ada hito nga tendensya. Ha pagkamatuod, bisan an mga eksperto nga natoo nga an kasina may bayolohikal nga hinungdan nangangalimbasog ha pagbulig ha mga tawo nga makontrol ito nga tendensya.

Sugad liwat hito an ginbubuhat han mga Saksi ni Jehova ha bisan ano nga buhat nga diri uyon ha mga suruklan han Biblia, upod na an seksuwal nga buhat han babaye ngan lalaki nga diri mag-asawa. Ha ngatanan nga sugad nga kahimtang, aplikado an sagdon han Biblia: “An tagsa ha iyo sadang mahibaro pagkontrol han iya lawas ha baraan ngan dungganon nga paagi, diri ha hakugnon nga mga hingyap ha pakighilawas.”—1 Tesalonica 4:4, 5.

Adton karuyag magin Kristiano han siyahan nga siglo tikang ha magkalain-lain nga kultura ngan estilo han pagkinabuhi, ngan an pipira ha ira naghimo hin dagku nga mga pagbag-o. Pananglitan, an Biblia nag-uunabi hadton “mga imoral, parasingba ha mga dios-dios, nag-aadulteryo, kalalakin-an nga nagpapakababaye,” katapos ito nagdugang: “Sugad hito an iba ha iyo hadto.”—1 Corinto 6:9-11.

Ha pagsiring nga “sugad hito an iba ha iyo hadto,” iginpapasabot ba han Biblia nga adton umundang na ha pakigbahin ha homoseksuwal nga mga buhat waray na hingyap nga kanan homoseksuwal? Diri man, tungod kay an Biblia dugang nga nagsasagdon: “Magpadayon kamo ha pagkinabuhi uyon ha espiritu ngan diri gud kamo magbubuhat uyon ha makasasala nga hingyap.”—Galacia 5:16.

Tagda nga an Biblia waray magsiring nga diri gud magkakaada an usa nga Kristiano hin sayop nga hingyap. Lugod, nasiring ito nga mahimo hiya magdesisyon nga diri magbuhat uyon hito nga hingyap. Nahibabaro an mga Kristiano ha pagkontrol han sugad nga mga hingyap, salit diri nira ito ginhihinunahuna basi diri ito mabuhat.—Santiago 1:14, 15. ^[6]

Hito nga paagi, iginpapakita han Biblia an kaibahan han tendensya ngan binuhatan. (Roma 7:16-25) An usa nga may tendensya nga magin homoseksuwal mahimo magkontrol kon ano an iya paghihinunahunaon, sugad la nga mahimo liwat niya makontrol an bisan ano nga sayop nga hingyap, upod na an tendensya nga masina, mag-adulteryo, ngan magin hakog.—1 Corinto 9:27; 2 Pedro 2:14, 15.

Bisan kon an balaud han Biblia ha moral an ginsusunod han mga Saksi ni Jehova, diri nira iginpipirit an ira gintotoohan ha iba. Diri man liwat nira ginkukontra an mga balaud nga nagpuprotektar han katungod han mga tawo nga an estilo han pagkinabuhi iba han ira. An mensahe nga iginsasangyaw han mga Saksi ni Jehova positibo ngan nalilipay hira nga igsumat ito ha ngatanan nga mamamati.—Buhat 20:20.